Ol Profet Tok Oli Poen i Go Long Kraes

“Tok ya we Jisas i talemaot se i tru, hemia i stamba blong ol tok blong ol profet.”​—REVELESEN 19:10.

1, 2. (a) ?Stat long yia 29 K.T., wanem disisen we ol man Isrel oli mas mekem? (b) ?Bambae yumi tokbaot wanem long stadi ya?

 YIA, hem i 29 K.T. * Ol man Isrel oli stap tokbaot Mesaea ya we God i promes blong sanem i kam. Tok we Jon Baptaes i stap talemaot, i mekem se ol man oli wanem tumas blong luk Mesaea ya. (Luk 3:​15) Jon i talem se hem, hem i no Kraes. Hem i tokbaot man Nasaret ya Jisas, i se: “Mi mi luk samting ya, mo mi talemaot se man ya, hem i Pikinini blong God.” (Jon 1:​20, 34) I no longtaem, fulap man oli folem Jisas blong harem ol tijing blong hem, mo blong hem i tekemaot ol sik blong olgeta.

² Long ol manis biaen, Jeova i givim plante pruf blong soemaot se Jisas i Pikinini blong Hem. Ol man we oli bin stadi long ol hanraet blong Baebol mo we oli luklukgud ol wok blong Jisas, oli save gat bilif we i stanap long wan strong fandesen. Be bighaf blong spesel laen ya we God i bin mekem kontrak wetem olgeta, oli no bilif. Smol nomo oli bilif se Jisas hem i Kraes mo Pikinini blong God. (Jon 6:​60-​69) ?Sipos yu yu laef long taem ya, bambae yu mekem wanem? ?Bambae yu bilif se Jisas i Mesaea? ?Bambae yu folem hem? Tingbaot pruf we Jisas hem wan i givim blong soemaot se hem i Mesaea, taem sam man oli tok agens long hem se hem i brekem loa blong Sabat dei. Mo makem ol pruf we hem i givim biaen, blong mekem bilif blong ol trufala disaepol blong hem i kam strong.

Jisas Hem Wan i Givim Pruf

3. ?Wanem i hapen blong pulum Jisas blong givim pruf blong soemaot se hem i Mesaea?

³ Yia hem i 31 K.T. Jisas i stap long Jerusalem blong mekem lafet blong Pasova. Hem i jes tekemaot sik blong wan man we hem i bin sik blong 38  yia finis. Be from we Jisas i mekem merikel ya long Sabat dei, ol man Jiu oli mekem i nogud long hem. Oli talem se hem i tok nogud long nem blong God, mo oli wantem kilim hem i ded from we hem i stap talem se God i stret Papa blong hem. (Jon 5:​1-9, 16-​18) Ansa we Jisas i givim long olgeta i soemaot tri bigfala pruf se hem i Mesaea. Eni man Jiu we hat blong hem i stret, i mas bilivim samting ya taem hem i harem tok blong Jisas.

4, 5. ?From wanem Jon i prij? ?Wanem frut i kamaot from wok blong prij blong hem?

⁴ Fastaem, Jisas i tokbaot Jon Baptaes we i mekem rod blong hem, mo ol tok we Jon i talemaot. Hem i se: “Bifo ya, yufala i sanem ol man blong yufala blong oli go harem tok blong Jon. Mo hem i tokbaot mi, mo ol samting we hem i talem i tru. Jon ya, tok blong hem i olsem wan laet we i laet gud, mo i saen gud. Mo blong smol taem nomo, yufala i harem gud long laet ya blong hem.”​—Jon 5:​33, 35.

