Holemtaet Ol Fasin We Oli Pruvum Se Yu Yu Kristin

‘Hae God [Jeova] i talem se, . . . Yufala i witnes blong mi.’​—AESEA 43:​8.

1. ?Hu ol man we Jeova i stap pulum olgeta oli kam long hem?

 TAEM yu yu go long miting long Haos Kingdom, traem lukluk raon long yu. ?Hu i stap insaed long haos wosip ya? Ating yu luk sam yangfala we oli stap lesingud blong kasem plante waes blong Baebol. (Ol Sam 148:​12, 13) Ating yu luk sam papa we oli stap traehad blong mekem God i glad, nating se wol ya i mekem i hadwok long ol famle blong oli joengud. Ating yu luk ol gudfala olfala, we oli stap holemstrong long promes we oli bin mekem blong givim laef blong olgeta long Jeova, nating se oli harem nogud from ol sik blong olfala. (Ol Proveb 16:31) Olgeta evriwan ya oli lavem Jeova tumas. Mo Jeova i luk se i stret blong pulum olgeta oli kam fren blong hem. Pikinini blong God i talem klia se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.”​—Jon 6:​37, 44, 65.

2, 3. ?From wanem i no isi blong holem klia tingting oltaem se yumi Kristin?

² Ating yu yu haremgud tumas blong stap kampani wetem ol man we Jeova i glad long olgeta mo i blesem olgeta. Nating se i olsem, long taem ya we ‘laef i strong tumas,’ i no isi nating blong holem klia tingting oltaem se yumi Kristin. (2 Timoti 3:1) I had moa long ol yangfala we oli gruap long ol Kristin famle. Wan yangfala i talem se: “Mi mi stap go long ol Kristin miting, be mi mi no putum ol klia mak long saed blong spirit we mi stap traehad blong  kasem. Blong talem stret, mi mi no wokem wan strong tingting nating se mi wantem mekem wok blong Jeova.”

³ Samfala oli wantem tumas blong mekem wok blong Jeova. Be maet ol fren, wol, no tingting blong wantem samting we i no stret, i pulum olgeta. Taem ol samting ya oli pulum yumi strong, sloslo yumi save lusum klia tingting se yumi Kristin. Tede, plante man oli ting se ol rul blong Baebol long saed blong seks oli blong bifo nomo, oli no stret long taem blong yumi. (1 Pita 4:4) Samfala oli ting se i no impoten blong wosipim God long fasin we hem i wantem. (Jon 4:​24) Long leta we Pol i raetem i go long ol Kristin long Efesas, hem i talem se wol ya i gat wan “spirit” blong hem no wan tingting we bighaf blong ol man oli gat. (Efesas 2:​2, NW ) Spirit ya i save pulum yumi blong tingting olsem ol man blong wol ya we oli no save Jeova.

4. ?Olsem wanem Jisas i makem se yumi mas holemtaet ol fasin we oli pruvum se yumi Kristin?

⁴ Be yumi, we yumi givim laef blong yumi i go long Jeova finis, yumi save se nating we yumi yangfala no olfala, be bambae yumi kasem bigfala trabol sipos tingting blong yumi i no stap klia oltaem se yumi Kristin. Wan rod nomo blong holem klia tingting oltaem, hemia blong tingbaot ol rul blong Jeova mo ol samting we hem i wantem. Yumi no mas fogetem se, hem i wokem yumi blong yumi tekem fasin blong hem. (Jenesis 1:​26; Maeka 6:8) Baebol i talem se ol fasin we oli pruvum se yumi Kristin oli olsem klos blong yumi we ol narafala man oli save luk. Jisas i givim woning long ol man long taem blong yumi, i se: “Yufala i lesin. Bambae mi mi kamtru long yufala olsem we man blong stil i kam. Man we i stap lukaot gud, i no tekemaot klos blong hem blong i slip, bambae hem i save harem gud. Bambae hem i no wokbaot neked, we ol man oli luk we hem i sem.” * (Revelesen 16:15) Yumi no wantem lusum ol Kristin fasin mo gudfala rul we yumi folem, mo letem wol blong Setan i pulum yumi blong kam olsem hem. Sipos yumi lusum ol gudfala fasin ya, i olsem we yumi tekemaot “klos” blong yumi, mo bambae yumi mas harem nogud mo sem.

