Trufala Wosip i Agensem Ol Hiten Skul

BLONG plante handred yia, ol man blong digim graon oli wokhad long ples ya we hem i taon blong Efesas bifo, hemia long wes kos blong Teki. Oli wokem plante haos blong taon ya bakegen, mo ol man blong sayens oli stadi mo oli eksplenem plante samting we oli bin faenem long ples ya. Taswe, Efesas i wan long ol ples we i pulum plante moa turis i kam long Teki.

?Oli faenem wanem long saed blong Efesas? ?Tede, yumi save talem wanem long saed blong nambawan taon ya blong bifo? Mifala i singaot yu blong visitim olfala taon ya blong Efesas, wetem Musium blong Efesas long Vienna, blong kasem save olsem wanem trufala wosip i bin agensem ol hiten skul long Efesas. I gud yumi intres long histri blong Efesas fastaem.

Plante Man Oli Wantem Tekem Ples Ya

Long ol yia 1000 B.K.T., * ol man we oli laef long Yurop mo Esia oli kasem plante trabol, mo oli muvmuv plante. Long taem ya, ol man Gris blong Iona oli stat tekem ol kantri we oli stap long wes kos blong Esia Maena. Ol man Gris ya oli mitim sam pipol we ol man oli savegud olgeta from we oli wosipim wan woman god. Biaen, ol man oli singaot woman god ya se Atemis blong Efesas.

Raonabaot long ol yia 650 B.K.T., ol man Cimmeria long not blong Blak Si oli kam blong stil long ol kantri blong Esia Maena. Biaen, raonabaot long 550 B.K.T., King Kresus blong Lydia i tekem paoa. Hem i wan lida we i gat paoa, mo ol man oli savegud hem from we hem i rij we i rij. Be, taem gavman blong Pesia i kam bigwan moa, King Saeras i winim ol taon blong ol man Gris, wetem Efesas tu.

Long 334 B.K.T., Aleksanda blong Masedonia i lidim wan faet agensem Pesia, nao hem i kam niufala rula blong Efesas. Afta we Aleksanda i ded long 323 B.K.T., ol jenerol blong hem oli faet blong tekem Efesas. Long 133 B.K.T., Attalus 3, we hem i king blong Pegamam mo i no gat pikinini, i givim Efesas long ol man Rom, mekem se taon ya i kam wan haf blong provins blong ol man Rom long Esia.

Trufala Wosip i Agensem Ol Hiten Skul

Taem aposol Pol i kam long Efesas long en blong nambatu misinari trip blong hem, long faswan handred yia K.T., i gat samwe 300,000 man i laef long Efesas. (Ol Wok 18:19-21) Long nambatri misinari trip, Pol i gobak long Efesas,  mo hem i no fraet blong talemaot Kingdom blong God insaed long ol haos prea blong ol man Jiu. Be, afta tri manis i pas, ol man Jiu oli strong moa agensem Pol, taswe hem i tekem disisen blong givim ol pablik tok blong hem long klasrum blong Tiranas. (Ol Wok 19:1, 8, 9) Pol i prij long ples ya blong tu yia, mo hem i mekem ol merikel blong hilim man, mo i ronemaot ol devel long man. (Ol Wok 19:10-17) !Taswe yumi no sapraes we plante man oli bilif long God! Yes, tok blong Jeova i win, mo from samting ya, plante man we bifo oli stap mekem majik, oli bonem ol buk blong majik blong olgeta, nating se oli sas tumas.​—Ol Wok 19:19, 20.

Gud nius we Pol i talemaot i karem frut. Plante man oli lego giaman wosip we oli bin mekem long woman god ya Atemis. Be long semtaem, ol man we oli sapotem wosip blong Atemis oli kros long Pol. Ol man we oli wokem ol smosmol haos prea blong Atemis long silva, oli winim bigfala mane long bisnes ya. Be naoia we plante man oli lego wosip blong Atemis, oli fraet se bambae oli lusum mane. Taswe, wan man, nem blong hem Demetrius, i pulum ol narafala man blong wokem silva, oli kam wanples.​—Ol Wok 19:23-32.

Nao wan bigfala rao i kamaot mo plante man oli singaot bigwan se: “!Hurei long Atemis blong Efesas!” (Ol Wok 19:34) Taem rao ya i godaon, Pol i leftemap tingting blong ol Kristin bakegen, mo biaen hem i aot long ples ya. (Ol Wok 20:1) Be taem Pol i go long Masedonia, wosip blong Atemis i no kam antap bakegen. Defren olgeta, hem i stap godaon.

Tempel Blong Atemis i Foldaon

Wosip blong Atemis i strong long Efesas. Bifo we King Kresus i rul, woman god ya Cybele i stamba god we ol man oli wosipim long eria ya. Ale, Kresus i talem se Cybele i wan famle blong ol god blong ol man Gris. Olsemia, hem i ting se ol man Gris wetem ol narafala tu bambae oli akseptem woman god ya. Taswe, raonbaot long ol yia 550 B.K.T., oli stat bildim tempel blong Atemis, woman god ya we i tekem ples blong Cybele.

