?Yu Yu Skelem Yu Wan Wetem Ol Narafala?

ATING yumi evriwan i mitim wan we hem i luk moa naes bitim yumi, we plante man i save hem, no we i kasem save samting kwiktaem moa i bitim yumi, no we i gat ol mak long skul we i moagud i bitim yumi. Maet sam narafala oli gat bodi we i strong moa, no wan gudfala wok, oli win long laef, no i luk olsem se oli gat plante fren. Maet oli gat fulap sas samting, plante mane, wan niufala trak, no i luk olsem se oli glad moa long yumi. Taem yumi luk ol samting ya we narafala i gat, ?Olsem wanem? ?Yumi skelem yumi wan wetem olgeta? ?Yumi save blokem fasin ya blong skelem yumi wan wetem ol narafala? ?From wanem wan Kristin i wantem blong stap longwe long fasin ya? ?Mo olsem wanem yumi save glad taem yumi no skelem yumi wan wetem ol narafala?

?From Wanem Mo Wetaem Yumi Skelem Yumi Wan Wetem Narafala?

Wan risen from wanem ol man oli skelem olgeta wetem ol narafala, hemia se samting ya i mekem we oli no ting nating long olgeta wan. Plante taem ol man oli haremgud taem oli save se olgeta tu oli save win sem mak long ol fren blong olgeta. Mo tu, fasin ya blong skelem yumi wan wetem narafala, i pulum yumi blong sua long yumi wan, blong kasem save wanem we yumi naf blong mekem mo wanem we yumi no naf blong mekem. Yumi lukluk wanem samting we narafala i win long hem. Sipos yumi luk se narafala ya i sem mak long yumi mo i kasem sam mak long laef, maet yumi harem se yumi naf tu blong kasem ol semfala mak.

Plante taem, fasin ya we man i skelem hem wan wetem narafala i kamaot bitwin tu man no tu woman we maet yia blong tufala i sem mak, tufala i save gud tufala mo maet laef blong tufala i sem mak. Yumi no save skelem yumi wan wetem narawan sipos yumi harem se yumi no sem mak long hem long plante samting. Blong talem long narafala rod se, wan yangfala gel maet bambae i no skelem hem wan wetem wan woman we i stap long ol buk no long sinema, be bambae i skelem hem wetem ol narafala gel long skul blong hem. Mo long sem fasin, wan woman long ol buk bambae i no save skelem hem wan long wan yangfala gel we plante man oli no save hem.

?Ol man oli skelem olgeta wan wetem narafala long saed blong wanem samting? Oli mekem olsem ya from eni samting we ol man long wan komuniti oli ting se hemia nao i moa impoten​—maet bigfala save, naesfala bodi, plante sas samting, mo ol naesfala klos. Be, plante taem, yumi skelem yumi wan wetem narafala taem yumi intres long sem samting we narafala i gat. Tru ya, sipos yumi no intres tumas long ol flaoa, ating bambae yumi no jalus long wan man we i stap karem ol defdefren kaen flaoa blong putum long haos blong hem, i nating se hem i gat plante plante flaoa.

 Fasin ya blong skelem yumi wan wetem narafala i save pulum plante defdefren filing i kam long yumi. Maet i mekem yumi haremgud no i mekem tingting blong yumi i foldaon, maet i mekem yumi tinghae long narafala no i mekem we yumi wantem winim narafala, no maet fasin ya i mekem yumi sem long yumi wan no yumi agensem narafala. Sam long ol filing ya i save spolem yumi, mo oli no laenap wetem ol Kristin fasin.

Skelem Yumi Wetem Narafala Blong Winim Hem

Plante man we oli skelem olgeta wetem ol narafala from we oli wantem “win,” oli soemaot tingting blong kompetisin. Oli wantem blong kam gud moa bitim ol narafala, mo oli save glad nomo sipos oli kasem samting ya. Yumi no harem gud blong stap wanples wetem ol man olsem. Yumi no save joengud no frengud wetem olgeta. Ol man ya oli no gat tingting daon, be tu, oli no stap folem advaes long Baebol se oli mas laekem ol man raonabaot long olgeta. Fasin blong ol man ya i save mekem ol narafala oli harem se oli sem mo oli daon moa.​—Matiu 18:​1-5; Jon 13:​34, 35.

Yumi spolem filing blong man taem yumi mekem oli harem se oli ‘nating nomo.’ Wan woman blong raetem ol buk i talem se: “yumi save harem nogud moa, taem ol man we oli sem mak long yumi oli kasem sam samting we yumi wan i wantem.” Fasin ya blong wantem winim narafala i leftemap fasin jalus, fasin agens mo i mekem yumi harem nogud long wan man from olting blong hem, ol sas samting, posisen blong hem, gudnem, mo ol gudfala samting we hem i gat. Samting ya i mekem fasin blong winim narafala i kam antap​—we i neva stop. Baebol i tok agens long fasin ya blong ‘traem winim ol narafala.’​—Galesia 5:​26, NW.

