Jeova Bambae i Jajem Ol Rabis Man
Jeova Bambae i Jajem Ol Rabis Man
“Yufala evriwan i mas mekemrere blong kam stanap long fes blong [God].”—AMOS 4:12.
1, 2. ?From wanem yumi save sua se God bambae i finisim ol rabis fasin long wol ya?
?OLSEM wanem? ?Bambae Jeova i finisim ol rabis man wetem ol trabol long wol ya? Long taem blong yumi, kwestin ya i stap long tingting blong plante moa man i bitim olgeta taem bifo. Long evri ples, yumi luk we ol man oli stap spolem mo mekem i nogud long ol narafala man. !Yumi wantem tumas blong luk en blong raf fasin, wok blong ol teroris, mo kruked fasin!
2 Be i gat gud nius i stap. Yumi save trastem Jeova fulwan se hem bambae i finisim rabis fasin. Ol nambawan fasin blong God oli mekem yumi sua se hem bambae i spolem ol rabis man. Jeova i stap mekem i stret oltaem mo hem i stap jajem man long stret fasin. Ol Sam 33:5 i talem se: “Hae God i laekem ol fasin we i stret.” Mo wan narafala Sam i talem se, Jeova “i no laekem nating olgeta we oli laekem tumas blong mekem faet.” (Ol Sam 11:5) Tru ya, Jeova we i gat olgeta paoa mo i laekem stret fasin, i no save letem ol rabis fasin we hem i no laekem nating, i stap blong olwe.
3. ?Bambae yumi tokbaot wanem samting long profet tok blong Amos?
3 I gat wan narafala risen we i mekem yumi sua se Jeova bambae i finisim rabis fasin. Ol samting we hem i mekem finis long taem bifo oli olsem promes se bambae hem i finisim rabis fasin bakegen. Buk blong Amos long Baebol i soemaot klia se Jeova bambae i jajem ol rabis man. Taem yumi gohed blong stadi long profet tok ya blong Amos, bambae yumi luk tri samting long saed blong jajmen blong God. Faswan se, Jeova bambae i panisim ol man nomo we i stret blong panisim olgeta. Seken samting se, ol man oli no save ronwe long jajmen blong Jeova. Mo namba tri samting se, Jeova i no save spolem evri man, bambae hem i sore long ol man we oli tanem tingting blong olgeta mo we hat blong olgeta i stret.—Rom 9:17-26.
I Stret We Jeova i Jajem Ol Rabis Man
4. ?Jeova i sanem Amos i go wea? ?Amos i mas mekem wanem long ples ya?
4 Long taem blong Amos, ol laen blong Isrel oli seraot long tu haf finis. Tu laen i mekemap kingdom blong Juda long saot. Ten narafala laen oli mekemap kingdom blong Isrel long not. Jeova i jusumaot Amos blong i talemaot ol profet tok blong Hem. Amos i mas aot long ples blong hem long Juda, i mas wokbaot i go long Isrel. Long ples ya, God i yusum hem blong talemaot jajmen blong Hem.
5. ?Amos i talemaot profet tok agensem hu fastaem? ?From wanem i stret we Jeova i jajem ol kantri ya?
5 Amos i no talemaot jajmen blong Jeova fastaem long ol stronghed man Isrel long not. Nogat. Hem i talemaot jajmen blong God fastaem long sikis kantri we oli stap raonabaot long Isrel, hemia, Siria, Filistia, Taea, Edom, Amon, mo Moab. ?Be i stret we God i jajem ol kantri ya? Yes i stret nomo. Olgeta ya oli strong enemi blong ol man blong Jeova.
6. ?From wanem God i wantem spolem ol man Siria, Filistia, mo Taea?
6 Jeova i jajem ol man Siria from we ‘oli spolemgud ol man Gilead, oli no gat sore.’ (Amos 1:3) Ol man Siria oli tekem graon blong ol man Gilead, hemia wan haf blong Isrel long is saed blong Jodan Reva. Mo tu, long ples ya ol man Siria oli faetem nogud ol man blong God. ?Olsem wanem long Filistia mo Taea? Ol man Filistia oli holem ol man Isrel oli stap kalabus. Oli salem sam long olgeta oli go long ol man Edom tu, mo samfala oli go long han blong ol man Taea we oli mekem bisnes blong pem mo salem ol slef. (Amos 1:6, 9) !Tingbaot samting ya! !Oli salem ol man blong God blong oli kam slef! Taswe i stret nomo we Jeova i spolem ol man Siria, Filistia, mo Taea.
