Ol Man Blong Jeova Oli Haremgud
Ol Man Blong Jeova Oli Haremgud
“Olgeta we oli stap lukaot God from we oli no gat paoa blong hem long laef blong olgeta, oli save harem gud.”—MATIU 5:3.
1. ?Wanem ya trufala fasin blong harem gud? ?Taem man i harem gud, samting ya i soemaot wanem?
FASIN blong harem gud i wan fasin blong ol man blong Jeova we i gud tumas. Long wan Sam blong Deved, hem i talem se: “[Jeova] i God blong yumi, mo from samting ya, yumi save harem gud.” (Ol Sam 144:15) Harem gud i min se yumi glad. Yumi harem gud moa—speseli long hat blong yumi—taem yumi luksave se Jeova i stap mekem i gud long yumi. (Ol Proveb 10:22) Taem yumi harem gud olsem, samting ya i soemaot se yumi stap frengud wetem Papa blong yumi long heven, mo se yumi haremsave we yumi stap mekem olsem hem i wantem. (Ol Sam 112:1; 119:1, 2) Jisas i tokbaot naen fasin we oli save lidim man blong harem gud. Long stadi ya mo long nekis stadi, bambae yumi lukluk gud ol naen fasin ya. Samting ya i save givhan long yumi blong luksave olsem wanem bambae yumi harem gud tumas sipos yumi holemstrong long Jeova God we i “stap harem gud oltaem.”—1 Timoti 1:11.
Lukaot God From We Yumi No Gat Paoa
2. ?Wetaem Jisas i bin tokbaot fasin ya blong harem gud? ?Wanem fastok blong hem long taem ya?
2 Long 31 K.T., * Jisas i givim wan tok we klosap olgeta man tede oli save long hem. Hemia Bigfala Toktok blong hem antap long wan Hil we i lukluk i godaon long Lugun blong Galili. Gospel blong Matiu i talem se: “Jisas i luk we plante man oli stap, nao hem i go antap long wan hil. Hem i sidaon, mo ol man blong hem oli kam sidaon raon long hem, nao hem i tijim olgeta. Hem i talem se, ‘Olgeta we oli stap lukaot God from we oli no gat paoa blong hem long laef blong olgeta, oli save harem gud, from we God i King blong olgeta.’ ” Prapa mining blong ol fastok ya blong Jisas se: “Man we i puaman long [saed blong] spirit, hem i save harem gud,” no “Olgeta we oli askem strong long God blong i givim spirit blong hem long olgeta, oli save harem gud.” (Matiu 5:1-3; Kingdom Interlinear; futnot) Baebol ya Today’s English Version i talem se: “Ol man we oli savegud se oli nidim spirit blong God, oli save harem gud.”
3. ?Olsem wanem tingting daon i save givhan long yumi blong harem gud?
3 Long tok ya we Jisas i givim antap long hil, hem i talem se man i save harem gud moa taem hem i luksave se i nidim spirit blong God long laef blong hem. Ol Kristin we oli gat tingting daon, oli savegud se oli sinman. Taswe, oli askem strong long Jeova blong i fogivim sin blong olgeta tru long ransom sakrefaes blong Jisas Kraes. (1 Jon 1:9) Olsem nao, oli kasem pis long tingting blong olgeta, mo oli harem gud tru. “Man we Hae God i fogivim hem, mo i tekemaot ol sin blong hem, hem i save harem gud.”—Ol Sam 32:1; 119:165.
4. (a) ?Olsem wanem yumi soemaot se yumi luksave we yumi mo ol narafala i nidim paoa blong God? (b) ?Taem yumi luksave se yumi nidim paoa blong God long laef blong yumi, wanem i save mekem yumi harem gud moa?
4 Man we i luksave se i nidim paoa blong God long laef blong hem, hem i ridim Baebol evri dei, hem i tekem olgeta kakae long saed blong spirit we ‘slef we i stret mo waes’ i stap givimaot “long stret taem blong hem,” mo hem i stap go long ol Kristin miting oltaem. (Matiu 24:45, NW; Ol Sam 1:1, 2; 119:111; Hibrus 10:25) Lav we yumi gat long ol narafala man i mekem yumi luksave se olgeta tu oli nidim paoa blong God long laef blong olgeta. Nao yumi wantem tumas blong go prij long olgeta mo tijim olgeta long gud nius blong Kingdom. (Mak 13:10; Rom 1:14-16) Taem yumi serem ol trutok blong Baebol wetem ol narafala, yumi harem gud. (Ol Wok 20:20, 35) Yumi rili harem gud long hat blong yumi taem yumi tingting dip long nambawan hop blong Kingdom mo blesing we Kingdom ya bambae i mekem i kamaot long fiuja. Long saed blong “smol kampani” blong ol Kristin we tabu spirit i makemaot olgeta, Kingdom bambae i mekem se oli kasem gudfala laef long heven we i no gat ded long hem, mo bambae oli kam ol memba blong Kingdom gavman blong Jisas Kraes. (Luk 12:32, NW; 1 Korin 15:50, 54) Long saed blong “ol narafala sipsip,” Kingdom ya bambae i mekem se oli save kasem laef blong olwe long paradaes long wol, aninit long rul blong Kingdom gavman ya.—Jon 10:16; Ol Sam 37:11; Matiu 25:34, 46.
