?Yu Stap Wet Long Jeova Olsem Wanem?

LONG wol tede, plante man oli no gat longfala tingting, oli no wantem wet long wan man no long wan samting. Nating se i olsem, Baebol i pulum ol man blong God blong oli wokem fasin ya blong “stap wet.” Profet Maeka i gat wan fasin we i defren olgeta long fasin blong ol man raonabaot long hem. Hem i se: “Bambae mi stap wet long [God], from we hem nao bambae i kam sevem mi.”​—Maeka 7:7; Ol Krae 3:26.

?I minim wanem blong stap wet long God? ?Olsem wanem wan Kristin i save wet long God? ?I gat rod we i stret mo rod we i no stret blong wet long God? Stori blong profet Jona we i laef long ol yia 800 B.K.T. * i tijim yumi long saed ya.

Hem i Wet From Wan Nogud Risen

Jeova God i sanem Jona i go prij long ol man Nineve, kapital blong nesen ya Asiria. Ol man oli savegud Nineve olsem taon we ‘man i kilim man i ded,’ from we ol man Nineve oli raf tumas mo oli spolem nogud ol narafala man. Ol man blong raetem histri mo ol man blong digim graon blong faenem ol samting blong bifo oli sapotem tingting ya. (Neham 3:1) Fastaem, Jona i traem ronwe long wok ya, be Jeova i meksua se profet Jona ya i go long Nineve.​—Jona 1:3–3:2.

“Nao hem [Jona] i go insaed long taon ya, i wokbaot wan ful dei, mo biaen, hem i talemaot tok ya long olgeta. Hem i talem se, ‘Olgeta. !Yufala i lukaot! !Foti dei nomo i stap, nao God bambae i spolemgud bigfala taon ya blong yufala!’ ” (Jona 3:4) Ol traehad blong Jona oli karem gudfala frut: “Nao ol man Nineve oli bilif long tok ya blong God. Mo olgeta man, i stat long ol haeman i go kasem ol olbaot man, oli tanem tingting blong olgeta from ol rabis fasin blong olgeta, nao oli livim kakae, mo oli putum ol rabis klos blong soemaot we oli harem nogud tumas from sin blong olgeta.” (Jona 3:5) Jeova “i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” Taswe hem i jenisim tingting blong hem, nao i no moa spolem taon ya Nineve.​—2 Pita 3:9.

?Jona i mekem wanem? Baebol i talem se: “Be Profet Jona i no glad nating from samting ya, mo hem i kros tumas.” (Jona 4:1) ?From wanem Jona i kros? From we Nineve i no lus olsem we Jona i bin talemaot, maet hem i harem se samting ya i putum sem long hem olsem wan profet. Jona i wari moa long nem blong hem, be hem i no tingbaot fasin sore blong Jeova mo laef blong ol man Nineve.

Jona i no bitim mak, hem i no lego wok blong hem olsem wan profet. Be nating se i olsem, hem i “wet blong luk se wanem samting bambae i kasem Nineve.” Jona i kam kros, mo from samting ya hem i no moa prij blong smol taem mo i wet blong luk wanem bambae i hapen. Taem hem i luk we ol samting oli no hapen olsem we hem i wantem, hem i bildim wan wansaed haos blong haed long san, hem i sidaon, i mekem fes blong hem i strong, mo i wet blong luk wanem bambae i hapen. Be Jeova i no glad long fasin blong Jona, taswe, wetem lav, hem i stretem tingting blong profet blong hem.​—Jona 4:5, 9-11.

 ?From Wanem Jeova i Gat Longfala Tingting?

Ol man Nineve oli tanem tingting blong olgeta mo Jeova i no spolem olgeta, be biaen, oli gobak bakegen long rabis fasin blong olgeta. Nao Jeova i yusum tufala profet ya Neham mo Sefanaea blong talem se bambae taon ya i lus olgeta. Jeova i tokbaot ol man Nineve olsem ol “man blong kilim man i ded,” mo hem i talem se bambae hem i spolem kantri ya Asiria mo bambae i mekem bigfala taon blong hem Nineve i kam nogud olgeta, we i no moa gat man i stap long hem. (Neham 3:1; Sefanaea 2:13) Long 632 B.K.T., Nineve i lus olgeta mo neva hem i stanap bakegen.

Long sem fasin, ol man blong wol tede oli gat fol from we oli mekem plante blad i ron i bitim ol man Nineve bifo. From samting ya mo from sam narafala risen tu, Jeova i talem se bambae wol ya i lus long wan “bigfala trabol” we neva man i luk olsem bifo, mo neva bambae i luk bakegen samtaem.​—Matiu 24:21, 22.