⁵ Jon Baptaes i olsem “wan laet we i laet gud, mo i saen gud,” from we bifo we Herod i mekem rabis wok ya blong putum hem long kalabus, Jon i mekem rod i rere blong Mesaea, olsem we God i talem long hem. Jon i talem se: “Mi kam, mi stap mekem baptaes long wota, blong mi save soemaot [Mesaea] long ol laen blong Isrel. . . . God i sanem mi blong mi mekem baptaes long wota, mo taem mi mi kam, mi no save se hem nao man ya. Be God i talemaot long mi se, ‘Bambae yu save luk Tabu Spirit i kamdaon, i stap long wan man. Man ya nao bambae i mekem baptaes long Tabu Spirit.’ Nao biaen, mi luk we Tabu Spirit i aot long heven, i kamdaon olsem wan sotleg, i kam sidaon long hem. Nao mi mi luk samting ya, mo mi talemaot se man ya, hem i Pikinini blong God.” * (Jon 1:​26-​37) Jon i talem stret se Jisas i Pikinini blong God​—Mesaea we God i promes blong sanem i kam. Jon i talemaot samting ya i klia nomo, mekem se samwe long eit manis afta we hem i ded, plante man Jiu we hat blong olgeta i stret oli talem se: “Ol tok we [Jon] i talem blong tokbaot man ya oli tru nomo.”​—Jon 10:​41, 42.

6. ?From wanem ol wok blong Jisas i mas pruvum long ol man se God nao i sanem hem i kam?

⁶ Biaen, Jisas i pulum tingting blong ol man i go long wan pruf se hem i Mesaea. Hem i tokbaot ol gudfala wok blong hem, se olgeta nao oli soemaot se God i sanem hem i kam. Hem i se: “Mi mi gat wan narafala witnes blong mi tu, we tok blong hem i strong moa long tok ya we Jon i talem. Witnes ya, hemia ol wok ya blong mi we Papa blong mi i givim long mi blong mi mekem. Ol wok ya blong mi oli stap talemaot mi, mo oli stap soemaot we Papa blong mi i sanem mi mi kam.” (Jon 5:​36) Ol enemi blong Jisas tu oli no save sakemaot pruf blong ol bigfala wok ya olsem ol merikel we Jisas i mekem. Sam long ol enemi ya oli askem se: “?Bambae yumi mekem olsem wanem? Man ya i stap mekem plante merikel ya.” (Jon 11:47) Sam man oli toktokgud long saed blong ol wok blong Jisas, oli se: “?Be sipos Mesaea i kam, yufala i ting se bambae hem i save mekem plante merikel moa, i winim man ya?” (Jon 7:​31) Ol man we oli harem tok blong Jisas oli save luksave klia se Jisas i gat ol semfala fasin olsem Papa blong hem.​—Jon 14:9.

7. ?Olsem wanem Hibru haf blong Baebol i talemaot Jisas?

⁷ Nao Jisas i pulum ol man blong tingbaot wan pruf we oli no save agensem nating. Hem i se: “Ol tok blong Baebol . . . oli stap tokbaot mi.” Mo hem i gohed se: “Sipos yufala i bilif long tok blong Moses, bambae yufala i save bilif long mi, from we tok ya we hem i raetem, hem i stap tokbaot mi.” (Jon 5:​39, 46) I tru, plante witnes we oli laef bifo long Kraes oli tokbaot Kraes, i no Moses nomo. Oli raetemdaon plante handred profet tok we oli talemaot Mesaea, mo oli raetemdaon laen we Mesaea bambae i kamaot long hem. (Luk 3:​23-​38; 24:​44-​46; Ol Wok 10:43) ?Mo olsem wanem long Loa blong Moses? Aposol Pol i raetem se: “Mifala i stap aninit long Loa ya olsem we pikinini i stap aninit long man we i lukaot long hem blong mekem hem i folemgud ol rul blong masta blong hem, mo Loa ya i stap mekem long mifala olsem, kam kasem taem we Kraes i kamtru.” (Galesia 3:​24) Yes, “tok ya we Jisas i talemaot se i tru, hemia i stamba blong ol tok blong ol profet [no, ol profet tok oli tokbaot hem, no, hemia risen blong ol profet tok].”​—Revelesen 19:10.

