?Ol Man Oli Save Laef Hamas Yia?

LONG Maj 3, 1513, wan man Spen, nem blong hem Juan Ponce de Leon, we wok blong hem i blong faenem ol niufala aelan, i aot long sip blong mekem wan bigfala trip. Hem i lego Puerto Rico, i stap go from aelan blong Bimini. Ol stori oli talem se hem i stap lukaotem wan springwota we i gat paoa blong mekem merikel​—hemia Wota We i Mekem Man i Kam Yangfala Bakegen. Be Juan Ponce de Leon i goso long wan ples we naoia hem i kantri ya Florida, long Yunaeted Stet. Mo hem i neva faenem springwota ya, from we wota ya i nogat.

Tede, bighaf blong ol man long wol oli laef kasem 70 no 80 yia nomo. I tru se ol man we Baebol i tokbaot olgeta, oli laef blong plante yia moa i bitim ol man tede. Be, wan buk (2002 Guinness Book of World Records) i tokbaot wan woman we i laef longtaem moa i bitim ol narafala woman long wol, se hem i gat 122 yia mo 164 dei. (Jenesis 5:3-32) Be John Harris we i stap stadi long ol rul we i stret blong folem long saed blong tritmen blong ol sikman mo ol olfala, i talem se: “Naoia ol niufala save i soemaot se i no longtaem, maet yumi save blokem fasin we yumi kam olfala mo maet yumi save blokem ded tu.” Stat long yia 2000, plante bigman blong hae save oli stap tokbaot “laef we i no moa gat ded long hem,” mo oli talem se “bifo long yia 2099, bambae laef blong man i no moa gat en blong hem.” Mo bakegen, oli talem se “bodi blong man bambae i neva stop blong wokem ol niufala ‘sel,’ ” * mo oli talem sam narafala tok olsemia tu.

Long buk blong Mark Benecke (The Dream of Eternal Life), hem i talem se: “Long laef blong wan man, klosap olgeta sel long bodi blong hem oli kam niuwan bakegen mo bakegen. . . . Afta seven yia, yumi rili gat wan niufala bodi.” Be, ol sel ya oli no gohed olsem blong olwe, from we i gat wan taem we bodi i stop blong wokem ol niuwan bakegen. Sipos i no stop, Masta Benecke i talem se “bodi blong man i save gohed blong kam niuwan blong longtaem​—ating i save gohed olsem blong olwe.”

Tingbaot tu, ol samting we bren blong yumi i save mekem we yumi sapraes tumas from. Long sotfala laef blong yumi, bren blong yumi i kasem fulap save, be hem i naf blong kasem plante moa save yet. Wan buk (Encyclopædia Britannica), i  talem se bren blong man i “save mekem fulap moa wok i bitim samting we hem i stap mekem long ful laef blong yumi.” (1976 Edition, Buk 12, pej 998) Wan buk we David A. Sousa i raetem (How the Brain Learns), i talem se: “Bren i naf blong holemtaet fulap defdefren save, i no gat mak blong hem.”​—Pej 78, Buk 2, copiraet 2001.

?From wanem ol man we oli stadi long saed blong bodi blong man, oli no faenemaot stret risen blong ded blong yumi? ?Mo from wanem bren blong man i naf blong holemtaet fulap save? ?God i wokem yumi long wan fasin we yumi naf blong kasem ol defdefren save gogo i no gat en blong hem? ?From wanem yumi stap tingting long laef we i no save finis?

Baebol i talem se: “Laef we i no save finis [God] i putum long hat blong olgeta, blong bambae olgeta man oli no save faenemaot olgeta wok we trufala God i mekem, long stat blong olgeta i go kasem en blong olgeta.” (Prija 3:​11, NW ) Ol tok ya oli soemaot long yumi se God i putum tingting ya insaed long yumi se yumi wantem laef olwe. Olsem nao, oltaem bambae yumi gat sam moa samting blong lanem long saed blong God mo ol wok blong hem. Sipos yumi laef plante bilian yia​—yes, blong olwe—​bambae oltaem nomo yumi save lanem moa long saed blong ol samting raonabaot long yumi we God i mekem.

Ol tok blong Jisas Kraes tu oli soemaot se ol man oli save laef blong olwe. Hem i talem se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:3, Nyutesteman wetem Ol Sam Long Bislama) ?Olsem wanem long saed blong yu? ?Yu yu wantem laef blong olwe?

[Futnot]

[Tok blong pija long pej 3]

Juan Ponce de León i lukaotem wan springwota we i save mekem man i kam yangfala bakegen

[Credit Line]

Ponce de León: Harper’s Encyclopædia of United States History