?Hu Bambae i Givim Kakae Long Ol Man?

WORLD Food Programme, wan grup blong Yunaeted Nesen we wok blong hem i blong faet agensem hanggri, i ting se klosap nao bambae i gat 800 milian man​—plante long olgeta oli ol pikinini—​we oli sot long kakae. I no longtaem i pas, ogenaesesen ya i talem se ol samting mo ol tingting we plante bigfala nesen oli save traem blong mekem long saed blong hanggri, oli no save kamtru from we plante narafala problem i kamaot, olsem trabol we ol teroris oli mekem. Problem ya i kam bigwan moa tu from ol sik we oli stap kam antap. Wan ripot we ogenaesesen ya i mekem (Global School Feeding Report) i tokbaot ol kantri long Afrika we sik ya AIDS i kasem plante man tumas i se: “Klosap evri papa mama oli stap ded from sik ya AIDS. Ale ol pikinini blong olgeta ya oli mas traehad blong lukaot long olgeta wan, plante long olgeta oli no save olsem wanem blong mekem garen mo oli no gat save long fasin blong laef we plante taem ol papa nao oli pasem i go long ol pikinini blong olgeta.”

World Food Programme i stap traehad blong kasem wan mak we i save givhan long ol pikinini long ol skul blong oli save kakae wan taem long wan dei. Tingting ya i no blong daonem hanggri nomo be i blong stanemap sam narafala program tu we i blong tijim ol yangfala olsem wanem blong blokem sik ya HIV/AIDS.

Long ol ples we oli stat folem wanem we ogenaesesen ya i talem, ol pikinini oli kasem kakae, trening blong givhan long olgeta blong gat gudfala helt mo nara samting moa. Oli bin luksave tu se long ol ples we ol man oli jenisim fasin blong olgeta, namba blong HIV/AIDS i godaon.

Sore tumas, gudfala frut we oli kasem from traehad ya i smol tumas mo i no kamtru fulwan olsem we man i wantem. Be Baebol i leftemap tingting blong yumi wetem promes ya se wan dei bambae ol man oli no moa sot long kakae. Ol Sam 72:16 (NW ) i talem se: “Bambae i gat fulap kakae olsem wit long wol.” Aninit long Kingdom blong God, olgeta man bambae oli save tokbaot Jeova God se: “Yu yu soemaot we yu stap lukaot gud long wol ya. . . . Yu mekem we . . . graon i karem plante kakae. Fasin blong yu blong mekem i olsem.”​—Ol Sam 65:9.

[Foto Credit Line blong pija long pej 32]

WFP/Y. Yuge