?Yu Yu Akseptem Help Blong Jeova?

“Hae God i stap givhan long mi, nao bambae mi mi no save fraet.”​—HIBRUS 13:6.

1, 2. ?From wanem i impoten we yumi akseptem help blong Jeova mo letem hem i lidim yumi?

 TINGBAOT sipos yu stap wokbaot folem wan smol rod long saed blong wan bigfala hil. Yu no stap wokbaot yu wan nomo, i gat wan man we i wokbaot wetem yu. Hem i wan man we wok blong hem i blong lidim ol man we oli wantem klaem ol hil. Hem i savegud rod ya bitim ol narafala man. Hem i lan finis blong klaem ol hil, be yu no yet, mo bodi blong hem i fitgud i bitim bodi blong yu. Nating se i olsem, hem i gat longfala tingting, hem i wokbaot sloslo wetem yu. Hem i luk we sam samtaem yu kikim wan ston mo klosap yu foldaon. Hem i no wantem se yu karekil, ale taem yutufala i kasem wan ples we i denja, hem i holem han blong yu blong givhan long yu. ?Olsem wanem? ?Bambae yu akseptem help blong hem no nogat? Si, bambae yu akseptem, from we ples we yu stap long hem, hem i wan ples we i denja.

² Yumi ol Kristin, yumi stap folem wan rod we i had blong wokbaot long hem. ?Yu ting se yumi mas wokbaot yumi wan nomo long smol rod ya? (Matiu 7:​14) Nogat, Baebol i soemaot se i gat wan Man we i save lidim yumi moagud i bitim olgeta narafala man, hemia Jeova God. Hem i letem man i frengud wetem hem mo wokbaot wetem hem. (Jenesis 5:​24; 6:9) ?Jeova i stap givhan long ol man we oli wokbaot wetem hem? Hem wan i talem se: “!Mi mi Hae God, mi God blong yufala! Mi nao mi stap mekem yufala i strong, mo mi stap talem long yufala se, ‘!Yufala i no fraet! !Mi bambae mi givhan long yufala!’ ” (Aesea 41:13) Olsem man ya we yumi tokbaot long stat blong stadi ya, long kaen fasin Jeova i holem han blong olgeta we oli wantem wokbaot wetem hem, mo hem i frengud wetem olgeta. !Tru ya, yumi evriwan i mas glad blong akseptem help blong hem!

3. ?Long stadi ya, wanem ol kwestin we bambae yumi tokbaot?

 ³ Long laswan stadi, yumi bin tokbaot fo rod we Jeova i yusum long taem bifo blong givhan long ol man blong hem. ?Olsem wanem long taem blong yumi? ?Hem i yusum ol semfala rod blong givhan long ol man blong hem? ?Olsem wanem yumi save sua se yumi stap akseptem ol help olsem? Naoia, bambae yumi tokbaot ol kwestin ya. Long rod ya, bambae yumi save mekem tingting blong yumi i strong se Jeova i rili stap givhan long yumi.​—Hibrus 13:6.

Ol Enjel Oli Givhan

4. ?From wanem ol man blong God tede oli save sua se ol enjel oli stap givhan long olgeta?

⁴ ?Olsem wanem? ?Ol enjel oli stap givhan long ol man blong Jeova tede? Yes. Be oli no stap kamtru long wan bodi we ol man oli save luk, blong sevem ol man blong God taem oli kasem trabol. Long taem bifo tu, ol enjel oli kamtru sam samtaem nomo long fasin ya. Oli mekem bighaf blong wok blong olgeta long fasin we man i no save luk olgeta, olsem oli mekem tede. Nating se i olsem, taem ol man blong God bifo oli luksave se ol enjel oli stap klosap long olgeta blong givhan long olgeta, samting ya i leftemap tingting blong olgeta bigwan. (2 King 6:​14-​17) Sem samting i save leftemap tingting blong yumi tede tu.

5. ?Baebol i talem wanem blong soem se ol enjel oli joen long wok blong prij tede?

