Laef Stori

Wan Edukesen We i Stap Long Ful Laef Blong Mi

HAROLD GLUYAS I TALEM STORI YA

Mi rimemba gud yet wan samting we mi luk taem mi mi wan pikinini yet, samwe 70 yia bifo. Mi sidaon long kijin blong Mama, mo mi stap lukluk wan pija we i gat raeting ya long hem se “Ceylon Tea.” Long pija ya i gat sam woman we oli stap pikimap ol lif ti long ol grin plantesen blong Ceylon (we tede oli kolem kantri ya se Sri Lanka). Pija ya we i soem wan ples we i defren olgeta long drae ples blong mifala long Saot Ostrelia, i pulum tingting blong mi. !Mi tingting se kantri ya Ceylon i naes tumas mo i nambawan! Long taem ya, mi no save yet we bambae mi wok 45 yia olsem misinari long naesfala aelan ya.

MI MI bon long Eprel 1922, long wan wol we i defren olgeta long wol blong tede. Famle blong mi i wok long wan fam blong wit klosap long taon ya Kimba, we i stap longwe long bus long medel blong Ostrelia, long saot blong bigfala draeples. Laef long ples ya i no isi nating. Mifala i hadwok oltaem from we graon i drae tumas, ol bebet oli spolem wok blong mifala, mo ples i hot we i hot tumas. Mama blong mi i wok had blong lukaot long Papa mo long mifala sikis pikinini, we mifala i laef long wan smol haos kapa.

Nating se i olsem, mi laekem ples blong mifala from we mifala i fri mo i gat plante defdefren samting oli hapen long laef. Mi rimemba bigfala sapraes blong mi taem mi yang yet, mo mi luk ol bigfala hip blong ol buluk oli resis i kam mo oli purumpurumbut long ol smol tri long bus. Biaen, ol bigfala win oli karem fulap smok blong graon mo das i kavremap olgeta ples. Taswe, edukesen blong mi long laef i stat longtaem bifo we mi stat go long skul. Skul we mi go long hem i gat wan tija nomo, mo hem i stap 5 kilometa longwe long haos.

 Papa mama blong mi, tufala i bilif long God. Be, tufala i neva go long jos from we jos i stap long taon, mo i longwe tumas long fam blong mifala. Nating se i olsem, long stat blong ol yia 1930, Mama i stat lesin long ol Baebol riding blong Jaj Rutherford long radio, we i kamaot evri wik long wan radio stesen we i stap long taon ya Adelaide. Mi ting se Jaj Rutherford i wan prija blong Adelaide, mo mi no intres tumas long toktok blong hem. Be evri wik, Mama i stap wet long program ya long radio, mo hem i lesingud long ol tok blong Rutherford nating se voes blong hem i no kamaot klia long olfala radio blong mifala.

Wan aftenun we ples i hot mo i gat fulap das long win, wan olfala fowil trak i stop long fored blong haos blong mifala, mo tu man we oli werem ol naesfala klos oli kamaot long trak. Tufala man ya oli Witnes blong Jeova. Mama i lesingud long mesej blong tufala, mo hem i pem plante buk long tufala we hem i stat ridim wantaem nomo. Ol buk ya oli tajem hat blong hem gogo hem i askem Papa blong tekem hem i go luk ol man raonabaot long ples blong mifala, blong talemaot long olgeta ol samting we hem i stap lanem long ol buk ya.

Ol Gudfala Fren Oli Pulum Mi Blong Mekem Ol Gudfala Samting

Smoltaem biaen, laef i kam had tumas long draeples, mekem se mifala i mas muv i go long taon ya Adelaide, 500 kilometa longwe. Famle blong mifala i stat joen wetem kongregesen blong ol Witnes blong Jeova long Adelaide, mo mifala i gohedgud long saed blong spirit. Edukesen blong mi long skul i stop long taem ya tu. Afta we mi finisim yia seven long skul, mi no moa go long skul. Long taem ya mi gat 13 yia. Mi mi wan man we i no wari tumas long ol samting, mo fasin ya i save pulum mi mi gowe long ol wok long saed blong spirit. Be samting ya i no hapen, from we mi kasem help blong plante gudfala brata, sam paenia, no man blong prij fultaem, we oli lukaotgud long mi.

