Paradaes​—?Hem i Blong Yu?

“Mi mi save wan man blong Kraes, we . . . hem i bin go long paradaes.”—2 KORIN 12:​2-4, NW.

1. ?Wanem ol promes blong Baebol we plante man oli haremgud tumas long olgeta?

 PARADAES. Traem tingtingbak long faswan taem we yu harem promes blong God long saed blong paradaes long wol ya. ?Yu yu bin harem olsem wanem long taem ya? ?Wanem filing blong yu taem yu kasem save se ‘ol blaen man bambae oli lukluk, olgeta we sora blong olgeta i fas, sora blong olgeta bambae i open bakegen, mo long draeples, ol springwota bambae oli kamkamaot’ blong mekem ol samting oli grugud? Tingbaot faswan taem we yu bin harem profet tok ya se wael dog mo pikinini blong sipsip bambae tufala i stap wanples mo bigfala puskat ya leped bambae i ledaon wetem pikinini blong nani. Ating yu bin haremgud tumas blong ridim tok ya blong Baebol se ol famle blong yu we oli ded finis oli save laef bakegen mo oli save gat janis blong laef olwe long Paradaes.​—Aesea 11:6; 35:​5, 6; Jon 5:​28, 29.

2, 3. (a) ?From wanem yumi save talem se i gat pruf blong ol promes blong Baebol we yu yu putum tingting blong yu i stap strong long olgeta? (b) ?Wanem narafala pruf bakegen we yumi gat?

² Yu yu no stap drim taem yu putum tingting blong yu i strong long promes blong Baebol long saed blong Paradaes. Hop ya i stanap long ol strong pruf. Wan pruf, hemia tok we Jisas i talem long man nogud ya we i bin hang long pos klosap long hem se: “Yu bambae yu stap wetem mi long Paradaes.” (Luk 23:43) Yu yu bilivim tok ya, olsem we yu bilivim promes blong God se bambae hem i ‘putum niufala skae mo niufala wol, we stret fasin nomo bambae i stap long hem, mo yu yu stap wet long ol samting ya blong oli kamtru.’ Yu yu trastem promes blong God tu se bambae hem i ravemaot wota blong ae blong yumi, bambae i no moa gat man i ded, bambae man i no moa krae from man we i ded, bambae i no moa gat man i krae, mo bambae man i no moa harem nogud long bodi blong hem. !Ol promes ya oli soem se wol ya bambae i kam paradaes bakegen!​—2 Pita 3:​13; Revelesen 21:4.

³ Wan moa pruf se Paradaes ya bambae i kamtru, hemia wan samting we olgeta trufala Kristin long wol oli joen long hem naoia. ?Wanem samting ya? God i wokem finis wan paradaes long saed blong spirit mo hem i putum ol man blong hem long paradaes ya. Maet i hadwok blong kasem save long tok ya “paradaes long saed blong spirit” from we hem i no joen wetem olting we yumi save luk long wol ya. Be Baebol i talemaot paradaes ya, mo tru ya, paradaes ya i stap finis.

Wan Vison Blong Paradaes

4. ?Seken Korin 12:​2-4 i tokbaot wanem vison? ?Ating hu nao i bin luk vison ya?

⁴ Long saed blong paradaes ya, makemgud tok we aposol Pol i raetem, se: “Mi mi save wan man blong Kraes, we . . . hem i bin go long namba tri heven. Yes, mi save man ya, mi no save sipos hem i rili go long heven no sipos hem i luk wan vison nomo, God nomo i save samting ya. Man ya i bin go long paradaes mo i bin harem ol tok we ol man oli no naf blong talem, mo we i no stret blong ol man oli talem tu.” (2 Korin 12:​2-4, NW ) Ating Pol nao i luk vison ya, from we jes bifo long ol vas ya, Pol i bin talem plante toktok blong pruvum se hem i wan trufala aposol. Mo tu, Baebol i no talem nem blong wan narafala man we i bin go long namba tri heven, Pol nomo i raetem tok olsem. ?Ale, long vison ya we i kamaot long Jeova, Pol i luk wanem “paradaes”?​—2 Korin 11:​5, 23-31.