⁵ Ol enjel blong Jeova oli intres tumas long wan spesel wok we yumi stap joen long hem. ?Wanem wok ya? Yumi faenem ansa blong kwestin ya long Revelesen 14:6: “Nao mi luk we wan narafala enjel i stap flae antap long skae, i stap talemaot gud nius ya we i blong stap oltaem nomo, gogo i no save finis. Enjel ya i stap talemaot gud nius ya long olgeta man long wol, long olgeta blong evri kala, mo kantri, mo laen, mo lanwis.” I klia se “gud nius ya we i blong stap oltaem nomo” i sem mak long “gud nius ya blong kingdom” we Jisas i tokbaot. Hem i talem se bifo we en blong rabis fasin blong wol ya i kamtru, “bambae ol man oli talemaot [gud nius ya] long olgeta ples long wol, blong oli witnes long hem long fes blong olgeta man.” (Matiu 24:14, NW ) I tru se ol enjel oli no stap wokbaot long wol ya blong prij. Jisas i givim bigfala wok ya long ol man. (Matiu 28:19, 20) Be i gud tumas blong save se taem yumi stap mekem wok ya, ol tabu enjel we oli waes mo oli gat paoa, oli stap klosap blong givhan long yumi.

6, 7. (a) ?Wanem i soemaot se ol enjel oli stap givhan long yumi long wok blong prij? (b) ?Yumi mas mekem wanem blong yumi save sua blong kasem help blong ol enjel blong Jeova?

⁶ Plante samting i hapen blong soem se ol enjel oli stap givhan long yumi long wok ya. Olsem nao, long wok blong prij, plante taem ol Witnes blong Jeova oli mitim wan man we i jes prea blong askem God blong givhan long hem blong faenem trutok. Samting ya i no hapen wan taem nomo be i hapen plante taem. Taswe yumi save se ol enjel oli givhan long yumi blong faenem ol man ya, i no from laki nomo we yumi faenem olgeta. From samting ya, plante moa man naoia oli stap lanem blong obei long tok blong ‘enjel we i stap flae antap long skae.’ Hem i talem se: “Yufala i mas ona gud long God, mo  yufala i mas leftemap nem blong hem.”​—Revelesen 14:7.

⁷ ?Olsem wanem? ?Yu yu wantem tumas we ol strong enjel blong Jeova oli givhan long yu? Ale, yu mas joen fulwan long wok blong prij. (1 Korin 15:58) Taem yumi mekem bes blong yumi long spesel wok ya we Jeova i givim long yumi, yumi save sua se bambae yumi kasem help blong ol enjel.

Jif Blong Ol Enjel i Givhan

8. ?Jisas i gat wanem hae posisen long heven? ?From wanem samting ya i mekem yumi haremgud?

⁸ Jeova i stap yusum wan spesel enjel tu blong givhan long yumi. Revelesen 10:1 i tokbaot “wan narafala enjel we i gat paoa” mo we “fes blong hem i stap saen olsem san.” I klia se enjel we i stap long vison ya i minim Jisas Kraes we i tekem paoa blong hem long heven finis. (Revelesen 1:​13, 16) ?Be Jisas i rili wan enjel? Yes, yumi save talem olsem from we hem i jif blong ol enjel. (1 Tesalonaeka 4:​16) Jisas i gat moa paoa i bitim ol narafala enjel blong Jeova. Jeova i putumap hem i kam lida blong ol enjel blong hem we oli olsem wan bigfala ami. Tru ya, jif ya blong ol enjel hem i gat bigfala paoa blong givhan long yumi. ?Hem i givhan long yumi long wanem rod?

9, 10. (a) ?Taem yumi mekem sin, olsem wanem Jisas i wan “man blong givhan” long yumi? (b) ?Eksampol blong Jisas i save givhan long yumi olsem wanem?

