?Yumi Ridim Wanem?—Hemia Waes Advaes Blong Solomon

“BAMBAE ol man oli stap raetem ol buk gogo i no save finis, mo sipos yu stap stadi tumas long olgeta oltaem, samting ya bambae i mekem yu yu taed gud nomo.” (Prija 12:12) Taem waes King Solomon blong Isrel i raetem ol tok ya 3,000 yia bifo, hem i no min se fasin blong rid i nogud. Be, hem i wantem talem se yumi mas jusum gud wanem buk we yumi stap ridim. Tede, ol tok ya blong hem oli stret from we evri yia, raon long wol ol man oli prentem bilian buk blong rid.

“Ol buk” ya we Solomon i tokbaot oli ol buk we oli no bildimap man no leftemap tingting blong man. Taswe, hem i talem se man we i ridim ol buk ya oltaem, samting ya bambae i ‘mekem we hem i taed gud nomo.’ Ol buk ya oli no givhan long hem blong kasem ol gudfala blesing we oli stap longtaem.

?Nating se i olsem, yu ting se Solomon i wantem talem se i no gat wan buk nating we i save lidim man long wan gudfala rod mo halpem hem blong kasem blesing? No, hem i no minim olsem, from we hem i raetem tu se: “Ol tok blong ol waes man oli olsem sap stik we man blong lukaot long sipsip i stap karem blong stikim ol sipsip blong hem, mo oli save stap longtaem, olsem nil we man i hamarem i go insaed long wud, we i fas gud long hem.” (Prija 12:11) Yes, i gat sam tok we oli raetem we i save halpem man olsem ‘sap stik blong stikim ol sipsip.’ Ol tok olsem oli save pusum wan man blong folem stret rod. Antap moa, oli save mekem tingting blong man i stap strong long disisen we hem i tekem mo oli save mekem we laef blong man i no go olbaot be i stap stret, “olsem nil we man i hamarem i go insaed long wud, we i fas gud long hem.”

?Weples nao yumi save faenem ol waes tok olsem? Olsem Solomon i talem, buk we i moa impoten long ol nara buk hemia buk we i kamaot long man blong lukaot long sipsip, Jeova. (Ol Sam 23:1) Yes, beswan buk blong faenem ol waes tok ya long hem hemia buk we i kamaot long God​—Baebol. Taem yumi ridim ol tok blong buk ya oltaem, samting ya i save givhan long yumi blong yumi “save kam waes long olgeta samting, nao bambae yumi savegud ol rod blong mekem ol gudfala wok.”​—2 Timoti 3:16, 17.