?Yu Harem Finis Glad Ya We i Kamaot From Fasin Blong Givim?

WOMAN ya i bin mekem wok blong Jeova blong klosap 50 yia. Naoia hem i olfala mo helt blong hem i nogud, be nating se i olsem, hem i gat strong tingting blong go luk niufala Haos Kingdom we oli jes bildim. Wan Kristin brata i halpem hem blong wokbaot, mo sista ya i go insaed long Haos Kingdom, go kasem bokis ya blong givim presen mane. Hem i putum smol mane we hem i bin kipim blong putum long bokis ya. Sista ya i no naf blong givhan blong bildim haos, be hem i wantem givhan long wan defren rod.

Ating Kristin sista ya i mekem yu yu tingbaot wan narafala woman we i bin stap tru long God tu. Hemia ‘wido ya we i pua tumas,’ we Jisas i luk se i putum smol vatu long ples blong sakem kleksen insaed long tempol. Baebol i no talem plante samting long saed blong hem, be long taem ya, ol woman we oli no gat hasban oli fesem hadtaem long saed blong mane. Yumi sua we Jisas i haremsave ol filing blong woman ya, from we hem i rili save se laef blong hem i had olsem wanem. Taem Jisas i talemaot hem olsem wan eksampol long ol disaepol blong hem, hem i makem we smol presen blong wido ya i minim “olgeta mane we hem i gat, we i blong pem kakae blong hem long hem.”​—Mak 12:41-44.

?From wanem wan pua woman olsem wido ya i mekem wan bigfala presen olsemia? From we hem i onagud long Jeova God, mo stamba ples blong wosipim Hem i stap long tempol long Jerusalem. Nating se hem i save mekem smol wok nomo, be hem i wantem sapotem tabu wok blong God. Mo yumi sua we hem i rili haremgud long smol presen we hem i bin givim.

Givim Ol Presen Blong Sapotem Wok Blong Jeova

Oltaem, fasin ya blong givim presen mane i bin stap olsem wan haf blong wosip we ol man oli mekem long God, mo fasin ya i bin mekem olgeta oli haremgud. (1 Kronikel 29:9) Long Isrel bifo, oli yusum presen mane blong flasem tempol mo blong pem ol samting we oli nidim blong mekem wosip i gohed evri dei long tempol. Loa i talem se ol man Isrel oli givim ten pesen blong olgeta samting blong olgeta blong sapotem ol Livaet, we oli stap wok long tempol. Be ol Livaet tu oli mas givim ten pesen blong olgeta samting we oli kasem i go long Jeova.​—Namba 18:21-29.

 Ol Kristin oli no moa stap aninit long Loa, be stamba rul i stap yet, se ol man blong God oli mas givim presen mane blong sapotem trufala wosip. (Galesia 5:1) Antap long samting ya, ol Kristin blong faswan handred yia oli glad blong givim presen mane blong sapotem ol brata blong olgeta we oli gat nid. (Ol Wok 2:45, 46) Aposol Pol i talem bakegen long ol Kristin olsem wanem Jeova i givim plante gudfala samting long olgeta, mekem se olgeta tu oli mas glad blong givim long ol narafala. Hem i raetem se: “Yu mas tok strong long olgeta we oli rijman long ol samting blong wol ya, blong oli no letem tingting blong olgeta i go antap tumas. Mo bambae oli no putum tingting blong olgeta long ol mane blong olgeta, from we mane i no wan samting blong stap longtaem. Oli mas putum tingting blong olgeta i stap long God nomo, we hem i stap givim plante samting long yumi, blong yumi harem gud long hem. Yu mas talem long olgeta se oli mas mekem ol gudfala fasin, mo ol gudfala wok, mo oli mas kam rij long fasin ya. Oli mas gat gladhat blong givhan long ol man, mo blong seraot ol samting blong olgeta long ol narafala man. Long fasin ya, i olsem we oli stap putumgud plante gudgudfala samting blong olgeta, we i olsem fandesen blong laef blong olgeta, we i save stap strong oltaem. Nao bambae oli save kasem laef ya we i prapa wan.” (1 Timoti 6:17-19; 2 Korin 9:11) Pol i givim eksampol long saed ya, taswe hem i save talem bakegen ol tok blong Jisas se: “Man we i stap givim presen i go, hem i save harem gud moa, i winim man we i stap kasem presen blong hem.”​—Ol Wok 20:35.

Presen Mane Blong Ol Kristin Tede

Tede, ol man blong Jeova oli yusum olting blong olgeta blong givgivhan long olgeta mo blong sapotem wok blong God. Olgeta we oli gat smol mane nomo oli save givhan tu. ‘Slef we i stret mo waes’ i harem se hem i gat wan bigfala responsabiliti long fored blong Jeova, from we hem i mas yusumgud presen mane blong ol brata sista. (Matiu 24:45, NW ) Hem i yusum mane ya blong mekem ol branj ofis oli wokgud, blong transletem mo wokem ol Baebol wetem ol buk we oli tokbaot Baebol, blong rerem ol bigfala asembli, blong trenem ol seket elda mo ol misinari mo sanem olgeta i go long ol narafala kantri, blong halpem ol brata we oli fesem ol disasta, mo blong mekem plante narafala impoten samting bakegen. Bambae yumi tokbaot  wan long ol impoten samting ya: givim mane blong halpem ol brata we oli nidim ol ples blong wosip.

