“?Wanem Rod We Yu Yu Folem?”

HEMIA kwestin we wan olfala man i bin askem long Muriel, wan mama we i gat tri pikinini blong hem, taem oli stap kakae long wan restoron. Kwestin ya i mekem Muriel i sapraes. Muriel i bin bisi ful dei blong tekem ol pikinini blong hem i go luk ol dokta. From samting ya, hem mo ol pikinini blong hem oli no gat i naf taem blong gobak long haos blong kakae bifo we oli go long Kristin miting blong olgeta. Ale, Muriel i karem ol pikinini blong hem i go long wan restoron we i stap klosap, blong oli save kakae wan samting bifo we oli go long miting.

Taem oli finis blong kakae, wan olfala man i kam klosap long Muriel mo i talem se: “Mi stap wajem yufala stat long taem we yufala i jes kam insaed. Mo mi makem wan samting we i defren long saed blong ol pikinini blong yu wetem ol nara pikinini we oli stap kam long ples ya. Ol nara pikinini oli no gat ol gudfala fasin nating. Oli putum leg blong olgeta i go antap long tebol. Oli puspusum ol jea olbaot. Be ol pikinini blong yu oli stap kwaet. ?Wanem rod we yu yu folem blong mekem se ol pikinini blong yu oli stap kwaet olsem?”

Muriel i ansa se: “Mi mo hasban blong mi, mitufala i stadi Baebol oltaem wetem ol pikinini blong mitufala, mo mifala i traem blong mekem wanem we mifala i lanem i wok long laef blong mifala. Mifala ol Witnes blong Jeova.” Taem man ya i harem samting ya hem i talem se: “Mi mi wan Jiu mo mi laef tru long taem we ol Nasi oli bin kilim i ded plante man. Mi rimemba taem ol man oli bin mekem i nogud tumas long ol Witnes blong Jeova long Jemani. Long taem ya, ol man oli luksave we olgeta oli defren. Mi mi rili laekem fasin blong ol pikinini blong yu. Mi mas faenemaot moa long saed blong skul blong yufala.”

Baebol hem i wan nambawan buk we i givim ol advaes blong trenem tingting blong ol pikinini. Ol Witnes blong Jeova oli glad tumas blong halpem ol narafala blong kasem gudfala frut from ol advaes we oli stap insaed long Baebol. Mifala i glad tumas sipos yu askem blong mifala i givhan long yu.