Taem ol yia oli pas, gudfala fasin blong ol brata ya we oli wok strong long wok blong prij i wekemap lav blong trutok we i stap dip insaed long mi. Mi glad tumas blong stap wetem olgeta mo mi tinghae long fasin blong olgeta blong wokhad. Taswe, long wan asembli we oli holem long Adelaide long 1940, taem oli leftemap tingting blong ol man blong oli joen long fultaem wok blong prij, mi sapraes long mi wan se mi putum nem blong mi long lis blong olgeta ya. Long taem ya mi no baptaes yet, mo mi no bin prij plante tu. Nating se i olsem, sam dei biaen, oli singaot mi blong joenem wan smol grup blong paenia long Warrnambool, wan taon we i stap samwe 500 kilometa longwe long Adelaide, long stet ya Victoria.

Mi stat sloslo nomo, be kwiktaem nomo mi stat lavem wok blong prij, mo tede mi glad blong talem se, long olgeta yia we i pas, lav ya i neva godaon. Blong talem stret, wok ya i karem bigfala jenis long laef blong mi mo stat long taem ya mi rili gohedgud long saed blong spirit. Mi lanem se i impoten tumas blong stap wetem ol man we oli  laekem ol samting long saed blong spirit. Gudfala fasin blong ol man ya i gat paoa long laef blong mi, nomata wanem edukesen we mi bin kasem bifo. Mo ol lesen we mi lanem wetem olgeta, i mekem i gud long mi long ful laef blong mi.

Ol Traem Oli Mekem Mi Mi Strong Moa

Mi bin paenia blong smol taem nomo, nao gavman i putum tabu long wok blong prij blong ol Witnes blong Jeova long Ostrelia. Mi no save se mi mas mekem wanem, taswe mi askem sam advaes long ol brata. Oli talem long mi se gavman i no talem se i tabu blong tokbaot Baebol wetem ol man, taswe, mi wetem sam narafala paenia, mifala i stat go long ol haos wanwan blong givim wan smol mesej we i kamaot long Baebol. Samting ya i givim paoa long mi blong fesem ol traem we oli mas kam biaen.

Fo manis biaen mi gat 18 yia blong mi mo oli singaot mi blong joen long ami. Samting ya i givim janis long mi blong talemaot bilif blong mi long fored blong plante ofisa blong ami mo wan jaj. Long taem ya, samwe 20 brata oli stap finis long kalabus long Adelaide from we oli no wantem joen long ami, mo mi mi joenem olgeta. Mifala i mas mekem ol strong wok, karem ol bigfala ston mo fiksimap ol rod. Wok ya i halpem mi blong wokem sam naesfala fasin olsem fasin blong stanap strong longtaem, mo strong tingting. Mifala i gat ol gudfala fasin mo mifala i stanap strong, mo samting ya i pulum plante gad long kalabus blong oli respektem mifala.

Taem mi aot long kalabus sam manis biaen, mi glad blong kakae sam gudfala kakae bakegen, mo wantaem nomo mi gobak long wok blong paenia. Be i no gat plante brata we oli paenia, taswe oli askem mi sipos mi agri blong go prij mi wan nomo long wan ples blong ol fama we i stap longwe long taon, long Saot blong Ostrelia. Mi agri, ale, mi tekem olting we mi nidim blong prij, wetem wan baskel, mo mi pas long wan sip we i go kasem Yorke Peninsula. Taem mi kasem ples ya, wan famle we i intres long trutok, i sanem mi mi go long wan geshaos, mo long ples ya wan gudfala woman i lukaotgud long mi olsem we mi mi boe blong hem stret. Long dei, mi ron long baskel blong mi long ol rod we oli fulap long das, mo mi prij long ol man long ol smol taon blong ples ya. Blong kasem ol ples we oli stap farawe moa, samtaem long naet mi mas slip long ol smol hotel no long ol geshaos. Olsemia, mi wokbaot plante handred kilometa long baskel blong mi, mo mi gat plante gudfala ekspiriens. Mi no wari nating se mi mas stap mi wan nomo long wok blong prij, mo taem mi luk olsem wanem Jeova i lukaot long mi, mi kam klosap moa long hem.

Mi Harem Se Mi No Naf Be Mi Gohed Yet

Long 1946, ol brata oli sanem wan leta long mi, blong askem mi blong mekem wok blong seket elda. I min se mi mas visitim plante kongregesen blong wan seket. Mi mas talem se, mi harem se wok ya i no isi nating. Wan dei, mi harem wan brata i stap tokbaot mi mo i talem se, “Harold i no gud tumas blong givim tok long platfom, be hem i nambawan long wok blong prij.” Toktok ya i leftemap tingting blong mi. Mi save finis se mi mi no gat gudhan blong givim ol tok mo blong ogenaesem wok, be mi harem se wok blong prij, samting ya nao i stamba wok blong ol Kristin.