7. ?Wanem samting long saed blong Edom, Amon, mo Moab, we i sem mak long ol man Isrel? ?Be trifala kantri ya oli mekem olsem wanem long ol man Isrel?
7 I gat wan samting long saed blong trifala kantri ya Edom, Amon, mo Moab, we i sem mak long ol man Isrel. Ol man blong trifala kantri ya oli famle nomo blong ol man Isrel. Ol man Edom oli laen blong Ebraham. Oli kamaot long Esao, we hem mo Jekob tufala i twin. Taswe ol man Edom oli olsem ol brata blong ol man Isrel nomo. Ol man Amon mo Moab oli kamaot long Lot, boe blong brata blong Ebraham. ?Be olsem wanem? ?Ol man Edom, Amon mo Moab, oli mekem i gud long ol brata blong olgeta long Isrel? !Nogat! Ol man Edom oli no gat sore, oli ronem mo kilim i ded ‘ol brata blong olgeta.’ Mo ol man Amon tu, oli kilim i ded ol man Isrel we oli slef blong olgeta, olsem we i wan pleplei blong olgeta nomo. (Amos 1:11, 13) Amos i no talem stret ol nogud samting we ol man Moab oli mekem long ol man blong God, be longtaem finis i kam, olgeta ya oli agensem ol man Isrel. Panis blong trifala brata kantri ya bambae i strong. Jeova bambae i spolem ol man ya olsem we faea i kakae olgeta.
No Save Ronwe Long Jajmen Blong God
8. ?From wanem sikis kantri klosap long Isrel oli no save ronwe long jajmen blong Jeova?
8 I klia se i stret nomo we God i jajem sikis kantri ya we Amos i tokbaot long fashaf blong profet tok blong hem. Antap moa, oli no save ronwe long jajmen ya. Stat long Amos japta 1, vas 3, go kasem japta 2, vas 1, Jeova i talem sikis taem se: “Tru, mi talem long yufala, mi bambae mi panisim olgeta.” Ale, Jeova i mekem olsemia, hem i panisim ol kantri ya. Ol stori blong histri oli soemaot se trabol i kasem olgeta, mo i spolem olgeta. !Yes, fofala kantri ya blong Filistia, Moab, Amon, mo Edom oli lus olgeta, mo oli neva stanap bakegen!
9. ?I stret se wanem samting bambae i kasem ol man Juda? ?From wanem i stret?
9 Naoia Amos i tokbaot namba seven kantri, hemia stret ples blong hem, Juda. Ating ol man long kingdom blong Isrel long not oli sapraes blong harem tok blong Amos we i jajem kingdom blong Juda. ?From wanem i stret we Jeova i jajem Juda? Amos 2:4 i talem se: “Olgeta oli tanem baksaed long ol tok blong [Jeova].” Jeova i no glad nating long man we i tanem baksaed long Loa blong hem. Amos 2:5 i talem se: “Bambae mi bonem olgeta ples blong olgeta. Ol strong ples blong haed blong olgeta long Jerusalem, bambae mi bonem olgeta evriwan.”
10. ?From wanem Juda i no save ronwe long panis blong hem?
10 Ol man Juda we oli no stap tru long God, oli no save ronwe long panis blong olgeta. Namba seven taem, Jeova i talem se: “Tru, mi talem long yufala, mi bambae mi panisim olgeta.” (Amos 2:4) Panis ya i kamtru long Juda long yia 607 B.K.T., taem ol man Babilon oli kam spolemgud ples blong olgeta. Bakegen, yumi luksave se ol rabis man oli no save ronwe long jajmen blong God.
11-13. ?Amos i talemaot profet tok agens long wanem kantri fastaem? ?Ol man long kantri ya oli stap mekem wanem nogud fasin long ol narafala?
11 Profet Amos i talemaot jajmen blong Jeova long seven kantri ya. !Be profet tok blong hem i no finis long ples ya! God i givim wok long hem fastaem blong talemaot ol tok panis long kingdom blong Isrel long not. I stret nomo we Jeova i jajem ol man ya, from we fasin blong laef blong olgeta mo wosip blong olgeta tu i kam nogud olgeta.
