Laef Stori

Mifala i Gat Strong Tingting Blong Sapotem Rul Blong God

MICHAL ŽOBRÁK I TALEM STORI YA

Afta we oli bin sakem mi mi stap mi wan long wan smol rum blong kalabus blong wan manis, oli dragem mi mi go long wan man we i raf tumas, blong i askem sam kwestin long mi. Kwiktaem nomo, man ya i kros mo i singaot se: “!Yufala ol spae! !Yufala ol spae blong Amerika!” ?From wanem man ya i kam kros olsemia? Jes bifo, hem i askem long mi wanem skul blong mi, mo mi ansa long hem se: “Mi mi wan Witnes blong Jeova.”

SAMTING ya i hapen bitim 50 yia bifo. Long taem ya, kantri blong mi i stap aninit long rul blong ol Komunis. Be longtaem bifo we samting ya i hapen, mifala i fesem sam hadtaem from ol man we oli agensem Kristin wok blong prij blong mifala.

Wo i Afektem Laef Blong Mifala

Taem Wol Wo Wan i stat long 1914, mi mi gat 8 yia blong mi. Long taem ya, vilej blong mi, Zálužice, i stap aninit long rul blong king blong Ostria mo Hangari. Wo i jenisim evri samting long wol, be tu, hem i finisim laef blong mi olsem wan pikinini. Papa blong mi i wan soldia, mo hem i ded long faswan yia blong wo. Olsem nao, mi wetem mama blong mi mo tufala smol sista blong mi, mifala i kam pua bitim mak. Mi mi fasbon mo wan boe nomo blong famle, taswe mi mas mekem olgeta wok long smol fam blong mifala mo raonabaot long haos. Stat taem mi smol yet, mi strong blong folem skul blong mi. Pasta blong Rifom Jos blong mifala (hemia jos blong Calvin) i askem mi blong tekem ples blong hem samtaem, blong tijim ol narafala studen long klas blong mi.

Long 1918 Wol Wo Wan i finis, mo mifala i glad tumas. Gavman blong Ostria mo Hangari i lus, nao kantri i kam Ripablik blong Jekoslovakia. Plante manples we oli bin muv i go long Amerika bifo, naoia oli kambak. Wan long olgeta, hemia  Michal Petrík, we i kam long vilej blong mifala long 1922. Taem hem i visitim wan famle we i stap klosap long haos blong mifala, oli singaot mi wetem mama blong mi tu.

Rul Blong God i Wan Trufala Gavman

Michal i wan Baebol Studen, hemia nem blong ol Witnes blong Jeova long taem ya. Hem i tokbaot sam impoten tijing blong Baebol, mo mi sapraes long olgeta. Wan long ol tijing ya hemia long saed blong Kingdom blong Jeova we i mas kam. (Daniel 2:44) Taem hem i talem se nekis Sande bambae oli holem wan Kristin miting long vilej blong Záhor, mi gat strong tingting blong go long miting ya. Mi wekap long 4 klok long moning mo mi wokbaot samwe 8 kilometa go kasem haos blong kasen blong mi, blong tekem baskel blong hem. Mi fiksim wan wil, mo mi raed long baskel ya blong samwe 24 kilometa go kasem Záhor. Mi no save weples bambae oli holem miting ya, taswe mi stap wokbaot sloslo long wan rod blong traem faenem ples ya. Biaen, mi harem ol man oli stap mekem wan singsing blong Kingdom long wan haos. Mi glad we mi glad tumas. Mi kam insaed long haos mo mi eksplenem from wanem mi kam long vilej. Oli singaot mi blong dring ti wetem famle, mo biaen oli tekem mi mi go long miting wetem olgeta. Mi mas wokbaot mo raed long baskel blong 32 kilometa blong gobak hom, be nating se i olsem, mi no taed nating.​—Aesea 40:31.

