‘Mi Mi Glad Blong Kasem Trening Ya’

YANGFALA Kazuna i sek taem tija blong hem i talem long hem se hem i joen long wan kompetisin, we long kompetisin ya hem i mas givim wan tok long Inglis. Evri hae skul long Hokkaido [hemia bigfala aelan long not blong Japan] oli joen long kompetisin ya, be skul blong Kazuna i neva joen long wan samting olsem bifo. Long taem blong kompetisin, Kazuna i seksek from we hem i mas traem blong winim klosap 50 nara studen. Hem i seksek moa taem hem i luk tu Inglis woman we tufala i stap blong tekem disisen long saed blong kompetisin ya.

Oli talemaot nem blong olgeta we oli win, be oli stat fastaem wetem olgeta we oli kasem laswan praes. !Kazuna i sek we i sek taem oli singaotem nem blong hem laswan se hem nao i winim faswan praes! Kazuna wetem tija blong hem, tufala i lukluk tufala, tufala i sapraes tumas. Kazuna i go long fored blong karem trofi blong hem.

Kazuna i glad taem hem i talem se: “Mi mi save winim praes ya nomo from trening we ogenaesesen blong Jeova i givim long mi tru long Tiokratik Skul. Mi mi glad tumas blong kasem trening ya.” Skul ya [Tiokratik Skul] we Kazuna i joen long hem taem hem i smol yet, hem i wan long ol miting blong kongregesen blong ol Witnes blong Jeova. Taem Kazuna i stap rere blong joen long kompetisin ya, hem i lukluk gud olsem wanem olgeta we oli joen long Tiokratik Skul oli stap yusum maekrofon, toktok wetem lav mo wetem filing, yusum han mo fes taem oli toktok, lukluk olgeta we oli lesin mo sam narafala poen bakegen.

Mifala i glad blong invaetem yu blong kam lukluk skul ya we mifala i stap mekem evri wik long Haos Kingdom blong ol Witnes blong Jeova. Bambae yu luk olsem wanem skul ya i givhan long ol yangfala wetem ol olfala tu. Evri man oli welkam blong kam long miting ya. Blong save moa long saed blong skul ya, plis toktok wetem ol Witnes blong Jeova we oli stap long ples blong yu.