Taem Sol i Prij, Ol Man Oli Agensem Hem
Taem Sol i Prij, Ol Man Oli Agensem Hem
OL MAN Jiu we oli stap long Damaskes oli no kasem save long samting ya se: ?Olsem wanem wan man we i strong blong toktok from ol tijing blong Loa i save tanem baksaed long ol bilif ya mo joenem wan narafala skul? Ol man oli savegud Sol, se hemia man we i stap mekem trabol long olgeta long Jerusalem we oli stap singaot long nem blong Jisas. Hem i kam long Damaskes blong ronem ol disaepol we oli stap long ples ya. !Be naoia, Sol hem wan i stap prij olbaot mo i stap talemaot semfala Jisas ya se hem i Mesaea, Jisas ya we i brekem loa, i tok nogud long nem blong God nao oli nilim hem long wan pos! ?Olsem wanem? ?Sol i lusum tingting blong hem?—Ol Wok 9:1, 2, 20-22.
Maet i gat wan risen. I luk olsem se ol narafala we oli aot wantaem wetem Sol long Jerusalem oli tokbaot ol samting we i bin hapen long olgeta long rod. Taem oli stap kam klosap long Damaskes, wantaem nomo wan laet long skae i saenaot, i kam kasem ol ples raonabaot long olgeta, mo olgeta evriwan oli foldaon long graon. Oli harem wan voes tu. Sol nomo i kasem kil, be ol narafala nogat. Sol i foldaon long rod. Taem hem i girap, hem i no moa save lukluk, nao ol narafala we oli stap wetem hem oli lidim hem i go long Damaskes.—Ol Wok 9:3-8; 26:13, 14.
Wan Enemi i Stat Blong Prij Long Saed Blong Jisas
?Wanem samting i hapen long Sol taem hem i stap wokbaot long rod blong go long Damaskes? ?Maet longfala rod ya no strong san blong medel dei i mekem se hem i lusum paoa? Plante man we oli gat tu tingting long stori ya oli talem plante samting long saed ya. Oli talem se Sol i fiva bigwan nao i lusum hed, mo i luk ol narakaen drim. Oli talem se tingting blong hem i trabol tumas nao hed blong hem i kam krangke, hem i wari tumas nao tingting blong hem i foldaon olgeta, mo samfala oli talem se Sol i gat sik ya epilepsy (sik blong faol).
Samting we i rili hapen taem bigfala laet ya i saen long Sol, hemia se Jisas Kraes i toktok long Sol blong pruvum se Hem hem i Mesaea. Sam man we oli droem pija blong stori ya, oli soemaot se Sol i stap ron long wan hos nao i foldaon long graon. Ating samting ya i tru, be Baebol i jes talem nomo se hem i “foldaon long graon.” (Ol Wok 22:6-11) Nomata se Sol i kasem wanem kil long bodi blong hem, be hemia i nating nomo taem yumi skelem wetem sem we hem i harem taem hem i foldaon long hae posisen we hem i gat fastaem. Naoia, hem i mas agri se ol tok we ol man blong Jisas oli talem, oli trutok. Wan rod nomo we Sol i mas folem, hemia se hem i mas joen wetem ol man ya. Fastaem Sol i wan enemi we i agensem strong ol tok blong Jisas, be naoia hem i kam wan man we i sapotem fulwan tok ya. Afta we Sol i save lukluk bakegen mo i tekem baptaes, hem i “stap kam strong moa, mo hem i soemaot i klia gud we Jisas, hem i Mesaea. Nao ol laen blong Isrel we oli stap long Damaskes, oli no moa gat tok blong talem.”—Ol Wok 9:22.
Plan Blong Kilim Sol i Foldaon
?Sol, we biaen oli singaot hem se Pol, i go long weples afta we hem i kam Kristin? Taem hem i raet i go long ol man Galesia, hem i talem se: “Wantaem nomo, mi aot, mi go long Arebia. Nao biaen, mi kambak bakegen, stret long Damaskes.” (Galesia 1:17) Taem Sol i talem tok ya “Arebia,” hem i save minim se hem i wokbaot i go long wan ples long poen blong Arebia. Sam man blong stadi oli talem se maet Pol i go long Draeples blong Siria no long wan narafala ples long Nabataea we King Aretas 4 i rul long hem. Be i luk olsem se afta we Sol i tekem baptaes, hem i go long wan ples we i kwaet blong i save tingting dip, olsem Jisas i bin go long draeples afta we hem i baptaes.—Luk 4:1.
Taem Sol i kambak long Damaskes, “ol lida blong [Isrel] oli kam wanples, oli mekem plan blong kilim [hem].” (Ol Wok 9:23) Hed gavman we i wok blong King Aretas long Damaskes, hem i blokem ol doa blong taon ya from we hem i wantem holem Sol. (2 Korin 11:32) Be taem ol enemi oli stap plan blong kilim Sol i ded, long semtaem ol disaepol blong Jisas oli stap traem faenem rod blong sevem hem.
Ananaeas i stap wetem ol man blong Jisas we oli halpem Sol blong ronwe, olgeta ya oli bin joen wetem hem jes afta we hem i kam wan Kristin. * (Ol Wok 9:17-19) Maet sam long olgeta we oli kam man blong bilif taem Sol i prij long Damaskes oli givhan long hem tu, from we Ol Wok 9:25 i talem se: “Wan naet, ol man blong Sol oli tekem hem, oli putum hem insaed long wan bigfala basket, nao oli slakem hem i godaon afsaed long stonwol blong taon ya.” Maet tok ya ‘ol man blong hem’ i minim olgeta we Sol i tijim. Nomata se i olsem wanem, be ol man oli kam kros moa long Sol from we plante man oli bilif long tok we hem i talemaot.
?Yumi Lanem Wanem Lesen?
Taem yumi luk ol samting we oli hapen long taem ya we Sol i kam wan Kristin mo i tekem baptaes, i klia se hem i no wari bitim mak se ol narafala bambae oli gat wanem tingting long saed blong hem, mo hem i no lego wok blong God from we ol man oli agensem hem strong. Long tingting blong Sol, samting we i impoten moa, hemia wok we God i jusumaot hem blong mekem, wok blong prij.—Ol Wok 22:14, 15.
?Yu yu jes kasem save i no longtaem se wok blong go talemaot gud nius i impoten? Sipos yes, yu yu save se olgeta trufala Kristin oli mas man blong talemaot Kingdom. Yu no mas sapraes sipos taem yu prij, samfala oli agensem yu. (Matiu 24:9; Luk 21:12; 1 Pita 2:20) Sol i soemaot gudfala eksampol taem ol narafala oli agensem hem. God i glad long ol Kristin we oli stanap strong taem oli kasem traem. Jisas i talem long ol man blong hem se: “Bambae ol man oli no laekem yufala nating, oli agens long yufala, from we yufala i holem nem blong mi.” Be hem i leftemap tingting blong olgeta tu se: “Bambae yufala i save sevem laef blong yufala, from we yufala i stap stanap strong.”—Luk 21:17-19.
[Futnot]
^ Maet Kristin skul i kasem Damaskes afta long taem we Jisas i prij long Galili no afta long Pentekos 33 K.T.—Matiu 4:24; Ol Wok 2:5.
[Tok blong pija long pej 28]
Sol i “foldaon long graon” taem Jisas i kamtru long hem
[Tok blong pija long pej 29]
Sol i ronwe taem olgeta long Damaskes oli mekem plan blong kilim hem i ded