?Trutok i Karem Frut Long Laef Blong Ol Man We Yu Stap Tijim?

TAEM yangfala Eric i talemaot se hem i no moa wantem stap olsem wan Witnes blong Jeova, tingting blong papa mama i foldaon olgeta. Oli no luksave long ol fasin blong Eric se hem i stap jenis. Taem Eric i wan yangfala boe nomo, hem i joen long famle stadi, i go long ol miting, mo i joen long wok blong prij wetem kongregesen. I luk olsem se hem i stap wokbaot long rod blong trutok. Be naoia we hem i no moa stap long haos, papa mama i luksave se, trutok blong Baebol i no stap long hat blong hem. Samting ya i mekem we tufala i sek mo tingting i foldaon.

Sam narafala oli harem olsem ya tu, taem wan we oli mekem stadi wetem i stop blong stadi wantaem nomo. Long taem olsem, ol man oli stap askem olgeta wan se, ‘?From wanem mi no luksave ol saen se bambae i olsem?’ ?I isi blong luksave sipos trutok i karem frut long laef blong ol man we yumi stap tijim, bifo we wan trabol long saed blong spirit i kamaot? ?Mo, olsem wanem yumi save sua se trutok i stap long yumi mo long olgeta we yumi stap tijim olgeta? Parabol blong Jisas long saed blong man we i planem sid, i givhan long yumi blong kasem ansa long ol kwestin ya.

Trutok i Mas Kasem Hat Blong Man

Jisas i talem se: “Sid ya, hemia tok blong God. Mo ol sid ya we oli foldaon long gudfala graon, hemia olgeta we oli gat gudfala tingting, nao oli harem tok ya, oli holemstrong long tingting blong olgeta, mo oli obei long hem. Olgeta ya oli mekem tingting blong olgeta i longfala, nao oli gat frut blong tok ya long laef blong olgeta.” (Luk 8:​11, 15) Taswe bifo we trutok blong Kingdom i karem frut long laef blong ol studen, sid i mas gru long hat blong studen ya. Jisas i talem se taem trutok blong God i kasem wan gudfala hat, i olsem wan gudfala sid we i gru long gudfala graon. Ale, wantaem nomo sid ya i gru mo i karem frut. ?Wanem samting we yumi save luk long laef blong studen?

Yumi mas traem luksave wanem i stap long hat blong hem, i no jes ol fasin we man ya i soem. Taem wan man i folem wan fasin blong wosip hemia i no rili soemaot wanem we i stap long hat blong man ya, no gat. (Jeremaea 17:​9, 10; Matiu 15:​7-9) Yumi mas lukluk dip moa. Wan man i mas jenis bigwan long ol filing, ol samting we i pusum hem, mo ol samting we oli moa impoten. Studen ya i mas wokem niufala fasin, we God i wokem olsem we hem i wantem. (Efesas 4:​20-​24) Tingbaot: Pol i talem se, taem ol man Tesalonaeka oli harem gud nius, kwiktaem nomo oli akseptem se hem i tok blong God. Be fasin blong olgeta blong stanap strong, stap tru, mo gat lav, hemia nao i soemaot long Pol se trutok i ‘stap wok long laef blong olgeta.’​—1 Tesalonaeka 2:​13, 14; 3:6.

I tru, samting we i stap insaed long hat blong studen bambae i kamaot i no longtaem long ol aksin blong hem, olsem eksampol blong Eric i soem. (Mak 7:​21, 22; Jemes 1:​14, 15) Be sore tumas, taem sam nogud fasin i kamaot long aksin blong wan studen, maet i let finis. Taswe samting we yumi mas traem mekem we i no isi nating, hemia blong luksave sam slak fasin bifo we oli spolem studen long saed blong spirit. Yumi nidim blong save rod blong lukluk insaed long hat long saed blong spirit. ?Olsem wanem blong mekem samting ya?