Mi sapraes long ol tijing blong ol Witnes blong Jeova long saed blong Baebol, from we oli kliagud. Hop ya se bambae yumi save haremgud long laef aninit long rul blong God i tajem hat blong mi. (Ol Sam 104:28) Mi wetem mama blong mi, mitufala i sanem wan leta long jos blong mifala blong talem se mitufala i aot long jos. Long vilej plante man oli kros long mifala from samting ya. Sam long olgeta oli no moa toktok long mifala blong smol taem. Be mifala i joengud wetem ol Witnes we oli stap long ples blong mifala. (Matiu 5:11, 12) Smol taem biaen, mi tekem baptaes long Uh Reva.

Wok Blong Prij i Kam Wan Fasin Blong Laef

Mifala i tekem evri janis blong talemaot Kingdom blong Jeova. (Matiu 24:14) Mifala i joen speseli long wok blong prij we oli mekem long Sande. Long taem ya, ol man oli wekap eli long moning, mekem se mifala i save prij eli tu. Long aftenun mifala i holem wan pablik miting. Plante taem ol man blong givim tok long Baebol oli no gat wan tok we i rere finis long wan pepa. Tok blong olgeta i dipen long namba blong man we i stap long miting, i dipen tu long skul blong olgeta, mo long ol poen we ol man ya oli intres long hem.

Ol trutok blong Baebol we mifala i talemaot i openem ae blong plante man we oli gat gud hat. Smol taem afta we mi tekem baptaes, mi prij long vilej blong Trhovište. Long wan haos, mi toktok wetem wan gudfala woman we i kaen tumas, nem blong hem Zuzana Moskal. Hem wetem famle blong hem oli joen long Jos blong Calvin, olsem mi bifo. Woman ya i savegud Baebol, be nating se i olsem, i gat plante kwestin yet long saed blong Baebol we hem i no bin faenem ansa blong olgeta. Mifala i storian blong wan aoa, mo mi givim buk ya long hem, The Harp of God. *

Wantaem nomo, famle Moskal i stat yusum buk ya Harp taem oli stap ridim Baebol tugeta. Plante moa famle long vilej blong olgeta oli intres long Baebol tu mo oli stat kam long ol miting. Pasta blong olgeta i givim wan strong woning agensem mifala mo ol buk blong mifala. Biaen, sam man we oli intres oli talem long pasta ya se hem i sud kam long wan miting blong mifala, mo pruvum long pablik ples we ol tijing blong mifala oli rong.

Pasta ya i kam, be hem i no naf blong faenem wan vas long Baebol we i sapotem ol tijing blong hem. Ale, hem i mekem eskius se: “Yumi no save bilif long olgeta samting we i stap long Baebol. Ol man nomo oli bin raetem Baebol, mo i gat sam narafala rod blong ansa long ol kwestin long saed blong skul.” Tok ya i pulum plante man blong tekem wan strong disisen. Samfala oli talem long pasta se, sipos hem i no bilif long Baebol, bambae oli no moa kam lesin long hem long jos. Ale, oli aot long Jos blong Calvin, mo samwe 30 man blong vilej ya oli akseptem ol trutok blong Baebol.

Talemaot gud nius blong Kingdom i kam wan  fasin blong laef, taswe taem mi wantem mared, mi lukaotem wan waef we i kamaot long wan famle we i strong long saed blong spirit. I gat wan brata i stap prij wetem mi, nem blong hem Ján Petruška. Hem i bin lanem trutok long Amerika. Mi sapraes long gel blong hem, Mária, from we oltaem hem i rere blong prij long eni man, sem mak olsem papa blong hem. Mi wetem Mária, mitufala i mared long 1936, mo Mária i stap wetem mi blong 50 yia, go kasem taem we hem i ded long 1986. Mitufala i gat wan pikinini nomo, Eduard, we i bon long 1938. Hemia jes bifo we wan narafala wo i stat long Yurop. ?Olsem wanem wo ya i afektem wok blong prij blong mifala?