Ol Witnes blong Jeova oli joen tugeta plante taem long wan wik long ol Haos Kingdom blong olgeta, blong kasem tijing long saed blong spirit mo haremgud tugeta. Be long plante kantri we laef i had long saed blong mane, ol Witnes oli nidim sam help blong faenem mane blong bildim ol Haos Kingdom. Taswe long 1999, ol Witnes blong Jeova oli statem wan program we i yusum mane we i kamaot long ol brata sista we oli laef long ol rij kantri, blong halpem ol brata blong ol pua kantri blong bildim sam Haos Kingdom. Antap long samting ya, plante taosen volontia oli givim taem mo save blong olgeta blong wok long ol pua kantri ya, plante taem long sam ples we oli stap longwe long ol bigfala taon. Taem oli bildim ol Haos Kingdom, ol lokol Witnes oli lanem olsem wanem blong bildim mo lukaot gud long Haos Kingdom blong olgeta, mo wetem mane blong program ya blong wokem ol Haos Kingdom, oli pem ol tul mo ol narafala samting we oli nidim. Ol Witnes we oli go long ol miting long ol niufala Haos Kingdom ya oli tangkiu tumas long ol brata sista we oli bin givim taem mo mane blong olgeta blong bildim ol haos ya. Evri manis, oli givim sam mane blong lukaot long niufala Haos Kingdom blong olgeta mo pembak ol samting we oli bin yusum blong bildim hem. Olsemia, oli givhan blong bildim sam moa Haos Kingdom bakegen.

Blong bildim ol Haos Kingdom, ol brata sista oli yusum ol fasin mo olting blong ol manples. Ol Haos Kingdom ya oli no flas tumas, be oli naes, oli stret blong wok we i stap gohed insaed long olgeta, mo ol man oli haremgud insaed. Samwe 40 kantri we oli no gat naf mane oli joen long program ya taem i stat long 1999. Kam kasem tede, 116 kantri olsemia oli joen long program ya, hemia bitim stret haf blong olgeta kongregesen blong ol Witnes blong Jeova long wol. !Long ol faef yia we oli jes pas, oli bildim 9,000 Haos Kingdom folem program ya, minim se evri dei oli wokem samwe 5 niufala bilding! Nating se i olsem, long ol 116 kantri ya oli nidim yet 14,500 Haos Kingdom. Yumi hop se blesing blong Jeova mo presen mane blong ol Witnes blong Jeova raon long wol bambae oli sapotemgud program ya blong wokem ol Haos Kingdom, blong oli save bildim olgeta Haos Kingdom we ol brata oli nidim.​—Ol Sam 127:1.

 Ol Haos Kingdom Oli Pulum Plante Moa Man i Kam Long Trutok

?Olsem wanem long ol Witnes we oli laef long ol ples ya we oli bildim ol Haos Kingdom, mo long wok blong prij long teritori blong olgeta? ?Wanem frut i kamaot afta bigfala wok ya? Long plante ples, plante moa man oli kam long ol miting afta we oli bin bildim wan niufala Haos Kingdom. Ripot we i kam biaen i kamaot long Burundi. Hem i talem se: “Taem wan Haos Kingdom i finis, plante man oli kam long miting. Eksampol, oli bildim wan Haos Kingdom blong wan kongregesen we bifo, i gat samwe 100 man i stap kam long ol miting. Long niufala Haos Kingdom i gat 150 jea. Taem Haos Kingdom ya i finis, 250 man oli kam long ol miting.”

?From wanem plante moa man oli kam? Wan risen hemia se bifo, taem ol pablisa oli no gat wan ples blong joen tugeta mo oli mas stap aninit long wan tri no long bus, ol man oli save ting nogud long olgeta. Long wan kantri, ol man oli ting se raf fasin agensem sam laen i kamaot long ol smol grup blong skul we oli hivap olsem, taswe gavman i putum wan loa se olgeta jos oli mas holem ol miting blong olgeta insaed long wan haos blong wosip.

Mo tu, naoia we ol Witnes blong Jeova oli gat prapa haos wosip blong olgeta, ol man raonabaot oli luksave se ol Witnes oli no folem wan pasta. Branj ofis blong ol Witnes blong Jeova long Simbabwe i raetem se: “Bifo, ol brata long ples ya oli joen tugeta insaed long haos blong wan brata, mo ol manples oli luk brata ya we haos i blong hem olsem lida blong kongregesen.  Oli tokbaot ol brata olsem ol man we oli joen long jos blong Masta Hemia. Samting ya i jenis naoia, from we ol man oli luk ol saen we oli talem klia se hemia wan ‘Haos Kingdom blong ol Witnes blong Jeova.’ ”

Oli Givim Long Gladhat Blong Olgeta

Aposol Pol i raetem tok ya se: “God i lavem man we i save givim samting long gladhat blong hem.” (2 Korin 9:7) I tru se ol bigfala presen mane oli givhan bigwan. Be bighaf blong ol presen mane we i sapotem wok blong prij blong ol Witnes blong Jeova i kamaot long ol bokis blong givim presen mane we oli stap long ol Haos Kingdom. Nomata se presen mane ya i bigwan no i smol, be olgeta evriwan i impoten. Rimemba se Jisas i stap long wan ples we hem i save luk pua wido ya we i givim smol vatu blong hem. Ol enjel mo Jeova tu, oli luk wido ya. Yumi no save nem blong wido ya, be Jeova i meksua se gudfala fasin blong hem i stap long Baebol blong ol man oli rimemba hem oltaem.