 Lanem Samting Long Fasin Blong Jisas

Jisas i save gud wanem i stap long hat blong man. (Matiu 12:25) I no gat wan long yumi we i naf blong mekem olsem ya. Be, Jisas i tijim yumi se yumi naf blong luksave wanem ol filing blong wan man, wanem ol samting we i stap pusum hem blong mekem samting, mo wanem ol samting we oli impoten moa long laef blong hem. Long sem fasin we wan dokta i naf blong yusum ol defdefren teknik blong lukluk long prapa hat blong wan man we i sik, Jisas i yusum Tok blong God blong “faenemaot” mo soemaot klia “tingting mo ol plan blong hat,” nating se ol narafala man oli no save samting ya yet.​—Ol Proveb 20:5; Hibrus 4:​12, NW.

Wan taem Jisas i givhan long Pita blong luksave wan slak fasin we biaen i bin mekem hem i foldaon. Jisas i save se Pita i lavem hem. Tru ya, Jisas i jes givim ‘ol ki blong Kingdom’ long Pita. (Matiu 16:​13-​19) Be, Jisas i save tu se, Setan i wantem pulum ol aposol. Long ol dei we i kam, bambae oli kasem ol strong traem blong lego bilif. Jisas i luksave se sam long ol disaepol blong hem oli slak smol long bilif. Taswe hem i no fraet blong talemaot long olgeta ol fasin we oli mas jenisim. Tingbaot olsem wanem hem i statem storian long saed blong bisnes ya.

Matiu 16:21 i talem se: “Jisas i stat soemaot long ol man blong hem we bambae hem i mas . . . harem nogud [mo] . . . Bambae olgeta oli kilim hem i ded.” Makemgud se, Jisas i no talem nomo, be hem i soem long olgeta wanem we bambae i hapen long hem. Yumi sua se ating hem i yusum ol vas long Baebol, olsem Ol Sam 22:​14-​18 mo Aesea 53:​10-​12, blong soemaot se Mesaea bambae i harem nogud mo bambae i ded. Be yumi save se, taem Jisas i ridim ol vas ya, hem i givim janis long Pita mo ol narafala aposol blong talemaot wanem we i stap long hat blong olgeta. ?Bambae oli mekem wanem long taem we bambae oli kasem ol traem?

Yumi sapraes se, nating we Pita i wan man we i no fraet mo i strong, be toktok we hem i sakem hareap nomo long taem ya i soemaot we hem i gat wan slak fasin. Hem i talem se, “Masta, God i mas blokem samting ya. Samting ya i no save kamtru long yu olsem.” Tingting ya blong Pita i no stret nating, from we Jisas i talem long Pita se, “Tingting blong yu i no tingting blong God, i tingting blong man nomo.” Hemia wan slak fasin we i save karem nogud frut i kam. ?Jisas i mekem wanem? Afta we Jisas i tok strong long Pita, Jisas i talem long Pita mo ol narafala disaepol se: “Man we i wantem kam biaen long mi, hem i mas blokem ol samting we hem nomo i wantem, nao i mas karem [“pos,” NW ] blong hem, i biaen long mi.” Hem i pulum tingting blong olgeta long ol vas ya, Ol Sam 49:8 mo 62:​12, mo long kaen fasin i talem long olgeta bakegen se God nomo i save sevem olgeta, i no man.​—Matiu 16:​22-​28.

Nating we smoltaem afta Pita i letem fraet i winim hem mo i giaman tri taem se hem i no save Jisas, ol samting ya we Jisas i bin talem long hem, i rerem hem blong kam gud bakegen kwiktaem long saed blong spirit. (Jon 21:​15-​19) Fifti dei biaen, Pita i no fraet blong stanap fored long hip blong ol man long Jerusalem, blong talemaot se Jisas i laef bakegen. Long ol wik, manis, mo yia we oli kam biaen, hem i no fraet blong soemaot wan nambawan eksampol long fasin blong stap tru long God, taem ol man oli holemtaet hem, oli wipim hem mo putum hem long kalabus.​—Ol Wok 2:​14-​36; 4:​18-​21; 5:​29-​32, 40-​42; 12:​3-5.

