Lav Blong God i Joenem Olgeta

TAEM Kristin kongregesen i stat long faswan handred yia, i gat wan samting we i makemaot ol man blong hem, hemia se oli joengud, nating we oli kamaot long ol defdefren ples. Ol man ya we oli wosip long trufala God oli kamaot long ol nesen blong Esia, Yurop, mo Afrika. Olgeta oli kamaot long ol defdefren famle mo fasin blong laef​—sam oli pris, soldia, slef, refuji, tredaman, sam oli wok long ofis, mo sam oli man blong mekem bisnes. Samfala oli man Jiu, mo ol narafala oli kamaot long ol narafala laen. Plante long olgeta oli bin mekem ol fasin olsem ronem woman, slip wetem man bakegen, dring we oli lusum hed, stil, no mekem bisnes blong stilim mane. Be, taem oli kam Kristin, oli lego ol rabis fasin blong olgeta mo oli joengud tugeta long wan bilif nomo.

?Kristin skul blong faswan handred yia i mekem wanem blong pulum ol man ya oli joengud olsem? ?From wanem oli gat pis bitwin olgeta mo wetem ol narafala man tu? ?From wanem oli no joen wetem ol narafala blong agensem ol haeman mo oli no mekem faet? ?From wanem faswan Kristin skul i defren olgeta long ol bigbigfala jos blong tede?

?Wanem i Pulum Ol Memba Blong Kongregesen Blong Oli Joengud?

Faswan samting we i mekem ol man blong bilif long faswan handred yia oli joengud, hemia lav we oli gat long God. Ol Kristin ya oli luksave se faswan wok blong olgeta i blong laekem trufala God, Jeova, wetem olgeta hat, laef, mo tingting blong olgeta. Olsem nao, aposol Pita we i wan man Jiu, i kasem wan oda we i talem se hem i mas go long haos blong wan man we i no wan man Jiu, hemia wan  samting we fastaem hem i no save mekem nating. Faswan samting we i pusum hem blong obei long oda ya, hemia lav we hem i gat long Jeova. Pita mo ol faswan Kristin oli frengud wetem God from we oli gat stret save long saed blong ol fasin blong Hem, ol samting we Hem i laekem, mo ol samting we Hem i no laekem. Biaen, olgeta ya oli kasem save se Jeova i wantem se oli ‘mas joen gud we oli gat wan tingting nomo, mo we fasin blong olgeta i wan nomo.’​—1 Korin 1:​10; Matiu 22:37; Ol Wok 10:​1-​35.

Ol Kristin ya oli joengud wanples tu from we oli bilif long Jisas Kraes. Oli wantem biaenem Jisas. Jisas i givim oda long olgeta se: “ ‘Yufala i mas lavlavem yufala.’ Olsem we mi mi lavem yufala. . . . Nao from we yufala i stap lavlavem yufala, bambae olgeta man oli luksave se yufala i man blong mi.” (Jon 13:34, 35) Lav ya i no jes wan filing we i kamaot wantaem nomo afta i lus kwiktaem, nogat. Hem i wan lav we i pusum olgeta blong oli lego ol samting we olgeta nomo oli wantem. ?Wanem samting i kamaot from? Jisas i prea long saed blong olgeta we oli bilif long hem i se: “Mi mi prea, blong olgeta evriwan oli save stap wan nomo. Papa. Laef blong yu i joen gud long laef blong mi, mo laef blong mi i joen gud long laef blong yu. Mo long sem fasin, mi mi prea blong laef blong olgeta ya i save joen gud long laef blong yumitufala, blong oli stap wan nomo.”​—Jon 17:20, 21; 1 Pita 2:21.