Ol presen mane blong yumi oli givhan blong bildim ol Haos Kingdom, mo tu oli sapotem ol narafala wok blong Kingdom. Sipos yumi givim presen mane, bambae yumi haremgud mo yumi gat risen blong “talem tangkiu long God.” (2 Korin 9:12) Ol brata blong yumi long Benin oli talem se: “Evri dei, plante brata sista oli prea long Jeova blong talem tangkiu from ol presen mane we ol brata sista long fulwol oli givim blong halpem olgeta.” !Long sem taem, yumi evriwan we i givim presen mane blong sapotem wok blong Kingdom, yumi harem glad ya we i kamaot from Kristin fasin blong givim!

[Bokis/Foto blong pija long pej 22, 23]

Ol Rod We Samfala Oli Folem Blong Givim Presen Mane

BLONG SAPOTEM WOK LONG OLGETA PLES LONG WOL

Plante man oli makemaot, no mekem plan, blong hamas mane we bambae oli putum long bokis blong presen mane, we oli raetem long hem se “Presen Mane Blong Sapotem Wok Blong Prij Long Ful Wol​—Matiu 24:14.”

Evri manis, ol kongregesen oli sanem mane ya i go long ofis blong ol Witnes blong Jeova we i lukaot long wok long kantri blong olgeta. Yu yu save sanem presen mane i go long branj ofis we i lukaot long kantri blong yu. Sipos yu sanem wan jek, yu mas raetem i go long “Watch Tower.” Ol gol jen, sas ston mo ol narafala sas samting yu save givim tu olsem presen. Yu mas sanem wan sotfala leta i go wetem ol presen ya blong talemaot se yu givim samting ya olsem wan presen nomo.

PRESEN MANE WE MAN I SAVE KASEMBAK SIPOS I NIDIM

Man i save givim presen mane folem wan spesel rod, mekem se sipos man ya i wantem kasembak mane ya, bambae Sosaeti i givimbak long hem. Blong kasem moa save long saed ya, plis raet i go long branj ofis we i lukaot long kantri blong yu.

PLAN WE MAN I FOLEM BLONG GIVIM PRESEN MANE

Antap long ol presen mane we man i save givim stret, mo mane we hem i save kasembak sipos i nidim, i gat sam narafala rod blong givim presen we oli save givhan long wok blong Kingdom long olgeta ples long wol. Sam long olgeta ya hemia:

Insurens: Man i save mekem se Watch Tower Sosaeti i kasem mane blong wan laef insurens, no mane blong pem yia blong hem taem i ritae long wok, no mane we sam kampani oli givim long ol olfala.

Ol Bank Kaon: Folem ol rul blong bang long ples blong wanwan man, man i save mekem we mane we bang i holem long kaon blong hem, mane we hem i putum long wan spesel kaon go kasem wan stret taem, no mane we hem i kasem taem hem i ritae, i go long han blong Watch Tower Sosaeti no i givim long olgeta taem hem i ded.

Ol Stok Mo Bon: Man i save givim stok mo bon oli go fulwan long Watch Tower Sosaeti olsem presen nomo.

Graon Mo Haos: Man i save givim graon no haos blong hem i go long Watch Tower Sosaeti, blong oli salem biaen. Sipos no, man i save folem plan se Sosaeti i kasem haos no graon ya taem hem i ded, be man ya i save gohed blong stap long haos ya long fulwan laef blong hem. Yu mas toktok wetem branj ofis we i lukaot long kantri blong yu bifo we yu givim graon no haos long Sosaeti.

Lastok Blong Man Bifo We Hem i Ded Mo Plan Blong Holem Mane i Stap Kasem Ded: Man i save givim graon no haos no mane blong hem long Watch Tower Sosaeti taem hem i raetem wan pepa folem loa, we i olsem lastok blong hem bifo we hem i ded. Sipos no, bang i save holem mane blong man ya i stap, blong i go long Watch Tower Sosaeti taem man ya i ded. Mane we bang i holem blong givhan long wan skul, maet man i no nidim blong pem takis long hem.

Ol man we oli intres long eniwan long olgeta plan ya blong givim presen, oli mas raetem leta i go long ofis blong Sosaeti we i lukaot long kantri blong olgeta.

[Tok blong pija long pej 20, 21]

Sam olfala mo sam niufala ples blong miting blong ol Witnes blong Jeova

Sambia

Ripablik blong Sentrol Afrika