5, 6. ?From wanem i impoten we yumi no hafhaf long saed blong spirit?

⁵ Sipos yumi tingting strong oltaem se yumi Kristin, tingting ya i save gat paoa long rod we yumi folem long laef blong yumi. ?From wanem yumi talem olsem? From we sipos wan man blong Jeova i no holem long tingting blong hem oltaem se hem i Kristin, maet laef blong hem i olbaot, hem i no moa wokbaot long wan stret rod, mo i no moa traehad blong kasem wan mak. Baebol i givim woning bakegen mo bakegen long man we i gat tu tingting olsem. Disaepol Jemes i talem se: “Man we tingting blong hem i hafhaf, hem i olsem wef blong solwota, we win i blu long hem, i mekem i go olbaot. Man we tingting blong hem i hafhaf olsem, we oltaem hem i stap tingbaot blong go long tu rod, i nogud hem i ting se bambae i save kasem sam samting long [Jeova].”​—Jemes 1:​6-8; Efesas 4:​14; Hibrus 13:9.

⁶ ?Yumi save mekem wanem blong holemtaet ol fasin we oli pruvum se yumi Kristin? ?Wanem i save givhan long yumi blong luksave bigfala ona we yumi gat blong mekem wosip long God ya we i Antap Olgeta? Plis tingting gud long ol rod we bambae yumi tokbaot.

Pruvum Long Yu Wan Se Yu Yu Kristin

7. ?From wanem i gud blong askem Jeova blong lukluk long laef blong yumi?

⁷ Traehad oltaem blong fren moa wetem Jeova. Beswan samting we wan Kristin i gat, hemia fasin fren  blong hem wetem God. (Ol Sam 25:14; Ol Proveb 3:​32) Sipos tingting blong yumi i no moa strong se yumi Kristin, yumi mas skelem gud fasin fren blong yumi wetem Jeova, blong luksave se hem i gud mo i dip olsem wanem. Man blong raetem Ol Sam i askem stret long Jeova se: “Plis yu lukluk long laef blong mi, blong faenemaot se mi mi wanem man, mo yu skelem olgeta tingting blong mi.” (Ol Sam 26:2) ?From wanem i gud we Jeova i lukluk long laef blong yumi? From we yumi wan, yumi no naf blong skelem ol tingting we oli stap biaen long ol aksin blong yumi, mo ol samting we yumi wantem long hat blong yumi. Jeova nomo i naf blong kasem save long ol samting long saed blong yumi we oli haed​—ol tingting blong yumi, risen from wanem yumi mekem samting, mo ol filing blong yumi.​—Jeremaea 17:​9, 10.

8. (a) ?Sipos Jeova i traem yumi, olsem wanem samting ya i save givhan long yumi? (b) ?Wanem i bin givhan long yu blong yu kam bigwan moa long ol Kristin fasin?

⁸ Taem yumi askem Jeova blong lukluk long laef blong yumi, yumi stap askem hem blong i traem yumi. Maet hem i letem sam samting i kamaot long laef blong yumi, blong yumi soemaot trufala risen from wanem yumi mekem samting, no blong yumi soemaot wanem i rili stap long hat blong yumi. (Hibrus 4:​12, 13; Jemes 1:​22-​25) Yumi mas glad long ol traem ya, from we oli givim janis long yumi blong soemaot se fasin blong yumi blong stap tru long Jeova i dip olsem wanem. Oli save soemaot sipos yumi ‘stret gud, yumi no sot long wan samting, mo yumi gat olgeta samting blong Kristin laef blong yumi.’ (Jemes 1:​2-4) Mo taem yumi stap gotru long ol traem ya, yumi gru moa tu long saed blong spirit.​—Efesas 4:​22-​24.

