?Hu Man i Nafgud Blong Kam Wan Lida Tede?

Long 1940, Palemen blong Inglan i fesem bigfala trabol long saed blong ol lida. David Lloyd George, we i gat 77 yia blong hem, i stap long taem ya. Man ya i bin lidim Inglan blong win long Wol Wo Wan, mo hem i bin stap long politik blong plante yia. Samting ya i givhan long hem blong luksave hu olgeta long gavman we oli wokgud mo hu oli wok nogud. Long wan tok we hem i givim long Palemen long Mei namba 8, hem i talem se: “Nesen ya bambae i rere fulwan blong mekem eni samting sipos i gat ol lida blong hem, sipos Gavman i soemaot klia wanem ol mak we hem i wantem blong kasem, mo sipos nesen ya i sua se ol lida we oli stap lidim hem oli givim bes blong olgeta long wok ya.”

OL TOKTOK ya blong Masta Lloyd George i soemaot klia se ol man oli wantem ol lida we oli nafgud mo we oli rili traehad blong mekem olting i kamgud. Wan woman we i wok long kampen blong eleksen i talem olsem se: “Taem ol man oli vot blong wan man i kam presiden, oli putum laef blong olgeta, fiuja blong olgeta, mo fiuja blong pikinini blong olgeta long han blong hemia we oli vot long hem.” Lida ya we ol man oli putum tras blong olgeta long hem, i holem wan wok we i no isi nating. ?From wanem?

Wol blong yumi i fulap long ol problem we ol man oli no naf blong fiksimap. ?I gat wan lida we i waes gud mo i gat paoa blong finisim wo mo raf fasin? ?Olsem wanem? ?I gat wan lida tede we i gat fasin sore mo i naf blong givim samting we ol man oli nidim olsem kakae, klin wota mo gudfala helt? ?I gat wan lida we i gat save mo strong tingting blong lukaotgud long ol samting raonabaot long yumi? ?Mo weswan lida we i nafgud mo i gat paoa blong meksua se ol man oli save glad mo laef longtaem?

Ol Man Oli No Naf Blong Mekem Wok Ya

I tru se i gat sam lida we oli win long sam samting. Be, oli mekem wok ya blong smol taem nomo​—mo afta, i gat narawan i tekem ples blong olgeta. Long olgeta lida we oli bin laef long wol, King Solomon blong Isrel bifo i wan lida we i nafgud. Hem i tingting dip long bisnes ya, mo i se: “Ol samting ya we mi stap wok strong long hem, we mi kasem finis, bambae oli no givhan long mi nating, from we mi save se bambae mi livim olgeta i stap, oli blong man we bambae i tekem ples blong mi. ?Be man ya, maet i waes gud no i no gat hed, hu i save? Be bambae hem i kasem olgeta samting ya we mi mi hadwok long hem, wetem olgeta samting we mi kasem  from waes blong mi long wol ya. Ol hadwok ya i blong nating nomo.”​—Prija 2:​18, 19.

Solomon i no save sipos man we i tekem ples blong hem bambae i gohed blong mekem ol gudfala wok no bambae i spolem wok we hem i mekem finis. Long tingting blong Solomon, rod ya blong tekemaot ol olfala lida mo putumap ol niuwan i blong “nating nomo.” Sam narafala Baebol oli tanem tok ya blong Solomon se “i no gat frut.” Wan narafala Baebol i talem se: “Hemia i no gat mining.”

Sam samtaem, raf fasin i fosem ol man blong jusum wan narafala lida. Oli kilim i ded sam lida we oli naf, taem oli stap yet long wok blong olgeta. Abraham Lincoln, wan presiden blong Yunaeted Stet we ol man oli tinghae long hem, i talem se: “Oli jusum mi blong mekem wan impoten wok ya blong sot taem nomo, mo naoia, mi mi stap fored long yufala, wetem paoa olsem wan lida we klosap bambae i finis.” Yes, hem i bin mekem wok ya smoltaem nomo. Nating we hem i mekem sam gudfala samting finis, mo i wantem givhan moa long kantri blong hem, Presiden Lincoln i lidim kantri ya blong fo yia nomo. Taem hem i rere blong holem wok ya bakegen namba tu taem, wan man we i wantem wan niufala lida i kilim Presiden Lincoln i ded.

Ol beswan lida long wol, olgeta tu oli no save sua long fiuja blong olgeta wan. ?Taswe, i stret we yu trastem olgeta blong mekem fiuja blong yu i gud? Baebol i talem se: “Yufala i no mas trastem ol lida blong wol ya. Olgeta oli no save sevem yufala. Taem oli ded, oli stap gobak long graon nomo, nao ol plan blong olgeta oli no save kamtru.”​—Ol Sam 146:​3, 4.

Ating i had blong agri long advaes ya blong no trastem ol lida blong wol. Be, Baebol i talem se ol man long wol bambae oli gat wan lida we i gud mo bambae lida ya i lidim ol man long fasin we i gud. Aesea 32:1 i talem se: “!Olgeta! I gat taem i stap kam, we wan king bambae i stap rul long fasin we i stret olgeta.” Jeova God we i Wokem ol man, i rerem “wan king,” no wan Lida, we klosap nao bambae hem i bos long wol ya mo ol samting we oli stap long hem. ?Be king ya hem i hu? Profet tok long Baebol i tokbaot hem.