Long 1947, mifala i glad tumas from we Brata Nathan Knorr mo Brata Milton Henschel, we tufala i wok long hedkwota blong ol Witnes blong Jeova long Brooklyn, tufala i kam long Ostrelia. Hemia fastaem we ol brata blong hedkwota oli kam long Ostrelia, afta we Brata Rutherford i bin kam long 1938. Mifala i holem wan bigfala asembli long Sydney taem tufala brata ya i kam visitim mifala. Olsem plante narafala yangfala paenia, mi mi intres long trening we oli givim long ol misinari  long niufala skul ya we i jes open, hemia Wajtaoa Baebol Skul blong Gilead, long South Lansing, New York, Yunaeted Stet. Plante long mifala we i stap long asembli ya i wantem save sipos mifala i mas gat wan haefala edukesen blong folem trening ya. Brata Knorr i eksplenem se, sipos wan man i save ridim wan atikol long Wajtaoa mo i save rimemba ol stamba poen blong hem, hemia i naf blong folem ol kos blong Gilead.

Mi ting se from we mi no skulgud bambae mi no naf blong joen long Gilead skul. Be sam manis biaen, mi sapraes taem oli singaot mi blong go tekem kos long Gilead. Olsem nao, mi kam wan studen blong klas ya, mo mi folem ol kos blong namba 16 klas blong Gilead we oli holem long yia 1950. Skul ya i gud we i gud tumas, mo i halpem mi blong trastem mi wan moa. Mo tu, hem i pruvum long mi se stadi long haeskul i no wan stamba samting long laef. Defren olgeta, mi lanem se fasin blong wok had mo fasin blong obei, ol samting ya nao oli impoten tumas. Ol tija blong mifala oli pulum mifala blong givim bes blong mifala. Mi folem advaes blong olgeta, nao mi luk we mi gohedgud mo mi naf blong folem ol kos blong Gilead.

Mi Aot Long Ostrelia Blong Muv i Go Long Ceylon

Afta we mifala i kasem setifiket blong mifala, oli sanem mi wetem tu narafala brata blong Ostrelia i go long Ceylon (we naoia oli kolem Sri Lanka). Mifala i kasem kaptel taon, hemia Colombo, long Septemba 1951. Ples i hot mo i wetwet, mo mifala i luk plante niufala samting, mifala i harem plante niufala noes, wetem ol defdefren smel tu. Taem mifala i kamdaon long sip, wan long ol misinari we i stap finis long kantri ya i welkamem mifala, mo hem i givim wan smol pepa long mi. Smol pepa ya i talem se nekis Sande bambae i gat wan pablik tok long open ples long taon. Mi sapraes blong luk nem blong mi i stap long pepa ya. !Mi nao mi mas givim tok ya! !Traem tingbaot sapraes blong mi! Mi harem se mi fraet lelebet. Be ol yia we mi bin paenia long Ostrelia oli tijim mi long wan samting, hemia se mi mas akseptem olgeta wok we mi kasem. Taswe, wetem help blong Jeova, mi givim tok ya. Mitrifala, wetem ol fofala singel brata we oli stap finis long haos blong misinari long Colombo long taem ya, mifala i stat lanem lanwis ya Sinhala we i no isi nating, mo mifala i stat prij. Plante taem mifala i go prij wanwan nomo, mo mifala i glad blong luk we ol manples oli soem respek mo oli glad blong welkamem mifala. Kwiktaem nomo, plante moa man oli kam long ol miting.

Taem i pas, mo mi stat tingbaot wan naesfala paenia sista we nem blong hem Sybil. Mi bin mitim hem taem mi tekem sip blong go long Gilead Skul. Sista ya i stap go long intenasnal asembli long New York. Biaen, hem i folem ol kos blong namba 21 klas blong Gilead, mo oli sanem hem i go long Hong Kong long 1953. Mi tekem disisen blong raetem leta i go long hem, mo mitufala i gohed blong raet long mitufala go kasem 1955, taem Sybil i joenem mi long Ceylon, mo mitufala i mared.

Faswan ples we mitufala i go prij long hem olsem hasban mo waef, hemia taon ya Jaffna, long not olgeta blong Sri Lanka. Long medel blong ol yia 1950, politik i stat seraotem ol man Sinhala mo ol man Tamil, mo samting ya i statem ol faet we oli kasem ful kantri long ol yia we oli kam biaen. !I gud tumas blong luk ol Sinhala mo ol Tamil Witnes we oli stap givgivhan long olgeta, samtaem blong plante manis, long wan taem we i had tumas! Ol traem ya oli mekem bilif blong ol brata i kam strong moa.