?Samting ya i tijim wanem long yumi? ?Yu luk samting we Jisas i mekem blong pulum mo soemaot klia wanem we i stap long hat blong  Pita? Fastaem, Jisas i jusum sam vas we i laenap stret long problem ya we i impoten blong Pita i tingbaot. Afta, hem i wet long Pita blong talemaot wanem we i stap long hat blong hem. Laswan samting, hem i pulum sam moa advaes blong Baebol blong givhan long Pita blong stretem tingting mo ol filing blong hem. Ating yu yu ting se, fasin ya blong tijim wan man i had tumas long yu blong mekem. Be i gud yumi tingbaot tu stori, blong soem olsem wanem Jeova i save givhan long yumi blong folem eksampol blong Jisas, sipos yumi reregud mo yumi trastem hem.

Kasem Wanem We i Stap Long Hat

Taem wan Kristin papa i save se tufala boe blong hem, wan long klas wan mo wan long klas tu, i tekem loli long tebol blong tija, hem i sidaon wetem tufala mo storian long bisnes ya. Papa i no tingbaot problem ya olsem wan smol samting we i nating nomo, no gat. Hem i talem se: “Mi traehad blong kasem se wanem samting i stap long hat blong tufala we i pulum tufala blong mekem nogud fasin ya.”

Papa i pulum tingting blong tufala boe, blong tingbaot wanem we i hapen long man ya Akan, we Josua japta 7 i tokbaot. Kwiktaem nomo, tufala i kasem gud poen mo tufala i talem sore. Tingting blong tufala i stikim tufala finis. Taswe, papa i askem tufala blong ridim Efesas 4:​28, we i talem se: “Man we i man blong stil, hem i mas lego fasin ya. Hem i mas wok had long stret fasin . . . nao bambae i save givhan long ol puaman tu.” Ale, blong folem advaes ya blong Baebol, papa i talem long tufala blong pem sam loli mo givim i gobak long tija ya.

Papa i talem se, “Taem mifala i luksave wan nogud fasin, mifala i traehad blong karemaot, mo jenisim wetem ol fasin we oli gud mo klin taem mifala storian wetem ol pikinini.” From we papa mama ya i folem eksampol blong Jisas blong tijim pikinini blong tufala, tufala i karem gudfala frut from. Mekem se biaen, tufala boe tugeta oli go wok long Betel long Brooklyn, mo twanti-faef yia biaen, wan i wok yet long Betel.

Tingbaot olsem wanem wan narafala Kristin sista i naf blong givhan long Baebol stadi blong hem. Studen i stap kam long ol miting mo joen long wok blong prij, mo i bin soemaot se hem i wantem tekem baptaes. Be, i luk olsem se, studen ya i no trastem Jeova fulwan. Sista ya i talem se: “From we hem i no mared, hem i no luksave se hem i kam independen tumas long tingting blong hem. Mi wari se i nogud hem i sik long tingting no i foldaon long saed blong spirit.”

Sista ya i spenem taem wetem studen blong storebaot Matiu 6:​33. Hem i leftemap tingting blong studen blong putum Kingdom long fasples long laef blong hem mo trastem se Jeova i save lukaot long evri samting mo mekem se oli rongud. Nao sista ya i askem studen stret se: “?From we yu laef yu wan, hemia nao i mekem se i hadwok blong trastem narafala mo Jeova tu?” Studen i talemaot se klosap hem i stop fulwan blong prea long Jeova. Sista i leftemap tingting blong hem blong folem advaes we i stap long Ol Sam 55:22 mo putum ol trabol blong hem long Jeova, from we 1 Pita 5:7 i talem se: ‘Hem i stap tingbaot yu.’ Ol tok ya i kasem hat blong studen ya. Sista i talem se: “Hemia wan long ol taem we mi luk hem i krae.”