Tempel ya i wan impoten samting long histri blong ol man Gris we oli man blong bildim haos. Bifo long hemia, oli neva bin yusum ol bigbigfala ston ya mabel blong wokem wan tempel we i bigwan olsemia. Be wan faea i spolem tempel ya long 356 B.K.T. Nao, oli wokem wan niufala tempel we i naes olsem faswan, i givim wok long plante man, mo i pulum plante man blong wosipim giaman god i kam long ples ya. Tempel ya, bigfala blong hem i klosap 50 meta, longfala blong hem i 105 meta, mo hem i stanap long wan platfom we bigfala blong hem i 73 meta, mo longfala blong hem i 127 meta. Oli talem se tempel ya i wan long ol seven bigfala samting long wol long taem bifo. Nating se i olsem, sam man oli no laekem tempel ya. Wan waes man blong wol, nem blong hem Heracleitus blong Efesas, i talem se dak rod ya we i go long olta blong tempel, i olsem tudak we i joen wetem rabis fasin, mo hem i talem se nogud fasin blong ol man we oli wosip long tempel i mowas i bitim fasin blong ol anamol. Be bighaf blong ol man oli ting se wosip blong Atemis long Efesas i no save lus samtaem. Histri i pruvum se ol man ya oli rong. Buk ya Ephesos​—Der neue Führer (Niufala Buk Blong Save Efesas) i talem se: “Long ol yia 100, wosip blong Atemis mo blong sam narafala god we plante man oli wosipim, i foldaon wantaem nomo.”

 Long ol yia 300 K.T., wan bigfala etkwek i spolem Efesas. Antap long samting ya, ol man Goth oli kamaot long Blak Si long sip, oli stilim ol sas samting long tempel blong Atemis, mo biaen oli bonem tempel ya long faea. Buk ya we mifala i tokbaot antap i talem se: “Atemis i lusum faet mo hem i no naf blong protektem hem wan, taswe ol man oli no moa save lukluk hem olsem wan woman god blong protektem taon blong olgeta.”​—Ol Sam 135:15-18.

Long en blong ol yia 300 K.T., Rula ya Theodosius 1, i stanemap “Kristin Skul” olsem stamba skul blong gavman. Kwiktaem, ol man oli yusum ol bigfala ston blong tempel blong Atemis blong bildim sam narafala haos. Wosip blong Atemis i lus. Wan man i tokbaot wan naesfala tok we oli bin raetem blong presem tempel ya, we bifo hem i wan long ol bigfala samting blong wol, i se: “Naoia, ples ya i emti nomo mo ol man oli sore long hem.”

Atemis Mo “Mama Blong God”

Pol i givim woning long ol elda long kongregesen blong Efesas, i se afta we hem i go, ol man “we oli olsem wael dog” bambae oli kam, mo sam man bambae oli girap long medel blong olgeta mo “oli giaman nomo.” (Ol Wok 20:17, 29, 30) Samting ya i hapen stret olsem Pol i talem. Histri i soem we giaman wosip i kam antap long Efesas, tru long Kristin skul we i stanap long apostasi.

Long 431 K.T., oli holem namba tri kaonsel blong olgeta jos long Efesas. Long kaonsel ya, oli traem faenem ansa long kwestin ya se, ?Jisas i wan god no wan man? Buk ya Ephesos​—Der neue Führer i talem se: “Tingting blong ol man Aleksandria, we oli talem se Kraes i wan god, . . . i winim ol narafala tingting.” Samting ya i karem plante frut. “Disisen ya we oli tekem long Efesas i leftemap Meri. Bifo, oli tokbaot Meri olsem woman we i bonem Kraes, be naoia, hem i kam woman we i bonem God. Samting ya i stanemap wosip blong Meri, mo tu, i pulum ol man blong jos blong seraot. . . . Kam kasem tede, ol man oli no agri yet long ansa blong kwestin ya.”

Taswe, wosip blong Cybele mo Atemis i lus, mo wosip blong Meri, “woman ya we i bonem God” no “mama blong God,” i kam antap. Olsem buk ya i talem, “wosip blong Meri long Efesas . . . i stap gohed kam kasem tede, mo hem i no save stanap sipos i no bin gat Wosip blong Atemis bifo.”

Wosip Blong Atemis i Lus

Wosip blong Atemis i lus, mo biaen, Efesas i foldaon. Ol etkwek, malaria, mo sofmad we sloslo i fulumap haba, olgeta samting ya oli mekem laef long Efesas i kam had tumas.

Long ol yia 600 K.T., skul blong Islam i stat winim plante kantri. Islam i wantem pulum olgeta man Arab oli joen tugeta, be hem i wantem mekem moa. Ol man Arab we oli kam long sip oli spolemgud Efesas long ol yia 600 mo 700 K.T. Efesas i lus fulwan taem sofmad i fulumap haba blong hem, mo taon i kam wan bigfala hip ston nomo. Long ples ya we bifo i gat wan bigbigfala taon, naoia, wan smol ples nomo i stap, nem blong hem Aya Soluk (we tede oli kolem hem se Selçuk).