12 Profet Amos i soemaot klia ol rabis fasin we ol man long kingdom blong Isrel oli stap mekem long ol brata blong olgeta. Long saed ya, Amos 2:6, 7 (NW) i talem se: “Jeova i talem se, ‘From trifala samting we ol man Isrel oli mekem agens long mi, yes, from fo samting, bambae mi no save holembak panis long olgeta. Olgeta ya oli stap salem ol stret man blong oli kasem silva, mo oli stap salem ol puaman olsem slef, blong kasem mane we i praes blong sandel nomo. Oli stap sotwin blong sakem graon long hed blong ol man we oli no gat nem, mo oli no wantem nating blong halpem ol man we oli gat tingting daon.’ ”
13 !Traem tingbaot! Oli stap “salem” ol stret man blong oli kasem silva. Ating tok ya i min se ol jaj oli letem ol man oli pem olgeta blong oli jajem ol man we oli no gat fol mo givim panis long olgeta. Mo tu, ol man we narafala i kaon long olgeta, maet from wan smol samting nomo, oli stap salem olgeta olsem slef, blong kasem mane we i praes blong “sandel” nomo. Ol man ya we oli no gat sore nating, oli “stap sotwin,” i min se oli wantem tumas blong daonem “ol man we oli no gat nem,” gogo ol puaman ya oli sakem graon long prapa hed blong olgeta blong soemaot se oli harem nogud, oli stap krae, mo oli sem. Kruked fasin i fulap, mekem se i no gat wan stret man nating we i save givhan long “ol man we oli gat tingting daon.”
14. ?Long ten laen blong Isrel, hu ol man we ol narafala oli stap mekem i nogud long olgeta?
14 Makemgud hu ol man we ol narafala oli stap mekem i nogud long olgeta. Hemia ol stret man, ol puaman, ol man we oli no gat nem, mo ol man we tingting blong olgeta i stap daon. Loa we Jeova i givim long ol man Isrel i talem finis se oli mas gat sore long ol puaman mo ol man we oli trabol. Be oli no stap mekem samting ya. Taswe, plante man long ten laen ya blong Isrel, oli stap harem nogud bitim mak.
‘Mekemrere Blong Stanap Long Fes Blong God’
15, 16. (a) ?From wanem ol man Isrel oli kasem woning ya se ‘oli mas mekemrere blong kam stanap long fes blong God’? (b) ?Amos 9:1, 2 i talem wanem blong soem se ol rabis man oli no save ronwe long jajmen blong God? (c) ?Long yia 740 B.K.T., wanem i hapen long ten laen blong Isrel?
15 Isrel i fulap long rabis fasin long saed blong seks mo ol narafala nogud fasin. Taswe, profet Amos i givim woning long stronghed nesen ya se: ‘Yufala i mas mekemrere blong kam stanap long fes blong God.’ (Amos 4:12) Ol man Isrel we oli no stap tru long God oli no save ronwe long jajmen blong Hem we i stap kam klosap. Namba eit taem Jeova i talem se: “Tru, mi talem long yufala, mi bambae mi panisim yufala.” (Amos 2:6) God i tokbaot ol man nogud we oli traem haed, i se: “Bambae i no gat wan long olgeta i save ronwe blong go haed. Bambae i no gat wan long olgeta nating i stap. Nating we sam long olgeta oli digim hol i godaon blong go haed long Hom blong ol Dedman, be bambae mi tekemaot olgeta i kam antap bakegen. Mo nating we sam long olgeta oli ronwe i go antap i kasem long skae, be bambae mi tekemaot olgeta i kamdaon bakegen.”—Amos 9:1, 2.
16 Ol rabis man oli no save ronwe long jajmen blong Jeova, nating se oli go haed “long Hom blong ol Dedman,” we i minim ol ples aninit long graon. Oli no save ronwe ‘i go antap kasem skae’ tu, hemia i min se antap long ol bigbigfala hil. Woning blong Jeova i klia nomo: Nomata weples ol man oli go long hem blong traem haed, be Jeova i save faenem olgeta. Folem stret fasin, Jeova i mas givim panis long kingdom blong Isrel from ol rabis wok blong hem. Stret taem blong panis ya i kam long yia 740 B.K.T., hemia 60 yia afta we Amos i talemaot profet tok ya. Long taem ya, ol ami blong Asiria oli kam spolemgud kingdom blong Isrel.
God i Sevem Samfala
17, 18. ?Amos japta 9 i soemaot wanem samting long saed blong fasin sore blong God?
