Talemaot Tok Blong God Wetem Strong Tingting

“Go, talemaot profet tok long ol man blong mi.”​—AMOS 7:​15, NW.

1, 2. ?Hu ya Amos? ?Baebol i talem wanem long saed blong Amos?

 WAN man blong Jeova i stap prij, nao hem i mitim wan pris. Pris ya i singaot strong long hem se: ‘!Yu stop! !Yu no moa prij, mo yu aot long ples ya!’ ?Man ya blong Jeova i mekem wanem? ?Yu ting se hem i mekem olsem pris ya i talem, no hem i gohed nomo blong talemaot tok blong God wetem strong tingting? Yu save faenem ansa long kwestin ya long ol tok we man ya blong Jeova i raetemdaon long wan buk blong Baebol. Nem blong buk ya i sem mak long nem blong man ya, Amos. Be bifo we yumi faenemaot moa long saed blong storian blong Amos wetem pris ya, bambae yumi traem save moa long saed blong man ya Amos.

² ?Hu ya Amos? ?Hem i laef long wanem taem? ?Mo hem i blong wea? Yumi faenem ansa blong trifala kwestin ya long Amos 1:1, we i talem se: “Profet Amos, hem i man blong lukaot long sipsip, mo ples blong hem long taon ya Tekoa long Juda. Long taem we King Usia i king long Juda, mo King Jeroboam, we papa blong hem King Jehoas, i king long Isrel.” Yes, Amos i blong Juda. Hem i gruap long taon ya Tekoa, we i stap 16 kilometa longwe long Jerusalem, long saed i go long saot. Hem i stap laef long ol laswan yia bifo 800 B.K.T., * taem Usia i king blong Juda mo Jeroboam 2 i king blong ten laen blong Isrel. Amos i wan man blong lukaot long sipsip. Amos 7:​14 i talem se hem i mekem tu wok, hem i “lukaot long ol buluk mo sipsip,” mo tu, hem i wok long “plantesen blong figtri.” Yes, long wan haf blong yia, hem i wok long plantesen. Hem i katem no i stikim frut blong figtri. Samting ya i mekem se ol frut ya oli raep hareap. Wok ya i tekem taem mo man i save kam taed long hem.

“Go, Talemaot Profet Tok”

3. ?Olsem wanem stori blong Amos i save givhan long yumi sipos yumi harem se yumi no naf blong prij?

³ Amos i no sem blong talem se: “Mi mi no wan long ol profet ya.” Mo hem i no pikinini blong wan profet tu. (Amos 7:​14) Papa blong hem i no wan profet, mo Amos i no kasem trening olsem wan profet. Be Jeova i jusumaot Amos long olgeta man Juda, blong hem i mekem wok blong Hem. God i no jusum wan king we i gat paoa, wan pris we i gat save, no wan jif we i gat mane, nogat. Yumi lanem wan samting long ples ya we i mekem tingting blong yumi i strong. Maet yumi no gat nem wetem ol man blong wol ya mo ating yumi no skulgud tu. Be yumi no mas harem se yumi no naf blong talemaot Tok blong God. Jeova i save mekem yumi naf blong talemaot tok blong hem​—nating sipos yumi stap long wan ples we i no isi nating blong prij long ol man. Jeova i mekem Amos i naf. Taswe, yumi, we yumi wantem tumas blong talemaot tok blong God wetem strong tingting, i gud yumi tingting dip long eksampol blong profet ya we i no fraet nating.

4. ?From wanem i no isi long Amos blong talemaot profet tok long Isrel?

