Wan Samting We i Moa Long Wan Pleplei Nomo

OL PIKININI oli laekem pleplei. Be buk ya The Developing Child i talem se: “Hemia i no wan samting blong nating nomo no wan samting we i no gat mining long hem. Hem i wan samting we i mekem tingting blong pikinini i gru.” Taem ol pikinini oli stap pleplei oli lanem blong yusum tingting blong olgeta, kasem save long ples we oli stap long hem, mo olsem wanem blong toktok mo wok wetem narafala.

Stat long 4 mo 5 yia i go antap, ol pikinini bambae oli stat mekem sam pleplei we i folem fasin we oli luk long ol bigman. Wantaem, Jisas i tokbaot ol pikinini we oli stap pleplei. Samfala oli wantem blong pleplei olsem we i gat wan “mared” sam narafala oli wantem blong pleplei olsem we i gat wan “ded.” Mo olsem ol pikinini oli mekem oltaem, oli stap rao bitwin olgeta from samfala oli no wantem joen long pleplei. (Matiu 11:16, 17) Olkaen pleplei olsem oli save putum wan mak we i gat mining long tingting blong wan pikinini we i stap gruap.

Ol pija ya oli soem sam pikinini we oli stap pleplei, oli mekem olsem we wan i stap stadi Baebol wetem narawan. Hemia i no wan trufala Baebol stadi, be tingting blong serem mesej blong Baebol i klia nomo long tingting blong ol pikinini ya. Hemia wan nambawan lesen from we Jisas i talem long ol man blong hem se oli mas go pulum ol man oli kam disaepol mo oli mas tijim ol man blong oli folem olgeta tok we hem i tijim olgeta long hem.—Matiu 28:19, 20.

Ol papa mama we ol pikinini blong olgeta oli laekem blong pleplei olsem we oli stap mekem Baebol stadi, givim wan tok, no mekem wok blong prij long ol haos wanwan, oli save glad bigwan. Yes ol pikinini oli folem fasin we ol bigman raonabaot long olgeta oli stap mekem. Taswe, taem ol pikinini oli mekem ol pleplei we oli laenap wetem samting we Baebol i tokbaot, oli soemaot se oli gruap “wetem wan edukesen mo advaes we Masta i glad long hem.”—Efesas 6:4, Charles B. Williams.

Jeova i wantem se ol pikinini tu oli joen long wosip. Hem i talem long Moses blong singaot “ol pikinini” oli kam, taem oli ridimaot Loa. (Dutronome 31:12) Sipos ol pikinini oli harem se olgeta tu oli stap insaed long wosip, bambae oli soemaot samting ya long ol pleplei blong olgeta. Mo wan pikinini we i stap pleplei olsem we hem i stap mekem wok blong God, hem i stap putum wan mak blong kam wan man olsem ya nao, blong mekem wok blong God.