17 Yumi luk tu samting finis long profet tok blong Amos. Faswan samting se, Jeova i panisim ol man nomo we i stret blong panisim olgeta, mo seken samting se, ol rabis man oli no save ronwe long jajmen blong Jeova. Be buk blong Amos i soemaot tu se Jeova i no save spolem evri man, bambae hem i sevem samfala. Nomata weples ol rabis man oli haed, God i save faenem olgeta mo panisim olgeta. Be hem i save faenem ol gudfala man tu, olgeta we oli tanem tingting blong olgeta, mo olgeta we hat blong olgeta i stret, yes, hem i save sore long olgeta ya. Ol gudfala tok long las japta blong buk blong Amos i soemaot samting ya.
18 Amos japta 9, vas 8, i talemaot tok blong Jeova se: “Bambae mi no save kilim yufala evriwan we i laen blong Jekob.” Long vas 13 kasem 15, Jeova i promes blong ‘tekem ol man blong hem we oli stap olbaot long ol narafala kantri, oli kambak’ long ples blong olgeta. Bambae hem i sore long olgeta, mo bambae oli stapgud we oli gat plante samting. Jeova i promes se: “Bambae ol garen oli stap gru kwiktaem nomo, we ol kakae blong hem bambae oli plante we plante, ol man bambae oli no naf blong karem i kam.” Tingbaot—bambae i gat plante tumas kakae. !Bambae oli no naf blong karem ol kakae ya i kam, bambae oli stap karem kakae i kam yet, nao oli sek se i taem blong brasem garen mo planem kakae bakegen!
19. ?Wan smol grup blong ol man Isrel mo Juda oli mekem wanem?
19 Yumi luksave long jajmen we Jeova i mekem long Juda mo Isrel, se hem i no save spolem evri man. Hem i sore long ol man we oli tanem tingting blong olgeta mo ol man we hat blong olgeta i stret. Olsem profet tok blong Amos japta 9 i talem, wan smol grup blong ol man Isrel mo Juda oli tanem tingting blong olgeta, nao oli aot long wok slef long Babilon, oli kambak long ples blong olgeta. Samting ya i hapen long yia 537 B.K.T. Taem oli kambak long ples blong olgeta, oli mekem trufala wosip i stanap strong bakegen. Oli haremgud mo sef, ale oli bildim bakegen ol haos blong olgeta mo oli planem bakegen garen blong olgeta wetem ol plantesen blong grep.
!Jajmen Blong Jeova Bambae i Kamtru!
20. ?Ol jajmen blong God we Amos i talemaot oli mas mekem yumi sua long wanem samting?
20 Jajmen blong God we Amos i talemaot i mas mekem yumi sua se Jeova bambae i finisim ol rabis fasin long taem blong yumi. ?From wanem yumi save bilif strong long samting ya? Faswan risen se, ol panis we God i givim long ol rabis man long taem bifo oli soemaot samting we bambae hem i mekem bakegen long taem blong yumi. Seken risen se, jajmen blong God long kingdom blong Isrel we i lego Hem, i soemaot klia se God bambae i spolem Krisendom, hemia haf blong ol giaman skul long “Bigfala Babilon” we oli gat fol moa long fes blong God.—Revelesen 18:2, NW.
21. ?From wanem i stret nomo we God i jajem Krisendom?
21 I klia nomo se Krisendom i mas kasem jajmen blong God. Olgeta man oli stap luk ol rabis fasin mo giaman wosip blong hem. I stret nomo we Jeova i jajem Krisendom wetem ol narafala haf blong wol blong Setan. I no gat man i save ronwe long jajmen ya. Long taem ya we God i tekem aksin, tok blong Amos japta 9, vas 1, bambae i kamtru: “Bambae i no gat wan long olgeta i save ronwe blong go haed. Bambae i no gat wan long olgeta nating i stap.” Yes, nomata weples ol rabis man oli traem haed, be Jeova bambae i faenem olgeta.
22. ?Wanem sam samting long saed blong jajmen blong God we 2 Tesalonaeka 1:6-8 i soemaot klia?
