?Yu Yu Wantem Laef Blong Olwe?

“MI MI no fraet blong ded. Be bambae mi harem nogud blong livim ol flaoa blong mi.” Hemia toktok blong wan olfala woman long Japan. Wan Kristin woman we i go long haos blong hem, i kasem save tingting blong olfala woman ya we i gat plante naesfala flaoa long yad blong hem. Plante man we oli no fraet blong ded, oli harem gud tumas long ol naesfala samting we God i wokem mo oli wantem tumas blong laef olwe.

?Laef olwe? Plante man bambae oli sakemaot tingting ya. Maet samfala oli talem se oli no wantem laef olwe. ?From wanem wan man i save gat tingting olsem?

Laef Blong Olwe​—?Man i Save Kam Taed Long Hem?

Sam man oli tingting se bambae oli kam taed sipos oli laef olwe. Maet oli tokbaot olgeta we oli ritae finis, se evri dei oli stap mekem sem samting  nomo, oli no gat wok ale oli jes sidaon nomo mo lukluk televisin. Sipos yu tu yu tingting olsemia, tingbaot ansa we wan man blong stadi long ol sta, Robert Jastrow, i talem, taem oli askem long hem sipos laef blong olwe bambae i wan presen no i wan trabol. Jastrow i ansa se: “Hem i save stap olsem wan presen long ol man we oli wantem save evri samting mo we oli wantem gohed blong lanem plante moa samting. Bambae oli haremgud tumas blong tingbaot se oli save gohed blong lanem ol defren save gogo i no save finis. Be ol narafala we oli harem se oli save evri samting finis mo we tingting blong olgeta i sat, laef we i no save finis bambae i wan bigfala trabol long olgeta. Bambae oli no save wanem samting blong mekem long ol yia ya.”

Fasin blong yu nomo bambae i mekem se yu tingbaot laef blong olwe olsem wan laef we yu yu save kam taed long hem no nogat. Sipos yu yu wan man we yu ‘wantem save evri samting mo yu wantem gohed blong lanem plante moa samting,’ tingbaot ol defren wok we yu save mekem long saed blong droem ol naesfala pija, pleplei miusik, mekem plan blong wokem haos, garen, mo ol narafala samting we yu yu intres long hem. Laef we i no save finis long wol bambae i givim nambawan janis long yu blong gat gudhan long ol defdefren wok we yu yu laekem blong mekem.

Bambae yumi glad moa blong laef olwe sipos yumi naf blong soemaot mo kasem lav oltaem gogo i no save finis. God i wokem yumi we yumi naf blong soemaot lav, mo yumi haremgud tumas taem narafala i laekem yumi. Taem yumi soemaot trufala lav, yumi kasem wan glad we i dip mo i stap longtaem, nating sipos plante yia i pas. Laef blong olwe bambae i givim plante janis long yumi blong wokem gudfala fasin ya blong laekem ol narafala man, antap moa, blong laekem God. Aposol Pol i talem se: “Man we i lavem God, God i savegud hem.” (1 Korin 8:3) !Hemia i wan nambawan samting​—yumi save Hae Masta blong heven mo wol mo hem i save yumi! Antap moa, neva bambae yumi save evri samting long saed blong God we i wokem yumi wetem lav. Taswe, yumi no save talem se laef blong olwe bambae i mekem man i kam taed mo i no givim glad.

Laef​—Sot Mo Sas

Samfala oli ting se laef i sas tumas from we hem i sot. Maet oli talem se laef i sem mak long gol. Gol i sas from we i no gat plante. Oli talem se sipos yumi save faenem gol long evri ples, bambae praes blong hem i godaon. Nating se i olsem, be gol bambae i naes yet. Laef tu, sipos i stap olwe, be bambae i gud tumas yet.

Maet yumi save skelem laef blong olwe wetem win we yumi pulum. Tingbaot wan man we i daeva long dip ples nao hem i fas mo i no moa save kambak antap. ?Olsem wanem? ?Bambae man ya i tingbaot win we hem i stap pulum olsem wan samting we i gud tumas, no nogat? ?Afta we ol man oli sevem hem nao hem i pulumgud win bakegen, yu ting se bambae hem i komplen se hem i harem nogud blong pulum win bakegen? !Nogat!

 Ol man oli save sevem man ya we i fas long dip ples, mo long sem fasin, God i save sevem yumi tu. Be hem i save mekem i gud moa long yumi, from we hem i save givim hop ya blong laef gogo i no save finis. Aposol Pol i raetem se: “Ol man we oli stap mekem sin, pei blong olgeta, bambae oli ded from, be ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.” (Rom 6:​23) Tru long ransom sakrefaes blong Jisas, God bambae i tekemaot sin mo ded, mo bambae hem i givim presen ya, laef we i no save finis, long olgeta we oli obei long hem. !Yumi mas gat bigfala tangkiu from rod we hem i mekem wetem lav blong halpem yumi!

Olgeta We Yumi Laekem Olgeta Tumas

Samfala man oli save askem se: ‘?Olsem wanem long olgeta ya we mi mi laekem olgeta tumas? Laef we i no save finis long wol bambae i blong nating nomo sipos oli no stap wetem mi.’ Ating yu bin kasem save long Baebol mo yu bin lanem se ol man oli gat janis blong haremgud blong olwe long paradaes long wol. (Luk 23:43; Jon 3:​16; 17:3) I stret nomo we yu wantem ol memba blong famle blong yu, mo ol narafala we yu yu laekem olgeta tumas, mo ol gudfala fren blong yu, oli kasem semfala glad we yu yu hop blong kasem long niufala wol we God i promes blong givim, we stret fasin nomo bambae i stap long hem.​—2 Pita 3:​13.