⁴ Jeova i talem long Amos se: “Go, talemaot profet  tok long ol man blong mi Isrel.” (Amos 7:​15, NW ) Wok ya i no isi. Long taem ya, ten laen ya blong Isrel oli stapgud, oli stap long pis, mo oli gat plante samting. Plante man Isrel oli gat ‘haos blong koltaem’ mo ‘haos blong hot taem’ tu. Hemia ol gudgudfala haos we oli wokem “long ston,” i no ol haos brikis we oli wokem long graon nomo. Samfala oli gat ol tebol mo jea we oli wokem long tut blong elefen, mo oli gat ol nambawan plantesen blong “grep” we oli wokem waen long olgeta. (Amos 3:​15; 5:​11) From samting ya, ol man ya oli no save lesin long Amos. Yes, ples ya we Amos i mas wok long hem, ating hem i sem mak long ples we sam long yumi i stap prij long hem tede.

5. ?Sam man Isrel oli stap mekem wanem nogud fasin?

⁵ I no rong blong ol man Isrel oli gat plante samting. Be sam long olgeta oli stap kam rij long rod we i no stret. Olgeta we oli rij oli stap “spolem olgeta we oli no strong” mo oli “mekem i strong tumas long ol puaman.” (Amos 4:1) Sam bigfala bisnesman, jaj, mo pris, oli stap mekem plan tugeta blong stilim ol puaman. Ale, bambae yumi tingbaot taem ya bifo mo ol samting we ol man ya oli stap mekem long ol narafala.

Brekem Loa Blong God

6. ?Olsem wanem sam bisnesman long Isrel oli spolemgud ol narafala man?

⁶ Fastaem, yumi tingbaot maket ples. Ol man long maket oli stap yusum “ol giaman lita mo ol giaman skel,” mo oli salem ‘wit we i nogud finis.’ (Amos 8:​5, 6) Oli stap giaman gud long ol man. Oli yusum giaman skel, oli leftemap praes blong evri samting i go antap tumas, mo oli salem samting we i nogud finis. Oli mekem gogo oli spolemgud ol puaman, nao ol puaman ya oli mas kam slef blong olgeta, i no gat narafala rod. Antap long samting ya, ol bisnesman ya oli “givim sandel” nomo long ol puaman ya blong pemaot olgeta oli kam slef blong olgeta. (Amos 8:6) !Tingbaot samting ya! !Ol griri bisnesman ya oli ting se ol manples blong olgeta oli sas olsem wan sandel nomo! !Oli spolem mo daonem ol puaman ya bitim mak, mo oli brekem Loa blong God tu! Be tingbaot, ol semfala bisnesman ya oli kipim “Sabat dei” tu. (Amos 8:5) Yes, oli stap mekem wosip long God, be oli mekem blong soem olgeta nomo.

7. ?From wanem ol bisnesman oli no kasem panis taem oli brekem Loa blong God?

⁷ Loa i talem se: “Yufala i mas lavem ol man we oli stap raonabaot long yufala, mo yufala i mas mekem i gud long olgeta, olsem we yufala i stap mekem i gud long yufala nomo.” (Levitikas 19:18) ?Taswe, from wanem ol bisnesman ya oli no kasem panis taem oli brekem Loa ya blong God? Oli no kasem panis from we wok blong panisim man we i brekem Loa hem i wok blong ol jaj. Be ol jaj oli stap joen wetem ol bisnesman ya blong stilim ol man. Ol jaj we oli sidaon long get blong taon blong jajem ol trabol blong ol man, oli ‘kasem mane long ol man nogud blong haedem ol rong blong olgeta, mo oli no save jajem bisnes blong ol puaman long stret fasin.’ Yes, ol jaj ya oli mas halpem ol puaman. Be oli no mekem olsem. Defren olgeta, oli letem ol man nogud oli pem olgeta blong haedem ol rong blong olgeta mo oli putum i go long ol puaman. (Amos 5:​10, 12) Taswe, ol jaj ya tu oli stap brekem Loa blong God.

8. ?Ol rabis pris oli stap satem ae blong olgeta long wanem nogud fasin?