⁹ Olfala aposol Jon i raetem se: “Sipos wan long yumi i mekem sin, i gat Jisas Kraes i stap, we fasin blong hem i stret gud, mo hem i man blong givhan long yumi, blong toktok long Papa blong yumi long saed blong yumi.” (1 Jon 2:1) ?From wanem Jon i talem se Jisas i “man blong givhan” long yumi, antap moa, taem yumi “mekem sin”? Blong ansa long kwestin ya, yumi mas tingbaot se evri dei yumi mekem sin, mo pei blong sin hemia ded. (Prija 7:​20; Rom 6:​23) Be Jisas i girap i givim laef blong hem olsem wan sakrefaes blong tekemaot sin ya blong yumi. Mo hem i stanap long saed blong Papa blong yumi long heven we i gat sore, blong toktok long hem from yumi. Yumi evriwan i nidim help ya. ?Yumi mas mekem wanem blong akseptem help ya? Yumi mas tanem tingting blong yumi from sin, mo askem Jeova blong yusum paoa blong sakrefaes blong Jisas blong fogivim yumi. Nao yumi mas traehad blong no mekem sin ya bakegen.

¹⁰ Jisas i ded from yumi, mo antap long samting ya, hem i givim wan eksampol we i stretgud olgeta blong yumi save folem. (1 Pita 2:​21) Eksampol blong hem i save lidim yumi mo givhan long yumi blong save rod we yumi mas wokbaot long hem. Nao bambae yumi no foldaon long ol bigfala sin, be bambae yumi mekem Jeova God i glad. Yumi glad tumas blong kasem help olsem. Jisas i promes tu blong givim wan narafala samting long ol man blong hem blong givhan long olgeta.

Tabu Spirit i Givhan

11, 12. ?Wanem ya spirit blong Jeova? ?Paoa ya i strong olsem wanem? ?From wanem yumi nidim spirit ya tede?

¹¹ Jisas i mekem promes ya se: “Bambae mi mi askem long Papa blong mi, mo hem bambae i givim wan narafala Man blong Givhan long yufala, blong hem i save stap oltaem wetem yufala. Narafala Man ya hemia Spirit ya we i stamba blong Trutok. Ol man blong wol ya oli no save tekem hem blong givhan long olgeta.” (Jon 14:16, 17) “Spirit ya we i stamba blong Trutok,” no tabu spirit, i no rili wan man, be hem i wan paoa. Hem i paoa we i kamaot long Jeova God hem wan. Paoa ya i strong bitim mak. Jeova i bin yusum paoa ya blong wokem heven mo wol, mo blong mekem ol bigbigfala merikel, mo blong givim ol vison long ol man blong soemaot samting we bambae hem i mekem. Tede Jeova i no moa yusum spirit blong hem long ol fasin ya. ?Hemia i min se yumi no nidim spirit ya tede?

¹² !Si, yumi nidim tumas! Long taem ya we ‘laef i strong tumas,’ yumi nidim spirit blong Jeova bitim olgeta taem bifo. (2 Timoti 3:1) Spirit ya i mekem yumi stanap strong taem wan traem i kasem yumi. Spirit ya i stap givhan long yumi blong wokem ol  nambawan fasin we oli pulum yumi blong kam klosap moa long Jeova mo ol Kristin brata sista blong yumi. (Galesia 5:​22, 23) ?Ale, yumi mas mekem wanem blong kasem nambawan help ya?

13, 14. (a) ?From wanem yumi save sua se Jeova i glad blong givim tabu spirit long ol man blong hem? (b) ?Wanem ol fasin we oli save soem se yumi no stap akseptem presen ya blong tabu spirit we God i givim?

¹³ Faswan samting, se yumi mas prea blong askem Jeova blong givim tabu spirit blong hem long yumi. Jisas i talem se: “Nating we yufala i man nogud, be yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim Tabu Spirit long ol man we oli askem long hem.” (Luk 11:13) Yes, Jeova i beswan Papa we yumi save gat. Sipos yumi prea wetem bilif blong askem hem blong givim tabu spirit long yumi, bambae hem i mas givim presen ya long yumi. Be bigfala kwestin se: ?Yu yu stap askem Jeova blong givim tabu spirit long yu? I gud we evri dei yumi askem samting ya long Jeova long ol prea blong yumi.