Wan Lida We i Nafgud

Tu taosen yia bifo finis, wan enjel i talem long wan gel Jiu we nem blong hem Meri se: “Bambae  yu yu gat bel, mo bambae yu save bonem wan pikinini boe blong yu, mo bambae yu putum nem blong hem, se Jisas. Hem bambae i wan haeman, mo ol man bambae oli save singaot hem, se Pikinini blong God ya we i hae we i hae. Hae God bambae i mekem hem i King, olsem King Deved, olfala bubu blong hem bifo. Hem bambae i King blong ol laen blong Jekob ya bifo, mo hem bambae i rul, gogo i no save finis.” (Luk 1:​31-​33) Tru ya, Jisas man Nasaret, hem i King ya we profet tok blong Baebol i tokbaot.

Plante taem, ol skul oli droem pija blong Jisas olsem wan smol bebi, no olsem wan man we i slak, mo we i letem eni samting nomo i kasem hem. Ol pija olsem ya i no givhan nating long yumi blong trastem Jisas olsem wan Rula. Be trufala Jisas we Baebol i stap tokbaot, hem i wan man we i gruap long bodi, mo i gat strong tingting mo paoa. Mo hem i gat ol narafala fasin we i mekem se hem i naf blong kam wan lida. (Luk 2:​52) Hemia sam nomo long ol gudfala fasin blong Jisas.

Jisas i holemstrong long God. Fasin blong hem we i stret mo i gud oltaem, i mekem se hem i save talem long ol enemi blong hem blong traem faenem wan poen agens long hem. Be oli no save faenem wan poen. (Jon 8:​46) Gudfala tijing blong hem we i no gat fasin tu fes, i pulum fulap man we oli gat gud hat blong biaenem hem.​—Jon 7:​46; 8:​28-​30; 12:19.

Jisas i givim laef blong hem long God fulwan. Hem i gat strong tingting blong finisim wok we God i givim long hem. Taswe i no gat wan enemi​—man long wol ya no dimon—​i save blokem hem. Hem i no fraet taem ol man oli kilim hem. (Luk 4:​28-​30) Tingting blong hem i no foldaon taem hem i taed no i hanggri. (Jon 4:​5-​16, 31-​34) Ol fren blong hem tu oli lego hem, be hem i neva lego mak we hem i wantem kasem.​—Matiu 26:55, 56; Jon 18:​3-9.

Jisas i kea bigwan long ol man. Hem i givim kakae long ol man we oli hanggri. (Jon 6:​10, 11) Hem i leftemap tingting blong olgeta we tingting i foldaon. (Luk 7:​11-​15) Jisas i givhan long man we oli blaen, we sora blong olgeta i fas, mo we oli sik. (Matiu 12:22; Luk 8:​43-​48; Jon 9:​1-6) Hem i talem gudfala toktok long ol aposol we oli wok strong. (Jon, japta 13-​17) Jisas i pruvum se hem i “gudfala man ya blong lukaot long sipsip” we i keagud long ol sipsip blong hem.​—Jon 10:11-​14.

Jisas i glad blong wok. Hem i wasem leg blong ol aposol blong tijim wan impoten lesen long olgeta. (Jon 13:​4-​15) Ol leg blong hem oli kam doti from we hem i wokbaot olbaot long ol rod long Isrel we i gat das, blong talemaot gud nius. (Luk 8:1) Mo tu, taem hem i wantem blong spel smol “long wan ples we i no gat man,” ol man oli biaenem hem, nao hem i tijim olgeta. (Mak 6:​30-​34) Hem i soemaot wan gudfala eksampol long ol Kristin se oli mas wok strong.​—1 Jon 2:6.

Jisas i lego wol ya, afta we hem i finisim wok blong hem. Jeova God i givim long hem wan bodi we i no save ded samtaem, mo i putumap hem i king. Hemia pei we hem i kasem from we hem i stap tru long God. Long saed blong Jisas we i laef bakegen, Baebol i talem se: “Kraes ya, yumi save we God i mekem hem i laef bakegen, nao bambae hem i no save ded bakegen samtaem. Ded i no moa gat paoa long hem.” (Rom 6:9) Yumi save sua se hem i beswan Lida blong ol man long wol. Taem Jisas Kraes bambae i bos long wol ya fulwan, bambae i no moa nid blong putumap wan narafala lida bakegen. Mo tu bambae i no moa gat jenis long gavman. Bambae Jisas i neva lego wok ya, mo i no gat man bambae i tekem ples blong hem. ?Be wanem samting stret, we bambae hem i mekem blong givhan long ol man?

