Wan Kwestin

Samson hem i wan Nasiraet. ?Be, taem hem i holem dedbodi blong ol man we hem i kilim, samting ya i no brekem promes blong hem olsem Nasiraet?

Long Isrel bifo, wanwan man i save jusum blong mekem promes ya blong stap olsem wan Nasiraet blong smoltaem. * Taem wan man i mekem promes ya, hem i mas folem rul ya: “Bambae hem i no mas go klosap long dedbodi, from we dedbodi bambae i mekem hem i kam doti long fes blong [Jeova]. I nomata we dedman ya i papa blong hem no mama blong hem, no brata blong hem, no sista blong hem, be hem i no mas go klosap long hem.” ?Olsem wanem nao sipos “wan man i ded wantaem nomo klosap long wan Nasiraet”? Nating se Nasiraet ya i no minim blong tajem dedbodi ya, be hem i kam doti nao long fes blong God. Long taem olsem, “bambae hem i no save kaontem ol [dei] ya blong hem blong fastaem.” Bambae hem i mas folem rod blong kam klin bakegen long fes blong God, mo bambae i mas statem taem blong hem blong wok olsem wan Nasiraet, bakegen.​—Namba 6:​6-12.

Be Samson i wan Nasiraet we i spesel. Bifo we Samson i bon, enjel blong Jeova i toktok long mama blong hem se: “Taem pikinini ya blong yu i bon, bambae yu no mas katem hea blong hem, from we i stat long taem ya, bambae hem i wan Nasiraet. Bambae hem i tabu, i man blong God. Hem nao bambae i statem wok ya blong tekemaot yufala long han blong ol man Filistia, blong sevem yufala.” (Jajes 13:5) Samson i no mekem wan promes blong kam wan Nasiraet. God nao i jusumaot hem se bambae hem i wan Nasiraet, mo bambae hem i stap wan Nasiraet long ful laef blong hem. Taswe, loa ya se hem i no save tajem wan dedbodi nating, i no laenap wetem hem. Sipos samting ya i hapen se hem i tajem wan dedbodi, bambae hem i no save statem promes blong hem bakegen from we promes blong hem i stat taem hem i bon. Taswe, ol rul oli defren long Nasiraet we hem wan i jusum blong mekem wok ya, mo Nasiraet we God nao i jusumaot blong mekem wok ya.

I gat tri man nomo we Baebol i tokbaot se Jeova nao i jusum olgeta blong oli kam ol Nasiraet​—Samson, Samuel mo Jon Baptaes. I gud blong tingbaot wanem loa we Jeova i givim long trifala man ya. Olsem yumi ridim finis, Samson i no mas katem hea blong hem. Taem Hana i no gat bel yet long Samuel, hem i mekem promes ya: “Mi promes se bambae mi givim hem long [Jeova], blong hem bambae i man blong [hem] oltaem long laef blong hem. Mo blong soemaot we hem i man blong [God], neva bambae oli katem hea blong hem samtaem.” (1 Samuel 1:11) Enjel blong Jeova i tokbaot  Jon Baptaes i se: “Hem bambae i no save dring waen mo grog samtaem.” (Luk 1:15) Mo tu, “Jon i no putum flas klos. Klos blong hem oli wokem long hea blong kamel nomo, mo strap blong hem oli wokem long skin blong buluk. Mo kakae blong hem, lokis wetem eg blong sugabag blong bus.” (Matiu 3:4) I no gat wan long trifala ya we God i putum loa long hem se hem i no mas go klosap long wan dedbodi.

Nating se Samson i wan Nasiraet, Jeova i putumap hem olsem wan jaj blong sevem Isrel i aot long han blong ol enemi blong olgeta. (Jajes 2:16) Mo blong mekem wok ya we God i givim long hem, bambae hem i mas kilim ol man oli ded, i min se bambae hem i tajem plante dedbodi. Wan taem, Samson i kilim 30 man Filistia i ded mo i tekem ol gudfala klos blong olgeta. Long wan narafala taem bakegen, hem i go faet long ol enemi blong olgeta, mo i “kilim plante long olgeta oli ded.” Mo tu, hem i tekem bun blong maot blong wan dongki we i jes ded mo i kilim wan taosen man long hem oli ded evriwan. (Jajes 14:19; 15:​8, 15) Olgeta samting ya we Samson i mekem, Jeova i agri long hem. Baebol i tokbaot Samson olsem wan man we hem i soem gudfala eksampol long saed blong bilif.​—Hibrus 11:32; 12:1.

?Tok ya se Samson i terem wan laeon long tu haf, “olsem we laeon ya i wan smol nani nomo” i min se ol man bifo oli gat fasin ya blong stap terem smol nani long tu haf?

I no gat wan tok long Baebol blong soemaot se long taem blong ol Jaj blong Isrel, ol man oli gat fasin olsem. Jajes 14:6 i talem se: “Spirit blong Hae God i kam long [Samson], i mekem hem i strong, nao hem i go holem laeon ya, i terem long tu haf. Hem i mekem olsem we laeon ya i wan smol nani nomo.” Tok ya i olsem wan pijatok.

Tok ya se “i terem long tu haf” i save minim tu samting. Maet i minim se Samson i terem maot blong laeon ya i open, no maet i minim se hem i terem bodi blong laeon ya long plante pis. Sipos tok ya i minim nomo se Samson i terem maot blong laeon ya i open, ale hemia wan samting we eni man i save mekem isi nomo long wan smol nani. Taswe, hemia wan pijatok blong soemaot se fasin ya we Samson i terem wan laeon wetem han blong hem, i isi nomo olsem we laeon ya i wan smol nani. ?Be olsem wanem sipos tok ya i minim se Samson i terem bodi blong laeon ya long plante pis? Sipos i olsem, ale tok ya long saed blong wan smol nani i wan pijatok nomo blong soemaot wok ya we Samson i mekem. Jeova i givim spirit blong hem long Samson blong i mekem wan bigfala wok mo i nidim bigfala paoa blong mekem wok ya. Nating se i olsem wanem, pijatok ya long Jajes 14:6 i soemaot klia se paoa we Jeova i givim long Samson i mekem we wan laeon i nating nomo long han blong Samson, sem mak olsem we wan smol nani i nating nomo long han blong eni man.

[Futnot]