¹⁴ Seken samting se, blong akseptem presen ya, yumi mas wok folem spirit ya. Tingbaot wan samting we i soemaot poen ya. Sipos wan Kristin i stap traehad blong winim traem ya blong wantem lukluk ol doti pija blong seks. Ale, hem i prea blong askem Jeova blong givim tabu spirit long hem blong faet agensem doti fasin ya. Hem i askem advaes long ol Kristin elda tu, nao oli talem long hem se hem i mas tekem strong aksin, hem i no mas go klosap nating long ol rabis pija ya. (Matiu 5:​29) ?Nao, olsem wanem sipos Kristin ya i no lesin long advaes ya, ale hem i mekem sam samting bakegen we oli pulum hem blong lukluk ol doti pija ya? ?Yu ting se hem i stap wok folem prea blong hem blong askem Jeova blong givim tabu spirit long hem? ?No yu ting se hem i stap kam klosap tumas long fasin blong mekem tabu spirit i harem nogud, we i save mekem se hem i lusum paoa ya fulwan long laef blong hem? (Efesas 4:​30) Tru ya, yumi evriwan i mas mekem evri samting we yumi naf blong mekem, blong gohed blong kasem nambawan help ya we i kamaot long Jeova.

Baebol i Givhan

15. ?Olsem wanem yumi save soem se yumi no tingbaot Baebol olsem ol narafala buk nomo?

¹⁵ Blong plante handred yia finis, Baebol i givhan long ol man we oli stap tru long Jeova. Be yumi no mas tingbaot Baebol olsem ol narafala buk nomo. Yumi mas rimemba se Baebol i gat bigfala paoa blong givhan long yumi. Be blong akseptem help ya, yumi mas mekem wan samting. Yumi mas ridim Baebol, mo fasin ya i mas kam wan impoten haf blong laef blong yumi.

16, 17. (a) ?Ol Sam 1:​2, 3 i tokbaot wanem blesing we i kamaot taem yumi ridim loa blong God? (b) ?Olsem wanem Ol Sam 1:3 i soem se hadwok i joen wetem bisnes ya?

¹⁶ Ol Sam 1:​2, 3 i tokbaot man we i wantem mekem God i glad, i se: “Ol man olsem, oli glad blong folem Loa blong Hae God, mo oltaem oli stap ridim, mo oli stap tingting long hem long dei mo long naet. Olgeta ya oli olsem ol tri we oli gru [“we man i planem,” NW ] long saed blong wota we i stap ron. Ol tri ya oli stap karem frut long stret taem blong olgeta, mo lif blong olgeta i no save drae. Mo long sem fasin, ol man ya tu oli stap win long evri samting we oli stap mekem.” ?Yu yu luk bigfala tingting insaed long tufala vas ya? I isi blong ting se tufala i stap tokbaot nomo wan naesfala tri we i givim gudfala sado, long wan ples we i kwaet klosap long reva. !I tru, taem san i strong long medel dei, yumi glad tumas blong spel long sado blong ol tri olsem! Be Sam ya i no stap pulum yumi blong tingbaot spel. Defren olgeta, hem i stap soem se yumi mas wok strong. ?Olsem wanem hem i soemaot samting ya?

¹⁷ Makemgud se ol tri ya oli no stap blong givim sado nomo. Oli stap karem frut tu. Mo tu, i no from laki nomo we sid blong ol tri ya i gru klosap long wota ya. Wan man i “planem” ol tri ya long spesel ples ya​—“long saed blong wota we i stap ron.” Tingbaot se, long wan plantesen blong ol frut tri, maet ol man blong wok oli digim ol hol no krik i go kasem ol tri we oli spesel, nao wota i save ron long ol krik ya go kasem rus blong ol tri ya. !Saye, naoia yumi kasem bigfala poen long tufala vas ya! Long saed blong spirit, sipos yumi olsem tri ya we i stap grugud,  samting ya i kamaot from we samfala oli wokhad blong givhan long yumi. Yumi stap insaed long wan ogenaesesen we i wokhad blong mekem wota blong trutok i ron i kam stret long yumi. Be yumi mas mekem wok blong yumi tu. Yumi mas putum yumi i stap long stret ples blong kasem ol gudfala wota ya, hemia i min se yumi mas tingting dip mo lukaot moa save blong putum ol trutok ya blong Baebol oli stap long tingting mo hat blong yumi. Long rod ya nao, bambae yumi karem plante gudfala frut.

18. ?Yumi mas mekem wanem blong faenem ansa blong ol kwestin blong yumi long Baebol?