Jeova i kafsaedem tabu spirit blong hem, no paoa blong hem, long ol trufala man blong wok blong hem. Spirit ya i mekem olgeta oli joengud. Hem i givhan long olgeta blong oli kasem save ol tijing blong Baebol we evriwan long kongregesen oli agri blong folem. Ol man we oli wosip long Jeova oli go talemaot sem mesej nomo​—Kingdom blong God we Mesaea i rul long hem bambae i mekem nem blong Jeova i kam tabu, Kingdom ya hem i wan gavman we i stap long heven mo bambae i rulum olgeta man long wol. Ol faswan Kristin oli kasem save se oli no “blong wol ya.” Taswe, sipos wan faet i kamaot insaed long wan kantri no wan kantri i faet agensem narawan, be ol Kristin oli no joen long faet ya. Oli traehad blong gat pis wetem evri man.​—Jon 14:26; 18:36; Matiu 6:​9, 10; Ol Wok 2:​1-4; Rom 12:17-​21.

Olgeta man blong bilif oli traehad blong mekem fasin joengud i stap. ?Oli mekem samting ya olsem wanem? Taem oli meksua se fasin blong olgeta i laenap wetem Baebol. Taswe, aposol Pol i raet i go long ol Kristin i se: “Yufala i mas finis long olfala laef ya blong yufala bifo, we yufala i stap folem ol fasin blong yufala nomo,” mo ‘yufala i mas kam niufala man.’​—Efesas 4:​22-​32.

Oli Holemtaet Fasin Joen

I tru se ol faswan man blong bilif oli no stretgud olgeta, mo sam samting i bin kamaot we i traem fasin blong olgeta blong joengud. Ol Wok 6:​1-6 i tokbaot wan rao we i kamaot bitwin ol Kristin man Jiu we oli toktok lanwis Grik mo olgeta we oli toktok lanwis Hibru. Olgeta we oli toktok lanwis Grik oli harem se ol narafala Kristin ya oli stap mekem i moa gud long ol manples blong olgeta i winim ol man Gris. Be taem ol aposol oli kasem save long samting ya, kwiktaem nomo oli stretem bisnes ya long stret fasin. Biaen bakegen, wan rao i kamaot long saed blong olgeta long Kristin kongregesen we oli no man Jiu, se oli mas folem wan tijing blong Loa. Ol aposol oli tekem wan disisen long saed ya we i stanap long ol rul blong Baebol, mo evriwan long kongregesen oli agri wetem disisen ya.​—Ol Wok 15:1-29.

Ol eksampol ya oli soemaot se taem ol Kristin blong faswan handred yia oli no agri long wan samting, be hemia i no mekem se kongregesen i seraot folem laen blong olgeta no folem ol tijing we olgeta nomo oli wantem folem. ?From wanem oli no seraot? From we oli folem ol fasin we i givhan long olgeta blong joengud​—oli lavem Jeova, oli bilif long Jisas Kraes, oli gat lav ya we i pusum olgeta blong lego ol samting we olgeta nomo oli wantem,  oli letem tabu spirit i lidim olgeta, olgeta evriwan oli kasem sem save long saed blong Baebol, mo oli rere blong jenisim fasin blong olgeta​—ol fasin ya oli strong naf blong mekem se faswan kongregesen ya i joengud mo gat pis.

Joengud Long Wosip Tede

?Olsem wanem? ?Tede ol man oli save joengud long wosip olsem? ?Ol semfala fasin ya we i bin joenem ol faswan Kristin, oli naf yet blong pulum ol memba blong wan skul blong oli joengud mo blong oli gat pis wetem ol narafala we oli kamaot long ol defren laen? !Yes, oli naf! Ol Witnes blong Jeova oli joengud olsem wan bigfala famle blong ol brata sista we oli stap long bitim 230 kantri, aelan mo teritori raon long wol. Mo oli joengud from we oli folem ol semfala fasin ya we i joenem ol Kristin blong faswan handred yia.

