Yusum Waes Blong God Blong Protektem Ol Pikinini Blong Yu

EVRI dei bodi blong yumi i stap faet. Hem i faet agensem ol bebet no vaeras we oli save kasem yumi. Laki nomo se bighaf blong yumi, bodi blong yumi i naf blong faetem ol bebet no vaeras ya, mekem se yumi no kam sik oltaem.

Long sem fasin, yumi ol Kristin yumi mas faet agensem ol tingting mo fasin we Baebol i no agri long olgeta, mo ol traem we oli save spolem helt blong yumi long saed blong spirit. (2 Korin 11:3) Blong blokem ol samting we oli save spolem tingting mo hat blong yumi evri dei, yumi mas wokem wan rod blong protektem yumi long saed blong spirit.

Rod ya i impoten tumas, speseli blong ol pikinini blong yumi, from we taem oli bon oli no save olsem wanem blong blokem spirit blong wol. (Efesas 2:2) Taem ol pikinini oli stap gruap, ol papa mama oli mas halpem olgeta blong oli wokem prapa rod blong olgeta blong blokem ol rabis fasin. ?Rod ya i dipen long wanem samting? Baebol i talem se: “Hae God nomo i save mekem man i waes . . . mo i stap gad gud long olgeta we tingting blong olgeta i stap strong long hem.” (Ol Proveb 2:6, 8) Waes blong God i save lukaot gud long ol yangfala. Waes ya i blokem ol yangfala blong oli no joen wetem ol nogud fren, oli no letem ol narafala oli pulum olgeta blong mekem ol rabis samting, mo oli no mekem ol nogud pleplei. ?Olsem wanem ol papa mama oli save folem ol advaes blong Jeova mo givim waes blong God long ol pikinini blong olgeta?

Lukaotem Ol Gudfala Fren

Ol yangfala oli glad blong kampani wetem ol narafala yangfala. Be sipos oli fren nomo wetem ol yangfala we oli no gat save long laef, samting ya bambae i no givhan long olgeta blong kasem mo yusum waes blong God. Buk blong ol proveb i givim woning ya se: “Fasin blong pikinini, oltaem i save mekem ol krangke samting.” (Ol Proveb 22:15) ?Olsem wanem sam papa mama oli bin halpem ol pikinini blong olgeta blong yusum waes blong God, long saed blong ol fren blong olgeta?

Wan papa, nem blong hem Don, * i talem se: “Ol boe blong mitufala oli spenem plante taem wetem ol narafala yangfala, be oltaem oli stap long haos blong mifala, taem mitufala i stap long haos tu. Doa blong mifala i open oltaem nomo, mekem se  oltaem i gat plante yangfala we oli kam kakae wetem mifala mo oli haremgud wetem mifala. Nating se i gat fulap noes long haos, be mitufala i glad we ol pikinini oli stap long wan sefples we oli save haremgud long hem.”

Brian mo Mary, tufala i gat tri pikinini, mo tufala i talem se i no isi oltaem blong trenem trifala. Tufala i se: “Long kongregesen blong mifala, i no gat plante yangfala we oli save joen wetem gel blong mitufala, Jane. Nating se i olsem, hem i gat wan fren, nem blong hem Susan, wan yangfala gel we i glad oltaem. Be papa mama blong Susan tufala i no strong long hem olsem mitufala i strong long Jane. Tufala i letem Susan i wokbaot let long naet, hem i werem ol sotfala sket, hem i lesin long sam nogud miusik, mo hem i lukluk sam rabis sinema. Blong longtaem, Jane i no kasem save from wanem mitufala i strong olsemia wetem hem. Long tingting blong hem, papa mama blong Susan tufala i traem kasem save long tingting blong dota blong tufala, be mitufala i strong tumas. Be taem Susan i kasem sam problem long saed blong spirit, nao Jane i luksave we strong fasin blong mitufala i bin protektem hem. Mitufala i glad tumas we mitufala i no kam slak, mitufala i stanap strong blong blokem dota blong mitufala long ol samting we mitufala i ting se i nogud long hem.”

Olsem Jane, plante yangfala oli lanem se i waes blong askem advaes blong papa mama long saed blong ol fren. Proveb i talem se: “Man we i lesin gud long ol man we oli tok blong stretem hem, hem i wan waes man.” (Ol Proveb 15:31) Waes blong God i pulum ol yangfala blong lukaotem ol gudfala fren.

