‘Rere Blong Tekem Narafala i Kam Long Haos Blong Yufala’

FIBI, wan Kristin woman we i laef long faswan handred yia, i gat wan problem. Hem i aot long Kengkria, Gris, blong go long Rom, be hem i no save ol narafala Kristin we oli stap long taon ya. (Rom 16:​1, 2) Edgar Goodspeed, we i stap tanem ol tok blong Baebol i go long narafala lanwis, i talem se: “Ol man Rom [long taem ya] oli nogud mo oli raf, mo ol hotel oli no wan gudfala ples blong wan woman we i gat klin fasin i go stap long olgeta, antap moa sipos woman ya i wan Kristin.” ?Taswe nao, Fibi bambae i go stap wea?

Long taem we oli raetem Baebol, ol man oli wokbaot plante i go long ol ples farawe. Jisas Kraes mo ol disaepol blong hem oli bin mekem olsem taem oli stap talemaot gud nius olbaot long Judia mo Galili. I no longtaem biaen, ol Kristin misinari olsem Pol oli karem mesej blong gud nius i go long ol defren ples raonabaot long Mediterenian Si, wetem Rom tu we i kapital blong gavman blong Rom. ?Be, taem ol Kristin blong faswan handred yia oli wokbaot i go long ol ples farawe, nating sipos ol ples ya oli ples blong ol man Jiu no nogat, oli go stap wea? ?Wanem trabol oli fesem taem oli lukaotem ol ples blong slip? ?Olgeta oli tijim wanem lesen long yumi long saed blong fasin blong tekem narafala i kam long haos?

“Tede Bambae Mi Go Stap Long Haos Blong Yu”

Longtaem finis i kam, ol man oli makem ol trufala man blong wosip long Jeova from fasin blong olgeta blong tekem ol narafala i kam long haos blong olgeta. Ebraham, Lot, mo Rebeka oli bin soemaot fasin ya. (Jenesis 18:​1-8; 19:​1-3; 24:​17-​20) Olfala Job i tokbaot samting we hem i mekem long ol strenja i se: “Olgeta we oli stap wokbaot blong go long narafala ples, mi mi stap singaot olgeta oli kam long haos blong mi. Neva mi livim olgeta oli stap slip olbaot long rod.”​—Job 31:32.

Taem ol man Isrel oli wokbaot i go long narafala ples nao oli wantem se ol man ples blong olgeta oli tekem olgeta oli go long haos, oli jes go sidaon long wan pablik ples mo oli wet se wan i kam singaot olgeta. (Jajes 19:​15-​21) Plante taem, ol man oli wasem leg blong ol visita ya we oli kam long haos, oli givim kakae mo dring long olgeta, mo oli givim kakae long anamol blong olgeta tu. (Jenesis 18:​4, 5; 19:2; 24:​32, 33) Olgeta we oli no wantem mekem hadwok long man blong haos, oli karem kakae blong olgeta wetem olgeta olsem: bred mo waen blong olgeta mo drae gras blong ol dongki blong olgeta. Oli jes askem ples blong slip nomo long naet.

Nating se Baebol i no talem plante samting long saed blong Jisas se hem i faenem ples blong slip olsem wanem taem hem i stap prij long ol defren ples, be hem wetem ol disaepol blong hem oli mas gat wan ples we oli go stap slip long hem. (Luk 9:​58) Taem Jisas i go long Jeriko, hem i talem long Sakias se: “Tede bambae mi go stap long haos blong yu.” Sakias i “glad tumas” blong tekem Jisas long haos blong hem. (Luk 19:​5, 6) Plante taem Jisas i go long haos blong ol fren blong hem, Mata, Meri, mo Lasaros we oli stap long Betani. (Luk 10:​38; Jon 11:​1, 5, 18) Mo i luk olsem se taem Jisas i go long Kapaneam, hem i go stap long haos blong Saemon Pita.​—Mak 1:​21, 29-​35.

Taem ol 12 disaepol blong Jisas oli harem ol advaes we hem i givim long saed blong prij, oli kasem save wanem fasin ol man Isrel bambae oli soemaot taem bambae oli go long haos blong olgeta. Jisas i talem se: “Taem yufala i go, bambae yufala i no holem mane, mo bambae yufala i no karem basket blong yufala, mo yufala i no tekem tu klos, mo sandel, mo wokingstik  blong yufala. Mi talem olsem, from we taem we man i mekem wok blong narafala man, i stret blong man ya i givim kakae long hem. Taem yufala i go long wan taon no wan vilej, yufala i mas faenem wan gudfala man we i glad blong yufala i go stap wetem hem. Nao yufala i mas stap wetem hem, gogo kasem taem we yufala i aot long ples ya bakegen.” (Matiu 10:​9-​11) Jisas i save se olgeta we tingting blong olgeta i stret bambae oli mekem welkam long ol disaepol blong hem, bambae oli givim kakae, ples blong slip, mo ol narafala samting we oli save nidim.

