Ol Man Oli Ronem Ol Sas Samting

“Sipos yumi wantem kasem plante moa samting oltaem, bambae yumi neva gat inaf.”​—Wan ripot blong Worldwatch Institute.

“?YUMI wantem wanem? Yumi wantem olgeta samting. ?Wetaem yumi wantem kasem olgeta samting ya? Naoia nomo.” Ol studen blong haeskul oli laekem blong yusum tok ya long ol yia 1960. Tede, maet yumi no harem ol semfala tok stret, be tingting ya i stap yet. Yes, i luk olsem se fasin blong ronem ol sas samting i makemgud taem blong yumi.

Long lukluk blong plante man, fasin ya blong kasem fulap mane mo plante sas samting i stap long fasples long laef blong olgeta. Jimmy Carter, we bifo hem i Presiden blong Amerika, i bin talem se: “Yumi no moa jajem wan man long ol wok blong hem, be yumi jajem hem long ol samting we hem i gat.” ?I gat sam samting we oli impoten moa i bitim ol sas samting? ?Sipos yes, wanem nao ol samting ya? ?Mo olsem wanem ol samting ya oli save mekem i gud long yumi?