Bigfala samting we i givhan long ol Witnes blong Jeova blong oli joengud, hemia from we oli fasgud long Jeova God. Hemia i min se oli traehad blong stap tru long hem oltaem, nomata sipos oli stap long gud taem no long trabol taem. Mo tu, ol Witnes blong Jeova oli bilif long Jisas Kraes mo ol tijing blong hem. Ol Kristin ya oli gat lav we i pusum olgeta blong lego ol samting we olgeta nomo oli wantem. Oli soemaot lav ya long ol narafala we oli gat sem bilif olsem olgeta mo oli talemaot semfala gud nius blong Kingdom blong God long olgeta ples we oli stap long hem. Oli glad blong tokbaot Kingdom ya long ol man we oli gat defren bilif, we oli kamaot long ol defren laen, kantri, mo komuniti. Mo tu, ol Witnes blong Jeova oli no joen long ol bisnes blong wol ya, mo hemia i mekem se ol samting we oli stap seraotem man long politik, kastom, bisnes mo laef insaed long komuniti, i no gat paoa long olgeta. Ol Witnes ya oli agri se wanwan long olgeta i mas wok blong mekem se fasin joengud i stap. Taswe, oli mekem laef blong olgeta i laenap wetem ol rul blong Baebol.

Fasin Joengud i Pulum Ol Narafala

Plante taem, fasin joengud ya i pulum tingting blong olgeta we oli no Witnes. Olsem Ilse, * we fastaem i wan sista long Katolik jos long Jemani. ?Wanem samting hem i luk long saed blong ol Witnes we i pulum hem? Ilse i talem se: “Olgeta oli ol beswan man we mi mi mitim. Oli no joen long ol faet, oli no save mekem wan samting we i save spolem narafala. Oli wantem givhan long ol man blong oli gat gudfala laef long paradaes long wol ya aninit long Kingdom blong God.”

Mo tu i gat Günther, wan soldia blong Jemani we oli sanem i go long Franis long taem blong namba tu faet blong wol. Wan dei, wan pris blong Protestan i holem wan jos seves wetem grup blong ol soldia we Günther i joen long hem. Pris ya i prea mo i askem blong God i halpem olgeta, i lukaotgud long olgeta mo i mekem olgeta oli win long faet. Taem seves i finis, Günther i go mekem gad. Hem i yusum spae glas blong hem mo i wajem ol soldia long narasaed we oli enemi, mo hem i luk se wan pris i stap mekem jos seves tu wetem olgeta. Biaen Günther i talem se: “I luk olsem se pris ya tu i prea long God mo i askem blong Hem i halpem olgeta, i lukaotgud long olgeta mo i mekem olgeta oli win long faet. Mi stap askem long mi wan se from wanem nao ol Kristin jos oli stap faet agensem olgeta bakegen.” Ol samting ya oli stap strong long tingting blong Günther. Biaen hem i mitim ol Witnes blong Jeova, we oli no stap joen long faet, mo hem i kam haf blong bigfala famle blong olgeta raon long wol.

Ashok mo Feema tufala i bin joen long wan jos blong ol kantri blong Is. Long haos blong tufala, tufala i gat wan smol olta we i ples blong prea long wan god blong olgeta. Taem wan bigfala sik i kasem famle blong tufala, tufala i stat blong jekemap ol tijing blong jos blong tufala bakegen. Taem Ashok mo Feema, tufala i storian wetem ol Witnes blong Jeova, tufala i sapraes long ol tijing blong Baebol mo long lav we ol Witnes oli soem long olgeta. Naoia tufala i stap wok strong blong talemaot gud nius blong Kingdom blong Jeova.

Ilse, Günther, Ashok, mo Feema oli joen wetem ol milian Witnes blong Jeova we oli wan bigfala famle blong ol brata sista raon long wol. Oli bilif long promes blong Baebol we i talem se klosap nao ol fasin ya we i givhan long olgeta blong joengud tede, bambae i mekem olgeta man long wol we oli gat fasin obei oli joengud. Nao, bambae ol man oli no moa yusum nem blong jos blong mekem faet, blong agensem narafala, mo blong seraotem man. Bambae olgeta man long wol oli joengud blong wosipim trufala God ya Jeova.​—Revelesen 21:​4, 5.

[Futnot]

[Tok blong pija long pej 4]

Nating se ol faswan Kristin oli kamaot long ol defdefren ples, be evriwan oli joengud