⁸ ?Olsem wanem long ol pris long Isrel? ?Oli stap mekem wanem? Blong faenemaot samting ya, yumi mas lukluk long wan narafala ples. Traem tingbaot ol bigfala sin we ol pris oli letem ol man oli mekem ‘long haos blong god blong olgeta.’ Amos i talemaot tok ya blong God, se: “Fasin blong yufala, man i tekem woman slef blong hem, blong i slip wetem hem, nao pikinini blong hem i girap, i go slip wetem sem woman ya bakegen. Fasin ya i mekem nem blong mi i kam nogud olgeta.” (Amos 2:​7, 8) !Traem tingbaot samting ya! Wan man Isrel mo pikinini blong hem, tufala tugeta i slip wetem semfala woman blong rod long tempol. !Mo ol rabis pris oli satem ae blong olgeta long nogud fasin ya!​—Levitikas 19:29; Dutronome 5:​18; 23:17.

9, 10. ?Wanem sam samting we ol man Isrel oli mekem we i agensem Loa blong God? ?Olsem wanem taem blong yumi i sem mak long taem ya bifo?

⁹ Jeova i tokbaot sam narafala rabis fasin blong olgeta, i se: “Kaliko blong ol puaman we yufala i holem fastaem, blong letem olgeta oli kaon long yufala, be long naet, yufala i no givimbak long olgeta. Yufala i yusum blong mekem bed blong yufala long ol ples blong mekem wosip. Waen ya we ol man oli stap givim long yufala blong pemaot ol faen we yufala i putum long olgeta, yufala i stap yusum blong dring long haos blong [ol god blong yufala].” (Amos 2:8) Yes, plante pris mo plante man tu oli no obei long loa we i stap long Eksodas 22:26, 27. Loa ya i talem se, sipos oli holem kaliko blong narafala man  blong mekem olsem garanti blong hem se bambae hem i givimbak mane long olgeta, be oli mas givimbak kaliko ya long man ya bifo we san i godaon. Be oli no mekem olsem. Defren olgeta, oli yusum kaliko ya olsem blangket we oli slip long hem taem oli gohed blong mekem lafet long ol giaman god blong olgeta. Mo oli putum faen long ol puaman, nao oli yusum mane ya blong pem waen blong oli save dring long ol lafet we oli mekem blong wosip long ol giaman god. !Tru ya, oli go longwe tumas long stret rod blong wosip long God long klin fasin!

¹⁰ Ol man Isrel ya oli no sem nating blong brekem tufala bigfala komanmen blong Loa, hemia blong lavem Jeova mo blong lavem ol man raonabaot long olgeta. Taswe God i sanem Amos i go long olgeta blong jajem olgeta from ol fasin we oli stap mekem agens long God. Tede, ol nesen blong wol, wetem olgeta long Krisendom * tu, oli mekem ol semfala rabis fasin we ol man Isrel bifo oli bin mekem. Rabis fasin blong ol big bisnes, politik, mo ol giaman skul, oli mekem se samfala nomo oli kam rij. Bighaf blong ol man oli kam pua bitim mak mo oli harem nogud tumas. Be Jeova i stap tingbaot olgeta we oli safa olsem, mo we oli traehad blong faenem hem. Taswe, hem i givim wan wok long ol man blong hem tede we i sem mak long wok we hem i givim long Amos, hemia se oli mas talemaot tok blong Hem wetem strong tingting.

11. ?Eksampol blong Amos i soemaot wanem long yumi?

¹¹ From we wok blong yumi i klosap sem mak long wok blong Amos, yumi save lanem plante samting from eksampol blong hem. Amos i soem long yumi (1) wanem we yumi mas talemaot, (2) fasin we yumi mas gat taem yumi prij, mo (3) from wanem ol man we oli agensem yumi oli no save stopem wok blong prij. Bambae yumi tokbaot wanwan long trifala poen ya.

Folem Eksampol Blong Amos

12, 13. ?Olsem wanem Jeova i soemaot se hem i no glad long ol man Isrel? ?Be ol man Isrel oli mekem wanem?