¹⁸ Baebol i no save givhan long yumi sipos yumi livim i stap slip nomo long kabod. Mo tu, Baebol i no wan samting we i majik​—olsem we yu save satem ae blong yu, openem Baebol long eniples, nao ansa blong kwestin blong yu bambae i stap long pej ya. Nogat. Sipos yumi mas tekem wan disisen, ale yumi mas lukaot ‘save blong God,’ olsem we yumi mas digim graon blong faenem wan sas ston we man i bin berem. (Ol Proveb 2:​1-5) Yumi mas spenem taem mo wokhad blong faenem save blong Baebol we yumi nidim. Yumi gat plante buk we oli eksplenem Baebol, oli stap blong givhan long yumi blong faenem save ya. Taem yumi yusum ol buk ya blong traehad blong faenem ol nambawan save blong Baebol, yumi stap akseptem help we Jeova i givim.

Ol Narafala Man Blong God Oli Givhan

19. (a) ?From wanem yumi save talem se ol haf blong Wajtaoa mo Wekap! oli olsem help we ol narafala Kristin oli givim long yumi? (b) Talem olsem wanem wan haf blong Wajtaoa no Wekap! i bin givhan long yu.

¹⁹ Long olgeta yia we oli pas finis, ol man blong Jeova oli givgivhan long olgeta oltaem. ?Olsem wanem tede? ?Fasin blong Jeova blong yusum ol man blong hem long rod ya, i jenis? Nogat. Ating yumi evriwan i save tingbaot plante taem we ol narafala Kristin oli bin givim stret help we yumi nidim. Maet wan haf blong Wajtaoa no Wekap! i bin leftemap tingting blong yu taem yu nidim, no i bin givhan long yu blong winim wan trabol no blong stanap strong taem wan samting i traem bilif blong yu. Jeova nao i givim help ya long yu, tru long “slef ya we i stret mo waes” we hem i putumap blong givim ‘kakae long yumi long stret taem.’​—Matiu 24:​45-​47, NW.

20. ?Long wanem fasin ol Kristin elda oli soem se oli olsem “ol presen” we God i givim?

²⁰ Plante taem, ol tok we ol narafala Kristin oli talem stret long yumi i givhan long yumi. Maet wan Kristin elda i givim wan tok long miting we i tajem hat blong yumi. Maet wan elda i kam luk yumi blong leftemap tingting blong yumi long wan taem we yumi fesem bigfala trabol. Maet wan elda i givim advaes long yumi long kaen fasin, i givhan long yumi blong luksave wan slak fasin blong yumi mo blong stretem fasin ya. Wan Kristin sista i raetem wan leta blong talem tangkiu from help we wan elda i givim long hem. Hem i se: “Taem mi prij wetem elda ya, hem i tektaem blong pulum mi blong talemaot tingting blong mi. Long naet bifo nomo mi bin prea long Jeova blong hem i lidim mi long wan brata we mi mi no fraet blong toktok wetem hem. Long nekis dei, brata ya i toktok wetem mi long kaen fasin. Hem i mekem mi mi luksave se  Jeova i givhan long mi long ol yia we oli pas. Mi mi talem tangkiu long Jeova we hem i sanem elda ya i kam long mi.” Long ol rod olsem, ol Kristin elda oli soem se oli rili “ol presen” we Jeova i givim tru long Jisas Kraes, blong givhan long yumi blong gohed blong wokbaot long rod we i go kasem laef.​—Efesas 4:8.

21, 22. (a) ?Wanem i save kamaot taem olgeta long kongregesen oli folem advaes long Filipae 2:4? (b) ?From wanem ol smosmol rod blong soem kaen fasin oli impoten?

