‘Yumi Mas Lavlavem Yumi’

“Yufala i mas lavlavem yufala olsem we yufala i wan brata nomo.”​—ROM 12:10.

1, 2. ?Fasin fren we wan misinari long taem blong yumi mo aposol Pol bifo i gat wetem ol Kristin brata, i olsem wanem?

 BLONG 43 yia, Don i mekem wok blong misinari long Esia. Ol man we hem i bin tijim olgeta oli tingbaot hem olsem wan man we i rili lavem ol narafala. Taem klosap hem i ded from wan bigfala sik we i kasem hem, sam long ol studen blong hem oli mekem wan longfala trip blong plante taosen kilometa blong go luk hem. Oli kam klosap long bed blong hem, mo oli talem long lanwis blong Korea se, “!Kamsahamnida, kamsahamnida!” we i min se “!Tangkiu, tangkiu!” Dip lav we Don i bin soemaot i tajem hat blong olgeta bigwan.

² Plante narafala man tu oli bin soem fasin olsem Don. Long faswan handred yia, aposol Pol i soemaot bigfala filing long olgeta we hem i tijim olgeta. Hem i rere blong lego plante samting blong givhan long olgeta. Pol i wan man we i gat strong tingting, be hem i kaen tu mo i kea long ol narafala, “olsem wan mama we i stap lukaot long ol pikinini blong hem.” Hem i raetem leta i go long kongregesen blong Tesalonaeka, i se: “Mifala i no tingbaot blong talemaot gud nius ya nomo long yufala. Mifala i rere tu blong lego laef blong mifala from we mifala i lavem yufala, mo mifala i wantem tumas blong givhan long yufala.” (1 Tesalonaeka 2:​7, 8) Sam taem i pas nao Pol i talemaot long ol Kristin brata long Efesas se bambae oli no moa luk hem bakegen. Nao “olgeta oli stap krae tumas, oli stap holem Pol, oli kis long hem blong talem tata long hem.” (Ol Wok 20:25, 37) I klia se Pol i no jes frengud wetem ol Kristin brata ya from we oli gat sem bilif olsem hem, nogat. Hem i rili lavem olgeta.

Ol Defren Haf Blong Lav

3. ?Wanem ol defren fasin we Baebol i joenem wetem lav?

³ Long Baebol, kaen fasin, dip filing, mo sore, trifala i joen blong mekemap nambawan Kristin fasin ya lav. (1 Tesalonaeka 2:8; 2 Pita 1:7) Olsem naesfala ston ya daemon we ol wanwan haf blong hem oli joen tugeta blong mekem wan nambawan ston, trifala fasin ya oli joen tugeta blong mekem nambawan  fasin ya lav i kamaot. Trifala fasin ya oli pulum ol Kristin blong oli kam kloklosap, mo blong oli kam klosap long Papa blong olgeta long heven tu. Taswe aposol Pol i talem long ol Kristin brata blong hem se: “Yufala i mas lavem ol man, we yufala i no giaman. . . . Yufala i mas lavlavem yufala olsem we yufala i wan brata nomo.”​—Rom 12:​9, 10.

4. ?Wanem mining blong Grik tok we Baebol long Bislama i tanem i kam ‘lav’?

⁴ Taem Pol i tokbaot ‘lav’ long ples ya, hem i yusum tu Grik tok. Faswan i minim fasin fren mo sekenwan i minim filing we i kamaot long hat. Wan man we i stadi dip long Baebol i eksplenem se, “yumi luksave [ol trufala Kristin] from bigfala ona we wanwan long olgeta oli soem long ol narawan. Hemia semkaen ona we ol memba blong wan famle oli soem taem oli lavlavem olgeta, oli wokgud tugeta, mo oli givgivhan long olgeta.” ?Hemia nao filing we yu yu gat long ol Kristin brata sista blong yu? Filing ya we yumi lavlavem yumi​—olsem we yumi wan famle nomo—​i mas stap insaed long Kristin kongregesen. (Galesia 6:​10) Taswe, The New Testament in Modern English we J. B. Phillips i wokem, i tanem Rom 12:10 olsem: “Yumi mas rili filim lav we yumi gat long yumi, olsem lav we i stap bitwin long ol stret brata nomo.” Mo The Jerusalem Bible i tanem vas ya olsem: “Lav we yumi gat long yumi i mas sem mak olsem lav we ol stret brata oli gat long olgeta.” Yes, ol Kristin oli lavlavem olgeta, be i no from we oli harem nomo se hemia wan wok we ol Kristin oli mas mekem no from we hemia i stret samting blong mekem, nogat. Yumi mas lavlavem yumi “long fasin we i stret gud” no yumi mas ‘lavlavem yumi long olgeta tingting blong yumi, long fasin we i no save jenis.’​—1 Pita 1:​22.