¹² Kristin wok blong yumi ol Witnes blong Jeova, i blong talemaot Kingdom mo givhan long ol man blong oli kam man blong Jisas. (Matiu 28:19, 20; Mak 13:10) Be yumi talemaot ol woning blong God tu, olsem Amos we i talemaot se Jeova bambae i jajem ol rabis man. Amos 4:​6-​11 i talem se Jeova i soemaot long ol man Isrel, bakegen mo bakegen, se hem i no glad long olgeta. Hem i mekem we oli “gat hadtaem blong kasem kakae,” mo hem i “blokem ren blong i no kam.” Hem i sanem “win we i hot we i hot i kam bonem ol garen” blong olgeta, mo hem i ‘mekem ol kakae blong garen we oli putumgud i stap, i kam nogud kwiktaem.’ Mo hem i “sanem wan rabis sik” i go long olgeta tu. ?Olsem wanem? ?Ol trabol ya we God i sanem long Isrel i pulum olgeta blong oli tanem tingting blong olgeta? !Nogat! God i talem se: ‘Yufala i no kam long mi bakegen.’ Tru ya, bakegen mo bakegen ol man Isrel oli tanem baksaed long Jeova.

¹³ Jeova i panisim ol man Isrel we oli no tanem tingting blong olgeta. Be fastaem, hem i sanem ol profet blong givim woning long olgeta. God i talem se: “Hae God i Masta blong yumi, mo ol profet oli man blong wok blong hem, mo oltaem, sipos hem i wantem mekem wan samting, hem i stap soemaot ol plan blong hem fastaem long olgeta.” (Amos 3:7) Long saed blong Noa, God i talemaot fastaem long hem se Bigfala Wota bambae i kavremap wol, mo hem i talem long Noa blong givim woning long ol man. Long sem fasin, Jeova i talem long Amos blong givim laswan woning long ol man Isrel. Sore tumas, ol man Isrel oli no lesin long tok blong God we Amos i talemaot, mo oli no mekem samting we Jeova i talem long olgeta blong mekem.

14. ?Olsem wanem taem blong Amos i sem mak long taem blong yumi?

¹⁴ Ating yu yu luksave klia se taem blong Amos i klosap sem mak long taem blong yumi tede. Jisas Kraes i talemaot plante trabol we bambae i kasem yumi klosap long en blong wol. Hem i talem tu se ol man blong God bambae oli talemaot tok blong hem long olgeta ples blong wol. (Matiu 24:​3-​14) Be bighaf blong ol man tede oli sem mak long ol man long taem blong Amos. Oli no wantem save long ol saen ya we oli makem taem blong en, mo oli no wantem lesin long ol tok blong Kingdom. Ol man ya bambae oli kasem sem jajmen olsem ol man Isrel we oli no tanem tingting blong olgeta. Jeova i givim woning long olgeta se: “Yufala evriwan i mas mekemrere blong kam stanap long fes blong mi.” (Amos 4:​12) Oli stanap long fes blong God taem jajmen blong hem i kamtru long olgeta, hemia taem ol ami blong Asiria oli kam spolem olgeta. Ol rabis man tede bambae oli ‘stanap long fes blong God’ long taem blong Amageden. (Revelesen 16:14, 16) Be naoia,  Jeova i stap soemaot longfala tingting yet, mo yumi stap gohed blong talemaot long ol man se: “Yufala i mas traem faenem [Jeova], nao bambae yufala i save stap laef.”​—Amos 5:6, NW.

Kasem Fasin Agens Olsem Amos

15-17. (a) ?Hu ya Amajia? ?Hem i mekem wanem taem Amos i talemaot tok blong God long hem? (b) ?Amajia i talem wanem giaman tok agens long Amos?