Mifala i No Wantem Joen Long Ami

Taem Wol Wo Tu i stat, Slovakia i seraot long Jekoslovakia, i kam wan defren kantri we i stap aninit long rul blong ol Nasi. Nating se i olsem, gavman i no tekem aksin agensem wok blong ol Witnes blong Jeova olsem wan ogenaesesen. Be mifala i mas prij long fasin haed, mo oli jekemgud ol buk blong mifala. Nating se i olsem, mifala i gohed long wok blong prij wetem waes fasin.​—Matiu 10:16.

Wo i stap gohed, mo oli singaot mi blong joen long ami, nating se mi gat bitim 35 yia. Mi mi wan Kristin, taswe mi no wantem joen long wo. (Aesea 2:2-4) Laki nomo se, bifo we ol haeman oli tekem wan disisen long saed blong mi, oli letem mifala evriwan we mifala i gat bitim 35 yia, i gofri.

Mifala i luksave we ol brata we oli laef long taon oli no save faenem plante kakae olsem mifala we i laef long bus. Mifala i wantem serem ol samting blong mifala wetem olgeta. (2 Korin 8:14) Taswe mifala i tekem plante we plante kakae, mo mifala i wokbaot 500 kilometa i gokros long kantri, go kasem Bratislava. Long taem blong wo ya, mifala ol Kristin i wokem wan fasin fren bitwin long mifala we i halpem mifala blong fesem ol hadtaem we i kam biaen.

Oli Leftemap Tingting Blong Mifala Long Stret Taem

Afta Wol Wo Tu, Slovakia i kam wan haf blong Jekoslovakia bakegen. Stat long 1946 go kasem 1948, ol Witnes blong Jeova oli holem ol asembli long Brno mo long Prague. Mifala we i kamaot long is blong Slovakia, mifala i tekem ol spesel tren blong go long ol asembli ya. Yu save singaot ol tren ya se tren blong singsing, from we mifala i stap singsing oltaem long tren ya.​—Ol Wok 16:25.

Mi rimembagud asembli we mifala i holem long Brno long yia 1947. Tri brata blong wol hedkwota oli kam long asembli ya, wetem Brata Nathan H. Knorr. Blong singaot ol man oli kam long pablik tok, plante long mifala i wokbaot long taon wetem wan bigfala saen long fored mo long baksaed blong bodi blong mifala, we taetel blong tok i stap long hem. Boe blong mitufala, Eduard, i gat naen yia nomo long taem ya, mo hem i harem nogud  from we hem i no gat wan saen blong werem. Taswe ol brata oli wokem sam smol saen, blong Eduard mo plante narafala pikinini tu. !Grup blong ol yangfala ya i mekem wan gudfala wok blong singaotem ol man oli kam long pablik tok!

Long Februari 1948, ol Komunis oli tekem paoa. Mifala i save se bambae i no longtaem, gavman i traem blokem wok blong mifala. Mifala i holem wan asembli long Prague long Septemba 1948, mo mifala i gat ol strong filing from we mifala i save se bambae oli putum tabu bakegen long ol pablik miting blong mifala, hemia tri yia nomo afta we mifala i bin kam fri. Bifo long en blong asembli, mifala i agri blong tekem wan strong disisen. Hemia wan smol haf blong disisen ya: “Mifala, ol Witnes blong Jeova, we i joen tugeta long asembli ya . . . , mifala i gat strong tingting blong gohed moa long nambawan wok blong prij blong mifala. Lav blong Masta blong mifala we i kaengud olgeta bambae i halpem mifala blong gohedgud long wok ya, long gudfala taem mo long hadtaem tu. Mifala i tekem disisen blong wok strong moa blong talemaot gud nius blong Kingdom blong God.”

“Ol Enemi Blong Gavman”

Tu manis nomo afta long asembli blong Prague, sikret polis i kam long Betel klosap long Prague. Oli tekem graon wetem bilding, oli tekem olgeta buk we oli save faenem, mo oli arestem ol brata sista we oli wok long Betel wetem sam narafala brata tu. Be oli go moa yet.