“God i Tijim Yufala Finis”

5, 6. (a) ?Olsem wanem Jeova i yusum ol intenasnal asembli blong tijim ol man blong hem blong soemaot lav? (b) ?Olsem wanem lav blong ol brata i save kam strong bitim mak taem oli wok tugeta longtaem?

⁵ Nating se long wol ya ‘bighaf blong ol man oli no moa gat lav,’ be Jeova i stap tijim ol man blong hem blong ‘oli lavlavem olgeta.’ (Matiu 24:12; 1 Tesalonaeka 4:9) Yumi luk klia olsem wanem hem i stap tijim yumi, taem yumi go long ol intenasnal asembli blong ol Witnes blong Jeova. Long ol asembli ya, ol lokol brata oli mitim ol brata sista we oli kam long ol kantri farawe, mo oli tekem olgeta oli go stap long haos blong olgeta. Long wan asembli i no longtaem i pas, plante brata sista oli kam long wan kantri we ol man oli gat fasin blong holemtaet filing blong olgeta, oli no stap soemaot. Wan Kristin we i givhan blong faenem ol rum blong ol brata ya i talem se: “Taem ol brata sista ya oli jes kamtru, oli fraet mo oli sem. Be sikis dei biaen, taem oli talem tata, olgeta ya wetem ol lokol brata mo sista tugeta oli stap holholem olgeta mo oli krakrae tumas. Olgeta evriwan oli bin haremsave trufala lav blong ol Kristin we oli no save fogetem.” Taem yumi glad blong tekem ol brata oli kam long haos blong yumi, nomata wanem kantri ol brata ya oli kamaot long hem, yumi kasem bigfala blesing mo olgeta tu oli glad we i glad.​—Rom 12:13.

⁶ Ol stori blong ol asembli ya oli mekem yumi haremgud tumas. Be ol Kristin oli save gat wan fasin fren we i klosap moa yet, taem oli mekem wok blong Jeova tugeta blong longtaem. Taem yumi savegud ol brata blong yumi, yumi luksave ol gudfala fasin blong olgeta nao yumi lavem olgeta from​—oli no giaman, yumi save trastem olgeta, oli stap tru long yumi, oli kaen, oli gat gladhat blong givim presen, oli tingbaot yumi, oli gat sore, mo oli putum yumi  fastaem long olgeta. (Ol Sam 15:​3-5; Ol Proveb 19:22) Mark we i mekem wok blong misinari long Is Afrika, i talem se: “Taem mi wok wetem ol Kristin brata blong mi, lav we mifala i gat long mifala i kam strong bitim mak, mekem se i no gat samting i save brekem lav ya samtaem.”

7. ?Yumi mas mekem wanem blong gat Kristin lav insaed long kongregesen?

⁷ Blong gat lav olsem insaed long kongregesen mo blong holemtaet lav ya, ol wanwan memba blong hem oli mas kam kloklosap. Taem yumi kam long olgeta Kristin miting, yumi kam klosap moa long ol Kristin brata sista blong yumi. Mo tu, taem yumi stap long ol miting, mo yumi givim ansa, mo yumi storian gud wetem ol brata sista bifo mo afta long miting, yumi lefleftemap tingting blong yumi mo yumi pulum yumi blong “lavem ol man, mo blong mekem ol gudfala fasin.” (Hibrus 10:24, 25) Wan elda long Yunaeted Stet i talem se: “Wan gudfala memori we mi mi gat blong taem ya we mi mi pikinini, hemia se oltaem famle blong mifala i laswan blong aot long Haos Kingdom. Mifala i haremgud blong storian wetem ol brata mo sista mo blong frengud wetem olgeta.”