8. ?From wanem plante man Jiu oli no bilif long Mesaea?

 ⁸ Olgeta pruf ya​—ol klia tok we Jon i talemaot, ol bigbigfala wok blong Jisas, ol fasin blong God we Jisas i soemaot, mo fulap fulap profet tok we Baebol i talem—​?oli pruvum long yu se Jisas hem i Mesaea? Wan man we i rili lavem God mo Tok blong Hem, bambae i luksave samting ya kwiktaem nomo, mo bambae hem i bilif long Jisas olsem Mesaea we God i promes blong sanem i kam. Be bighaf blong ol man Isrel oli no gat lav ya. Jisas i tok long ol man we oli agensem hem, i se: “Mi mi savegud yufala, mo mi save we yufala i no lavem God nating.” (Jon 5:​42) Olgeta oli no ‘traem blong mekem wan samting we bambae God ya we hem nomo i God, i presem olgeta from.’ Be oli ‘wantem blong ol man oli stap presem olgeta.’ !Jisas i no laekem nating fasin ya, olsem Papa blong hem i no laekem! !I isi blong luksave from wanem plante man Jiu oli no agri wetem Jisas!​—Jon 5:​43, 44; Ol Wok 12:​21-​23.

Kasem Paoa From Wan Vison

9, 10. (a) ?From wanem yumi save talem se Jisas i givim wan saen long ol disaepol blong hem long stret taem nomo? (b) ?Wanem nambawan promes we Jisas i mekem long ol disaepol blong hem?

⁹ Bitim wan yia i pas afta we Jisas i givim ol pruf ya se hem i Mesaea. Hemia yia 32 K.T. Oli mekem lafet blong Pasova finis. Plante man we fastaem oli bilif long Jisas, oli no moa folem hem. Maet oli lego hem from we ol man oli agensem olgeta, maet oli wantem ronem mane, no maet oli tingting tumas long ol wari blong laef. Maet samfala oli konfius no oli harem nogud from we Jisas i no wantem we ol man oli mekem hem i kam king. Taem ol lida blong ol man Jiu oli askem long hem blong mekem wan saen long paoa blong God blong leftemap hem wan, hem i no wantem. (Matiu 12:​38, 39) Maet samfala oli no kasem save from wanem Jisas i no wantem. Mo tu, Jisas i stat talemaot wan samting long ol disaepol blong hem we i had blong oli kasem save long hem​—‘bambae hem i mas go long Jerusalem, mo ol elda blong ol laen blong Isrel, wetem ol jif pris mo ol tija blong Loa bambae oli mekem hem i harem nogud mo bambae oli kilim hem i ded.’​—Matiu 16:​21-​23.

¹⁰ Afta naen no ten manis, bambae “[Jisas] i aot long wol ya, i gobak long Papa blong hem.” (Jon 13:1) Hem i wari bigwan long ol disaepol blong hem, taswe hem i promes blong givim long samfala, wan saen we i kamaot long heven. Hemia samting we hem i no bin wantem givim long ol man Jiu we oli no gat bilif. Jisas i talem se: “Tru mi talem long yufala, i gat sam man oli stap stanap long ples ya, we bambae oli no save ded, gogo oli luk mi, mi Pikinini blong Man, mi kamtru, we mi mi King.” (Matiu 16:28) I klia we Jisas i no stap talem se sam disaepol blong hem bambae oli laef gogo Kingdom blong Mesaea i stanap long yia 1914, nogat. Jisas i gat tingting blong givim wan spesel vison long trifala disaepol we hem i laekem trifala tumas, blong soemaot paoa we bambae hem i kasem taem i kam King. Long vison ya, bodi blong Jisas i jenis, i kam narafala.