Be i gat wan taem we bambae ol man we oli stap wokbaot blong talemaot tok blong God oli lukaot long prapa nid blong olgeta wan mo oli pem ol samting we olgeta nomo oli nidim. Jisas i tingbaot se ol man we oli biaenem hem bambae oli mekem wok blong blong prij i kam bigwan moa gogo kasem ol ples raonabaot long Isrel mo se ol man bambae oli agens long olgeta, taswe hem i talem se: “Man we i gat paos no basket, hem i mas karem.” (Luk 22:36) Blong kasem plante moa man wetem gud nius, i nidim blong oli wokbaot i go long ol ples farawe mo i nidim ples blong slip.

‘Yufala i Mas Rere Blong Tekem Ol Kristin Oli Kam Long Haos Blong Yufala’

Long faswan handred yia, i no gat plante faet bitwin ol nesen we Rom i rul antap long olgeta, mo oli wokem plante moa rod long ol ples olsem, mekem se ol man oli wokbaot i go long ol ples farawe. * From we plante moa man oli stap wokbaot olsem, i nidim plante moa ples blong slip. Olsem nao, afta we ol man ya oli wokbaot wan ful dei, oli save faenem ol smolsmol hotel we oli stap long saed blong ol bigfala rod. Be, wan buk (The Book of Acts in Its Graeco-Roman Setting) i talem se: “Ol buk oli tokbaot sam rabis samting long saed blong ol hotel ya. Ol buk ya mo ol samting we ol man blong digim graon oli faenem, oli soemaot se ol hotel ya oli doti mo oli brokbrok olbaot, i gat wanwan bed, jea mo tebel nomo, i gat fulap bebet we oli kakae man long naet, oli no givim gudfala kakae mo dring, ol man oli no save trastem ol bos blong ol hotel ya wetem ol man blong wok blong olgeta, ol man we oli stap go slip oltaem long ol hotel ya oli nogud mo oli no gat gudfala fasin.” Taswe, yumi kasem save se wan man we i gat gudfala fasin i no save slip long ol hotel olsem taem hem i stap wokbaot blong go long narafala ples.

Taswe, yumi no sapraes se Baebol i talem bakegen mo bakegen long ol Kristin se oli mas rere blong tekem ol narafala Kristin oli kam long haos blong olgeta. Pol i pulum ol Kristin blong Rom se: “Sipos sam long yufala oli trabol, oli sot long sam samting, yufala i mas givhan long olgeta. Mo oltaem, yufala i mas rere blong tekem ol Kristin man blong ol narafala ples oli kam insaed long haos blong yufala.” (Rom 12:13) Hem i talem bakegen long ol Kristin man Jiu se: “Yufala i mas rere blong tekem ol strenja oli kam insaed long haos blong yufala. Yufala i save, i gat sam man bifo we oli mekem fasin ya, mo oli tekem ol enjel oli kam insaed long haos blong olgeta, be oli no save nating se oli enjel.” (Hibrus 13:2) Pita i givim advaes long ol brata sista blong hem se oli “mas rere blong tekem narafala Kristin man i kam long haos blong [olgeta,] we [olgeta oli] no toktok tumas from.”​—1 Pita 4:9.

Be, i gat sam taem we i no stret blong tekem ol narafala oli kam long haos. Aposol Jon i tokbaot “man we i ova long mak blong ol tijing blong Kraes, nao i joenem sam moa tok bakegen we i kamaot long tingting blong hem nomo,” hem se: “Yufala i no tekem hem i kam insaed long haos blong yufala. Sipos man olsem i kam, be bambae yufala i no talem halo long hem, from we man we i stap talem halo long man olsem, hem i stap joen long hem long ol rabis wok blong hem.” (2 Jon 9-​11) Long saed blong olgeta we oli no tanem tingting blong olgeta from sin blong olgeta, Pol i raet i talem se: “Yufala i no mas go joen wetem ol man ya we oli stap talem se oli brata blong yumi, be oli stap mekem ol sin ya. Sipos oli stap mekem ol fasin nogud wetem woman, no oli stap wantem tumas samting, no oli stap prea long ol narafala god, bambae yufala i no go joen wetem olgeta. Sipos oli stap spolem nem blong narafala man, no oli stap dring we oli lusum hed, no oli stap stil, bambae yufala i no go joen wetem olgeta. Bambae yufala i no go sidaon wetem ol man olsem blong kakae wetem olgeta.”​—1 Korin 5:​11.