“Openem Hat” Blong Yu Moa

8. (a) ?Pol i minim wanem taem i talem long ol Kristin long Korin se oli mas traem “openem hat” blong olgeta moa? (b) ?Yumi save mekem wanem blong mekem filing i gru insaed long kongregesen?

⁸ Blong soemaot lav fulwan, maet yumi mas “openem hat” blong yumi moa. Aposol Pol i raetem leta i go long kongregesen blong Korin, i se: “Mifala i talemaot olgeta tingting blong mifala long yufala. Mifala i no satem tingting blong mifala long yufala.” Pol i talem long olgeta blong ‘traem openem hat blong olgeta moa’ (NW ). (2 Korin 6:​11-13) ?Olsem wanem? ?Yu tu yu rere blong “openem hat” blong yu moa? Yu no nid blong wet se ol narafala oli mekem samting ya long yu fastaem. Long leta we Pol i raetem i go long ol Kristin long Rom, hem i joenem lav wetem wan narafala fasin, i se: “Oltaem yufala i mas rere blong ona long yufala.” (Rom 12:10) Blong ona long ol narafala yu no wet long olgeta blong oli kam talem halo long yu long miting, be yu yu go fastaem blong talem halo long olgeta. Mo tu, yu save singaot olgeta oli joen wetem yu long wok blong prij, no blong oli rerem wan miting wetem yu. Taem yumi ona long ol narafala, filing we yumi gat long olgeta i save gru isi nomo.

9. ?Samfala oli mekem wanem blong kam klosap moa long ol Kristin brata sista blong olgeta? (Talem sam samting we yufala i mekem long ples blong yufala.)

⁹ I gat wan narafala rod tu blong ol famle mo ol wanwan man long kongregesen oli save “openem hat” blong olgeta moa. Oli save visitim ol narafala long kongregesen, serem smol kakae, mo joen wanples blong mekem wan wok no wan narafala samting we oli haremgud long hem. (Luk 10:42; 14:12-​14) Wan brata, nem blong hem Hakop, i gat wan gudfala tingting. Wanwan taem, hem i singaot samfala long kongregesen blong oli go piknik. Hem i talem se: “Long smol grup ya, maet i gat sam yangfala, sam olfala, wetem sam mama we oli no gat man blong olgeta. Olgeta evriwan oli gobak long haos we oli haremgud nomo, mo oli harem se oli kam kloklosap moa.” Yumi ol Kristin, yumi mas traehad blong kam ol trufala fren, i no ol man blong wosip wanples nomo.​—3 Jon 14.

10. ?Yumi save mekem wanem taem yumi faenem se i had blong fren wetem wan narafala?

¹⁰ Be i tru se, sam samtaem ol mastik mo slak fasin blong yumi i save mekem i had blong yumi frengud mo lavlavem yumi. ?Ale, yumi save mekem wanem? Faswan samting se, yumi mas prea long Jeova blong i givhan long yumi blong frengud wetem ol Kristin brata blong yumi. Hem i wantem we ol man blong hem oli frengud tugeta, mo bambae hem i ansa long wan prea olsem we i kamaot long hat blong yumi. (1 Jon 4:​20, 21; 5:​14, 15) Mo tu, yumi mas wok folem ol prea blong yumi. Ric we hem i wan seket elda long Is Afrika, i tokbaot wan brata we i gat strong fasin mo i had blong fren wetem hem. Ric i eksplenem se: “Mi mi mekemap tingting blong mi se bambae mi no moa stap longwe long hem be bambae mi traem save hem moa. Sloslo mi faenemaot se taem hem i stap gruap papa blong hem i mekem i strong bitim  mak long hem. Taem mi kasem save olsem wanem brata ya i stap traehad blong winim trabol ya, mo ol bigbigfala jenis we hem i mekem finis, mi mi tinghae long hem. Ale, mitufala i kam gudfren.”​—1 Pita 4:8.

!Talemaot Olgeta Tingting Blong Yu!

11. (a) ?I nidim wanem blong mekem lav i gru insaed long kongregesen? (b) ?From wanem i nogud long yumi long saed blong spirit blong stap longwe long ol narafala oltaem?