5. ?Pol i no bin luk wanem samting? ?Hem i luk wanem kaen “paradaes”?

⁵ Ol vas raonabaot long tok ya oli no givim tingting se “namba tri heven” ya i minim skae antap long yumi no wan ples longwe moa we ol sta oli stap long hem, nogat. Plante taem Baebol i yusum namba ya tri blong makemgud wan samting, no blong givim paoa long tok blong hem no blong mekem tok i strong. (Prija 4:​12; Aesea 6:3; Matiu 26:34, 75; Revelesen 4:8) Taswe, samting we Pol i luk long vison blong hem i hae we i hae, i gud moa long ol samting we yumi save luk wetem prapa ae blong yumi. Hem i wan samting long saed blong spirit.

6. ?Wanem samting i hapen long taem bifo we i save givhan long yumi blong kasem save long vison blong Pol?

⁶ Ol faswan profet tok blong Baebol oli givhan  long yumi blong kasem save long mining blong paradaes ya. Taem ol man blong God bifo oli no moa stap tru long hem, God i letem ol man Babilon oli girap agensem Juda mo Jerusalem. Folem ol tok blong Baebol, yumi save makem stret yia we oli spolem gud kantri ya blong Juda, hemia long yia 607 B.K.T. * Profet tok blong Baebol i talem se kantri ya bambae i stap 70 yia we i no gat man long hem, nao biaen, God bambae i letem ol man Jiu we oli tanem tingting blong olgeta, oli kambak mo oli stanemap trufala wosip long kantri ya bakegen. Samting ya i hapen long yia 537 B.K.T. mo biaen. (Dutronome 28:15, 62-​68; 2 King 21:10-​15; 24:12-​16; 25:​1-4; Jeremaea 29:10-​14) ?Be taem oli kambak, kantri ya i olsem wanem? Long ol 70 yia ya, hem i stap olsem bus nomo, mo sam haf blong hem oli kam draeples we oli ples blong ol wael dog nomo. (Jeremaea 4:​26; 10:22) Be promes blong Jeova i stap se: “Mi [Jeova] bambae mi gat sore long [Jerusalem], mo long ol man we oli stap long hem. Nating we ol ples raonabaot long hem bambae oli kam draeples we i nogud olgeta, be bambae mi mekem olgeta i kam gudfala ples bakegen, we oli save karem fulap kakae. Bambae ol ples ya oli kam olsem gudfala ples ya Iden [no Paradaes ya, Septuagint Baebol], we mi mi mekem bifo.”​—Aesea 51:⁠3.

7. ?Afta we kantri ya i stap nating blong 70 yia, wanem profet tok i kamtru?

⁷ Afta we kantri ya i stap nating blong 70 yia, profet tok ya i kamtru. God i blesem graon nao ples ya i jenis, i kam naes we i naes. Traem tingbaot samting we i hapen: ‘Draeples i harem gud, i glad. Ples we ol samting i no save gru long hem, ol flaoa oli stap gru long hem. Draeples i glad, i singsing, hem i glad tumas, we i stap singaot bigwan from. . . . Olgeta we leg blong olgeta i nogud, leg blong olgeta i kam gud bakegen, nao oli jamjam olbaot, oli danis, mo olgeta we oli no save toktok, oli toktok, nao oli glad, oli stap singsingaot from. Long draeples, ol springwota oli kamkamaot, nao i mekem we i gat ol reva oli stap ron long hem. Mo long ples we i sanbij nomo, we i hot tumas, i gat bigfala lugun i stap long hem. Long graon we i drae we i drae, ol springwota oli kamaot long hem. Mo long ples we fastaem, i gat ol wael dog nomo i stap long hem, i gat fulap waelken, mo ol longfala gras blong wota long hem.’​—Aesea 35:​1-7.

Ol Man Jiu Oli Kambak Mo Ples i Jenis

8. ?Olsem wanem yumi save se Aesea japta 35 i stap tokbaot ol man?