9. ?I impoten blong yu wan yu pruvum se tok blong Baebol i tru? ?From wanem?

⁹ Pruvum long yu wan se ol tok blong Baebol i tru. Yumi save lusum ol fasin we oli soem se yumi man blong Jeova sipos yumi no bilif strong long ol save blong Baebol. (Filipae 1:​9, 10) Evri Kristin​—ol yangfala mo ol olfala tu—​oli mas pruvum se bilif blong olgeta i laenap wetem trutok blong Baebol. Pol i talem long ol Kristin se: “Yufala i mas traem olgeta samting fastaem, nao yufala i save holemstrong ol samting we oli gud.” (1 Tesalonaeka 5:​21) Ol yangfala Kristin long ol famle we oli onagud long God, oli mas luksave se oli no save dipen long bilif blong papa mama blong olgeta nomo. Deved i talem long stret pikinini blong hem Solomon, se hem i mas ‘save God blong papa blong hem, mo hem i mas mekem wok blong hem wetem fulhat blong hem.’ (1 Kronikel 28:​9, NW ) I no naf we yangfala Solomon i lukluk nomo olsem wanem papa blong hem i mekem bilif blong hem i kam strong. Solomon hem wan i mas save Jeova, mo hem i bin tekem aksin blong mekem olsem. Hem i askem long God se: “Plis, mi wantem blong yu givim waes mo save long mi, blong mi save rul long ol man ya long stret fasin.”​—2 Kronikel 1:​10.

10. ?From wanem i no rong blong askem ol gudfala kwestin we oli kamaot long stret tingting?

¹⁰ Blong man i wokem strong bilif, hem i mas gat save. Pol i talem se: “Ol man oli stap bilif long God, taem oli harem gud nius.” (Rom 10:17) ?Tok ya i minim wanem? Hem i min se, taem yumi stadi long Tok blong God, bilif blong yumi i kam strong, mo yumi lanem blong trastem Jeova, ol promes blong hem, mo ogenaesesen blong hem. Taem yumi faenem ansa blong ol gudfala kwestin long saed blong Baebol, yumi lanem blong trastem Baebol. Mo tu, long Rom 12:2 (NW ), Pol i givim advaes ya se: “Bambae yufala nomo i luksave ol samting we God i wantem, we ol samting ya oli gud, oli mekem man i glad, mo oli stret gud olgeta.” ?Olsem wanem blong mekem olsem? Yumi mas “save ol trutok” blong Baebol. (Taetas 1:1) Tabu spirit blong Jeova i save givhan long yumi blong kasem save long ol strong trutok ya. (1 Korin 2:​11, 12) Taem yumi faenem i had blong kasem save long wan samting, yumi mas prea i go long God blong askem help blong hem. (Ol Sam 119:​10, 11, 27) Jeova i wantem se yumi kasem save long Tok blong hem, yumi bilivim, mo yumi obei long Tok ya. Hem i glad sipos stret tingting i pusum yumi blong askem ol gudfala kwestin.

Wantem Tumas Blong Mekem God i Glad

11. (a) ?Wanem samting we yumi evriwan i nidim mo we i stret nomo, be i save kam wan trap tu? (b) ?Olsem wanem yumi save kasem paoa blong no letem ol rabis fren oli pulum yumi?