¹¹ Plante man tede, long ful laef blong olgeta, oli neva gat wan gudfala fren. !Sore tumas long olgeta! Insaed long Kristin kongregesen samting ya i no nid blong hapen​—mo i no mas hapen tu. Trufala lav i no minim nomo se yu talem halo long olgeta brata sista. Mo i no minim tu se yu tok swit we yu go bitim mak blong traem mekem olgeta oli laekem yu. Nogat. Olsem Pol i mekem long ol Kristin long Korin, yumi mas openem hat blong yumi mo soem long ol brata sista se yumi rili intres long olgeta. I tru, prapa fasin blong sam long yumi, hemia se yumi no laekem joen plante wetem ol man, mo yumi no stap talemaot ol tingting blong yumi long narafala. Be sipos yumi stap yumi wan oltaem we yumi no toktok nating, yumi save spolem yumi wan bakegen. Baebol i givim woning ya se: “Man we i no save wok gud wetem ol narafala man, oltaem hem i stap tingbaot ol bisnes blong hem nomo. Hem i no save agri long ol gudfala tok we ol narafala man oli givim long hem.”​—Ol Proveb 18:1.

12. ?From wanem olgeta long kongregesen oli mas toktokgud tugeta blong oli save frengud?

¹² Blong frengud, yumi mas toktok tugeta long fasin we i tru. (Jon 15:15) Yumi evriwan i nidim ol fren we yumi save talemaot olgeta tingting mo filing blong yumi long olgeta. Mo tu, taem yumi savsave yumi, i moa isi blong luksave wanem we yumi mas talem mo mekem long narafala. Sipos yumi intres long ol narafala olsem, yumi stap mekem lav i gru insaed long kongregesen. Mo bambae yumi luk se tok blong Jisas i tru, taem i talem se: “Man we i stap givim presen i go, hem i save harem gud moa, i winim man we i stap kasem presen blong hem.”​—Ol Wok 20:35; Filipae 2:​1-4.

13. ?Yumi save mekem wanem blong soem se yumi gat trufala lav long ol brata blong yumi?

¹³ Blong mekem se lav we yumi filim i halpem narafala, yumi mas soemaot lav ya. (Ol Proveb 27:5) Taem lav blong yu i tru, fes blong yu i stap soemaot samting ya. Narafala bambae i luksave se yu tru, mo samting ya bambae i pulum hem blong soem fasin fren long yu. Wan proveb blong Baebol i talem se: “Man we i smael i kam long yu i save mekem yu yu glad.” (Ol Proveb 15:30) Narafala rod blong soemaot lav, hemia blong mekem samting blong givhan long narafala. I tru, yu no givim samting long narafala blong traem fosem hem blong lavem yu, olsem we yu stap switim hem nomo, nogat. Be taem yu givim wan presen wetem fulhat blong yu, samting ya i save  gat bigfala paoa long narafala. Maet yu raetem wan smol leta, no talem wan gudfala ‘tok long stret taem blong hem.’ Ol samting ya i save soemaot bigfala lav. (Ol Proveb 25:11, NW; 27:9) Be taem yumi fren finis wetem narafala, yumi wantem holemtaet gudfala fasin fren ya. Blong mekem olsem, yumi mas gohed blong soemaot lav mo tingbaot olgeta fastaem long yumi wan. Yumi mas rere oltaem blong givhan long ol fren blong yumi, speseli taem oli nidim yumi. Baebol i talem se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.”​—Ol Proveb 17:17, NW.

14. ?Yu save mekem wanem sipos yu soemaot lav long narafala be hem i no wantem fren wetem yu?

¹⁴ Yu no mas ting se yu save kam besfren blong evriwan insaed long kongregesen. Oltaem bambae yu harem se yu klosap moa long samfala i bitim ol narafala. Taswe sipos i luk olsem we wan brata no sista long kongregesen i no soem fasin fren tumas, yu no mas hareap blong talem se wan samting i rong long yu no wan samting i rong long hem. Mo yu no mas traem fosem hem blong frengud wetem yu. Sipos yu fren wetem hem go kasem mak we hem i wantem, yu save mekem se rod i open blong yutufala i kam klosap moa long fiuja.