²¹ Be i no ol elda nomo we oli mekem wok ya. Wanwan Kristin we oli stap tru long God, oli traehad blong folem oda we Baebol i givim se ‘yumi evriwan i mas givgivhan long yumi long laef blong yumi. I nogud wan man i stap lukaot long laef blong hem nomo.’ (Filipae 2:4) Taem olgeta evriwan long Kristin kongregesen oli folem advaes ya, oli mekem plante nambawan samting blong soem kaen fasin long olgeta. Tingbaot wan famle we i bin harem nogud tumas long wan bigfala trabol we i kasem olgeta. Papa blong famle ya i bin tekem smol gel blong hem i go long stoa wetem hem. Taem tufala i stap kambak, i gat wan aksiden long trak nao smol gel ya i ded mo papa blong hem i kasem bigfala kil. Taem papa ya i kamaot long hospital, hem i no save wokbaot mo i no save mekem wan samting blong hem wan. Woman blong hem tu i harem nogud tumas, mekem se hem i no naf blong lukaot long man blong hem. Ale wan brata long kongregesen wetem woman blong hem tufala i tekem sik brata ya mo woman blong hem i go long haos blong tufala, nao tufala i lukaot long tufala blong plante wik.

²² I tru, i no oltaem we wan rabis samting olsem i hapen, nao wan brata no sista i mas livim plante samting blong soem bigfala kaen fasin long narafala. Plante taem yumi kasem help long ol smosmol rod nomo. Be nomata se kaen fasin we narafala i soem long yumi i smol nomo, ating bambae yu agri se yumi haremgud tumas long hem. ?Yu yu save tingbaot wan taem we wan brata no sista i talem sam gudfala toktok long yu, no i mekem wan samting blong soemaot se hem i tingbaot yu, stret olsem we yu yu nidim long taem ya? Plante taem Jeova i soemaot long ol rod olsem se hem i stap tingbaot yumi.​—Ol Proveb 17:17; 18:24.

23. ?Wanem tingting blong Jeova taem yumi traehad blong givhan long narafala?

²³ ?Bambae yu yu glad sipos Jeova i yusum yu blong givhan long narafala? Hemia nao janis we yu yu gat. Jeova i stap tinghae long ol traehad blong yu blong givhan long ol narafala. Tok blong hem i talem se: “Taem yu givim samting long puaman, i olsem we yu letem Hae God i yusum fastaem, mo biaen, hem bambae i givim jenis blong samting ya long yu.” (Ol Proveb 19:17) Yumi kasem bigfala glad taem yumi mekem samting blong givhan long ol Kristin brata sista blong yumi. (Ol Wok 20:35) Olgeta we oli wantem stap olgeta nomo oltaem, oli no kasem glad ya we i kamaot from fasin blong givhan long narafala, mo oli no haremgud long help blong narafala tu. (Ol Proveb 18:1) Taswe, yumi no mas mestem wan janis blong joen long ol Kristin miting. Long rod ya, yumi evriwan i save lefleftemap tingting blong yumi.​—Hibrus 10:​24, 25.

24. ?From wanem yumi no mas harem se ol man we oli bin luk ol bigbigfala merikel blong Jeova long taem bifo, oli gat moa janis i bitim yumi?

²⁴ Yumi haremgud tumas blong tingbaot ol rod we Jeova i yusum blong givhan long yumi. I tru, yumi no stap laef long wan taem we Jeova i mekem ol bigbigfala merikel blong mekem ol plan blong hem oli kamtru. Be yumi no mas harem se ol man long taem bifo we oli luk ol samting ya oli gat moa janis i bitim yumi. Bigfala samting se Jeova i stap givhan long yumi olsem we yumi nidim, blong yumi save stap tru long hem. Sipos yumi stanap strong long bilif, bambae yumi laef gogo yumi save luk ol bigbigfala merikel mo wok blong Jeova we oli bitim eni samting we ol man long taem bifo oli bin luk. Taswe yumi mas holem strong tingting blong akseptem help we Jeova i stap givim wetem lav, mo yumi mas yusum ol help ya fulwan. Olsem nao, bambae yumi soemaot se yumi agri long ol tok long stamba vas ya blong yia 2005: ‘Jeova i stap givhan long mi.’​—Ol Sam 121:2.

?Wanem Tingting Blong Yu?

?Blong givim help we yumi nidim tede, olsem wanem Jeova i stap yusum

• ol enjel?

• tabu spirit?

• Baebol?

• ol narafala man blong hem?

[Kwestin]

[Tok blong pija long pej 18]

I gud tumas blong save se ol enjel oli stap givhan long yumi long wok blong prij

[Tok blong pija long pej 21]

Jeova i save yusum wan narafala Kristin blong leftemap tingting blong yumi olsem yumi nidim