Olgeta We Oli Stap Krae Oli Save Harem Gud
5. (a) ?Wanem mining blong tok ya ‘olgeta we oli stap krae’? (b) ?Wanem i save mekem olgeta we oli stap krae oli harem gud?
5 Long nekis tok blong Jisas, i olsem we fas haf i no laenap wetem las haf. Hem i se: “Olgeta we oli harem nogud, oli stap krae, oli save harem gud, from we God bambae i mekem olgeta oli harem gud bakegen.” (Matiu 5:4) ?Olsem wanem man i save krae mo long semtaem i harem gud? Blong kasem save long tok ya blong Jisas, yumi mas tingbaot wanem kaen fasin krae we hem i stap tokbaot. Disaepol Jemes i talem se yumi mas krae from ol sin blong yumi. Hem i raetem se: “Yufala i man nogud, yufala i mas wasem han blong yufala. Yufala we i gat tu fes yufala i mas mekem tingting blong yufala i klin. Naoia i gud yufala i sore, yufala i krae. I gud yufala i krae bigwan from ol sin blong yufala. I gud yufala i no moa laf, yufala i no moa harem gud, bambae yufala i harem nogud, yufala i krae. Long fes blong Hae God, yufala i mas mekem tingting blong yufala i stap daon, nao hem bambae i leftemap yufala.” (Jemes 4:8-10) Olgeta we oli harem nogud long ol sin blong olgeta, oli save harem gud taem oli kasem save se God bambae i fogivim olgeta sipos oli rili tanem tingting blong olgeta. Blong mekem olsem, oli mas bilif long ransom sakrefaes blong Jisas, mo oli mas mekem samting we Jeova i wantem. (Jon 3:16; 2 Korin 7:9, 10) Nao oli save gat wan gudfala fasin fren wetem Jeova mo oli gat janis blong laef olwe blong mekem wok blong hem mo presem hem. Samting ya i mekem olgeta oli harem gud tumas.—Rom 4:7, 8.
6. ?Samfala oli krae long wanem fasin? ?Wanem i save mekem olgeta ya oli harem gud?
6 Tok ya blong Jisas i minim olgeta tu we oli krae from we oli harem nogud long ol trabol we i stap long wol ya. Jisas i talem se hem nao i mekem profet tok blong Aesea 61:1, 2, i kamtru se: “Hae God we i Masta blong yumi, hem i jusumaot mi, mo paoa blong Spirit blong hem i kam fulap long mi, blong mi kam talemaot gud nius long ol puaman. Hem i sanem mi, blong mi kam mekem ol man we tingting blong olgeta i foldaon olgeta, oli harem gud bakegen, mo . . . blong mi leftemap tingting blong olgeta we oli harem nogud, oli stap krae.” Ol Kristin we tabu spirit i makemaot olgeta, oli mas mekem wok ya taem oli stap yet long wol. Ol fren blong olgeta, hemia “ol narafala sipsip,” oli givhan long olgeta blong mekem wok ya. Tugeta, oli mekem wok ya blong putum mak long fored blong “olgeta man we oli trabol, oli stap harem nogud from ol samting nogud ya we ol narafala man ya oli stap mekem insaed long taon ya [Jerusalem we i no moa obei long God, mo we i pija blong Krisendom tede].” (Esikel 9:4) Olgeta ya we oli stap krae, oli harem gud taem oli kasem ‘gud nius blong kingdom.’ (Matiu 24:14, NW ) Oli harem gud long save ya se klosap nao, niufala wol blong Jeova we i fulap long stret fasin bambae i tekem ples blong rabis wol ya blong Setan.
Ol Kwaet Man Oli Save Harem Gud
7. ?“Kwaet” fasin i no minim wanem?