“Mi Mi Glad Tumas Long Yu”

15. ?Ol gudfala tok blong presem narafala mo ol strong tok blong daonem narafala i save mekem wanem i kamaot?

¹⁵ !Taem Jisas i baptaes, i sua se hem i glad tumas blong harem tok we i kamaot long heven se, “Mi mi glad tumas long yu”! (Mak 1:​11) Gudfala tok ya we Papa blong Jisas i talem, i mas mekem hem i sua moa se Papa blong hem i lavem hem. (Jon 5:​20) Sore tumas, samfala oli neva harem ol gudfala tok olsem long olgeta we oli respektem olgeta mo lavem olgeta. Gel ya Ann i talem se: “Plante yangfala olsem mi, famle blong olgeta i no stap folem Kristin fasin blong laef. Long haos, oltaem oli harem ol strong tok blong daonem olgeta nomo. Samting ya i stap mekem olgeta oli harem nogud.” Be taem ol yangfala ya oli joen long kongregesen, oli haremsave lav mo kea we i stap insaed long bigfala famle ya blong olgeta​—ol papa, mama, brata mo sista long saed blong bilif.​—Mak 10:29, 30; Galesia 6:​10.

16. ?From wanem yu no save givhan long narafala sipos yu daonem hem oltaem?

¹⁶ Fasin blong sam kantri se, ol papa mama, ol olfala, mo ol tija, oli no stap talem ol gudfala tok we i kamaot long hat blong olgeta blong presem ol yangfala. Oli ting se sipos oli talem ol tok olsem, maet yangfala i kam flas no maet hem i no moa traehad. Tingting ya i save kam insaed long ol Kristin famle tu. Maet sam olfala oli lesin long wan tok we yangfala i givim long kongregesen no oli luk wan traehad blong yangfala, nao oli talem se: “!I gud, be i no tumas! !Yu save mekem i moagud yet!” No maet oli mekem wan narafala fasin bakegen blong soem long yangfala se oli no glad long hem. Plante long olgeta oli ting se long rod ya oli stap pulum ol yangfala blong oli traehad moa. Be fasin ya i save mekem defren samting i kamaot, from we maet yangfala i harem se hem i no naf blong mekem wan samting nao bambae hem i no moa traehad nating.

17. ?From wanem yumi mas lukaot janis blong presem narafala from gudfala wok we hem i mekem?

¹⁷ Be i no stret tu, sipos yu talem ol gudfala tok blong presem narafala from we biaen yu wantem stretem hem. Trufala fasin blong presem narafala from wan gudfala samting we hem i mekem, i givhan blong mekem lav i gru insaed long famle mo insaed  long kongregesen. Olsem nao, ol yangfala bambae oli glad blong askem advaes long ol brata mo sista we oli olfala moa long olgeta. Taswe, yumi no mas letem ol fasin blong kantri we yumi gruap long hem oli gat paoa long fasin we yumi mekem long ol narafala. Yumi mas ‘kam niufala man, nao bambae ol man oli luksave se laef blong yumi i folem trutok, i stret gud, i tabu, i blong God nomo.’ Yes, yumi mas folem fasin blong Jeova mo presem narafala from gudfala wok we hem i mekem.​—Efesas 4:​24.

18. (a) ?Ol yangfala, yufala i mas tingting olsem wanem long ol advaes mo tok we ol olfala oli talem blong stretem yufala? (b) ?From wanem ol olfala oli mas lukaotgud long fasin blong olgeta blong givim advaes mo stretem narafala?

¹⁸ Be, i gat wan woning i go long ol yangfala tu. Sipos wan olfala i stretem yu no i givim advaes long yu, yu no mas ting se hem i no laekem yu. (Prija 7:9) !Ating i defren olgeta! Maet olfala ya i lavem yu tumas mo i stap wari long yu. Sipos hem i no tinghae long yu, ating bambae hem i livim nomo, bambae hem i no save tekem taem blong toktok wetem yu long bisnes ya. Ol olfala long kongregesen, antap moa ol elda, oli save se tok we oli talem i gat bigfala paoa, i save halpem narafala no i save spolem narafala. Taswe, bifo we oli givim advaes no stretem narafala, oli spenem plante taem blong tingting dip mo prea, from we oli wantem mekem i gud nomo long ol narafala.​—1 Pita 5:5.