No Letem Ol Fren Oli Pulum Olgeta

Wan narafala traem we i klosap sem mak olsem ol nogud fren, hemia taem ol fren oli traem pulum ol yangfala. Ol pikinini oli fesem traem ya evri dei. Ol yangfala oli wantem tumas we ol narafala yangfala oli laekem olgeta, mo fasin ya i save pulum olgeta blong folem ol fasin blong wol.​—Ol Proveb 29:25.

Baebol i talem se “wol ya wetem ol samting we ol man blong hem oli wantem, oli stap lus.” (1 Jon 2:17) Taswe, ol papa mama oli no mas letem rabis wol ya i gat paoa long ol pikinini blong olgeta. ?Olsem wanem oli save halpem ol pikinini blong olgeta blong oli gat tingting olsem ol Kristin?

Richard i talem se: “Oltaem, dota blong mi i wantem werem ol semfala klos olsem ol narafala yangfala. Taswe, wetem longfala tingting, mitufala i tokbaot ol gudfala saed mo ol nogud saed blong ol wanwan klos we hem i wantem werem. Nating se mitufala i luk se sam niufala stael oli oraet nomo, be mitufala i folem advaes we mitufala i bin harem sam yia bifo, se, ‘Wan man we i waes i no faswan man blong folem wan niufala stael, mo i no laswan man blong lego stael ya.’ ”

Wan mama, nem blong hem Pauline, i yusum wan defren rod blong blokem ol pikinini blong hem long ol narafala yangfala we oli traem pulum olgeta. Hem i talem se: “Mi mi soem intres long ol samting we ol pikinini blong mi oli laekem, mo oltaem mi go toktok wetem olgeta long rum blong olgeta. Ol longfala storian olsem oli halpem mi blong trenem tingting blong olgeta, mo ol pikinini oli lanem se i no prapa tingting blong olgeta we i stret evritaem.”

 Ol fren we oli traem pulum ol yangfala blong yumi, bambae oli no save stop, taswe oltaem ol papa mama oli mas ‘pulumdaon olgeta samting we ol man blong wol oli stap stanemap,’ mo oli mas halpem ol pikinini blong olgeta blong “tanem olgeta rabis tingting blong olgeta, blong mekem olgeta oli ona long Kraes.” (2 Korin 10:5) Sipos ol papa mama mo ol pikinini oli stap “prea oltaem,” bambae oli kasem paoa blong mekem impoten wok ya.​—Rom 12:12; Ol Sam 65:2.

Pleplei i Gat Paoa Long Ol Pikinini

Namba tri samting, ol papa mama oli save faenem i had blong lidimgud ol pikinini blong olgeta long saed blong ol pleplei. Ol pikinini oli laekem pleplei. Mo plante yangfala tu oli wantem tumas blong pleplei. (2 Timoti 2:22) Be sipos oli no waes long ol pleplei blong olgeta, samting ya i save spolem olgeta long saed blong spirit. Ol pleplei oli denja from tu stamba risen.

Faswan risen, plante pleplei oli joen wetem ol rabis fasin blong wol. (Efesas 4:17-19) Blong pulum ol yangfala, ol pleplei ya oli luk gud, mo oli pulum ae. Samting ya i wan bigfala denja long ol yangfala we oli no luksave ol trik.

Nambatu risen, ol pleplei oli save tekem tumas taem. Long tingting blong sam man, haremgud i stap long faswan ples long laef blong olgeta, mo oli spenem plante taem mo paoa blong haremgud. Buk blong Ol Proveb i givim woning ya se, “I nogud yu stap dring tumas suga.” (Ol Proveb 25:27) Long sem fasin, sipos wan yangfala i laekem tumas ol pleplei, bambae hem i no moa wantem tekem plante kakae long saed blong spirit, nao hem i save kam slak. (Ol Proveb 21:17; 24:30-34) Ol yangfala we oli haremgud tumas long ol samting blong wol ya oli no save “kasem laef ya we i prapa wan,” hemia laef we i no save finis long niufala wol blong God. (1 Timoti 6:12, 19) ?Olsem wanem sam papa mama oli winim traem ya?