11. Eksplenem vison ya we bodi blong Jisas i jenis i kam narafala.

¹¹ Sikis dei biaen, Jisas i tekem Pita, Jemes, mo Jon, trifala i go antap long wan bigfala hil​—ating hil ya Hemon. Long ples ya, “stret long fes blong trifala, bodi blong Jisas i jenis, i kam narafala. Trifala i luk we fes blong hem i saen olsem san, mo klos blong hem oli kam waet olsem laet blong  san.” Mo tu, profet Moses mo Elaeja, tufala i kamtru, tufala i stap stori wetem Jisas. Ating narakaen samting ya i hapen long naet, mekem se i gat moa paoa long trifala disaepol ya. Pita i ting se ol man ya oli rili stap long ples ya, taswe hem i talem se i gud we hem i wokem tri wansaed haos​—wan blong Jisas, wan blong Moses, mo wan blong Elaeja. Taem Pita i stap toktok yet, wan klaod we i saen we i saen i kam kavremap olgeta, nao wan voes i kamaot long klaod ya i se: “Hemia Pikinini blong mi, we mi lavem hem. Mi mi glad tumas long hem. Yufala i mas lesin gud long hem.”​—Matiu 17:​1-6.

12, 13. ?Olsem wanem vison ya i gat bigfala paoa long ol disaepol blong Jisas? ?Mo from wanem?

¹² I no longtaem i pas, Pita i bin talemaot long klia ples se Jisas i ‘Mesaea, Pikinini blong God ya we i laef, i stap we i stap.’ (Matiu 16:16) !Be traem tingbaot filing blong hem taem hem i harem prapa voes blong God i talemaot samting ya, mo i talemaot wok we Pikinini blong hem bambae i mekem! !Tru ya, vison ya i mas mekem bilif blong Pita, Jemes, mo Jon, i strong gud! Naoia we bilif blong trifala i strong, trifala i rere moa blong fesem ol trabol we bambae i kam long olgeta mo blong mekem bigfala wok long kongregesen long fiuja.

¹³ Vison ya i stap longtaem long tingting blong ol disaepol. Bitim 30 yia biaen, Pita i raetem se: “Taem God Papa blong yumi i leftemap nem blong [Jisas], nao i mekem laet ya i saenaot long hem, mitrifala i stap. Nao mitrifala i harem tok i kamaot long bigfala laet blong heven, i talem se, ‘Hemia Pikinini blong mi ya, we mi lavem hem. Mi mi glad tumas long hem.’ Taem mitrifala i stap wetem hem long bigfala hil ya we i tabu, mitrifala i harem tok ya we i aot long heven i kam.” (2 Pita 1:​17, 18) Vison ya i gat bigfala paoa long Jon tu. Bitim 60 yia biaen, hem i tokbaot vison ya i se: “Mifala i luk bigfala paoa blong hem. Hemia bigfala paoa ya we God we i Papa blong hem i givim long hem, from we hem nomo i stret Pikinini blong God.” (Jon 1:​14) Be vison ya i no laswan vison we Jisas i givim long ol man blong hem.

Ol Man We Oli Stap Tru Long God Oli Kasem Moa Save

14, 15. ?Olsem wanem aposol Jon i stap laef gogo Jisas i kambak bakegen?

¹⁴ Afta we Jisas i laef bakegen, hem i kamtru long ol disaepol blong hem klosap long Lugun blong Galili. Long taem ya, hem i talem long Pita se: “Sipos mi mi wantem blong [Jon] i stap laef, gogo i kasem we mi mi kambak bakegen, hemia i no bisnes blong yu.” (Jon 21:​1, 20-​22, 24) ?Olsem wanem? ?Tok ya i soemaot se aposol Jon bambae i laef longtaem moa long ol narafala aposol? I luk olsem, from we Jon i gohed blong mekem wok blong Jeova blong klosap 70 yia bakegen. Be tok ya blong Jisas i gat wan mining we i bigwan moa.