Ating Pol i talem tok ya from we i gat sam man we oli giaman se oli Kristin, no sam narafala man bakegen, oli traem blong yusum ol trufala Kristin from gudfala fasin ya blong olgeta blong mekem welkam long ol narafala. Wan buk (The Didache, no Tijing Blong Ol Twelef Aposol) we oli raetem long ol yia tu handred K.T. i givim sam moa advaes long saed blong Kristin bilif. Buk ya i talem se ol man oli save mekem welkam long wan man we i wokbaot farawe blong prij mo oli save tekem hem i kam long haos blong olgeta blong “wan dei, no sipos i gat nid, tu dei.” Afta, taem man ya i aot, hem i save karem kakae nomo . . . Sipos man ya i askem mane, hem i wan giaman profet.” Buk ya i gohed moa i se: “Sipos man ya i wantem stap smoltaem wetem yufala mo hem i gat wan wok, hem i mas mekem wok ya blong kasem kakae blong hem. Be sipos hem i no gat wok, yufala i save givim long hem ol samting we yufala  i ting se i stret blong givim. Be yufala i no mas letem we hem i stap nating. I nogud hem i ting se hem i wan Kristin, nao i gat raet blong laef gud wetem yufala, we i stap nating nomo. Be sipos man ya i no folem tok ya blong yufala, hem i wantem profite long Kraes nomo; yufala i mas lukaot long man olsem.”

Taem aposol Pol i stap longtaem long sam taon, hem i lukaotgud blong no mekem i hevi tumas long olgeta we hem i stap long haos blong olgeta. Hem i mekem wok olsem man blong somap tapolen blong kasem ol samting we hem i nidim. (Ol Wok 18:​1-3; 2 Tesalonaeka 3:​7-​12) Blong givhan long ol gudfala Kristin we oli wokbaot farawe blong go luk ol narafala, i luk olsem se ol faswan Kristin oli yusum leta blong talem gudfala samting long saed blong olgeta ya, olsem we Pol i mekem long saed blong Fibi mo i raetem se. “Mi mi talemaot long yufala we sista ya blong yumi, Fibi . . . hem i wan gudfala woman. I gud yufala i tekem hem i kam joen long yufala long nem blong Masta blong yumi. . . . Sipos hem i sot long sam samting, i gud yufala i givhan long hem.”​—Rom 16:​1, 2.

Kasem Blesing From Yumi Welkamem Narafala Long Haos

Ol Kristin misinari blong faswan handred yia oli trastem se Jeova bambae i givim samting we oli nidim. ?Be oli save sua se ol narafala Kristin bambae oli tekem olgeta i kam long haos blong olgeta? Lidia i tekem Pol mo ol narafala oli kam long haos blong hem. Long Korin, aposol Pol i stap long haos blong Akwila mo Prisila. Long Filipae, wan man blong lukaot long kalabus i givim kakae long Pol mo Saelas. Long Tesalonaeka, Pol i stap long haos blong Jeson, long Sisaria, long haos blong Filip, mo taem hem i aot long Sisaria blong go long Jerusalem, hem i go stap long haos blong Nason. Taem Pol i stap go long Rom, ol brata long Puteoli oli karem hem i go long haos blong olgeta. !Olgeta we oli tekem Pol i go long haos blong olgeta oli mas harem gud from ol gudfala blesing long saed blong spirit we oli kasem long taem ya!​—Ol Wok 16:​33, 34; 17:7; 18:​1-3; 21:​8, 16; 28:​13, 14.

Frederick F. Bruce, wan man blong mekem ol stadi i talem se: “Ol fren blong Pol ya wetem olgeta we oli wok wetem hem, ol man mo woman we oli tekem hem long haos blong olgeta, olgeta evriwan oli givhan long Pol from we oli lavem hem mo oli lavem Masta blong hem. Oli save se taem oli wok blong givhan long Pol, oli stap mekem wok blong Jisas tu.” Hemia i wan nambawan risen blong tekem narafala i kam long haos blong yumi.

Tede i gat nid yet blong welkamem narafala long haos blong yumi. I gat plante taosen elda blong ol Witnes blong Jeova we oli stap goraon blong visitim ol kongregesen, mo ol Witnes nomo oli stap tekem olgeta ya i kam long haos blong olgeta. Sam man blong talemaot Kingdom oli pem prapa rod blong olgeta blong go long ol ples we gud nius i no kasem yet. Taem yumi openem haos blong yumi long ol man olsem, nating sipos haos ya i no flas, be bambae yumi kasem plante gudfala blesing from. Maet yumi gat smol kakae nomo blong givim long wan we yumi tekem i kam long haos blong yumi, be fasin ya we i kamaot long hat, i givim nambawan janis long yumi blong ‘bilif blong yumi i givhan long bilif’ blong narafala mo blong yumi soemaot lav long ol brata sista blong yumi mo long God blong yumi. (Rom 1:​11, 12) Long ol taem olsem, man we i welkamem narafala long haos blong hem i kasem bigfala blesing, from se “man we i stap givim presen i go, hem i save harem gud moa, i winim man we i stap kasem presen blong hem.”​—Ol Wok 20:35.

[Futnot]

[Tok blong pija long pej 23]

Ol Kristin oli ‘rere blong tekem ol narafala Kristin oli kam long haos blong olgeta’