Mari Carmen, wan mama we i gat tri gel, i talem se: “Mitufala i wantem we ol gel blong mitufala oli pleplei mo oli haremgud. Taswe, plante taem mifala i go samples blong pleplei tugeta olsem wan famle, mo ol gel oli spenem taem tu wetem ol fren blong olgeta long kongregesen. Be mifala i no bitim mak long saed blong ol pleplei. Pleplei i olsem wan loli we mifala i tekem afta we mifala i kakae. Hem i wan gudfala samting we i tesgud, be hem i no stamba kakae blong mifala. Ol gel oli lan blong wok long haos, long skul, mo long kongregesen tu.”

Don mo Ruth tufala i makemaot taem blong famle i pleplei tugeta. Tufala i eksplenem se: “Mifala i tekem disisen ya se Sarede hem i ‘famle dei.’ Long moning mifala i go prij, long aftenun mifala i go swim long solwota, mo long naet mifala i mekem wan spesel kakae.”

Eksampol blong ol papa mama ya i soem we i impoten blong gat wan tingting we i skelgud long saed blong ol pleplei, mo blong no letem pleplei i tekem faswan ples long laef blong ol Kristin.​—Prija 3:4; Filipae 4:5, NW.

Trastem Jeova

I tru se, blong wokem ol rod blong faet agensem ol nogud fasin, i nidim plante yia. I no gat wan spesel meresin we i save givim waes blong God long ol pikinini wantaem nomo, mo we i save pusum olgeta blong trastem Papa blong olgeta long heven. Defren olgeta, ol papa mama oli mas “gohed blong stretem olgeta, mo blong trenem tingting blong olgeta olsem we Jeova i wantem.” (Efesas 6:4, NW ) Hemia i min se ol papa mama oli mas halpem ol pikinini blong gat tingting blong God long evri samting. ?Olsem wanem ol papa mama oli save mekem samting ya?

I impoten tumas we oltaem, oli gat wan famle Baebol stadi. Stadi i ‘openem ae blong ol pikinini blong oli save luk ol gudgudfala samting long loa blong God.’ (Ol Sam 119:18) Diego i tinghae long famle Baebol stadi, olsem nao hem i halpem ol pikinini blong hem blong oli kam klosap long Jeova. Hem i talem se: “Mi reremgud stadi ya. Mi mekem sam risej long ol buk we oli tokbaot Baebol, mo  samting ya i halpem mi blong mekem ol man long Baebol oli kam ol trufala man long tingting blong ol pikinini blong mi. Mi pulum olgeta blong skelem laef blong olgeta wetem laef blong ol man blong Baebol. Olsemia, ol pikinini blong mi oli rimembagud ol samting we oli mekem Jeova i glad.”

I gat sam narafala fasin blong tijim ol pikinini tu. Moses i pulum ol papa mama blong tokbaot Jeova ‘taem oli stap long haos, taem oli wokbaot, taem oli go blong slip no oli girap bakegen.’ (Dutronome 6:7) Wan papa i eksplenem se: “I no isi long boe blong mi blong talemaot ol filing blong hem. Taem mitufala i go wokbaot no taem mitufala i wok tugeta, sloslo hem i harem i fri blong talemaot ol filing blong hem. Long taem ya, mitufala i storiangud mo mitufala i haremgud from.”

Ol prea blong ol papa mama oli tajem hat blong ol pikinini tu. Taem oli harem ol papa mama blong olgeta oli prea long God wetem tingting daon, blong kasem help mo blong askem God blong i fogivim olgeta, samting ya i save pulum ol pikinini blong “bilif we God i stap.” (Hibrus 11:6) Plante papa mama we oli lidimgud famle blong olgeta oli talem se i impoten tumas blong prea wetem famle. Sam long ol prea ya oli save tokbaot skul mo ol narafala samting we ol pikinini oli wari from. Wan papa i talem se oltaem, waef blong hem i prea wetem ol pikinini bifo we oli go long skul.​—Ol Sam 62:8; 112:7.

“Yumi No Kam Slak Blong Mekem Ol Gudfala Fasin”

Olgeta papa mama oli mekem sam mastik, mo samtaem oli luksave se oli no bin folem beswan rod blong dil wetem sam problem. Nating se i olsem, Baebol i pulum ol papa mama blong gohed blong traehad, i talem se oli no mas “kam slak blong mekem ol gudfala fasin.”​—Galesia 6:9.