‘Jeova i Kaen Tumas’

19. ?Sipos narafala i bin spolem yu, from wanem yu save lukluk i go long Jeova blong i givhan long yu?

¹⁹ Maet sam long yumi i bin soemaot dip lav long narafala be narafala ya i spolem yumi bigwan. Taswe maet naoia yumi harem se yumi no moa wantem kam klosap long ol narafala. Tru ya, sipos samting olsem i bin hapen, bambae yu nidim strong bilif mo fasin no fraet blong openem hat blong yu bakegen. Be yu mas tingbaot oltaem se Jeova “i no stap longwe long yumi nating.” Hem i singaot yumi blong yumi kam klosap long hem. (Ol Wok 17:27; Jemes 4:8) Mo tu, Jeova i kasem save taem yumi fraet se narafala bambae i spolem yumi bakegen, mo hem i promes se bambae hem i stap klosap long yumi blong halpem yumi. Wan Sam blong Deved we i mekem yumi haremgud tumas, hem i se: “[Jeova] i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.”​—Ol Sam 34:18.

20, 21. (a) ?Olsem wanem blong sua se yumi save kam wan fren blong Jeova? (b) ?Yumi mas mekem wanem blong kam klosap long Jeova?

²⁰ Yumi save fren wetem olgeta man, be bambae i no gat wan we i gudfren olsem Jeova. ?I rili tru se yumi save kam wan fren blong Jeova? Yes i tru. Baebol i tokbaot sam gudfala man mo woman we oli bin frengud wetem Papa blong yumi long heven. Ol tok we oli talem wetem dip filing i stap long Baebol, blong givhan long yumi blong gat strong tingting se yumi tu yumi save kam klosap long Jeova.​—Ol Sam 23, 34, 139; Jon 16:27; Rom 15:4.

²¹ Yumi evriwan yumi naf blong kasem mak ya we yumi save kam wan fren blong Jeova. Deved i askem kwestin ya se: “Hae God. ?Hu man we i stret blong go long Haos Tapolen blong yu?” Nao hem i ansa se: ‘Man we i stap obei long yu long evri samting, mo oltaem i stap mekem ol samting we i stret, mo ol tok blong hem i tru mo stret.’ (Ol Sam 15:​1, 2; 25:14) Taem yumi karem gudfala frut long wok blong God mo yumi luksave se hem i stap lidim yumi mo i stap lukaotgud long yumi, bambae yumi kasem save se ‘Jeova i kaen tumas.’​—Jemes 5:​11.

22. ?Jeova i wantem se ol man blong hem oli haremgud long wanem kaen fasin fren?

²² !Jeova i wantem tumas blong fren wetem yumi nating se yumi sinman! !Hemia wan bigfala blesing ya! Samting ya i mas mekem se yumi wantem soemaot dip lav long ol narafala. Yes kampani blong ol Kristin brata i fulap long lav. Sipos Jeova i halpem yumi, yumi evriwan i naf blong soem lav ya mo haremgud long lav we narafala i soem long yumi. Aninit long Kingdom blong God, olgeta man blong wol bambae oli lavlavem olgeta gogo i no save finis.

?Yu Yu Save Eksplenem?

• ?Wanem fasin we i mas stap insaed long Kristin kongregesen?

• ?Olsem wanem yumi evriwan i save givhan blong mekem lav i gru insaed long kongregesen?

• ?Olsem wanem gudfala tok blong presem narafala i save mekem Kristin lav i kam strong moa?

• ?Olsem wanem kaen fasin blong Jeova i save halpem yumi mo givim paoa long yumi?

[Kwestin]

[Tok blong pija long pej 15]

Ol Kristin oli lavlavem olgeta, be i no jes from we hemia wan wok blong olgeta Kristin

[Tok blong pija long pej 17]

?Yu yu save “openem hat” blong yu moa?

[Tok blong pija long pej 18]

?Yu yu stap daonem narafala no yu stap leftemap tingting blong narafala?