⁸ !Hemia wan bigfala jenis tru! Ples we fastaem i draeples, hem i kam paradaes. Mo antap long samting ya, profet tok ya mo sam narafala profet tok we yumi save trastem olgeta, oli soem se ol man Jiu tu oli jenis, olsem wan draeples we i kam gudfala graon mo i karem plante kakae. ?From wanem yumi talem olsem? From we, Aesea i stap tokbaot ‘ol man we God i pemaot olgeta, i mekem olgeta i fri.’ Hem i talem se bambae oli kambak long kantri blong olgeta “we oli stap singsing,” bambae ‘oli stap harem gud mo oli glad we i glad.’ (Aesea 35:9, 10) Vas ya i no stap  tokbaot graon be i stap tokbaot ol man. Mo long sam narafala vas bakegen, Aesea i talemaot samting we bambae i hapen long ol man ya we oli kambak long Jerusalem, i se: ‘Olgeta bambae oli olsem ol tri we [Jeova] nomo i planem olgeta. Bambae olgeta evriwan oli save folem ol fasin we i stret nomo . . . Olsem we oltaem, ol sid oli gru, . . . [Jeova] bambae i mekem we oli kam stret man, mo we oli stap presem hem long fes blong ol man blong ol narafala kantri.’ Aesea i talem bakegen long saed blong ol man blong God se: “Oltaem, bambae mi [Jeova] mi stap lidim yufala . . . Bambae mi lukaot gud long yufala, blong yufala i no sik, bodi blong yufala i strong. Bambae yufala i olsem garen, we oltaem ren i stap wasem.” (Aesea 58:11; 61:​3, 11; Jeremaea 31:10-​12) Taswe, graon bambae i kamgud, mo long sem fasin ol man Jiu we oli kambak long ples blong olgeta, olgeta tu bambae oli jenis oli kamgud.

9. ?Pol i luk wanem “paradaes” long vison blong hem? ?Samting ya i kamtru wetaem?

⁹ Samting ya we i hapen long taem bifo i givhan long yumi blong kasem save long vison blong Pol. Vison ya i joen wetem Kristin kongregesen. Pol i talem se kongregesen ya “i olsem garen we God i mekemrere graon blong hem“ mo we i karem plante kakae. (1 Korin 3:9) ?Vison ya i kamtru wetaem? Pol i talem se vison we hem i luk i wan ‘samting we God i soemaot long hem’ no wan revelesen, hemia i min se bambae i kamtru long fiuja. Pol i save se afta we hem i ded, plante man bambae oli lego trufala bilif. (2 Korin 12:1; Ol Wok 20:29, 30; 2 Tesalonaeka 2:​3, 7) Taem ol man ya blong apostasi * oli mekem olsemia, maet i save luk olsem se oli gat moa paoa i winim ol trufala Kristin. Taswe, yumi save talem se taem samting ya i hapen, trufala Kristin skul i no moa olsem wan naesfala garen we graon blong hem i gud. Be biaen, trufala wosip i mas kam antap bakegen. Ol man blong God oli mas kam strong bakegen, olsem nao ‘ol stret man oli save go long niufala wol ya we Papa blong olgeta i king long hem, nao long ples ya oli save saen olsem san.’ (Matiu 13:24-​30, 36-​43) Samting ya i kamtru sam yia nomo afta we Kingdom blong God i stanap long heven. Long ol yia afta we Kingdom ya i stanap mo tede tu, i stap kam klia moa se ol man blong God oli stap long wan paradaes long saed blong spirit, olsem Pol i luk long vison blong hem.

10, 11. ?Nating se yumi sinman yet, from wanem yumi save talem se yumi stap long wan paradaes long saed blong spirit?

