Hem i Talemaot Bilif Blong Hem Long Ol Narafala Studen

?YU YU wantem halpem ol studen we oli skul wetem yu blong oli kasem save ol bilif blong yu we oli stanap long Baebol? Magdalena i gat 18 yia blong hem, mo hem i stadi long wan haeskul long Polan. Plante taem hem i tokbaot bilif blong hem olsem wan Witnes blong Jeova long ol narafala studen blong klas blong hem. Taswe oltaem oli askem sam kwestin long hem olsem se, ‘?I minim wanem blong stap olsem wan Witnes blong Jeova?’ mo ‘?Yufala i no bilif long Jisas Kraes?’ ?Olsem wanem Magdalena i save halpem ol studen we oli skul wetem hem? Hem i prea long Jeova blong i lidim hem, mo hem i wok folem prea blong hem.​—Jemes 1:5.

Wan dei, Magdalena i askem long wan tija we i gat respek long ol bilif blong hem, sipos hem i save soem video kaset ya Jehovah’s Witnesses​—The Organization Behind The Name. * Tija ya i agri. Ale, Magdalena i talem long ol narafala studen se: “Mi stap mekem plan blong holem wan miting long klas blong mifala, mo mi singaot wan fren blong mi i kam joen long program blong miting ya blong 90 menet. Long program ya bambae mifala i soem wan video kaset mo wan storian long saed blong ol Witnes blong Jeova. ?Yu yu wantem kam long miting ya?” Evriwan i talem yes. Magdalena mo Wojciech, wan fultaem paenia we i gat plante ekspiriens, tufala i stat rerem program ya.

Plan blong tufala i olsem: program i sud stat wetem wan tok blong 20 menet we i stanap long smol buk ya Jehovah’s Witnesses​—Who Are They? What Do They Believe?* Mo biaen, toktok i gohed wetem ol kwestin mo ol ansa. Afta, oli soem video kaset long laebri blong skul ya. Biaen, oli givim wan presen long evri studen​—hemia wan bigfala envlop we insaed long hem i gat sam smosmol buk, wetem buk ya Ol Kwestin We Ol Yangfala Oli Askem​—Ol Ansa We Oli Wok Gud,* mo sam traket mo sam magasin.

Long dei we oli soem program, i gat 14 studen i stap, wetem tija blong olgeta, mo 4 narafala studen we oli stap long laebri long taem ya. Fastaem, Wojciech i eksplenem we plante man Polan we oli raetem ol naesfala tok mo ol buk, oli yusum nem blong God, Jeova, long ol stori we oli raetem. Mo tu, hem i tokbaot sam olfala buk we ol Katolik oli yusum blong tijim bilif blong olgeta, we nem blong God i stap long ol buk ya tu. Afta, hem i eksplenem wok blong ol Witnes blong Jeova long taem blong yumi, mo hem i soem sam smol buk we i gat pija blong ol defdefren branj ofis mo foto blong sam Haos Asembli tu.

Wan gudfala storian i gohed. Magdalena mo Wojciech tufala i yusum Baebol blong ansa long olgeta kwestin. Ol man we oli stap lesin oli sapraes long fasin ya blong tufala blong yusum Baebol oltaem, nao oli kam sua fulwan we ol Witnes blong Jeova oli tijim Baebol nomo, oli no tijim prapa tingting blong olgeta. ?Wanem nao sam long ol kwestin we ol studen oli askem, mo wanem ansa oli kasem?

Kwestin: Baebol i fulap long ol toktok we oli no klia tumas mo long ol pijatok, mo ol man oli save givim defdefren mining long olgeta. ?Taswe olsem wanem wan man i save laef folem samting we Baebol i talem?

Ansa: Samfala oli talem se ol man oli save yusum Baebol blong sapotem eni tingting we oli gat. Be traem tingbaot: ?Bambae yu mekem wanem sipos yu wantem save stret tingting blong wan man long saed blong wan buk we man ya i raetem? Ating i moa isi sipos yu go luk hem stret, blong yu save askem ol kwestin long hem. Plante man blong raetem  buk oli ded finis. Be Jeova God, Bigman ya we i wokem Baebol, hem i laef i stap. (Rom 1:20; 1 Korin 8:5, 6) Ol vas raonabaot long wan vas oli save givhan blong kasem save stret mining blong vas ya. Antap long samting ya, plante taem Baebol i tokbaot semfala samting long defdefren buk no japta blong hem, taswe yumi save skelem ol defren vas ya blong kasem stret mining blong olgeta. Olsemia, yumi letem God i lidim ol tingting blong yumi. I olsem we hem nomo i stap eksplenem ol toktok blong Baebol long yumi. Taem yumi mekem samting ya, yumi luksave stamba tingting blong God mo yumi save mekem laef blong yumi i laenap wetem tijing blong Baebol.