Nating se i olsem, Jeova i letem taem i pas bifo we hem i spolem wol ya. Olsemia, ol man we hat blong olgeta i stret oli gat janis blong tanem tingting blong olgeta mo kasem laef, olsem ol man Nineve bifo. Aposol Pita i tokbaot longfala tingting blong God i se: “Sam man oli ting se Masta blong yumi i stap tektaem tumas, i no mekem promes blong hem i kamtru kwik, be i no olsem. Hem i stap mekem tingting blong hem i longfala blong wet long yufala, from we hem i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.”​—2 Pita 3:9, 10, 13.

Wet Long Jeova Long Fasin We i Stret

Pita i gohed i talem se: “Nao from we olgeta samting ya bambae oli lus olsem, yufala i mas luklukgud long laef blong yufala. Taem yufala i stap wet long Dei ya blong God blong i kamtru, yufala i mas tabu, yufala i man blong God, mo yufala i mas mekem ol fasin we hem i wantem. Mo yufala i mas gohed blong wok blong mekem Dei ya i kamtru kwik.” (2 Pita 3:11, 12) Makemgud se taem yumi stap wet long dei blong Jeova, yumi mas ‘tabu, yumi mas man blong God, mo yumi mas mekem ol fasin we hem i wantem.’ I min se yumi mas wok, yumi no mas les.

Yes, blong wet long God long fasin we i stret, yumi mas trastem Jeova fulwan se bambae dei blong Hem i kamtru long stret taem blong hem. Bilif ya bambae i karem gudfala frut, bambae i mekem se yumi tabu mo yumi stap bisi long wok blong God. Mo wan long ol stamba wok ya, hemia wok blong talemaot gud nius blong Kingdom blong God. Jisas i givim wan gudfala eksampol long saed blong wok ya, mo hem i talem long ol tabu man we oli stap folem hem se: “Oltaem, yufala i mas rere blong wok, olsem man we i putum klos blong hem, i taetem strap blong hem, mo i laetem laet blong hem finis, i stap rere. Yufala i mas olsem ol man blong wok we oli stap wet long masta blong olgeta we i jes mared, blong i aot long kakae blong mared, i kamhom. Taem hem i kam kilkilim doa, wantaem nomo oli save openem doa long hem. Nao sipos masta i kam, mo i luk we ol man blong hem oli no slip, oli stap rere long hem olsem, ol man ya oli save harem gud.”​—Luk 12:35-37.

Long faswan handred yia, ol slef oli “taetem strap” blong olgeta taem oli pulum en blong klos blong olgeta i kam antap mo oli fasem olgeta wetem strap, nao ol longfala klos ya oli no blokem olgeta taem oli mekem hadwok. Long sem fasin, wan Kristin i mas wok, i mas yusum ful paoa blong hem blong mekem ol gudfala wok. Hem i mas faet agensem eni fasin we i save mekem hem i “stap les” long saed blong spirit, olsem fasin ya blong pleplei bitim mak, no fasin  blong ronem ol sas samting. Defren olgeta, hem i mas “wok strong long ol wok ya blong Masta” taem hem i stap wet long bigfala dei blong Jeova we bambae i mekem man i fraet.​—Rom 12:11; 1 Korin 15:58.

Stap Bisi Taem Yumi Wet Long God

Ol Witnes blong Jeova oli stap bisi taem oli stap wet long dei blong Jeova. Long yia 2003, oli bin spenem bitim 3,383,000 aoa evri dei long wok blong prij. !Traem tingbaot, wan man i mas prij evri dei mo evri naet blong 386 yia blong mekem wok ya we ol Witnes oli mekem long wan dei nomo!

Nating se i olsem, i gud yumi wanwan i traem ansa long kwestin ya se, ‘?Mi mi stap wet long God olsem wanem?’ Jisas i givim wan parabol we i tokbaot hadwok we ol tabu Kristin oli mas mekem. Hem i tokbaot trifala slef i se: “Long wan, [masta] i givim faef milian vatu, mo long narawan i givim tu milian vatu, mo long narawan bakegen i givim wan milian vatu. Nao biaen, hem i aot, i go. Nao man ya we i kasem faef milian vatu, hem i go wantaem nomo, i mekem plante bisnes long mane ya, gogo i winim narafala faef milian vatu bakegen. Mo long sem fasin, man ya we i kasem tu milian vatu, hem i winim narafala tu milian vatu bakegen. Be man ya we i kasem wan milian vatu, hem i girap i go digim hol, i berem mane ya blong masta blong hem. Nao plante yia i pas, masta blong ol man ya i kambak bakegen, mo hem i wantem jekemap mane ya we i bin givim long olgeta.”​—Matiu 25:15-19.