7 Jisas i gohed long Bigfala Toktok blong hem antap long Hil, i se: “Olgeta we oli kwaet man, oli save harem gud, from we God bambae i givim wol ya long olgeta.” (Matiu 5:5, futnot) Samfala oli ting se man we i gat kwaet fasin, hem i wan slak man. Be tingting ya i no stret. Wan man we i stadi dip long Baebol i eksplenem prapa mining blong tok ya “kwaet man,” i se: “Man [we i gat kwaet fasin] hem i bos fulwan long hem wan. Hem i no slak, olsem we tingting blong hem i no strong blong mekem wan samting. Hem i no mekem olsem we i laekem olgeta man bitim mak jes from we hem i wantem pulum olgeta. Mo hem i no kwaet nomo from we hem i stap oltaem long kona blong hem. Man we i gat kwaet fasin, hem i strong, be hem i bos long hem wan.” Jisas i tokbaot hem wan se: “Mi mi wan kwaet man, mo tingting blong mi i stap daon.” (Matiu 11:29) Be Jisas i no fraet blong tok strong agens long ol nogud fasin, mo blong leftemap stret fasin.—Matiu 21:12, 13; 23:13-33.
8. ?Kwaet fasin i klosap sem mak long wanem narafala fasin? ?From wanem yumi nidim kwaet fasin taem yumi joen wetem ol narafala man?
8 Kwaet fasin i klosap sem mak long fasin blong bos long tingting. Taem aposol Pol i talem ol “frut blong spirit,” hem i putum kwaet fasin klosap long fasin blong bos long tingting. (Galesia 5:22, 23, NW ) Blong lanem kwaet fasin, yumi nidim tabu spirit blong God. Kristin fasin ya i save mekem se yumi gat pis wetem ol man raonabaot long yumi mo insaed long kongregesen tu. Pol i raetem se: “Yufala i mas gat sore long ol man mo yufala i mas mekem i gud long olgeta. Tingting blong yufala i mas stap daon, mo yufala i mas kwaet man, mo tingting blong yufala i mas longfala. Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala.”—Kolosi 3:12, 13.
9. (a) ?Yumi soem kwaet fasin nomo taem yumi stap wetem ol narafala man? Eksplenem. (b) ?Olsem wanem “God bambae i givim wol ya” long ol kwaet man?
9 Be yumi no soem kwaet fasin nomo taem yumi joen wetem ol narafala man. Taem yumi glad blong obei long Jeova olsem king blong yumi, yumi soemaot se yumi kwaet man. Beswan eksampol blong samting ya, hemia Jisas Kraes. Taem hem i stap long wol, hem i soemaot kwaet fasin mo i obei fulwan long samting we Papa blong hem i wantem. (Jon 5:19, 30) Faswan risen from wanem Jeova bambae i givim wol ya long Jisas, hemia from we Hem i jusumaot Jisas finis blong rul antap long wol ya. (Ol Sam 2:6-8; Daniel 7:13, 14) Jisas bambae i serem wol ya wetem ol 144,000 man we God i tekemaot olgeta “long ol narafala man,” taem oli “joen” wetem Kraes olsem ‘ol king we oli rul long olgeta man long wol.’ (Rom 8:17; Revelesen 5:9, 10; 14:1, 3, 4; Daniel 7:27) Jisas Kraes mo olgeta we oli stap wetem hem, bambae oli rul long plante milian man mo woman we oli gat kwaet fasin olsem sipsip. Bambae ol man mo woman ya oli harem gud tumas taem profet tok blong Ol Sam i kamtru long olgeta, se: “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:11; Matiu 25:33, 34, 46.
Olgeta We Oli Wantem Stret Fasin Oli Save Harem Gud
10. ?Olsem wanem “olgeta we oli wantem stret fasin” oli save kam fulap long stret fasin?
10 Nekiswan samting we Jisas i talem long toktok blong hem antap long hil long Galili, hemia: “Olgeta we oli wantem stret fasin, olsem we man we i hanggri i wantem kakae, man we i tosta i wantem dring, oli save harem gud, from we God bambae i mekem laef blong olgeta i fulap long stret fasin ya.” (Matiu 5:6, Niutesteman wetem Ol Sam long Bislama) Jeova nao i makemaot ol stret fasin we ol Kristin oli mas folem. Taswe, olgeta we oli wantem stret fasin, oli wantem we God i lidim olgeta, olsem we man we i hanggri i wantem kakae mo man we i tosta i wantem dring. Ol man olsem oli luksave se oli sinman mo se oli mestem plante taem, nao oli wantem tumas we Jeova i glad long olgeta. Olgeta ya oli harem gud blong kasem save long Tok blong God, mo blong faenemaot se oli save tanem tingting blong olgeta from sin mo askem God blong fogivim olgeta tru long ransom sakrefaes blong Jisas Kraes, nao oli save kam olsem stret man long fes blong God.—Ol Wok 2:38; 10:43; 13:38, 39; Rom 5:19.