Wokbaot Long Ol Ston Blong Efesas Blong Bifo

Blong luksave olsem wanem Efesas i pulum ae blong ol man long taem bifo, yumi save wokbaot long ples we taon ya i bin stanap long hem bifo. Sipos yu stat wokbaot long ples ya we bifo i gat doa blong taon long hem, bambae yu save lukdaon long rod ya we oli kolem Rod blong ol Man Krit, we i go kasem Laebri blong Celsus. Long raet saed blong rod ya, bambae yu intres blong luk ples ya we oli kolem Odeum. Hem i wan smol haos blong plei long stej, we oli bildim long ol yia 100 K.T. Long ples ya we 1,500 man i save sidaon long hem, ol man oli holem ol kaonsel blong taon, mo tu oli save mekem pleplei long hem. Long tufala saed blong Rod blong ol Man Krit, i gat ol bilding olsem agora blong Gavman, we ol man oli tokbaot ol problem blong Gavman long  hem, yu save luk tempel blong Hadrian, wetem sam pablik springwota, mo sam haos we oli bildim antap long hil, hemia ol naesfala haos blong sam haeman blong Efesas.

Bambae yu sapraes blong luk naesfala Laebri blong Celsus, we oli bildim long ol yia 100 K.T. Oli kipim ol skrol long ol hol, insaed long wan bigfala rum blong ridim buk. Oli katem fo pija long ston we oli stanemap long fored blong laebri. Fofala woman ya oli pija blong ol naesfala fasin we ol gudfala man Rom olsem Celsus oli mas soem. Nem blong fofala woman ya, hemia: Sophia (waes), Arete (gudfala fasin), Ennoia (fasgud long god), mo Episteme (save no kasem save). Yu save luk ol trufala pija ya long Musium blong Efesas long Vienna. Klosap long yad blong laebri, wan bigbigfala doa i open i go long ples ya we oli kolem Tetragonos agora, hemia ples blong maket. Long bigbigfala ples ya, ol man oli stap mekem bisnes blong olgeta evri dei. Mo raonabaot long maket, ol man oli save wokbaot long ol smol rod aninit long wan ruf.

Afta long hemia, yu kamtru long Mabel Rod, we i lidim yu i go long bigfala haos blong plei long stej. Afta we oli finisim bigfala haos ya long taem blong ol man Rom, 25,000 man i save sidaon insaed long hem blong lukluk ol pleplei long stej. Oli flasem fored blong haos ya wetem ol bigbigfala pos, ol pija we oli kavem long ston, mo ol pija blong man. Long tingting blong yu, yu save pijarem bigfala rao we Demetrius, man ya blong wokem silva, i bin mekem long medel blong olgeta man we oli hivap long ples ya.

Rod we i joenem bigfala haos blong plei long stej wetem haba, i naes tumas. Longfala blong hem i klosap 500 meta, mo bigfala blong hem i 11 meta. Ol bigbigfala pos oli stanap long tufala saed blong rod ya. Long saed blong rod ya, oli bildim tu haos blong plei spot, we oli yusum speseli blong trenem ol man. Wokbaot blong yumi long olfala taon blong Efesas i finis long en blong rod ya, long bigfala get blong haba we i open i go long ol narafala ples long wol afsaed. Long Musium blong Efesas long Vienna, ol man oli katem wan smol pija blong bigfala taon ya long wud, wetem sam narafala bilding tu we man i save lukluk.

Taem yumi wokbaot insaed long musium ya, mo yumi luk pija blong Atemis blong Efesas, wantaem nomo yumi tingbaot ol faswan Kristin mo olsem wanem oli bin stanap strong. Oli mas laef long wan taon we i fulap long wok blong ol rabis spirit, long medel blong ol manples we oli ting nogud long bilif blong olgeta. Ol man we oli wosipim Atemis oli agensem ol Kristin we oli talemaot mesej blong Kingdom. (Ol Wok 19:19; Efesas 6:12; Revelesen 2:1-3) Be nating se i olsem, ol Kristin oli stanemap trufala wosip long taon ya. Trufala wosip ya bambae i kam antap mo i tekem ples blong ol giaman skul taem bambae oli lus, sem mak olsem wosip blong Atemis bifo i bin lus.​—Revelesen 18:4-8.

[Futnot]

[Mape blong pija long pej 26]

MASEDONIA

Blak Si

ESIA MAENA

Efesas

Mediterenian Si

IJIP

[Tok blong pija long pej 27]

Ol ston blong tempel blong Atemis bifo

[Tok blong pija long pej 29]

1. Laebri blong Celsus

2. Arete

3. Mabel Rod, we i go long bigfala haos blong plei long stej