Klaem i Go Long The Bottom Blong Saba

AELAN blong Saba we i stap aninit long gavman blong Netalan, bifo hem i wan strong ples blong haed blong olgeta we oli stap ron long sip blong stilim ol sas samting long ol narafala sip we oli krosem Karibin Si. Tede, smol aelan ya we i stap 240 kilometa long is blong Puerto Rico, i gat samwe 1,600 man we oli stap long hem mo 5 long olgeta ya oli ol Witnes blong Jeova. Ol Witnes ya oli gohed wetem strong tingting blong lukaot wan samting we i sas moa i bitim mane no gol. Yes, oli traem faenem “olgeta we oli stret blong kasem laef blong olwe.”​—Ol Wok 13:​48, NW.

Long namba 22 dei blong manis Jun, 1952, gud nius blong Kingdom blong God i kasem aelan ya taem smol seling sip ya Sibia blong ol Witnes blong Jeova i angka afsaed long solwota blong Saba. (Matiu 24:14) Tufala misinari ya Gust Maki mo Stanley Carter, oli klaem folem wan rod we oli kolem The Ladder. Rod ya i gat bitim 500 step long hem i go kasem vilej ya The Bottom we i kaptel blong Saba. * Blong plante handred yia, ol man oli folem smol rod ya nomo blong kasem ol man long vilej ya.

Oli putum faswan ripot blong Kristin wok long Saba long 1966 Yearbook of Jehovah’s Witnesses. Long ripot ya, i gat wan Witnes nomo long aelan ya. Smoltaem biaen, wan famle blong Kanada i stap sam yia long ples ya blong talemaot gud nius. I no longtaem i pas, Russel mo Kathy, we tufala i ritae long wok blong tufala long Yunaeted Stet, tufala i go long Saba mo tufala i prij long ples ya. Ridim stori ya blong tufala.

 Visitim Aelan Blong Saba

Mi mo waef blong mi i kam long wan plen blong mitim Ronald, we hem wan nomo i Witnes long aelan ya long ol yia stat long 1990. Ronald i wet long mitufala long epot. Hem i glad tumas long bokis blong ol ligim we mitufala i karem i kam long hem olsem wan presen, from we i no gat man we i stap mekem maket long ples ya. Taem mifala i go insaed long trak, mifala i ron sloslo i go long lef mo afta i go long raet folem rod i go antap long saed blong Hil ya Scenery we bifo hem i wan volkeno.

Mifala i stop long vilej we oli kolem Hell Gate, mo Ronald i jekem pablik notis blong luk sipos mesej long saed blong pablik tok blong Sande i stap. Mifala i glad blong luk se yes mesej ya i stap. Ronald i kambak long trak mo mifala i gohed blong klaem i go kasem bigfala vilej blong aelan ya hemia Windwardside. Vilej ya i stap long saed blong aelan ya we win i strong moa, hemia i olsem 400 meta antap long level blong solwota. Taem mifala i ron folem rod we i go long haos blong Ronald, mifala i luk wan naesfala saen long fored blong vranda we i talem se hemia nao Haos Kingdom blong ol Witnes blong Jeova.

Long medel dei taem mifala i stap kakae, mi askem kwestin ya we i pulum mitufala blong kam long Saba se, “?Olsem wanem yu yu kam wan man blong talemaot Kingdom long Saba?”

Ronald i talem se: “Taem wok blong bildim branj ofis blong ol Witnes blong Jeova long Puerto Rico i finis long 1993, mi mo waef blong mi i glad blong gohed long wok ya long ol narafala ples. Smoltaem biaen, mitufala wetem tu nara brata sista we tufala i paenia, mifala i visitim Saba mo mifala i luk we i gat 1,400 man long ples ya be i no gat Witnes blong Jeova. Taswe mi mo waef blong mi, mitufala i toktok i go long branj komiti long Puerto Rico se mitufala i wantem muv i go long ples ya.”

“Ol samting i gohed gud, ale i no longtaem biaen, mitufala i kasem ansa se mitufala i save go. Sore tumas, tu yia biaen, waef blong mi i sik tumas mo mifala i gobak long California. Afta we waef blong mi i ded, mi mi kambak long Saba. Yu save, mi mi wan man we taem mi statem wan samting be mi mas finisim samting ya.”

Prij Long Ol Haos Wanwan Long Saba

Haos blong Ronald i wan olfala haos we i gat 100 yia finis. Ronald i yusum rum we i ples blong sidaon long hem olsem Haos Kingdom. * Taem mifala i stap dring ti mo rere blong go prij, ren i kam, nao i mekem kijin we i stap afsaed i wetwet. Afta we mifala i dring ti, nating se i gat dak klaod be mifala i go prij long vilej ya The Bottom. Long evri haos we mifala i go long hem, Ronald i save nem blong man we i stap. Storian blong mifala i stanap long ol samting we i kamaot long lokol nius. Plante man oli savegud Ronald mo wok we hem i stap mekem mo oli tekem ol buk we oli tokbaot Baebol.

Bambae i had tumas blong faenem bakegen olgeta we oli intres long mesej blong Kingdom sipos yu no savegud ol man long vilej ya. ?From wanem? Ronald i talem se: “From we loa i talem se evri haos i mas gat sem kala.” Mi luksave se samting ya i tru from we taem mi lukluk raon be mi luk we evri haos long Saba oli gat waet wol mo red ruf.

Taem mifala i finis blong storian long saed blong Baebol, mifala i invaetem man blong haos blong kam long pablik tok blong Sande long Haos Kingdom. Ronald i stap givim pablik tok evri wik taem hem i stap hem wan long aelan ya. Naoia i gat 17 Baebol stadi long Saba. Long 2004, i gat 20 man oli bin kam long Memoriol blong tingbaot ded blong Kraes. !Nating se i luk olsem se namba ya i smol be hem i 1 pesen long populesen blong Saba!

Yes, ol Witnes blong Jeova oli traehad blong talemaot gud nius ya blong sevem man long plante moa ples. Nating sipos hem i wan smol aelan olsem Saba no wan bigfala ples, be ol Witnes blong Jeova oli glad blong mekem wok ya blong ‘go long ol man long olgeta ples long wol, blong pulum olgeta oli kam man blong [Jisas].’​—Matiu 28:19.

Sore tumas, visit blong mitufala i finis long ples ya. Taem mitufala i go insaed long plen, mitufala i talem tata long fren blong mitufala. !Bambae mitufala i no save fogetem visit ya blong mitufala long Saba mo taem ya we mitufala i spenem blong klaem i go long vilej ya The Bottom!

[Ol Futnot]

[Map blong pija long pej 10]

(Lukluk niuspepa)

PUERTO RICO

[Credit Line blong pija long pej 10]

Background: www.sabatourism.com