Be maet samtaem ol papa mama oli no moa wantem traehad, from we oli no kasem save ol pikinini blong olgeta. Maet i isi blong talem se fasin blong ol yangfala tede i defren, mo oli strong moa i bitim ol yangfala blong bifo. Be tru, ol pikinini blong tede mo ol pikinini blong bifo oli sem mak nomo, oli gat ol semfala slak fasin, mo oli fesem ol semfala traem. Wan samting nomo se tede, i gat plante moa samting we i save pulum ol yangfala blong mekem wan rong. Taswe, wan papa, afta we hem i bin stretem boe blong hem, i talem long hem long kaen fasin se: “Boe blong mi, hat blong yu i wantem pulum yu nomo blong mekem ol semfala samting we hat blong mi i bin pulum mi blong wantem mekem taem mi mi yang yet.” Maet ol papa mama blong naoia oli no save plante samting long saed blong ol kompiuta, be oli savegud wanem samting i save pulum ol yangfala.​—Matiu 26:41; 2 Korin 2:11.

Sam pikinini oli no wantem folem ol advaes blong papa mama blong olgeta, no maet oli mekem stronghed taem papa mama i stretem olgeta. Nating sipos i olsem, ol papa mama oli mas gohed blong stanap strong. Maet fastaem ol pikinini oli  no wantem obei, no maet oli minim nomo blong agensem papa mama, be biaen sloslo maet bambae oli folem ol gudfala advaes blong olgeta. (Ol Proveb 22:6; 23:22-25) Mathew, wan yangfala Kristin we i wok long branj ofis blong ol Witnes blong Jeova, i talem se: “Taem mi mi yangfala, mi harem se ol rul blong papa mama blong mi oli strong tumas. Mi gat tingting ya se, sipos ol papa mama blong ol fren blong mi oli letem ol pikinini blong olgeta oli mekem sam samting, ?from wanem papa mama blong mi tufala i blokem mi? Mo mi harem nogud tumas sipos taem oli panisim mi, oli no letem mi mi go pul long kenu, from we mi laekem tumas blong mekem samting ya. Be, taem mi tingtingbak, mi luksave se papa mama tufala i yusum gudfala rod blong stretem mi, mo samting ya i mekem i gud long mi. Mi tangkiu tumas long tufala, from we tufala i bin stretem mi taem mi nidim.”

Yumi sua long wan samting: nating se ol pikinini blong yumi oli gruap long wan wol we i no givhan long olgeta nating long saed blong spirit, be oli save kam ol gudfala Kristin yet. Baebol i promes we waes blong God i save protektem olgeta long saed blong spirit, i talem se: “Nao bambae yu save kam waes, mo waes ya blong yu bambae i save mekem yu yu harem gud. Fasin ya we yu luksave ol samting mo we yu savegud ol mining blong hem, hem bambae i stap lukaot long yu, mo bambae i stap blokemgud yu, blong yu no mekem ol fasin nogud.”​—Ol Proveb 2:10-12.

I no isi long ol mama blong karem wan bebi insaed long bel blong olgeta blong naen manis. Mo ol 20 yia we oli kam biaen oli save mekem ol papa mama oli haremgud, be oli save safa tu. Nating se i olsem, ol Kristin papa mama oli lavem ol pikinini blong olgeta, taswe oli traehad wetem ful paoa blong olgeta blong yusum waes blong God blong protektem ol pikinini ya. Oli gat ol semfala filing olsem aposol Jon i bin gat long ol pikinini blong hem long saed blong spirit, taem hem i talem se: “Taem mi harem we oltaem ol pikinini blong mi oli stap folem ol tok we i tru, hemia i mekem mi mi harem gud moa, i winim we mi harem gud long ol narafala samting.”​—3 Jon 4.

[Futnot]

[Tok blong pija long pej 24]

“Doa blong mifala i open oltaem nomo, mekem se oltaem i gat plante yangfala we oli kam”

[Tok blong pija long pej 25]

Soem intres long ol samting we ol pikinini blong yu i laekem

[Tok blong pija long pej 26]

“Mi reremgud stadi ya”