¹⁰ I tru se yumi evriwan i sinman, taswe yumi no sapraes we i save gat sam trabol i kamaot long medel blong yumi, olsem i bin kamaot long medel blong ol Kristin long taem blong Pol. (1 Korin 1:​10-​13; Filipae 4:​2, 3; 2 Tesalonaeka 3:​6-​14) Be, traem tingbaot olsem wanem yumi haremgud long wan paradaes long saed blong spirit naoia. Bifo, yumi sik long saed blong spirit, be naoia yumi kamgud finis. Bifo, yumi hanggri long saed blong spirit, be naoia yumi gat fulap kakae. Ol man blong God oli no moa harem nogud olsem we oli stap long wan draeples long saed blong spirit, be God i glad long olgeta mo hem i givim fulap blesing long olgeta. (Aesea 35:​1, 7) Yumi no moa stap olsem we yumi blaen mo yumi no stap long tudak long saed blong spirit. Naoia i olsem we  yumi stap long laet from we yumi fri mo God i glad long yumi. Plante man we fastaem i olsem se sora blong olgeta i fas mo oli no harem ol profet tok blong Baebol, naoia oli harem mo oli kasem save long tok blong Baebol. (Aesea 35:5) Wan pruf blong samting ya, hemia profet tok blong Daniel we plante milian Witnes blong Jeova oli bin stadi long ol wanwan vas blong hem. Oli bin stadi dip tu long ol japta blong buk blong Aesea. ?Olsem wanem? ?Ol nambawan kakae ya long saed blong spirit i mekem yu yu haremgud tumas? ?Samting ya i pruvum se yumi stap long wan paradaes long saed blong spirit? Yes, hem i wan pruf.

¹¹ Tingbaot tu, ol man we oli kamaot long ol defdefren kaen laef, be from we hat blong olgeta i stret, oli traehad blong mekem Tok blong God i wok long laef blong olgeta, nao oli jenisim fasin blong olgeta. Oli wok strong blong sakemaot ol fasin blong bifo we yumi save talem se oli olsem fasin blong anamol. Maet yu tu yu bin mekem ol bigfala jenis long laef blong yu, mo ol Kristin brata sista blong yu oli bin mekem sem mak. (Kolosi 3:​8-​14) Taswe, taem yu joen long kongregesen blong ol Witnes blong Jeova, yu yu stap wetem ol man we oli jenisim fasin blong olgeta finis, oli kam ol man blong mekem pis mo ol man blong soem kaen fasin. I tru se oli no stretgud olgeta yet, be yumi save talem se oli no moa gat fasin olsem laeon no wael anamol. (Aesea 35:9) ?Gudfala kampani blong ol man ya we oli kwaet mo oli gat pis i soemaot wanem samting? I soemaot klia se, yumi stap long wan paradaes long saed blong spirit. Mo paradaes ya i olsem wan pija blong paradaes we bambae yumi haremgud long hem long wol ya sipos yumi stap tru long God.

12, 13. ?Yu yu mas mekem wanem blong stap olwe long paradaes ya long saed blong spirit?

¹² Be i gat wan samting we yumi no mas fogetem. God i talem long ol man Isrel se: “Sipos yufala i obei long olgeta loa ya we mi mi stap givim long yufala tede, bambae yufala i gat paoa blong holem kantri ya we bambae i no longtaem, yufala i gokros long reva ya blong holem.” (Dutronome 11:8) Levitikas 20:22, 24 i tokbaot semfala kantri ya i se: “Yufala i mas obei long ol loa blong mi, mo yufala i mas folem ol tingting blong mi, nao graon blong kantri ya Kenan we bambae mi tekem yufala i go stap long hem, bambae hem i no save kam nogud long yufala, mo i no save mekem we yufala i mas aot long hem. Graon ya blong olgeta i gud tumas, oltaem i stap karem fulap kakae, mo mi mi promes finis blong givim long yufala blong yufala i holem i blong yufala.” Yes, blong ol man Isrel oli holem Promes Lan ya i blong olgeta, oli mas gohed blong frengud wetem Jeova God. Taem oli no moa obei long God, long taem ya nao God i letem ol man Babilon oli winim olgeta mo tekemaot olgeta long kantri blong olgeta.

¹³ Maet yu yu laekem plante samting long paradaes ya long saed blong spirit. Yu yu laekem blong luk olgeta we oli stap insaed long paradaes ya, mo yu haremgud blong stap wanples wetem olgeta. Yu yu gat pis wetem ol Kristin we oli bin wok strong blong lego ol rabis fasin we oli olsem fasin blong anamol. Olgeta ya oli stap traehad blong soem kaen fasin mo givgivhan long olgeta. Nating se i olsem, blong yu stap olwe long paradaes ya long saed blong spirit, i no naf we yu frengud wetem ol narafala insaed long paradaes ya. Yu mas frengud wetem Jeova tu mo yu mas mekem samting we hem i wantem. (Maeka 6:8) Yu nomo yu jusum blong joen long paradaes ya long saed blong spirit, i no gat wan man i fosem yu. Be sipos yu no wokhad blong holemtaet fasin fren blong yu wetem God, yu save lusum rod mo livim paradaes ya, no oli save sakemaot yu long paradaes ya.