¹¹ Traehad blong mekem God i glad, i no ol man. Taem yumi joen wetem wan grup blong man, samting ya tu i soemaot se yumi hu. Hemia i gud nomo. Yumi evriwan i nidim ol fren, mo taem ol narafala oli wantem se yumi joen wetem olgeta, yumi haremgud. Taem yumi yangfala​—mo biaen tu—​ol fren oli save gat bigfala paoa long yumi, mekem se yumi wantem tumas blong folem fasin blong olgeta mo  mekem olgeta oli glad. Be i no olgeta fren evriwan we oli wantem pulum yumi long gudfala rod. Samfala oli wantem nomo we yumi joenem olgeta long ol rabis fasin blong olgeta. (Ol Proveb 1:​11-​19) Taem wan Kristin i letem ol rabis fren oli pulum hem, klosap oltaem bambae hem i traem haedem se hem i wan Kristin. (Ol Sam 26:4) Aposol Pol i givim woning ya se: “Yufala i no mas letem fasin blong yufala i kam olsem fasin blong ol man long wol.” (Rom 12:2) Jeova i save givim paoa we yumi nidim blong stanap strong agensem ol rabis fren we oli traem pulum yumi blong folem olgeta.​—Hibrus 13:6.

12. ?Wanem rul mo wanem eksampol i save givim paoa long yumi blong stanap strong taem wan samting i traem tras we yumi gat long God?

¹² Taem yu luk se ol fren oli save spolem ol gudfala fasin we oli pruvum se yu yu Kristin, i gud blong rimemba se i moa impoten blong stap tru long God i bitim we yu folem tingting mo fasin blong bighaf blong ol man tede. Wan gudfala rul blong folem i stap long Eksodas 23:2: “Nating sipos bighaf blong ol man oli mekem samting we i no stret, . . . bambae yufala i no folem fasin blong olgeta.” Wan taem, bighaf blong ol man Isrel oli no moa gat strong tingting se Jeova i save mekem ol promes blong hem oli kamtru. Be Keleb i stanap strong, hem i no folem tingting blong ol man ya. Hem i trastem gud ol promes blong God, mo hem i kasem bigfala blesing from. (Namba 13:30; Josua 14:​6-​11) ?Olsem wanem long yu? ?Yu tu yu rere blong stanap strong agensem bighaf blong ol man, blong yu save holemtaet gudfala fasin fren we yu yu gat wetem God?

13. ?From wanem i waes blong talemaot se yu yu Kristin?

¹³ Talemaot se yu yu wan Kristin. Sam man oli talem se beswan rod blong protektem yu wan i blong faetbak. Samting ya i tru taem yu wantem holemtaet ol fasin we oli pruvum se yu yu Kristin. Long taem blong Esra, sam man oli girap agens long ol man Isrel we oli stap traehad blong mekem samting we Jeova i wantem. Nao ol man Isrel we oli stap tru long God oli talem se: “God blong mifala, hem i God blong heven mo wol, mo mifala i man blong wok blong hem.” (Esra 5:​11) Sipos yu letem ol tok mo fasin blong ol man we oli agensem yu oli gat paoa long yu, yu save fraet nao bambae yu no moa mekem wan samting. Sipos yu traem mekem evri man i glad, bambae yu no moa karem frut long wok blong yu. Taswe yu no mas fraet. I gud se oltaem yu talemaot stret se yu yu Witnes blong Jeova. Wetem respek, yu save eksplenem klia ol samting we oli impoten long laef blong yu, ol bilif blong yu, mo ol Kristin disisen we yu yu stanap strong long olgeta. Soem long ol narafala se yu yu gat strong tingting blong holem ol nambawan klin fasin we Jeova i glad long olgeta. Soemaot klia se i no gat wan samting we i save mekem yu yu lego Kristin bilif blong yu. Yes, soem se yu yu praod long ol hae rul we yu stap folem. (Ol Sam 64:10) Taem yu no fraet blong soemaot se yu yu wan Kristin, samting ya i save givim paoa long yu, protektem yu, mo i save pulum narafala blong askem kwestin long saed blong Jeova mo ol man blong hem.

14. ?I stret we yumi harem nogud taem samfala oli jikim yumi mo agensem yumi? Eksplenem.

