Ripot Long Wok Blong Kingdom

Leta Blong Alejandra

FASIN blong raetem leta i wan gudfala rod blong givim witnes long narafala. Maet samtaem yumi no sua sipos gudfala frut bambae i kamaot no olsem wanem, be olgeta we oli gohed blong yusum rod ya blong givim witnes oli rili kasem bigfala blesing. Oli tingbaot waes advaes blong Baebol se: “Yu mas planem ol kakae long garen blong yu long moning, mo long sapa tu, from we yu no save weswan bambae oli gru gud. Maet olgeta evriwan oli karem gudfala kakae, no narawan nomo i karem, narawan i no gat.”—Prija 11:6.

Alejandra i wan yangfala Witnes we i wok long branj ofis blong ol Witnes blong Jeova long Meksiko blong klosap 10 yia. Hem i gat kansa mo hem i mas folem wan kaen tritmen we oli kolem chemotherapy. Sik ya i stap kam moa long hem, mekem se hem i kam slak mo i no save gohed blong mekem ol wok we hem i stap mekem evri dei. Be from we hem i no wantem se sik ya i stopem hem blong prij, ale, hem i plan blong raetem ol leta. Long ol leta blong hem, hem i tokbaot rod blong gat fri Baebol stadi mo hem i putum telefon namba blong mama blong hem tu. Afta, Alejandra i givim ol leta ya long mama blong hem mo i talem long mama blong hem blong karem ol leta ya i go wetem hem long wok blong prij mo putum long haos blong ol man we oli no stap.

Long taem ya, i gat wan yangfala gel blong Guatemala we i wok olsem haos gel long Cancún, hemia long Meksiko. Nem blong gel ya, Diojany. Taem hem i stap long ples blong wok, hem i mitim ol Witnes blong Jeova mo hem i glad taem oli storian long saed blong Baebol wetem hem. Smoltaem biaen, bos blong hem i plan blong go stap long bigfala taon blong Meksiko mo i wantem se Diojany tu i go wetem olgeta. Be Diojany i no wantem go from we hem i ting se bambae hem i no moa save luk ol Witnes blong Jeova.

Bos blong Diojany i talem long hem se: “Yu no wari, ol Witnes blong Jeova oli stap long evri ples. Bambae yumi lukaotem olgeta taem yumi kasem longwe.” Ale taem bos blong hem i talem olsem, Diojany i agri blong go wetem olgeta. Taem oli kasem bigfala taon blong Meksiko, bos blong Diojany i lukaotem ol Witnes blong Jeova. Long taon blong Meksiko i gat bitim 41,000 Witnes blong Jeova mo 730 kongregesen. Be bos blong Diojany i no gat janis blong faenem ol Witnes blong Jeova, yumi no save from wanem.

Samtaem i pas, tingting blong Diojany i foldaon from we hem i no save faenem ol Witnes blong Jeova blong storian moa long saed blong Baebol. Wan dei, waef blong bos blong hem i kam long hem mo i talem long hem se: “!Mi karem wan samting blong yu! God blong yu i harem ol prea blong yu.” Hem i givim wan leta long Diojany mo i talem se: “Ol Witnes oli livim leta ya se i blong yu.” Hemia leta blong Alejandra.

Diojany i telefon kwiktaem i go long mama mo sista blong Alejandra we nem blong hem Blanca mo hem i akseptem wan Baebol Stadi. Afta sam wik i pas, Diojany i mitim Alejandra mo tufala i glad tumas blong mitim tufala. Alejandra i leftemap tingting blong Diojany blong gohed blong stadi Baebol blong bambae hem i save gohed gud long saed blong spirit.

Sam manis afta, long Julae 2003, Alejandra i ded. Hem i givim wan gudfala eksampol long olgeta we oli gat semfala problem olsem hem, blong oli gat bilif mo strong tingting. Long taem we oli berem Alejandra, plante man oli luk Diojany mo toktok we hem i talem i rili tajem hat blong olgeta se: “Alejandra mo famle blong hem oli wan gudfala eksampol long mi. Mi tekem disisen blong mekem wok blong Jeova mo blong baptaes i no longtaem. !Mi mi wantem tumas blong luk Alejandra bakegen long Paradaes we bambae i kam!”

Yes, maet i luk olsem se leta i wan smol samting nomo. !Be frut we i kamaot biaen i nambawan tumas mo i save mekem i gud long man blong olwe!