?Be olsem wanem sipos ol fren blong yu mo olgeta we yu yu laekem olgeta tumas oli no wantem laef olwe long paradaes long wol? Yu no mas letem samting ya i spolem tingting blong yu. Yu mas gohed blong kasem stret save blong Baebol mo mekem laef blong yu i laenap wetem save ya. Aposol Pol i raetem se: “?Sipos yu yu woman olsem [Kristin waef], olsem wanem yu ting se yu no save sevem man blong yu? ?No sipos yu yu man olsem [Kristin hasban], olsem wanem yu ting se yu no save sevem woman blong yu?” (1 Korin 7:​16) Ol man oli save jenisim fasin blong olgeta. Tingbaot wan man we bifo hem i agensem ol Kristin, hem i jenisim tingting blong hem mo biaen hem i kam wan elda long Kristin kongregesen. Hem i talem se: “Mi mi glad tumas se gudfala famle blong mi i holem strong long ol rul blong Baebol taem mi mi bin agensem olgeta.”

God i wari tumas long laef blong yu wetem laef blong olgeta we yu yu laekem olgeta tumas. Yes, Jeova “i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9) Jeova God i wantem se yu mo olgeta we yu yu laekem olgeta tumas, yufala i laef blong olwe. Lav blong hem i bigfala moa i bitim lav blong ol man we oli no stret gud olgeta. (Aesea 49:15) Taswe, i gud yu traehad blong wokem wan gudfala fasin fren wetem God. Biaen, yu save halpem olgeta we yu laekem olgeta tumas blong oli mekem sem mak. Nating sipos naoia oli no gat hop ya blong laef olwe, fasin blong olgeta i save jenis sipos oli luk we yu yu mekem laef blong yu i laenap wetem stret save blong Baebol.

?Olsem wanem long ol famle mo fren blong yu we oli ded finis? Baebol i tokbaot wan nambawan hop blong ol milian man we oli ded finis, hemia hop blong laef bakegen​—blong girap bakegen long ded mo laef long Paradaes long wol. Jisas Kraes i promes se: “I gat taem i stap kam we ol dedman . . . bambae oli aot long beregraon blong olgeta.” (Jon 5:​28, 29) Olgeta we oli ded be oli no save long God, olgeta tu bambae oli laef bakegen. Baebol i talem se: “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” (Ol Wok 24:15) !Bambae yumi glad tumas blong mekem welkam long olgeta ya we oli girap bakegen long ded!

Laef Blong Olwe—Wan Hop We i Givim Glad

Sipos yu yu naf blong stap glad mo hapi tede, nating se i gat fulap trabol long wol ya, i sua se bambae yu haremgud blong laef olwe long paradaes long wol. Wan Witnes blong Jeova i stap storian long wan woman long saed blong blesing blong laef we i no save finis, nao woman ya i talem long hem se: “Mi mi no wantem laef blong olwe. Laef ya blong 70 no 80 yia i naf.” Wan Kristin elda we i stap long taem ya, i askem long hem se: “?Samtaem yu yu stap tingbaot ol pikinini blong yu, se bambae oli filim olsem wanem sipos yu ded?” Wota i ron long ae blong woman ya  taem hem i tingbaot bigfala sore we bambae oli kasem sipos mama blong olgeta i ded. Woman ya i talem se: “Hemia faswan taem we mi mi kasem save se mi stap tingbaot mi wan nomo. Mo mi mi luksave se man we i wantem laef olwe, hem i no stap tingbaot hem wan nomo, be hem i wantem stap wetem ol narafala mo givhan long olgeta.”

Samfala oli harem se oli no impoten long tingting blong wan man, taswe i nating nomo sipos oli laef no nogat. Be God we i givim laef long yumi, hem i tinghevi long laef blong yumi evriwan, taswe hem i talem se: “Mi mi Hae God, mi Masta blong yufala, mo mi laef, mi stap we mi stap. . . . Mi no glad nating blong luk wan man nogud i ded long sin blong hem. Mi wantem luk we hem i tanem tingting blong hem, i lego ol sin blong hem, nao bambae i laef i stap.” (Esikel 33:11) Sipos God i wari tumas long laef blong ol nogud man, yumi save se hem i mas wari moa long olgeta we oli laekem hem.

King Deved long Isrel bifo, i trastem Jeova blong kea gud long hem wetem lav. Wan taem, Deved i talem se: “Hae God. Papa mo mama blong mi, maet tufala i save lego mi, be yu, oltaem nomo bambae yu stap lukaot gud long mi.” (Ol Sam 27:10) Ating Deved i save se papa mama blong hem tufala i laekem hem. Be nating sipos papa mama blong Deved, we tufala i klosap moa long hem i bitim ol narafala, tufala i lego hem, hem i save se God bambae i no lego hem. From we Jeova i wari long yumi mo i laekem yumi, hem i wantem givim laef we i no save finis long yumi, wetem janis ya blong fren wetem hem blong olwe. (Jemes 2:​23) ?Olsem wanem? ?Bambae yumi gat tangkiu mo akseptem nambawan presen ya?

[Tok blong pija long pej 7]

Lav we yumi gat long God mo ol man raonabaot long yumi, bambae i mekem yumi glad blong laef olwe