?Tingting Daon Blong Jeova i Impoten Long Yumi Olsem Wanem?

DEVED i wan man we i savegud se laef i olsem wanem taem i gat trabol. Hem i harem nogud tumas from papa blong woman blong hem, hemia King Sol, we i jalus nogud long hem, i stap mekem i nogud long hem. Tri taem, Sol i traem blong kilim Deved i ded wetem wan spia. Mo blong plante yia Deved i mas laef long fasin haed jes from we Sol i stap gohed blong lukaotem hem. (1 Samuel 18:11; 19:10; 26:20) Nating se i olsem, Jeova i pruvum we hem i stap wetem Deved. Jeova i sevem Deved long han blong Sol mo ol nara enemi blong hem tu. Taswe, yumi kasem save ol filing blong Deved long wan singsing we i se: ‘Hae God i wan gudfala ples blong haed blong mi mo hem i stap lukaotgud long mi. Hem i stap blokemgud mi, mo i wan strong sefples blong mi. . . . Hae God. Yu yu stap blokemgud mi, yu stap sevem mi. Fasin blong yu we yu stap givhan long mi [“we yu gat tingting daon,” NW ], hem i stap leftemap nem blong mi. (2 Samuel 22:2, 36) Deved i kam wan hae man long Isrel. ?Olsem wanem Jeova i soemaot tingting daon blong hem long taem ya?

Taem Baebol i tokbaot Jeova se hem i gat tingting daon, hem i no minim se i gat sam samting we Jeova i no naf blong mekem no hem i daon moa long ol narafala man, nogat. Naesfala fasin ya i soemaot se Jeova i gat bigfala sore long ol man we oli traehad blong mekem samting we hem i wantem mo hem i rere blong soemaot sore ya long olgeta. Long Ol Sam 113:​6, 7, yumi ridim se: “[Jeova] i glad blong lukluk i kamdaon long skae mo graon. Hem i stap leftemap ol puaman, i stap tekemaot olgeta long ol trabol blong olgeta.” Hem i “glad blong lukluk i kamdaon” i minim se “hem i bendaon blong lukluk” no “hem i mekem tingting blong hem i stap daon blong lukluk.” (Today’s English Version; Young’s Literal Translation of the Holy Bible) Taswe taem Jeova i stap antap long heven, hem wan i “bendaon,” no i “mekem tingting blong hem i stap daon,” blong lukluk Deved, wan sinman we i gat tingting daon mo we i wantem mekem wok blong God. Taswe, Deved i leftemap tingting blong yumi taem hem i talem se: “Nating we yu [Jeova] yu hae olsem, oltaem yu stap lukaotgud long ol man we tingting blong olgeta i stap daon.” (Ol Sam 138:6) Rod we Jeova i yusum wetem longfala tingting mo fasin sore blong givhan long Deved, i mas leftemap tingting blong olgeta man we oli traehad blong mekem samting we God i wantem.

Nating se Jeova i Hae King, mo hem nomo i hae moa long olgeta samting long heven mo wol, hem i glad blong givhan long yumi wanwan. Samting ya i mekem yumi trastem hem fulwan se hem nomo i save halpem yumi long evri trabol blong yumi,  antap moa taem yumi fesem wan trabol we i bigwan tumas long laef blong yumi. Yumi no gat risen blong talem se Jeova bambae i fogetem yumi. Ol man Isrel bifo, oli tokbaot Jeova se ‘taem ol enemi blong olgeta oli winim olgeta, be hem i no fogetem olgeta. Oltaem bambae hem i lavem yumi gogo i no save finis.’​—Ol Sam 136:23.

Tede ol man blong Jeova oli save kasem trabol olsem Deved. Maet ol man oli jikim yumi no oli laf long yumi from we oli no save God. Maet yumi stap safa from we helt blong yumi i nogud no maet yumi stap harem nogud from we yumi lusum wan famle long ded. Nating se laef blong yumi i olsem wanem, be sipos hat blong yumi i stret, yumi save kam klosap long Jeova tru long prea mo askem hem blong i sore long yumi. Jeova bambae i “bendaon” blong lukluk yumi mo lesin long ol prea blong yumi. Man blong raetem Ol Sam i talem se: “Hae God i stap lukluk long ol stret man, i stap lesin blong harem krae blong olgeta.” (Ol Sam 34:15) Ating fasin ya blong Jeova blong gat tingting daon i rili tajem hat blong yumi.

[Tok blong pija long pej 30]

Tede, Jeova i glad blong harem ol prea blong yumi tu olsem we hem i bin harem ol prea blong Deved