11, 12. (a) ?Olsem wanem ol tabu Kristin oli kam stret man? (b) ?Olsem wanem ol fren blong ol tabu Kristin oli kam fulap long stret fasin?
11 Jisas i talem se olgeta ya bambae oli harem gud, olsem ‘man we i kakae gud, bel blong hem i fulap gud.’ (Matiu 5:6, Gud Nyus Bilong Jisas Krais we oli wokem long 1971) Ol tabu Kristin we bambae oli “joen long Kraes” blong rul wetem hem long heven, oli save kam ‘stret man long fes blong God, mo oli save laef.’ (Rom 5:1, 9, 16-18) I olsem we Jeova i adoptem olgeta olsem ol pikinini blong hem long saed blong spirit. God i jusumaot olgeta blong oli kam ol king mo pris wetem Kraes, long Kingdom gavman blong hem long heven.—Jon 3:3; 1 Pita 2:9.
12 Ol fren blong ol tabu Kristin ya, God i no luk olgeta yet olsem we oli stret man we oli save laef. Be from bilif blong olgeta long blad blong Kraes, yumi save talem se Jeova i luk olgeta olsem we oli stret lelebet. (Jemes 2:22-25; Revelesen 7:9, 10) Oli save kam olsem ol fren blong Jeova we i save sevem olgeta long taem blong “bigfala trabol.” (Revelesen 7:14) God bambae i mekem laef blong olgeta i fulap moa long stret fasin taem oli stap long niufala wol “we stret fasin nomo bambae i stap long hem,” aninit long rul blong “niufala skae.”—2 Pita 3:13; Ol Sam 37:29.
Olgeta We Oli Gat Sore Oli Save Harem Gud
13, 14. ?Wanem ol samting we yumi save mekem blong soem se yumi sore long narafala? ?Bambae yumi kasem wanem blesing from?
13 Jisas i gohed long Bigfala Toktok blong hem antap long Hil, i se: “Olgeta we oli gat sore long man, oli save harem gud, from we God bambae i gat sore long olgeta.” (Matiu 5:7) Long kot, taem wan jaj i no givim ful panis we loa i talem se man nogud i mas kasem, maet yumi talem se jaj ya i gat sore. Be long Baebol, bigfala mining blong tok ya “sore” se kaen fasin we man i mekem blong givhan long ol puaman. Taswe, olgeta we oli sore long narafala oli tekem aksin blong soemaot sore. Parabol blong Jisas long saed blong gudfala man Sameria we i givhan long man blong narafala laen, i soemaot gud, fasin ya blong “sore” long man we i nidim help.—Luk 10:29-37.
14 Blong harem gud, fasin sore i mas pusum yumi blong mekem samting blong soemaot kaen fasin long olgeta we oli nidim help. (Galesia 6:10) Jisas i sore long ol man we hem i luk raonabaot long hem. “Hem i sore tumas long olgeta, from we oli olsem ol sipsip we i no gat man blong lukaot long olgeta. Nao hem i stat tijim olgeta long plante samting.” (Mak 6:34) Jisas i luksave se ol man oli nidim moa ol samting long saed blong spirit. Yumi tu yumi save soemaot sore, sipos yumi givim samting long ol man we oli nidim moa—hemia ‘gud nius blong kingdom.’ (Matiu 24:14, NW ) Mo tu, yumi save mekem sam smosmol wok blong givhan long ol olfala Kristin, ol wido, ol pikinini we oli no gat papa mama, mo yumi save “leftemap tingting blong ol man” we oli harem nogud. (1 Tesalonaeka 5:14; Ol Proveb 12:25; Jemes 1:27) Sipos yumi mekem olsem, bambae yumi harem gud, be i no hemia nomo. Bambae Jeova i sore long yumi tu.—Ol Wok 20:35; Jemes 2:13.
Tingting i Klin Mo Man Blong Mekem Pis
15. ?Olsem wanem tingting blong yumi i save klin gud mo yumi man blong mekem pis?
15 Nao Jisas i tokbaot namba sikis mo namba seven fasin we i save mekem yumi harem gud. Hem i se: “Olgeta we tingting blong olgeta i klin gud, oli save harem gud, from we bambae oli save luk God. Olgeta we oli man blong mekem pis oli save harem gud, from we God bambae i talem se, ‘Yufala i pikinini blong mi.’ ” (Matiu 5:8, 9) Tingting we i klin gud, hemia tingting we i fulap long ol gudfala klin fasin. Mo tu, hemia tingting we i klin long saed blong spirit mo i wantem tumas blong mekem wok blong Jeova. (1 Kronikel 28:9; Ol Sam 86:11) Ol man blong mekem pis oli gat pis wetem ol Kristin brata sista blong olgeta, mo oli traehad oltaem blong faenem rod blong gat pis wetem ol man raonabaot long olgeta. (Rom 12:17-21) Oli “wok had blong mekem pis.”—1 Pita 3:11.