¹⁵ Tok ya “kasem we mi mi kambak bakegen,” i mekem yumi tingbaot wan narafala tok blong Jisas taem hem i talem se, “mi Pikinini blong Man, [bambae] mi kamtru, we mi mi King.” (Matiu 16:28) Long wan fasin, Jon i stap laef gogo Jisas i kambak bakegen. Yumi talem olsem from we biaen Jon i luk wan vison we i soemaot Jisas taem i rul olsem King long Kingdom blong hem. Taem Jon i olfala finis mo i stap kalabus long aelan blong Patmos, hem i kasem Revelesen ya wetem olgeta nambawan saen blong hem we oli olsem profet tok long saed blong ‘dei blong Masta.’ Ol vison ya oli tajem filing blong Jon, taswe taem Jisas i talem se, “I tru. Bambae i no longtaem, mi mi kamtru,” Jon i talem se, “Jisas, Masta, plis yu kam.”​—Revelesen 1:​1, 10; 22:20.

16. ?From wanem i impoten we yumi gohed blong mekem bilif blong yumi i kam strong moa?

¹⁶ Ol man long faswan handred yia we hat blong olgeta i stret, oli bilif long Jisas olsem Mesaea. Be oli nidim blong kam strong moa, from we oli gat  wan wok blong mekem, ol man raonabaot long olgeta oli no gat bilif nating, mo bambae oli kasem plante traem. Jisas i givim pruf blong soem se hem i Mesaea, mo hem i givim ol vison long ol trufala man blong hem, blong leftemap tingting blong olgeta mo givim save long olgeta. Tede, yumi stap long en blong ‘dei blong Masta.’ I no longtaem bambae Kraes i spolem wol ya blong Setan fulwan, mo bambae hem i sevem ol man blong God. Yumi tu yumi mas mekem bilif blong yumi i strong. Yumi save mekem olsem sipos yumi yusum fulwan olgeta samting we Jeova i givim long yumi long saed blong spirit.

Sevem Olgeta Oli Aot Long Tudak Mo Trabol

17, 18. ?Olsem wanem ol man blong Jisas long faswan handred yia oli defren olgeta long ol man we oli agensem plan blong God? ?Wanem i hapen long tufala grup ya?

¹⁷ Afta we Jisas i ded, ol disaepol blong hem oli obei long tok blong hem. Wetem strong tingting, oli go talemaot hem ‘long Jerusalem, mo long olgeta ples long Judia mo Sameria, gogo oli finisim olgeta ples long wol.’ (Ol Wok 1:8) Nating se ol man oli mekem plante trabol long niufala Kristin kongregesen ya, be Jeova i blesem hem, i givim save long hem, mo i ademap plante niufala disaepol long hem.​—Ol Wok 2:​47; 4:​1-​31; 8:​1-8.

¹⁸ Be laef blong olgeta we oli agensem gud nius, sloslo i kam moa nogud. Ol Proveb 4:19 i talem se: “Rod blong ol man nogud i tudak olgeta, i olsem naet. Oltaem olgeta oli stap foldaon, be oli no save luksave ol samting we oli stambol long hem.” Laef blong olgeta i kam “tudak” moa long yia 66 K.T., taem ol ami blong Rom oli raonem Jerusalem. Biaen ol man oli sek we ol ami ya oli lego taon ya bakegen. Be long yia 70 K.T. oli kambak bakegen, mo oli spolemgud taon ya. Man Jiu ya Josephus we hem i raetem sam buk blong histri, i talem se bitim wan milian man Jiu oli ded. Be ol trufala Kristin oli no ded. ?From wanem? From we taem ol ami oli lego taon ya, ol Kristin oli obei long tok blong Jisas nao oli ronwe.​—Luk 21:​20-​22.

19, 20. (a) ?From wanem ol man blong God oli no nid blong fraet taem en blong wol ya i kam klosap moa? (b) ?Long ol yia bifo 1914, Jeova i givim wanem nambawan save long ol man blong hem?