14. ?Wanem bambae i givhan long yumi blong stap olwe long paradaes ya long saed blong spirit?

¹⁴ Wan impoten samting we bambae i givhan long yu, hemia se yu mas gohed blong kasem paoa long Tok blong God. Makemgud pijatok ya long Ol Sam 1:​1-3: “Olgeta we oli no wantem folem toktok blong ol man nogud, . . . olgeta ya oli save harem gud. Ol man olsem, oli glad blong folem Loa blong Hae God, mo oltaem oli stap ridim, mo oli stap tingting long hem long dei mo long naet. Olgeta ya oli olsem ol tri we oli gru long saed blong wota we i stap ron. Ol tri ya oli stap karem frut long stret taem blong olgeta, mo lif blong olgeta i no save drae. Mo long sem fasin, ol man ya tu oli stap win long evri samting we oli stap mekem.” Antap long hemia, ol buk blong slef we i stret mo waes we oli stanap long Baebol, oli givim ol gudfala kakae long yumi taem yumi stap insaed long paradaes ya long saed blong spirit.​—Matiu 24:45-​47, NW.

Mekem Tingting Blong Yu i Strong Long Saed Blong Paradaes

15. ?From wanem Moses i no save lidim ol man Isrel oli go long Promes Lan? ?Be hem i luk wanem samting?

¹⁵ Tingbaot wan narafala samting we i givhan long yu blong kasem save long Paradaes. Afta we ol man  Isrel oli wokbaot long draeples blong 40 yia, Moses i lidim olgeta oli go long levelples blong Moab we i stap long is saed blong Jodan Reva. From wan bigfala sin we Moses i bin mekem, Jeova i talem long hem se hem i no save lidim ol man Isrel oli gokros long Jodan Reva. (Namba 20:​7-​12; 27:12, 13) Be Moses i askem strong long God se: “Plis yu letem mi mi gokros long Jodan Reva, blong mi luk ol gudfala graon ya.” Moses i no save go stap long graon ya, be afta we hem i klaem i go antap long Hil ya Pisga mo i lukluk sam haf blong kantri ya, hem i luksave se hemia “ol gudfala graon.” ?Yu yu ting se graon ya i olsem wanem?​—Dutronome 3:​25-​27.

16, 17. (a) ?Long taem blong yumi, olsem wanem Promes Lan i jenis? (b) ?From wanem yumi save bilif se fastaem Promes Lan i olsem paradaes?

¹⁶ Sipos yu tingbaot graon ya olsem i stap tede, ating bambae yu tingbaot wan ples we i drae mo san i strong, wan graon we i sanbij mo ston nomo. Be i gat pruf blong soem se long taem blong Baebol, graon ya i no olsem. Long buk ya Scientific American, Walter C. Lowdermilk we hem i gat bigfala save long saed blong graon mo wota, i eksplenem se, graon long kantri ya i “kam nogud from we long taosen yia we i pas ol man nomo oli spolem.” Man ya i raetem se: “I no win mo san we i mekem se gudfala graon ya i kam olsem ‘draeples,’ ol man nomo oli mekem trabol ya.” Yes, ol save we man ya i kasem taem hem i stadi long graon, i soemaot se “fastaem kantri ya i olsem paradaes.” Yes, ol man nomo oli spolem ples ya we fastaem “i olsem paradaes.” *

¹⁷ Sipos yu tingting dip long samting we yu ridim long Baebol, ating bambae yu luksave se tok blong man ya i tru. Tingbaot tok blong Jeova we Moses i talem long ol man Isrel se: “Kantri ya we yufala i go from naoia, hem i gat ol hil blong hem, mo i gat ol bigfala levelples long medel blong ol hil ya, mo oltaem ren i stap wasem ples ya. Hae God i God blong yumi, mo hem i stap lukaot long kantri ya.”​—Dutronome 11:​8-​12.

