Wan Kwestin

Jisas i talem long ol man blong hem se oli ‘mas letem man i kaon long olgeta, we oli no tingbaot se bambae oli pem.’ ?Olsem wanem? ?Jisas i wantem talem se bambae oli no save askembak wan long ol mane ya we oli bin givim long man fastaem?

Yumi kasem save tok blong Jisas long Luk 6:35 taem yumi gat save long Loa blong Moses. Long loa ya, God i talem long ol man Isrel se taem oli givim mane long narafala man Isrel we i no gat mane no we i nidim help, oli no mas mekem man ya i pem intres blong mane ya. (Eksodas 22:25; Levitikas 25:35-37; Matiu 5:42) Ol lon ya oli no blong mekem no statem wan bisnes. Be, ol lon ya we i no gat intres long hem, i blong givhan long olgeta we oli pua no we oli gat nid. Tru ya, yumi no soemaot lav nating sipos yumi wantem yusum ol fren blong yumi jes blong kasem samting long olgeta nomo. Nating se i olsem, hemia we i givim lon i gat raet blong askembak stret amaon blong mane we hem i bin givim. From samting ya, samtaem oli saenem wan kontrak (olsem we wan i kaon long narawan), hemia i blong meksua se narafala i pembak lon ya.​—Dutronome 15:7, 8.

Taem Jisas i stap tokbaot Loa, hem i ademap wan tok we i kavremap fulap samting. Hem i talem se taem man i givim mane blong givhan long narafala, hem i no mas ting se “bambae oli pem.” Olsem ol man Isrel, samtaem ol Kristin oli safa long saed blong ekonomi no sam narafala samting long laef we i mekem se oli pua no maet oli no moa gat wan samting nating. Sipos wan Kristin brata i stap long hadtaem olsem, we hem i nidim vatu, i gud we yumi givhan long hem. Yes, trufala lav bambae i pusum wan Kristin blong halpem wan brata we i no fol blong hem we i mekem se hem i trabol long saed blong vatu. (Ol Proveb 3:27) Yumi save givim wan presen long brata blong yumi we i gat nid, nating se maet mane ya we yumi givim long hem i no bigwan olsem mane blong wan lon.​—Ol Sam 37:21.

Long faswan handred yia K.T., * aposol Pol mo Banabas tufala i tekem ol presen mane blong ol Kristin long Antiok blong go givhan long ol brata long Judia we oli gat hadtaem blong kasem kakae. (Ol Wok 11:28-30) I sem mak tede taem i gat disasta, ol Kristin oli sanem presen i go long ol brata blong olgeta we oli gat nid. Mo tu, taem oli mekem olsem, oli givim wan gud witnes long ol man. (Matiu 5:16) Be i tru se bifo we yumi givhan long wan brata we i gat nid, yumi mas tingbaot sam samting fastaem. ?From wanem hem i gat nid? I gud blong tingbaot ol tok ya blong Pol se: “Man we i les blong wok, yufala i no givim kakae long hem.”​—2 Tesalonaeka 3:10.

Maet wan brata i no lusum olgeta samting we hem i gat, be hem kasem sam smosmol problem long mane, mekem se hem i askem wan lon blong halpem hem blong kambak antap bakegen long saed blong mane. I stret nomo blong givim wan lon long hem we yumi no askembak intres blong mane ya. Long taem olsem, man ya we i givim lon i no go agensem ol tok blong Jisas long Luk 6:35, sipos hem i ting se bambae narafala i mas pembak fulwan mane ya long hem. Tufala i mas saenem wan kontrak, mo hemia we i tekem lon i mas traehad blong givimbak mane olsem we hem i talem long pepa blong kontrak ya. Yes, lav we wan Kristin i gat i mas pusum hem blong pembak lon blong hem olsem we lav nao i pusum narawan blong givim lon ya long hem.

Man we i wantem givim wan lon (no givim mane olsem wan presen) hem i mas tingbaot nid blong famle blong hem wan fastaem. Olsem maet, sipos hem i givim mane long wan narafala famle, hem i mas lukaot se samting ya bambae i no givim trabol long famle blong hem wan bakegen from we Baebol i talem se i wok blong Kristin man blong lukaot long ol nid blong famle blong hem. (2 Korin 8:12; 1 Timoti 5:8) Nating se i olsem, ol Kristin oli lukaot sam rod blong soem lav long narafala, mo oli soem lav ya long fasin we i laenap wetem ol rul blong Baebol.​—Jemes 1:27; 1 Jon 3:18; 4:7-11.

[Futnot]