¹⁹ Ol samting i sem mak tede. Taem blong bigfala trabol we i klosap nao, bambae i finisim gud wol ya blong Setan. Be ol man blong God oli no nid blong fraet, from we Jisas i promes se: “Yufala i mas save se mi bambae mi stap wetem yufala oltaem, gogo wol ya i finis.” (Matiu 28:20) Blong mekem bilif blong ol faswan disaepol i strong mo blong rerem olgeta from ol samting we oli mas fesem, Jisas i givim wan vison long olgeta blong soemaot paoa we hem, Mesaea, bambae i gat taem i kam King. ?Olsem wanem tede? Long 1914, vison ya i kamtru. !Samting we i hapen long taem ya i mekem bilif blong ol man blong God i strong gud! Hem i givim hop long olgeta se bambae oli save gat wan nambawan fiuja. Mo ol man blong Jeova, sloslo oli stap kasem moa save. Long wol ya we i stap kam tudak moa, “rod we ol stret man oli stap wokbaot long hem, fasin blong hem i olsem eli moning, we i stat brok delaet, we oltaem, ol samting oli stap kam klia moa, gogo i delaet gud, mo san i kam antap.”​—Ol Proveb 4:​18.

²⁰ Bifo long 1914, wan smol grup blong ol Kristin we tabu spirit i makemaot olgeta, oli stat kasem save long ol impoten trutok long saed blong taem we Masta bambae i kambak bakegen. Olsem nao, oli kasem save se taem hem i kambak, ol man bambae oli no save luk hem. Long yia 33 K.T., tu enjel we tufala i kamtru long ol disaepol taem Jisas i stap go antap long heven, tufala i soemaot samting ya long ol toktok blong tufala. Afta we wan klaod i kavremap Jisas, tufala enjel ya i se: “Jisas ya we God i tekemaot hem long yufala, i tekem hem i go antap  long heven, hem bambae i mas kambak bakegen long sem fasin ya we yufala i luk we hem i go antap.”​—Ol Wok 1:​9-​11.

21. ?Bambae yumi tokbaot wanem long nekis stadi?

²¹ Ol trufala man blong Jisas nomo oli luk hem taem hem i aot long wol ya. Samting ya i no hapen long fored blong olgeta man, olsem we bodi blong Jisas i no jenis i kam narafala long fored blong olgeta man. Ol man blong wol oli no save nating wanem i bin hapen. Samting ya i sem mak long taem we Kraes i kambak blong tekem paoa olsem King. (Jon 14:19) Ol trufala disaepol blong hem we tabu spirit i makemaot olgeta, olgeta nomo oli luksave se hem i kambak. Long nekis stadi, bambae yumi luk olsem wanem save ya i gat bigfala paoa long olgeta, mo olsem wanem i lidim olgeta blong hivimap plante milian man we bambae oli laef long wol ya aninit long rul blong Jisas.​—Revelesen 7:​9, 14.

[Ol Futnot]

?Yu Yu Tingbaot?

• ?Taem samfala oli agensem Jisas se hem i brekem loa blong Sabat dei mo hem i tok nogud long nem blong God, hem i givim wanem pruf blong soem se hem i Mesaea?

• ?Olsem wanem vison ya we bodi blong Jisas i jenis i kam narafala, i givhan long ol faswan disaepol blong hem?

• ?Wanem mining blong tok blong Jisas se Jon bambae i stap laef gogo hem i kambak bakegen?

• ?Long yia 1914, wanem vison i kamtru?

[Kwestin]

[Tok blong pija long pej 10]

Jisas i givim pruf se hem i Mesaea

[Tok blong pija long pej 12]

Vison ya we bodi blong Jisas i jenis i kam narafala, i mekem bilif blong ol disaepol i strong

[Tok blong pija long pej 13]

Jon i mas stap laef gogo Jisas i ‘kambak bakegen’