¹⁴ Maet samfala oli jikim yu mo agensem yu. (Jud 18) Sipos oli no glad taem yu traem eksplenem ol samting we yu tinghae long hem, yu no mas harem nogud. (Esikel 3:​7, 8) Nomata se tingting blong yu i strong olsem wanem, be sipos narafala man i no wantem bilif, bambae i no gat wan samting we i save pulum hem blong bilif. Tingbaot Fero. Long olgeta panis mo merikel we Fero i luk, i no gat wan we i mekem  hem i bilif se Jeova i sanem Moses. Panis ya we hem i lusum fasbon blong hem tu, i no mekem hem i bilif. Taswe, yu no mas letem fraet long man i mekem yu yu sem blong toktok. Sipos yu trastem God mo bilif long hem, samting ya bambae i halpem yu blong winim fraet ya.​—Ol Proveb 3:​5, 6; 29:25.

Tingting Long Ol Samting We Oli Hapen Bifo, Lukluk i Go Long Fiuja

15, 16. (a) ?Wanem ol gudfala samting long saed blong spirit we laen blong ol Kristin i pasem i kam long yumi? (b) ?From wanem i gud blong tingting dip long ol gudfala samting ya long saed blong spirit?

¹⁵ Tinghae long ol gudfala samting long saed blong spirit we laen blong ol Kristin i pasem i kam long yumi. Wan samting we i save givhan long ol Kristin, i blong yusum Tok blong God blong tingting dip long ol gudfala samting long saed blong spirit we laen blong ol Kristin i pasem i kam long yumi. Long ol samting ya, i gat trutok blong Baebol, hop blong kasem laef blong olwe, mo bigfala ona blong holem nem blong God taem yumi talemaot gud nius. ?Yu yu luksave wok we yu wan yu gat long medel blong ol Witnes blong Jeova, wan grup nomo we i gat blesing ya blong mekem wok blong talemaot Kingdom blong sevem laef blong man? Yu no mas fogetem se hemia Jeova we i talem se: “Yufala i witnes blong mi.”​—Aesea 43:10.

¹⁶ Traem tingting gud long ol kwestin ya: ‘?Mi mi tinghae long ol gudfala samting long saed blong spirit we laen blong ol Witnes i pasem i kam long mi? ?Fasin blong mi blong tinghae long ol samting ya i pulum mi blong putum wok blong God long fasples long laef blong mi? ?From we mi mi tinghae long ol samting ya, mi mi gat paoa blong stanap strong agensem ol traem we oli pulum mi blong lego ol samting long saed blong spirit?’ Ol gudfala  samting ya long saed blong spirit oli save mekem yumi harem se yumi stap sef long saed blong spirit. Filing ya yumi save kasem nomo insaed long ogenaesesen blong Jeova. (Ol Sam 91:​1, 2) I gud tu blong tingting bak long ol impoten samting we oli bin hapen long ogenaesesen blong Jeova long taem blong yumi. Samting ya i save makemgud long tingting blong yumi se i no gat wan man no wan samting we i save spolem ol man blong Jeova fulwan long wol ya.​—Aesea 54:17; Jeremaea 1:​19.

17. ?Yumi no mas dipen nomo long ol samting long saed blong spirit we laen blong ol Kristin i pasem i kam long yumi, be yumi mas mekem wanem moa?

¹⁷ I tru, yumi no save dipen nomo long ol gudfala samting long saed blong spirit we laen blong ol Kristin i pasem i kam long yumi. Yumi wanwan i mas wok blong frengud wetem God. Afta we Pol i wokhad blong bildimap bilif blong ol Kristin long Filipae, hem i raetem tok ya i go long olgeta: “Ol fren blong mi. Bifo, long taem ya we mi stap yet wetem yufala, yufala i stap obei long mi, mo naoia we mi no moa stap wetem yufala, i gud moa blong yufala i obei long mi. Yufala i mas gohed blong wok had, we yufala i ona long God, mo yufala i fraet tu long hem. Yufala i mas mekem olsem, blong yufala i save finisim wok ya we hem i stap mekem blong sevem yufala.” (Filipae 2:​12) Yumi no save dipen long narafala blong sevem yumi.