Wanem We Niufala Lida Ya Bambae i Mekem

Ol Sam 72 i talemaot sam profet tok long saed blong wanem we King ya we i no save ded samtaem bambae i mekem. Long vas 7 mo 8 (NW ), hem i talem se: ‘Long ol dei blong hem, ol stret man bambae oli gru oli kam plante, mo bambae pis i fulap gogo mun i no moa stap. Mo ol man blong hem bambae oli stap olbaot, i stat long solwota, i go kasem narafala solwota, mo i stat long reva ya i go kasem ol ples long en blong wol ya.’ Aninit long gudfala lida ya, ol man long wol bambae oli haremgud blong olwe, mo oli stap long pis gogo i no save finis. Hem bambae i flatem gud ol tul blong faet mo i karemaot fasin nogud long tingting blong ol man. Ol man tede we oli spolem ol narafala olsem ol anamol, mo we oli raf long ol man raonabaot long olgeta olsem ol bea, bambae oli jenis fulwan long tingting blong olgeta. (Aesea 11:​1-9) Pis bambae i fulap.

 Long Ol Sam 72 vas 12 go kasem 14 hem i gohed i se: “Hem bambae i stap sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. Hem bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta. Long fes blong hem, laef blong ol man olsem bambae i gud tumas.” Ol puaman mo olgeta we oli no strong, mo olgeta we i no gat man i lukaot long olgeta, bambae oli kam haf long wan famle we oli glad. Bambae oli joengud aninit long lida ya Jisas Kraes we i King. Bambae oli no moa save harem nogud mo krae, be fasin glad bambae i fulap long laef blong olgeta.​—Aesea 35:10.

Vas 16 i givim promes ya se: “Bambae i gat plante kakae long ples ya, we bambae ol hil oli fulap gud long hem.” Plante milian man long wol tede oli harem nogud from we oli hanggri. Politik mo griri fasin blong ol man i mekem se oli no givimaot i naf kakae long evri man long kantri blong olgeta. Ale, samting ya i mekem se plante man, antap moa ol pikinini, oli stap ded from we oli no gat kakae. Be aninit long lida ya Jisas Kraes, trabol ya bambae i finis olgeta. God bambae i blesem graon blong i karem plante gudfala kakae. Olgeta man long wol bambae oli kakae we oli fulap gud.

?Yu yu wantem haremgud long ol blesing ya blong wan gudfala lida? Sipos yes, mifala i leftemap tingting blong yu blong kasem moa save long saed blong lida ya we i no longtaem nao bambae hem i rulum wol ya fulwan. Ol Witnes blong Jeova oli glad blong givhan long yu. Bambae yu no save sore sipos yu putum tingting blong yu i stap long lida ya, from we Jeova God hem wan i talem long saed blong Pikinini ya blong hem se: “Mi mi putumap king blong mi finis long Saeon, tabu hil ya blong mi.”​—Ol Sam 2:​6.

[Bokis blong pija long pej 5]

WANTAEM NOMO HEM I LUSUM POSISEN BLONG HEM

Wan lida i save sua se ol man bambae oli gat respek long hem mo oli sapotem hem, sipos hem i mekem we ol man oli harem se i gat pis mo laef blong olgeta i sefgud. Be, sipos ol man oli no moa trastem hem long wan samting, ale kwiktaem nomo, narafala bambae i tekem ples blong hem. Tingbaot sam long ol samting ya we i bin hapen finis mo i mekem se sam lida oli lusum posisen blong olgeta.

Laef we i nogud. Long en blong ol yia 1700, plante man we oli laef long Franis oli mas pem bigfala mane long takis, be oli sot long kakae. Nogud laef ya nao i pulum ol man blong oli mekem Franis Revolusen, mekem se long 1793 oli katemaot hed blong King Louis 16.

Faet. Wol Wo Wan i flatem gud paoa blong sam long ol bigfala haeman long wol ya. Wan eksampol, long 1917 long St. Petersburg, Rasia, wo i mekem se kantri ya i sot long kakae, ale ol man oli statem wanem we oli kolem Februari Revolusen. Revolusen ya i karemaot Czar Nicholas 2 long wok blong hem mo i statem rul blong ol Komunis. Long Novemba 1918, Jemani i wantem pis, be ol Kantri we oli joen tugeta blong faet agens long Jemani, oli no wantem stopem faet, from we oli wantem ol niufala lida. From samting ya, Empera blong Jemani, Wilhelm 2 i mas lego posisen blong hem mo i ronwe i go laef long Netalan.

Wantem wan fasin blong rul we i defren. Long 1989, Aean Keten (hemia tingting blong politik we i seraotem ol kantri blong Yurop mo ol kantri we Rasia i kontrolem bifo) i foldaon. Ol gavman we rul blong olgeta i strong tumas oli finis, taem ol man oli no moa wantem rul blong Komunis. Ale oli stanemap ol defdefren kaen fasin blong rulum kantri.

[Tok blong pija long pej 7]

Jisas i givim kakae long ol man we oli hanggri, i givhan long ol sikman, mo i soem wan gudfala eksampol blong ol trufala Kristin

[Foto Credit Line blong pija long pej 4]

Lloyd George: Photo by Kurt Hutton/Picture Post/Getty Images