Long naet blong Februari 3, 1952, polis i arestem bitim 100 Witnes long ful kantri. Mi mi wan long ol Witnes ya. Long samwe tri klok long moning, polis i wekemap famle blong mi. Oli no givim wan risen nating, oli askem long mi nomo blong go wetem olgeta. Oli fasem han mo leg blong mi long jen, mo oli kavremap ae blong mi wetem wan kaliko, nao oli sakem mi long wan trak wetem plante narafala man. Oli putum mi mi stap mi wan long wan smol rum blong kalabus.

Mi stap wan manis long ples ya we i no gat man i toktok wetem mi. Wan man nomo we mi save luk, hemia gad we i pusum smol kakae long mi tru long wan smol hol long doa. Biaen wan man i singaot mi blong askem ol kwestin long mi, olsem mi talem long fastok antap. Man ya i talem se mi mi wan ‘spae,’ nao i gohed se: “Skul i no save wan samting nating. !God i no stap! Mifala i no save letem yufala i giaman long ol man blong wok long kantri blong mifala. Bambae mifala i hangem nek blong yu, no bambae yu ded long kalabus nomo. !Mo sipos God blong yu i kam long ples ya, bambae mifala i kilim hem i ded tu!”

Ol haeman blong gavman oli savegud we i no gat wan loa i agensem Kristin wok blong prij blong mifala, taswe oli wantem mekemap wan risen blong agensem mifala, wan samting we oli save talem se i brekem loa blong kantri. Ale, oli traem mekem i luk olsem se mifala i spae blong ol narafala kantri, “ol enemi blong Gavman.” Blong mekem olsem, oli mas brekem strong tingting blong mifala, mo pusum mifala blong “agri” long ol giaman risen from wanem oli putum mifala long kot. Afta we oli bin askem ol kwestin long mi long naet ya, oli no letem mi mi slip. Sam aoa biaen, oli askem sam kwestin long mi bakegen. Naoia, oli wantem pusum mi blong saenem wan pepa we i talem se: “Mi mi wan enemi blong Demokratik Pipol blong Jekoslovakia, mo mi no wantem joen long [wok long fam] from we mi stap wet long ol man Amerika.” Mi no wantem saenem wan giaman tok olsemia, taswe oli sanem mi mi go long wan spesel rum blong kalabus blong stretem mi.

Oli no letem mi mi slip, ledaon, no sidaon. Mi save stanap no wokbaot nomo.  Taem mi kam taed bitim mak, mi ledaon long simen floa. Nao ol gad oli tekem mi mi gobak long ples we oli askem ol kwestin long mi. Man ya i talem long mi se: “?Naoia bambae yu saenem pepa ya no olsem wanem?” Mi no wantem saenem pepa ya, taswe hem i kilim mi. Blad i ron long fes blong mi. Hem i singaot bigwan i talem long ol gad se: “Hem i wantem kilim hem wan i ded. !Wajemgud hem blong i no kilim hem wan i ded!” Oli sanem mi mi gobak mi wan nomo long wan smol rum blong kalabus. Blong sikis manis oli gohed blong yusum ol raf fasin mo askem ol kwestin long mi. Nomata se oli traehad blong pusum mi blong giaman se mi mi wan enemi blong Gavman, oli neva spolem strong tingting blong mi. Mi stap tru long Jeova oltaem.

