Wan Kwestin

Loa blong Moses i talem se ol man Isrel oli no mas letem pikinini blong olgeta i go mared wetem pikinini blong ol man blong narafala nesen. ?Be, from wanem ol man Isrel oli gat raet blong mared wetem ol woman blong ol narafala kantri we oli holem olgeta long taem blong faet?—Dutronome 7:1-3; 21:​10, 11.

Oli mekem olsem from wan spesel samting i bin hapen. I gat seven nesen long kantri blong Kenan we Jeova i talem long ol man Isrel se oli mas spolem gud ol taon blong olgeta, mo kilim olgeta man i ded. (Dutronome 20:​15-18) Long saed blong ol narafala nesen, olgeta ya nomo we maet ol man Isrel oli no kilim i ded, hemia ol gel we oli no save man yet. (Namba 31:​17, 18; Dutronome 20:14) Wan man Isrel i save mared wetem wan long ol gel ya, be hemia nomo se i gat sam rul we gel ya i mas folem fastaem.

Baebol i tokbaot ol rul ya i se: “Gel ya i mas katemaot hea blong hem, mo i mas katem selfinga blong hem, mo i mas jenisim klos blong hem. Bambae hem i mas stap wan manis long haos blong man ya, blong i save krae long papa mo mama blong hem, nao biaen, man ya i save tekem hem, blong i mared long hem.”​—Dutronome 21:​12, 13.

Sipos gel ya i wantem mared wetem wan man Isrel, hem i mas katemaot hea blong hem. Fasin ya blong katemaot hea i wan saen blong soem se man i sore no i harem nogud. (Aesea 3:24) Eksampol, taem Job i lusum olgeta pikinini blong hem oli ded mo olgeta samting blong hem tu, hem i katemaot hea blong hem blong soem se hem i harem nogud. (Job 1:20) Ol woman blong ol narafala nesen oli mas katem ol selfinga blong olgeta tu. Oli mas ‘katem ol selfinga blong olgeta i kam sotfala,’ samting ya i mekem we, taem oli pentem selfinga blong olgeta, be bambae han blong olgeta i no pulum ae blong ol man. (Dutronome 21:​12, Knox) Woman ya we oli holem long taem blong faet i mas jenisim klos blong hem tu. Hem i kastom blong ol hiten woman ya blong putum ol beswan klos blong olgeta taem oli luk we ol enemi klosap oli winim taon blong olgeta. Oli mekem olsem blong traem pulum ae blong ol enemi ya blong olgeta. Be taem ol woman ya oli go kalabus oli mas lego ol klos ya blong oli save krae.

Wan woman we bambae i kam waef blong wan man Isrel, i mas stap long haos blong man ya blong wan manis blong i save krae from ol famle blong hem we oli ded. Taem ol man Isrel oli spolem olgeta samting we i stap long ol taon we oli winim, oli finisim gud olgeta famle mo fren blong woman ya, we i no gat wan long olgeta i stap. Ol ami blong Isrel oli spolem gud ol pija blong ol giaman god blong woman ya, from samting ya, hem i no moa gat samting blong yusum blong mekem wosip blong hem. Mo tu, manis ya we woman ya i stap krae long ol famle blong hem, i olsem wan taem blong hem i kam klin, i sakemaot olgeta samting we oli joen wetem wosip blong hem bifo.

Be ol man Isrel oli no mekem fasin ya wetem evri woman blong nara kantri. Long saed ya, i gat wan rul we oli mas tingbaot: “Bambae yufala i no mas letem ol boe blong yufala oli go mared long ol gel blong olgeta, mo ol boe blong olgeta oli kam mared long ol gel blong yufala. “(Dutronome 7:3) ?From wanem Jeova i givim rul ya? Dutronome 7:4 i talem se: “Sipos yufala i mekem olsem, bambae olgeta oli tanem tingting blong ol pikinini ya blong yufala i gowe long Hae God, nao bambae oli go mekem wosip long ol narafala god.” Yes, rul ya i blong protektem ol man Isrel long giaman wosip. Be wan woman blong nara kantri we i laenap wetem ol tok blong Dutronome 21:​10-13 hem i no wan denja long man Isrel. Olgeta famle blong hem oli ded finis, mo ol pija blong ol god blong hem oli lus finis. Woman ya i no moa save joen bakegen wetem ol man blong ol giaman skul ya. Long taem olsem nomo, wan man Isrel i save mared long wan woman blong narafala kantri.