¹⁵ Yumi save folem eksampol blong Amos long samting we yumi talemaot, mo antap long hemia, long fasin we yumi gat long wok blong prij. Samting ya i kamaot klia long Amos japta 7. Japta ya i tokbaot pris ya we yumi bin tokbaot long stat blong stadi ya, hemia ‘Amajia we i pris blong Betel.’ (Amos 7:​10) Taon ya Betel i stamba ples blong giaman wosip blong ol man Isrel, wetem wosip blong aedol blong smol buluk we oli wokem tu. Hemia i min se Amajia i pris blong skul we gavman blong kantri ya i putumap. ?Ale, Amajia i mekem wanem taem hem i harem tok we Amos i talemaot klia mo strong?

¹⁶ Amajia i talem long Amos se: “Profet. I gud yu hareap, yu gobak long Juda, yu go talemaot tok blong yu long ol man ples blong yu, nao olgeta bambae oli save pem yu from. I nogud yu stap long ples ya, from we Betel i ples blong mekem wosip blong king.” (Amos 7:​12, 13) I olsem we Amajia i talem se: ‘!Yu gohom! !Mifala i gat skul blong mifala finis!’ Mo tu, Amajia i traem blong pulum gavman blong putum tabu long wok blong Amos. Hem i talem long King Jeroboam 2 se: “Profet Amos i stap pulum ol man ples, blong oli mekem plan blong spolem yu.” (Amos 7:​10) !Yes, Amajia i talem se Amos i stap girap agensem gavman! Hem i talem long king se: “[Amos] i stap talem se, ‘King Jeroboam bambae i ded long taem blong faet, mo yufala ya tu [ol man Isrel], ol enemi blong yufala bambae oli kam tekemaot yufala i go wok slef long narafala kantri.’ ”​—Amos 7:​11.

¹⁷ Long smol tok ya, Amajia i talem tri samting we i givim rong tingting long king. Fastaem, hem i talem se: ‘Amos i stap talem se.’ Be profet tok ya i no kamaot long Amos. Oltaem Amos i stap talem se: “Hae God i talem se.” (Amos 1:3) Mo tu, Amajia i tokbaot Amos se hem i stap talem olsem: “King Jeroboam bambae i ded long taem blong faet.” Be Amos 7:9 i no talem olsem. Folem vas ya, Amos i stap talemaot, se: ‘Olgeta we bambae oli kamaot biaen  long King Jeroboam, bambae Jeova i kilim olgeta evriwan i ded.’ Yes, God bambae i jajem ‘olgeta we oli kamaot biaen’ long Jeroboam, hemia laen blong hem. Bakegen, Amajia i tokbaot Amos se hem i bin talemaot we ‘ol enemi blong ol man Isrel bambae oli kam tekemaot olgeta oli go wok slef long narafala kantri.’ Be Amos i talemaot tu se sipos ol man Isrel oli kambak long God, bambae oli kasem blesing. I klia se Amajia i twistim tok blong Amos blong traem pulum gavman blong putum tabu long wok blong prij we hem i stap mekem.

18. ?Olsem wanem sam lida blong jos tede oli sem mak long Amajia?

¹⁸ ?Olsem wanem? ?Yu yu luksave se fasin we Amajia i yusum blong agensem Amos i sem mak long fasin blong samfala we oli agensem ol man blong Jeova tede? Amajia i traem blong satem maot blong Amos. Long sem fasin, sam pris, sam lida blong jos, mo hed blong sam famle laen tede oli traem blokem wok blong prij we ol man blong Jeova oli stap mekem. Amajia i giaman se Amos i stap mekem plan blong girap agensem gavman. Tede tu, sam lida blong skul oli giaman se ol Witnes blong Jeova oli denja, mo se oli stap pulum ol man blong agensem gavman. Amajia i talem long king se hem i mas blokem Amos. Long sem fasin, plante lida blong skul tede oli pulum ol man blong politik blong joen wetem olgeta long wan plan blong agensem ol Witnes blong Jeova.