Gohed Blong Wokem Trutok Insaed Long Yu

Yumi harem gud tumas taem yumi tijim ol man, nao oli folem trutok. Be sipos yumi wantem se yumi win long wok ya, yumi mas soem gudfala eksampol. (Jud 22, 23) Yumi evriwan i  mas ‘gohed blong wok had, we yumi ona long God, mo yumi fraet tu long hem.’ (Filipae 2:​12) Samting ya i minim se yumi mas letem laet blong Baebol i saen oltaem long hat blong yumi wan. Mo traem faenemaot ol tingting, ol fasin, mo ol filing we yumi nidim blong jenisim.​—2 Pita 1:​19.

Eksampol: ?Strong tingting we yu gat long ol Kristin wok, i kam slak smol? ?Sipos yes, from wanem i olsem? Maet from we yu stap trastem yu wan tumas. ?Olsem wanem blong save sipos i olsem? Ridim Hagae 1:​2-​11, mo tingbaot olsem wanem Jeova i mekem ol man Jiu we oli kambak long Jerusalem oli tingting. Nao askem long yu wan se: ‘?Mi mi stap tingting tumas long wok blong mi blong kasem mane mo harem gud long laef? ?Mi mi rili trastem se Jeova bambae i kea long famle blong mi sipos mi putum olting long saed blong spirit fastaem? ?Mi harem olsem se mi mas lukaot long mi wan fastaem?’ Sipos yu mas jenisim sam samting long tingting mo ol filing blong yu, yu no mas wet blong mekem ol jenis ya. Ol advaes we i stap long Matiu 6:​25-​33, Luk 12:​13-​21, mo 1 Timoti 6:​6-​12, i givhan long yu blong gat wan tingting we i skelgud long ol samting we yu nidim long saed blong bodi, mo long rod ya yu no lusum blesing blong Jeova.​—Malakae 3:​10.

Blong jekemgud fasin blong yumi wan i no wan isi samting. Taem narafala i talemaot long yumi wan slak fasin we yumi gat, yumi save harem nogud long saed blong filing. Be, taem yumi tekem taem blong givhan long pikinini blong yumi, no wan man we yumi stadi wetem, mo yumi wan​—nating se samting we yumi tokbaot i sam samting long laef, no sam nogud fasin we man i mas lego—​yumi tekem faswan step we i save sevem hem mo yumi wan.​—Galesia 6:1.

?Olsem wanem sipos traehad blong yu i no karem gudfala frut? Yu no mas kwik blong kam slak. Blong jenisim wan hat we i no stretgud olgeta, i no wan isi samting, i tekem plante taem, mo i nidim we yumi traehad plante. Be, i gat gudfala frut tu we i save kamaot from.

Yangfala Eric we yumi tokbaot hem fastaem, i luksave mastik blong hem biaen, mo i ‘folem trutok’ bakegen. (2 Jon 4) Eric i talem se: “Mi kambak long Jeova afta we mi luksave se wanem we mi gat fastaem i impoten.” Papa mama blong Eric oli givhan long hem mo naoia Eric i holemstrong long wok blong God. Nating we fastaem hem i no laekem taem papa mama i traehad plante taem blong kasem hat blong hem, be naoia hem i tangkiu from wanem we tufala i mekem. Hem i talem se, “Papa mama blong mi oli gud tumas, oli neva stop blong laekem mi.”

Taem yumi putum Tok blong God long hat blong ol man we yumi tijim, hemia i wan saen blong kaengud fasin. (Ol Sam 141:5) Gohed blong traem faenem wanem i stap long hat blong pikinini blong yu, mo ol man we yu stadi Baebol wetem olgeta. Samting ya i givhan long yumi blong luksave sipos niufala Kristin fasin i rili stap wok long laef blong olgeta. Gohed blong wokem trutok long ol narafala mo long yu wan, taem yu “tijim ol man long trutok blong God long fasin we i stret gud.”​—2 Timoti 2:​15.

[Tok blong pija long pej 29]

Ol tok blong Jisas oli soemaot slak fasin blong Pita

[Tok blong pija long pej 31]

Yusum Baebol blong kasem wanem we i stap long hat