 Wok Blong Prij Mo Tij Long Sri Lanka

Mifala i mas gat longfala tingting blong savegud olsem wanem blong dil wetem ol man Hindu mo ol man Muslim. Be mifala i stat kasem save kalja blong tufala grup ya, mo mifala i stat laekem ol gudfala fasin blong olgeta. Ol waetman klosap oli neva tekem ol lokol bas wetem ol manples, taswe taem mifala i stap long bas, ol man oli stap lukluk mifala mo oli sapraes. Sybil i tekem disisen blong smael long olgeta. !Mifala i glad blong luk se fasin ya i pulum olgeta blong smael long mifala tu!

Wan dei, oli stopem mifala long wan ples we ami i blokem rod. Gad we i stap long ples ya i askem long mitufala se mitufala i blong wea mo mitufala i stap go wea. Biaen, hem i stat askem sam narafala kwestin long mitufala.

“?Woman ya hem i hu?”

Mi ansa se, “Hem i waef blong mi.”

“?Yutufala i mared hamas yia?”

“Eit yia.”

“?Yutufala i gat pikinini?”

“Nogat.”

“!Man! ?Yutufala i luk wan dokta finis?”

Fastaem, olkaen kwestin olsem oli mekem mitufala i sek, be biaen mitufala i luksave se hemia fasin blong ol manples blong soem se oli kea long narafala. Blong talem stret, hemia wan long ol fasin blong olgeta we i mekem se mifala i laekem olgeta tumas. Sipos wan man i stanap long wan open ples blong sam menet nomo, ale, wan man i mas kam luk hem, mo wetem kaen fasin, bambae hem i askem hem sipos i save halpem hem.

Ol Jenis Mo Tingtingbak

Long ol yia we oli pas, mitufala i bin glad blong mekem plante narafala wok antap long wok blong misinari long Sri Lanka. Oli putum mi long wok blong seket elda mo distrik elda, mo olsem memba blong Branj Komiti. Long 1996, mi gat klosap 74 yia blong mi. Mi bin wok olsem misinari long Sri Lanka blong bitim 45 yia. Long faswan miting blong mi long Colombo, i gat samwe 20 man i stap. !Naoia, namba ya i go antap i bitim 3,500 man! Mi wetem Sybil, mitufala i luk plante long ol dia brata sista ya olsem se oli pikinini no smol bubu blong mitufala long saed blong spirit. Be i gat plante wok blong mekem yet long ful kantri. Mo blong mekem wok ya, i nidim paoa mo gudhan blong ol brata sista we oli yangfala moa long mitufala. Mitufala i savegud samting ya, taswe taem Hed Kampani i askem mitufala blong gobak long Ostrelia, mitufala i agri blong mekem olsem. Olsem nao, ol yangfala misinari we oli gat gudhan oli save tekem ples blong mifala long Sri Lanka.

Naoia mi gat 82 yia blong mi, mo mi wetem Sybil, mitufala i glad from we helt blong mitufala i gud yet, mekem se mitufala i stap wok olsem spesel paenia long ples blong mi bifo, long Adelaide. Wok blong prij i mekem tingting blong mitufala i strong, mo mitufala i rere blong jenisim ol fasin blong mitufala sipos i nidim. Mo tu, wok ya i halpem mitufala blong lanem olsem wanem blong laef long Ostrelia bakegen.

Jeova i lukaotgud long ol nid blong mitufala long saed blong bodi, mo ol brata sista long kongregesen blong mitufala oli lavem mo oli sapotem gud mitufala. I no longtaem i pas oli givim wan niufala wok long mi. Mi mas mekem wok blong sekretari long kongregesen blong mifala. Mi wantem tumas blong mekem wok blong Jeova oltaem, mo mi luk se trening blong mi i stap gohed yet. Taem mi lukluk bak long ol yia we oli pas finis, mi sapraes oltaem blong luk olsem wanem wan smol boe blong bus we i no wari long eni samting, i bin kasem wan nambawan edukesen. Edukesen ya bambae i stap long ful laef blong mi.

[Tok blong pija long pej 26]

Long dei we mitufala i mared, 1955

[Tok blong pija long pej 27]

Mi stap prij wetem Rajan Kadirgamar, wan brata blong Sri Lanka, long 1957

[Tok blong pija long pej 28]

Wetem Sybil tede