Ale, trifala slef ya i wet long masta blong olgeta blong kambak. Taem masta i kamtru, hem i talem long tu slef we tufala i stap bisi taem tufala i stap wet long hem se: “!Ei, yu yu mekem wan gudfala wok!” Be masta i talem defren tok long slef ya we i stap les nomo taem i bin wet i se: “Rabis man ya, yufala i go sakem hem i go afsaed, long ples ya we i tudak.”​—Matiu 25:20-30.

Parabol ya i blong ol tabu man, be yumi evriwan i save lanem wan lesen from, nomata se yumi gat hop blong laef long heven no long wol. Masta Jisas Kraes i wantem se yumi evriwan i mas wokhad long wok blong hem, taem yumi stap wet long bigfala Dei blong Jeova. Hem i save ol samting long laef blong yumi wanwan mo hem i ‘makem save blong yumi,’ nao hem i tinghae long wok we yumi evriwan i mekem folem samting we yumi naf blong mekem. !Taem ol yia blong wet long dei blong Jeova oli pas finis nao dei ya i kamtru, bambae yumi glad tumas blong harem Masta i talem long yumi se “!Ei, yu yu mekem wan gudfala wok!”

Longfala Tingting Blong God Bambae i Sevem Laef Blong Plante Man

Maet yumi ting se dei blong Jeova i sud kam longtaem finis. Be i gat wan gudfala risen from wanem  Jeova i no mekem dei blong hem i kamtru yet. Aposol Pita i raetem se: “Masta blong yumi i gat longfala tingting blong wet long yufala. Mo yufala i mas luk fasin ya blong hem olsem janis blong yufala blong God i sevem yufala, nao yufala i no kasem panis.” (2 Pita 3:15) Sipos yumi gat stret save long saed blong stamba tingting blong God, mo yumi gat tingting daon blong luksave se yumi no impoten tumas be plan blong God i impoten moa, samting ya bambae i givhan long yumi blong gat longfala tingting blong wet go kasem taem we Jeova i ting se i stret blong finisim wol ya.

Jemes i yusum wan pijatok blong pulum ol Kristin blong gat longfala tingting. Hem i talem se: “Yufala i traem tingbaot fasin blong wokem garen. Yufala i save mekem tingting blong yufala i longfala blong wet, gogo garen blong yufala i karem kakae. Yufala i save wet long san, blong yufala i go bonem garen, mo biaen, yufala i planem. Mo yufala i save wet longtaem bakegen blong go tekem kakae long hem. Nao long sem fasin, yufala i mas mekem tingting blong yufala i longfala, mo yufala i mas mekem tingting blong yufala i strong tu, from we dei ya blong Masta blong yumi bambae i kamtru i no longtaem.”​—Jemes 5:7, 8.

Jeova God i no wantem se yumi kam taed tumas no yumi lego wok blong hem taem yumi stap wet. Hem i givim wan wok long yumi, mo hem i glad sipos yumi yusum taem we i stap yet blong joen fulwan long wok ya. Hem i wantem we yumi stap olsem ol man ya we aposol Pol i tokbaot olgeta long leta we hem i raetem long ol man Hibrus se: “Mifala i wantem tumas we tingting blong yufala bambae i stap strong oltaem, nao bambae yufala i save kasem ol samting ya we yufala i putum tingting blong yufala i stap strong long hem. Mifala i no wantem we bambae yufala i kam slak. Mifala i wantem we yufala bambae i folem fasin blong olgeta ya we oli bilif strong, mo we tingting blong olgeta i longfala, nao oli save kasem ol samting we God i promes blong givim long olgeta.”​—Hibrus 6:11, 12.

Taswe yumi no mas kam slak. Defren olgeta, yumi mas letem fasin fren blong yumi wetem Jeova God, mo bilif blong yumi long ransom sakrefaes blong Jisas, wetem nambawan hop blong laef long niufala wol, i givim paoa long yumi. Sem mak olsem ‘ol gudfala man we oli lukaot gud long wok’ long parabol blong Jisas, yumi mas stap bisi oltaem long wok blong presem God, nao Jisas i save talem ol gudfala toktok long yumi mo givim blesing long yumi. Yumi mas mekem olsem man blong raetem Sam we i talem se: “Oltaem nomo bambae mi mi stap wet long yu mo mi stap presem yu.”​—Ol Sam 71:14, NW.

[Futnot]

[Tok blong pija long pej 21]

Jona i harem nogud, nao hem i stap wet blong luk wanem bambae i hapen long Nineve

[Tok blong pija long pej 22]

Yumi mas soem we yumi onagud long Jeova taem yumi stap wet long dei blong Hem