18. ?Olsem wanem Aesea 35:2 i givhan long ol man Isrel we oli kalabus yet, blong oli kasem save lelebet long Promes Lan?

¹⁸ Promes Lan i naes we i naes mo graon blong hem i givim fulap kakae. Taswe, taem ol man bifo oli harem nem blong sam ples long Promes Lan, wantaem nomo oli tingbaot paradaes. Yumi luk samting ya long profet tok blong Aesea japta 35, we i kamtru fastaem long ol man Isrel, taem oli aot long Babilon oli kambak long graon blong olgeta. Aesea i talem se: “Draeples bambae i glad, i singsing, bambae hem i glad tumas, we i stap singaot bigwan from. Ples ya bambae i jenis, i kam naes we i naes, olsem ol hil long kantri ya Lebanon, mo graon blong ples ya bambae i kam nambawan, olsem gudfala graon ya blong garen klosap long hil ya Kamel, mo long levelples ya Saron. Hae God i God blong yumi, mo long taem ya, bambae olgeta man oli luk ol gudgudfala samting blong hem. Bambae oli luk we hem i hae we i hae, mo we i gat olgeta paoa.” (Aesea 35:2) Taem ol man Isrel oli harem ol nem olsem Lebanon, Kamel, mo Saron, ating oli haremgud from we oli tingbaot se ol ples ya oli naesfala ples.

19, 20. (a) Tokbaot ples ya Saron long taem bifo. (b) ?Olsem wanem blong mekem tingting blong yumi i strong moa long saed blong Paradaes long wol long fiuja?

¹⁹ Tingbaot Saron. Hem i wan levelples klosap  long solwota. Long wan saed, i gat ol hil blong Sameria, long narasaed, i gat Mediterenian Si. (Lukluk foto long pej 10.) Ol man oli save ples ya from we hem i naes we i naes mo from graon blong hem we i rij mo i givim fulap kakae. I gat plante wota tu long ples ya, mekem se hem i wan gudfala ples blong ol buluk mo sipsip. Long not, i gat fulap plantesin blong oktri. (1 Kronikel 27:29; Sing blong Solomon 2:1; Aesea 65:10) Taswe, taem Aesea 35:2 i talemaot se kantri ya bambae i kamgud bakegen mo bambae i kam wan naesfala ples we ol samting oli grugud long hem olsem wan paradaes, profet tok ya i stap talemaot wan nambawan paradaes long saed blong spirit tu, olsem samting we Pol i luk long vison blong hem plante yia biaen. Mo tu, profet tok ya wetem plante narafala profet tok bakegen oli mekem tingting blong yumi i strong moa long saed blong paradaes long wol we ol man bambae oli stap long hem.

²⁰ Taem yumi stap long paradaes ya long saed blong spirit, yumi save mekem tangkiu blong yumi i kam bigwan moa from paradaes ya, mo tu yumi save mekem tingting blong yumi i strong moa long saed blong Paradaes long wol we bambae yumi gat janis blong stap long hem. ?Olsem wanem yumi save mekem samting ya? Yumi mas kasem save moa long ol samting we yumi ridim long Baebol. Long plante vas blong Baebol mo long plante profet tok, yumi ridim nem blong ol ples. ?Yu yu wantem save se ol ples ya oli stap wea, mo wanem ol kantri mo taon we oli stap klosap long olgeta? Ale, long nekis stadi bambae yumi tokbaot olsem wanem blong save ol samting ya, mo wanem gudfala frut i save kamaot from.

[Ol Futnot]

?Yu Yu Tingbaot?

• ?Aposol Pol i luk wanem “paradaes” long vison blong hem?

• ?Wanem faswan taem we Aesea japta 35 i kamtru? ?Olsem wanem profet tok ya i joen wetem vison blong Pol?

• ?Olsem wanem yumi save gat moa tangkiu from paradaes long saed blong spirit tede mo from janis blong laef long paradaes long wol long fiuja?

[Kwestin]

[Tok blong pija long pej 10]

Levelples blong Saron, gudfala graon blong Promes Lan

[Credit Line]

Pictorial Archive (Near Eastern History) Est.

[Tok blong pija long pej 12]

Moses i luksave se hemia “ol gudfala graon”