‘Oltaem, Yufala i Mas Lukaot Gud’

LONG taem bifo, i gat ol man we oli lukaot long ol get blong wan taon no wan tempol mo samtaem long get blong sam haos tu. Ol man ya oli mas meksua se ol get oli lok gud long naet, be tu, oli mas mekem wok olsem wajman. Hemia wan impoten wok blong mekem from we wan taon i save sef sipos ol wajman ya oli singaot blong givim woning long ol man blong taon se denja i stap kam.

Jisas Kraes i save gud wok blong man blong lukaot long get. Wan taem, Jisas i talem se ol disaepol blong hem oli olsem ol man blong lukaot long get. Hem i talem long olgeta se oli mas lukaot gud oltaem blong wajem wetaem en blong fasin blong laef blong ol man Jiu i kam. Hem i talem se: “Yufala i mas lukaot gud, mo oltaem yufala i mas rere, from we yufala i no save taem ya we bambae olgeta samting ya oli kamtru. Hemia bambae i olsem we wan man i go wokbaot long narafala ples. . . . Mo hem i talem long man we i stap lukaot long get se, ‘Yu yu mas lukaot gud long olting blong mi.’ Nao long sem fasin, yufala tu i mas lukaot gud, from we yufala i no save taem we masta blong haos bambae i kambak.”​—Mak 13:​33-35.

Long sem fasin, bitim 125 yia nao, magasin ya Wajtaoa i stap pasem toktok ya blong Jisas long ol man se ‘oltaem, yufala i mas lukaot gud.’ ?Hem i mekem samting ya olsem wanem? Long pej 2 blong magasin ya i talem se, “Niuspepa ya i lukaot long ol samting we oli kamaot long wol, blong soemaot we ol profet tok blong Baebol oli kamtru. Hem i talemaot gud nius blong Kingdom long ol man, blong leftemap tingting blong olgeta. Bambae Kingdom ya i spolem ol man we oli mekem nogud long ol narafala man, mo bambae wol i kam paradaes bakegen.” Oli prentem bitim 26,000,000 kopi blong Wajtaoa long 150 lanwis mo hem i wan magasin we oli seremaot moa i bitim ol narafala magasin blong skul raon long wol. From samting ya, olsem ol man blong lukaot long get bifo, ol Witnes blong Jeova oli givim woning long ol man long evri ples se oli mas ‘stap wekap’ long saed blong spirit from we i no longtaem, Masta Jisas Kraes bambae i kam blong jajem rabis wol ya.​—Mak 13:​26, 37.