Kwestin: ?Wanem i defren bitwin ol Kristin mo ol Witnes blong Jeova?

Ansa: !I no gat samting i defren, mifala i Kristin ya! Be taem mifala i talem se mifala i Kristin, hemia i no jes wan toktok nomo. Ol Witnes blong Jeova, oli traehad blong mekem laef blong olgeta i laenap wetem ol bilif blong olgeta mo wetem ol samting we God i stap tijim long olgeta blong mekem i gud long olgeta. (Aesea 48:17, 18) Olgeta tijing blong olgeta oli stanap long Baebol, taswe oli save se oli faenem trutok.​—Matiu 7:13, 14, 21-23.

Kwestin: ?From wanem yufala i go luk ol man we yufala i no save olgeta, blong toktok long olgeta? ?Fasin ya i fosem ol man blong akseptem ol bilif blong yufala?

Ansa: ?Long tingting blong yu i rong sipos wan man i kam luk yu long rod, mo wetem naes fasin, hem i askem tingting blong yu long saed blong wan samting? (Jeremaea 5:1; Sefanaea 2:2, 3) (Biaen Wojciech mo Magdalena, tufala i mekem wan pleplei blong soem olsem wanem oli askem long ol man long rod, sipos oli ting se God i kea long ol man we oli safa from bigfala wota we i spolem sam ples long Polan i no longtaem i pas.) Taem ol man oli givim tingting blong olgeta, nao mifala i pulum olgeta i go long Baebol. Sipos wan man i talem se hem i no intres, mifala i talem tata long hem mo mifala i go nomo. (Matiu 10:11-14) ?Yufala i ting se fasin ya i fosem ol man blong lesin long mifala? ?No maet yufala i ting se ol man oli no mas toktok nating long ol narafala?

Kwestin: ?From wanem yufala i no selebretem lafet blong ol pablik holide?

Ansa: Mifala i selebretem wan lafet nomo we Baebol i talem long mifala se mifala i mas rimemba long hem, hemia Memoriol blong ded blong Jisas Kraes. (1 Korin 11:23-26) Long saed blong ol pablik holide, yu save mekem sam risej long ol ensaeklopedia mo sam narafala buk tu, blong faenemaot se ol lafet ya oli kamaot long wea. Sipos yu mekem ol risej ya, bambae yu kasem save from wanem mifala i no selebretem ol lafet ya.​—2 Korin 6:14-18.

Wojciech mo Magdalena, tufala i ansa long plante narafala kwestin we ol studen oli askem. Storian i gohed gogo oli tekem disisen blong wajem video wan narafala dei from we oli no gat naf taem.

?Ol studen oli ting wanem long storian ya? Magdalena i talem se: “Mi sapraes long sam studen we oltaem oli stap krangke nomo mo oli laf long ol narafala, be long taem ya oli askem ol gudfala kwestin. !Oli talem se oli no bilif long God, be taem mifala i storian oli soem we oli bilif long God!” Ol man we oli stap long miting ya oli glad blong tekem ol presen we tufala i givim. Long olgeta presen ya evriwan i gat 35 buk, 63 smol buk, mo 34 magasin.

!Program ya we Magdalena i mekem long skul i karem sam nambawan frut! Ol studen we oli skul wetem hem oli kasem moa save long saed blong ol Witnes blong Jeova, be tu program ya i pulum plante yangfala blong tingbaot mining blong laef. ?Olsem wanem long yu? ?Maet yu tu yu save mekem bes blong yu blong halpem ol studen we oli skul wetem yu blong oli kasem moa save long saed blong ol bilif blong yu?

[Futnot]

[Tok blong pija long pej 31]

Magdalena mo Wojciech tufala i stap rere blong storian wetem ol studen