22 Oltaem God i panisim ol man we i stret blong panisim olgeta, oltaem man i no save ronwe long jajmen blong hem, mo oltaem hem i sevem ol gudfala man. Yumi luk samting ya long ol tok blong aposol Pol se: “Long olgeta ya we oli stap mekem yufala i harem nogud, i stret nomo blong God i givimbak fasin ya long olgeta. Mo i stret nomo blong God i givim spel long yufala, we naoia yufala i stap harem nogud, mo long mitrifala tu. Hem bambae i mekem olsem long taem ya we Jisas, Masta blong yumi, bambae i aot long heven, i kamtru long yumi, wetem ol strong enjel blong hem, mo faea we i laet. Hem bambae i kam blong givim panis long olgeta we oli no save ona long God, mo long olgeta we oli no save obei long gud nius blong Jisas, Masta blong yumi.” (2 Tesalonaeka 1:6-8) Yes, “i stret nomo” we God i givimbak long ol man we oli stap mekem ol tabu Kristin oli harem nogud. Ol rabis man ya oli no save ronwe long jajmen ya. Bambae oli ded long taem ya we ‘Jisas i kamtru wetem ol strong enjel blong hem mo faea we i laet.’ God bambae i jajem ol rabis man nomo, olsem nao, bambae Jisas i givimbak “long olgeta we oli no save ona long God, mo long olgeta we oli no save obei long gud nius.” Ol man we oli ona long God mo we ol narafala oli stap mekem i nogud long olgeta, bambae oli haremgud tumas taem oli luk jajmen ya blong God i kamtru.
Hop Blong Ol Gudfala Man
23. ?Wanem nambawan hop we buk blong Amos i givim?
23 Profet tok blong Amos i givim wan nambawan hop long ol man we hat blong olgeta i stret. Amos i soemaot se long taem bifo, Jeova i no spolem olgeta man blong hem. Hem i tekemaot wan smol grup blong ol man Isrel mo Juda we oli stap wok slef, i mekem rod blong oli kambak long ples blong olgeta, nao hem i blesem olgeta, i mekem se oli stapgud mo oli gat plante samting. ?Wanem mining blong samting ya long taem blong yumi? Samting ya i mekem yumi sua se taem Jeova i jajem ol man, i no ol rabis man we oli traem haed nomo we Jeova bambae i faenem olgeta, be bambae hem i faenem tu ol man we hat blong olgeta i stret, mo bambae hem i soem sore long olgeta, nomata weples oli stap long wol.
24. ?Olsem wanem Jeova i stap blesem ol man blong hem tede?
24 ?Olsem wanem long yumi ol man blong Jeova, taem yumi stap wet blong Jeova i mekem jajmen blong hem i kamtru long ol rabis man? !Taem yumi stap wet, Jeova i stap blesem yumi, i mekem se yumi gat plante samting long saed blong spirit! Yumi mekem wosip we i klin, yumi no bilif long ol giaman tijing blong Krisendom mo ol tok we i hafhaf. Mo tu, Jeova i blesem yumi wetem fulap kakae long saed blong spirit. Be yumi no mas fogetem se, taem yumi kasem ol nambawan blesing ya long Jeova, yumi gat wan wok blong mekem. God i wantem se yumi givim woning long ol man long saed blong jajmen we i stap kam. Yumi mas wantem mekem evri samting we yumi save mekem, blong faenem olgeta we “oli stret blong kasem laef blong olwe.” (Ol Wok 13:48, NW ) Yes, yumi wantem givhan long olgeta man blong oli haremgud long ol blesing we yumi stap kasem long saed blong spirit. Mo yumi wantem se oli no ded long taem ya we Jeova bambae i mekem jajmen blong hem i kamtru long ol rabis man. Be, blong yumi kasem ol blesing ya, hat blong yumi i mas stret. Long nekis stadi, bambae yumi luk olsem wanem profet tok blong Amos i makem poen ya.
?Bambae Yu Yu Ansa Olsem Wanem?
• ?Olsem wanem profet tok blong Amos i soemaot se oltaem Jeova i panisim ol man nomo we i stret blong panisim olgeta?
• ?Olsem wanem Amos i soemaot se ol rabis man oli no save ronwe long jajmen blong God?
• ?Olsem wanem buk blong Amos i soemaot se God bambae i sevem ol gudfala man?
[Kwestin]
[Tok blong pija long pej 17]
Kingdom blong Isrel i no save ronwe long jajmen blong God
[Tok blong pija long pej 18]
Long yia 537 B.K.T., wan smol grup blong ol man Isrel mo Juda oli aot long wok slef long Babilon, oli kambak long ples blong olgeta