16, 17. (a) ?From wanem Baebol i talem se ol tabu Kristin oli ‘pikinini blong God’? ?Mo bambae oli “luk God” olsem wanem? (b) ?Olsem wanem “ol narafala sipsip” oli “luk God”? (c) ?Wetaem mo olsem wanem “ol narafala sipsip” bambae oli kam ‘ol pikinini blong God’ fulwan?
16 Promes i go long ol man blong mekem pis we tingting blong olgeta i klin gud, se ‘God bambae i talem se oli pikinini blong hem,’ mo oli “save luk God.” Taem ol tabu Kristin oli stap yet long wol, tabu spirit i makemaot olgeta mo Jeova i adoptem olgeta olsem ol “pikinini” blong hem. (Rom 8:14-17) Taem oli laef bakegen blong stap wetem Kraes long heven, bambae oli stap wok klosap long Jeova we oli save luk hem stret.—1 Jon 3:1, 2; Revelesen 4:9-11.
17 “Ol narafala sipsip” oli mekem wok blong Jeova aninit long rul blong Gudfala Man ya blong Lukaot Long Sipsip, Jisas Kraes, we i save kam ‘Papa blong olgeta we bambae i Stap Oltaem.’ (Jon 10:14, 16; Aesea 9:6) Ol man we oli winim laswan traem long en blong Taosen Yia Rul Blong Kraes, bambae Jeova i adoptem olgeta olsem ol pikinini blong hem we oli stap long wol ya. Nao bambae “oli fri olgeta, olsem ol pikinini blong hem.” (Rom 8:21; Revelesen 20:7, 9) Taem oli stap wet long samting ya, oli singaot Jeova se Papa blong olgeta, from we oli luksave se Hem nao i mekem olgeta, ale oli givim laef blong olgeta fulwan long hem. (Aesea 64:8) Oli olsem Job mo Moses bifo, we tufala i bilif strong long God, ale i olsem we tufala i “stap luk God.” (Job 42:5; Hibrus 11:27) From ol stret save we ol narafala sipsip oli kasem long saed blong God, i olsem we long ‘tingting blong olgeta’ oli luk ol nambawan fasin blong Jeova mo oli traehad blong folem ol fasin ya taem oli mekem ol samting we hem i wantem.—Efesas 1:18; Rom 1:19, 20; 3 Jon 11.
18. ?Ol seven fasin we Jisas i bin tokbaot oli soemaot se hu man we bambae oli harem gud tru tede?
18 Yumi luk finis se olgeta we oli lukaot God from we oli no gat paoa blong hem long laef blong olgeta, olgeta we oli krae, olgeta we oli kwaet man, olgeta we oli wantem tumas stret fasin, olgeta we oli gat sore, olgeta we tingting blong olgeta i klin gud, mo olgeta we oli man blong mekem pis, bambae olgeta evriwan oli harem gud tru taem oli stap mekem wok blong Jeova. Be, long olgeta yia we oli pas finis, plante man oli agensem ol man we oli gat ol fasin ya, mo samtaem oli ronem mo kilim olgeta tu. ?Olsem wanem? ?Trabol ya i mekem se ol man ya oli no moa harem gud? Long nekis stadi, bambae yumi faenem ansa blong kwestin ya.
[Futnot]
^ K.T. i minim Kristin Taem.
Tingtingbak
• ?Olsem wanem olgeta we oli stap lukaot God from we oli no gat paoa blong hem long laef blong olgeta, oli save harem gud?
• ?Olsem wanem olgeta we oli stap krae oli save harem gud?
• ?Olsem wanem yumi soemaot se yumi wan kwaet man?
• ?From wanem yumi mas gat sore long man, tingting blong yumi i mas klin gud, mo yumi mas man blong mekem pis?
[Kwestin]
[Tok blong pija long pej 10]
“Olgeta we oli stap lukaot God from we oli no gat paoa blong hem long laef blong olgeta, oli save harem gud”
[Tok blong pija long pej 10]
“Olgeta we oli gat sore long man, oli save harem gud”
[Tok blong pija long pej 10]
“Olgeta we oli wantem stret fasin, . . . oli save harem gud”