Ol Nambawan Samting We Jeova i Wokem

‘!Jeova, Yu Yu Mekem Plante Naranarafala Samting!’

NATING we yumi laef long taon no long wan vilej, antap long ol hil no klosap long solwota, yumi gat ol nambawan samting we Jeova i wokem i stap raonabaot long yumi. Taswe long 2004 Calendar of Jehovah’s Witnesses i gat plante naesfala pija blong ol nambawan samting we Jeova God i wokem.

Ol man we oli gat bigfala tangkiu, oltaem oli intres long ol samting we God i wokem. Wan eksampol, tingbaot Solomon we i waes moa “winim ol waes man blong ol kantri saed i go long is.” Baebol i talem se: “Hem i savegud fasin blong olgeta tri mo gras, i stat long ol bigbigfala tri olsem sida long Lebanon, i go kasem ol smosmol gras olsem hisop we i stap gru long ol stonwol olbaot. Mo hem i savegud fasin blong ol anamol, mo ol pijin, mo ol samting olsem lised mo snek, mo ol fis tu.” (1 King 4:​30, 33) King Deved, we i papa blong Solomon, i tingting dip oltaem long ol nambawan wok blong God. Samting ya i pusum hem blong talem tok ya long God ya we i Wokem hem, se: “[Jeova]. Yu yu mekem plante naranarafala samting, mo olgeta evriwan oli stap soemaot we fasin blong yu blong wokem olgeta i waes we i waes. Wol ya i fulap long olgeta samting we yu yu mekem.”​—Ol Sam 104:24. *

Yumi tu, yumi mas luklukgud mo tingting dip long ol samting we God i wokem. Eksampol, i gud yumi “traem luk antap long skae” mo askem se: ‘?Hu i wokem olgeta sta ya?’ !Yes, hemia Jeova God we “paoa blong hem i strong we i strong”!​—Aesea 40:26, NW.

?Taem yumi tingting dip long ol samting we Jeova i wokem, samting ya i mekem wanem long yumi? Samting ya i save givhan long yumi long tri rod. Faswan rod hemia se, oli save mekem yumi tinghae oltaem long laef. Namba tu rod se, oli save pusum yumi blong wantem halpem ol narafala blong olgeta tu oli lanem samting from ol samting ya we God i wokem. Mo namba tri rod se, oli save pulum yumi blong wantem soemaot tangkiu long God ya we i Wokem yumi mo blong save Hem moa.

Laef blong yumi ol man i hae moa long ol ‘anamol we oli no gat tingting.’ (2 Pita 2:​12) Ae blong yumi i save luk ol naesfala ples. Sora blong yumi i save harem ol naesfala singsing blong ol pijin. From we tingting blong yumi i save luksave taem mo ples we yumi stap long hem, yumi save rimemba ol samting we yumi bin mekem mo ol ples we yumi bin go long hem mo gat ol gudfala memori. !Nating we laef blong yumi naoia i no stret gud olgeta, be yumi harem gud long laef!

Ol papa mama oli glad blong luk taem we ol pikinini blong olgeta oli laekem ol samting we God i wokem. !Ol pikinini oli laekem tumas blong faenem ol sel long solwota, oli laekem blong pleplei wetem ol anamol, mo blong klaemap long wan tri! Ol papa mama oli wantem givhan long ol pikinini, blong oli luksave se i gat wan God i stap we hem i wokem ol samting ya raonabaot long olgeta. Bigfala ona mo respek we wan pikinini i gat, i save stap wetem hem long ful laef blong hem.​—Ol Sam 111:​2, 10.

Sipos yumi laekem blong luk ol samting we God i wokem, be yumi neva tinghae long ol samting ya, i olsem se ae blong yumi i nogud. Profet tok blong Aesea i givhan long yumi blong tingting dip long ol samting we God i wokem, taem hem i talem olsem se: “?Weswe? ?Yufala i no save? ?Yufala i no harem  stori blong hem? Hae God ya, hem i God we i stap oltaem, mo bambae i stap gogo i no save finis. Hem nao i mekem olgeta samting long wol ya. Neva hem i save kam taed, neva hem i save harem se i slak. Mo i no gat man we i save kasem tingting blong hem.”​—Aesea 40:28.

I tru, ol samting we Jeova i wokem oli soemaot waes blong hem, paoa blong hem we i bitim ol narafala man, mo dip lav we hem i gat long yumi. Taem yumi luk ol naesfala samting raonabaot long yumi mo yumi tingbaot ol fasin blong Man we i Wokem olgeta samting ya, i gud we yumi talem ol semfala toktok ya we Deved i bin talem se: “[Jeova], i no gat narafala god we i olsem yu. . . . I no gat wan i stap we i stap mekem ol gudgudfala wok olsem we yu yu bin mekem.”​—Ol Sam 86:8.

Yumi save sua se ol man we oli obei bambae oli save laef blong olwe mo harem gud long ol samting we Jeova i wokem. Bambae yumi gat janis blong kasem moa save long saed blong Jeova oltaem gogo i no save finis. (Prija 3:​11) Moa we bambae yumi kasem save long saed blong hem, moa we bambae yumi lavem God ya we i Wokem yumi.

[Futnot]

[Bokis blong pija long pej 9]

Presem God Ya We i Wokem Olgeta Samting

Plante man blong sayens oli luksave se i gat wan God i stap we hem i wokem olgeta samting. Hemia sam eksampol:

“Mi kasem glad mo mining long wok blong mi olsem wan sayentis, taem mi faenemaot ol niufala samting. Mo mi stap talem long mi wan se, ‘Hemia nao olsem wanem God i wokem samting ya.’ Mak blong mi i blong traem kasem save smol long ol plan blong God.”​—Henry Schaefer, wan tija blong kemistri.

“Olsem wanem yunivas i stat mo i bigwan olsem wanem, hem i samting we wanwan man i mas tingbaot. Be yumi no naf blong kasem fulwan save long samting ya sipos yumi no bilif se God i stap.”​—Edward Milne, wan sayentis we i stadi long yunivas.

“Matematik we i eksplenem ol samting raonabaot long yumi hem i beswan matematik from we God nao i wokem ol samting ya.”​—Alexander Polyakov, wan man Rasia we i gat save long matematik.

“Taem yumi mekem stadi long ol samting we i stap long yunivas, yumi stap lukluk i go insaed long ol plan blong God ya we i wokem olgeta samting ya. Yumi kasem save ol tingting blong hem, mo yumi stap eksplenem wan samting ya we i blong Hem nomo, i no blong yumi.”​—Louis Agassiz, wan man blong stadi long ol laef samting.

[Tok blong pija long pej 8, 9]

Wan kaen pijin blong solwota we oli kolem Gentoo penguin, long Antaktik Peninsula

[Tok blong pija long pej 9]

Nasnal Pak ya we oli kolem Grand Teton long Wyoming, Yunaeted Stet

[Credit Line]

Jack Hoehn/Index Stock Photography