18. ?Olsem wanem ol Kristin wok oli makem strong long tingting blong yumi se yumi Kristin?

¹⁸ Stap bisi long ol Kristin wok. Samfala oli talem se “wok blong yumi nao i soemaot se yumi hu.” Tede, God i givim wan impoten wok long ol Kristin, hemia blong talemaot gud nius blong Kingdom blong Hem we i stanap finis. Pol i talem se: “God i putumap mi finis, blong mi mi aposol blong yufala, mo mi glad tumas from wok ya we hem i givim long mi.” (Rom 11:13) Wok blong prij i mekem yumi defren long ol man blong wol, mo taem yumi joen long wok ya ol man oli luk klia se yumi Kristin. I gud tu we yumi stap bisi long ol narafala tiokratik wok, olsem ol Kristin miting, bildim ol niufala haos wosip, mo halpem ol narafala we oli gat nid. Olkaen wok olsem oli save makem strong long tingting blong yumi se yumi Kristin.​—Galesia 6:​9, 10; Hibrus 10:​23, 24.

Soemaot Klia Se Yumi Hu, Kasem Blesing From

19, 20. (a) ?Wanem sam blesing we yu wan yu bin kasem from we yu yu Kristin? (b) ?Wanem i rili soemaot se yumi hu?

¹⁹ I gud yu tekem smoltaem blong tingbaot ol blesing mo glad we yu yu kasem from we yu yu trufala Kristin. Wan blesing, se Jeova i luksave yu. Profet Malakae i talem se: “Ol man we oli ona gud long Hae God, mo oli tinghevi long hem, oli stap toktok gud wetem olgeta bakegen. Nao Hae God i stap lesin long olgeta, mo i harem ol samting we oli stap talem. Nao long fes blong hem, ol man blong hem oli raetemdaon long wan buk, ol nem blong olgeta ya we oli ona gud long hem, mo oli tinghevi long hem.” (Malakae 3:​16) God i save luk yumi olsem ol fren blong hem. (Jemes 2:​23) Yumi haremgud from we yumi gat wan risen blong laef, laef i no blong nating nomo, yumi stap traehad blong kasem ol gudfala hae mak mo karem frut long laef blong yumi. Mo tu, yumi gat hop blong kasem laef we i no save finis long fiuja.​—Ol Sam 37:9.

²⁰ Yu no mas fogetem se samting we i rili soemaot se yu yu hu mo i mekem yu yu sas, hemia tingting we God i gat long yu, i no tingting we ol narafala man oli gat. Maet samfala oli jajem yumi folem ol tingting blong man nomo we oli no stretgud. Be lav mo intres we God i gat long yumi wanwan i mekem se yumi sas​—yumi blong hem. (Matiu 10:​29-​31) Mo lav we yumi gat long God i save givim beswan risen long yumi blong praod se yumi Kristin, mo i save givim klia tingting long saed blong rod we yumi mas folem long laef. “Man we i lavem God, God i savegud hem.”​—1 Korin 8:3.

[Futnot]

?Yu Yu Tingbaot?

• ?From wanem i impoten we ol Kristin oli holemtaet ol gudfala fasin long saed blong spirit?

• ?Olsem wanem blong pruvum long yu wan se yu yu Kristin?

• ?Taem yumi mas jusum se bambae yumi mekem hu i glad, wanem i save givhan long yumi blong tekem stret disisen?

• ?Sipos yu yu praod blong stap olsem wan Kristin, olsem wanem samting ya i save gat paoa long fiuja long yu?

[Kwestin]

[Tok blong pija long pej 21]

Sipos yu stap bisi long ol Kristin wok, samting ya i save givhan long yu blong holemtaet ol fasin we oli pruvum se yu yu Kristin