Wan manis bifo we mi pas long kot, wan loea blong Prague i askem sam kwestin long mifala ol 12 brata. Hem i askem long mi se: “?Bambae yu mekem wanem sipos ol kantri blong Wes oli faet agensem kantri blong yumi?” Mi ansa long hem se: “Bambae mi mekem semfala samting we mi mekem finis taem kantri ya wetem Hitler, tufala i faet agensem Rasia. Long taem ya mi no joen long faet, mo tede tu mi no save joen long faet from we mi mi wan Kristin mo mi no joen long ami.” Loea ya i talem long mi se: “Mifala i no save letem ol Witnes blong Jeova oli gohed long wok blong olgeta. Mifala i nidim ol soldia sipos ol kantri blong Wes oli faet agensem mifala, mo mifala i nidim ol soldia blong mekem ol man blong wok blong mifala we oli stap long ol kantri blong Wes oli fri.”

Long Julae 24, 1953, oli tekem mifala i go long kot. Wan afta narawan, oli singaot mifala ol 12 brata i go long fored blong ol jaj. Mifala i tekem janis blong talemaot bilif blong mifala long olgeta. Afta we mifala i bin ansa long ol giaman tok we oli putum agens long olgeta, wan loea i stanap mo i talem se: “Mi bin kam long kot ya plante taem. Oltaem, ol man oli talemaot fol blong olgeta, oli tanem tingting blong olgeta, mo samtaem oli krae. Be ol man ya, taem oli aot long kot ya bambae oli strong moa i bitim bifo we oli kam.” Biaen, oli jajem mifala ol 12 brata se mifala i stap wok agensem Gavman. Oli givim panis long mi se bambae mi stap tri yia long kalabus, mo Gavman i tekem graon mo haos blong mi.

Mi Stap Prij Yet Nating Se Mi Olfala

Afta we mi kamhom, sikret polis i wajem mi oltaem. Nating se i olsem, mi mekem wok blong God bakegen, mo oli putumap mi olsem elda long kongregesen. Gavman i letem mifala i stap long haos ya we oli bin tekem, mo samwe 40 yia biaen, afta we Komunis gavman i lus, oli givimbak haos ya long mifala.

Wan narafala memba blong famle blong mi i bin go long kalabus tu. Tri yia nomo afta we mi kambak long ples blong mi, oli singaot Eduard blong joen long ami. Eduard i folem ol tijing blong Baebol, taswe hem i no wantem joen long ami, mo oli putum hem long kalabus. Sam yia biaen, smol bubu blong mi, Peter, hem tu i go long kalabus from semfala risen, nating se hem i siksik plante.

Long 1989 Komunis rul long Jekoslovakia i lus. !Mi haremgud tumas, from we afta 40 yia we gavman i bin putum tabu long wok blong mifala, naoia mifala i fri blong go prij long ol haos wanwan! (Ol Wok 20:20) Mi gohed long wok ya taem helt blong mi i gud yet. Naoia mi mi gat 98 yia, mo helt blong mi i kam nogud, be nating se i olsem, mi glad blong talemaot yet ol nambawan promes blong Jeova long saed blong fiuja.

Mi bin luk 5 defren kantri mo 12 defren lida we oli rul antap long taon blong mi. Long ol lida ya, i bin gat ol strongfala lida, sam presiden, mo wan king. Be i no gat wan long olgeta we i naf blong stretem olgeta trabol blong ol man we oli stap aninit long rul blong olgeta. (Ol Sam 146:3, 4) Mi tangkiu tumas long Jeova we hem i letem mi mi save hem taem mi yang yet. Olsemia, mi luksave se Kingdom blong Mesaea nomo i naf blong stretem olgeta problem, mo mi no mekem olsem ol man ya we oli no bilif long God mo we laef blong olgeta i blong nating nomo. Mi bin talemaot beswan nius blong bitim 75 yia, mo samting ya i givim wan risen blong laef long mi, i mekem mi mi haremgud, mo i givim nambawan hop ya long mi se bambae mi save laef blong olwe long wol. Mi no save askem wan samting moa. *

[Ol Futnot]

[Tok blong pija long pej 26]

Smol taem afta we mitufala i mared

[Tok blong pija long pej 26]

Mi wetem Eduard long stat blong ol yia 1940

[Tok blong pija long pej 27]

Mi talemaot asembli long Brno, 1947