Oli No Save Stopem Wok Blong Prij

19, 20. ?Amos i mekem wanem taem Amajia i agensem hem?

¹⁹ ?Amos i mekem wanem taem Amajia i agensem hem? Fastaem, Amos i talem long pris ya se: “Yu yu wantem blokem mi blong mi no moa talemaot tok blong [God], mo blong mi no moa prij agens long yufala long Isrel.” Nao Amos i no wet, i gohed wetem strong tingting blong talemaot tok blong God we Amajia i no wantem harem nating. (Amos 7:​16, 17) Amos i no fraet long Amajia. !Hem i givim wan nambawan eksampol long yumi! Bambae yumi gohed nomo blong talemaot tok blong God mo obei long hem. Mo bambae yumi mekem samting ya tu long ol kantri we ol man olsem Amajia oli stap ronem mo kilim yumi blong traem blokem yumi. Olsem Amos, bambae yumi gohed nomo blong talem se: “Hae God i talem se.” Ol man blong agens oli no save stopem wok blong prij, from we ‘paoa blong Jeova i stap long yumi.’​—Ol Wok 11:19-​21.

²⁰ Amajia i mas save se i blong nating nomo we hem i traem mekem Amos i fraet. Amos i talemaot finis from wanem ol man oli no save satem maot blong hem​—mo hemia nao namba tri poen we bambae yumi tokbaot. Long Amos 3:3-8, Amos i askem sam kwestin mo yusum sam pijatok blong soem se evri samting we i hapen i kamaot from wan risen. Nao hem i talem mining blong tok blong hem i se: “?Sipos wan laeon i stap singaot bigwan, yufala i ting se ol man oli no save fraet long hem? Hae God i Masta blong yumi, mo sipos hem i tok, ol profet blong hem oli mas go talemaot ol tok blong hem.” Amos i stap talem long ol man we oli lesin se: ‘Taem wan laeon i singaot, yufala i no save blokem fraet blong yufala. Long sem fasin, taem Jeova i givim tok long mi blong talemaot, mi no save blokem, mi mas talemaot.’ Yes, bigfala ona mo respek we Amos i gat long Jeova, i pusum hem blong talemaot tok blong God wetem strong tingting.

21. ?Yumi mekem wanem taem God i givim oda long yumi blong go talemaot gud nius?

²¹ Yumi tu, yumi harem tok blong Jeova we i talem se yumi mas prij. ?Ale yumi mekem wanem? Olsem Amos mo ol faswan disaepol blong Jisas, yumi dipen long paoa blong Jeova blong givhan long yumi blong talemaot tok blong Hem wetem strong tingting. (Ol Wok 4:​23-​31) I no gat wan man i save stopem yumi, nating se oli agensem yumi no oli no wantem lesin long tok we yumi talemaot. Ol Witnes blong Jeova long olgeta ples blong wol oli gat strong tingting olsem Amos, mo samting ya i pusum olgeta blong gohed nomo blong talemaot gud nius. Yumi gat wok blong mekem, hemia blong talemaot jajmen blong Jeova we i stap kam klosap nao. ?Mesej blong jajmen ya i olsem wanem? Bambae yumi faenem ansa blong kwestin ya long nekis stadi.

[Ol Futnot]

?Bambae Yu Yu Ansa Olsem Wanem?

• ?Laef blong ol man we Amos i prij long olgeta, hem i olsem wanem?

• ?Olsem Amos, yumi mas talemaot wanem?

• ?Wanem fasin we yumi mas soemaot taem yumi stap prij?

• ?From wanem ol man blong agens oli no save stopem wok blong prij?

[Kwestin]

[Tok blong pija long pej 10]

God i jusum Amos we i man blong katem frut blong figtri, blong i mekem wok blong Hem

[Tok blong pija long pej 13]

?Yu yu olsem Amos we yu talemaot tok blong Jeova wetem strong tingting?