Ol man we oli wantem kasem samting we narafala i gat, oli daonem ol wok we narafala i mekem from we long rod ya oli save leftemap olgeta wan. Maet i luk olsem se ol samting ya i smol nomo, be sipos man i no lukaot gud, i save lidim man blong mekem ol nogud samting. Tingbaot tu stori long Baebol long saed blong fasin jalus.

Taem Aesak i laef wetem ol man Filistia, hem i gat “plante sipsip, mo plante buluk, mo plante man blong wok blong hem, nao ol man Filistia long ples ya oli jalus long hem.” Oli girap, oli go berem ol wel ya bakegen, we ol man blong papa blong hem oli bin digim, mo king blong olgeta i talem long Aesak blong i gowe long ples ya. (Jenesis 26:​1-3, 12-​16) Fasin jalus we oli gat i nogud we i nogud. Oli no glad blong luk we Aesak i stap haremgud long ol sas samting we hem i kasem.

Plante handred yia biaen, Deved i kam wan strong man blong faet. Ol woman Isrel oli mekem singsing blong leftemap ol wok we Deved i mekem, mo oli singsing se: “King Sol i kilim plante taosen man, be Deved i kilim plante plante taosen moa, winim hem.” Nating we singsing ya i ona long Sol tu, be Sol i tingbaot fasin ya we oli skelem hem wetem Deved olsem wan tok jik, mo fasin jalus i gru long hat blong hem. Stat long taem ya, hem i holem nogud tingting long Deved. I no longtaem hem i mekem faswan samting blong traem kilim Deved i ded. ?Yumi luk rabis fasin we i save kamaot from fasin jalus?​—1 Samuel 18:​6-​11.

!Taswe sipos yumi stap skelem yumi wetem ol narafala, nao yumi luk se samting ya i mekem yumi jalus no yumi wantem winim narafala, yumi mas lukaot! Ol filing olsem ya oli save spolem yumi, mo oli no laenap wetem tingting blong God. Be bifo we yumi tokbaot olsem wanem yumi save winim ol filing ya, i gud yumi tingbaot wan narafala samting we i save pulum yumi blong skelem yumi wan wetem narafala.

Jekemap Yu Wan Mo Haremgud

‘?Olsem wanem? ?Mi mi smat, mi luk naes, mi naf blong mekem samting, mi gat gud bodi, ol fasin blong mi oli pulum narafala blong respektem mi mo laekem mi? ?Mo mi mi soem ol fasin ya moa i bitim narafala, no narafala i winim mi long saed ya?’ Ating i no oltaem we yumi stanap fored long glas mo askem ol kwestin ya long yumi wan. Be wan woman blong raetem ol buk i talem se, “blong talem stret, ol kwestin ya oli stap long tingting blong yumi plante taem, mo yumi gat ansa finis we maet i gud no maet i nogud.” Wan man we i no sua sipos hem i save mekem wan samting, maet hem i tingbaot samting ya, be hem i no harem se hem i jalus no i gat filing ya blong wantem winim narafala. Hem i jes skelem hem wan nomo. I no rong blong mekem olsem. Be, hemia nomo se,  yumi no mas stap skelem yumi wan wetem ol narafala.

Yumi defdefren long wanem we yumi save mekem, mo hemia i dipen long plante risen. Oltaem i gat sam we i luk olsem se oli gud moa long yumi. Taswe, bitim we yumi jalus long olgeta, i gud yumi tingbaot wanem we yumi stap mekem we i laenap wetem ol stret fasin blong God. Samting ya nao i save lidim yumi blong mekem wanem we i stret mo i gud. Jeova i intres long yumi wanwan. Hem i no stap skelem yumi wetem ol narafala. Aposol Pol i givim advaes ya long yumi se: “I gud se wanwan man oli pruvum se wok blong olgeta i olsem wanem, nao olgeta bambae oli gat risen blong glad from wok blong olgeta nomo, i no from we oli skelem wok blong olgeta wetem wok blong narafala.”​—Galesia 6:​4, NW.

Faet Agensem Fasin Jalus

From we yumi evriwan i sinman, i nidim bigfala traehad mo maet i tekem plante taem blong agensem fasin jalus. I isi blong save wanem we Baebol i talem se: “Long saed blong fasin blong ona long narafala, yufala fastaem i mas soemaot rod,” be i no isi blong folem advaes ya. Pol hem wan i luksave wanem we sin i save pulum hem blong mekem. Blong faet agensem sin, hem i mas ‘stap faetem gud bodi blong hem, mo bos long hem olsem we hem i wan slef nomo.’ (Rom 12:10; 1 Korin 9:​27, NW ) Long yumi, hemia i minim se maet yumi mas agensem tingting ya blong wantem winim narafala, mo jenisim wetem ol gudfala tingting. Yumi mas prea, mo askem Jeova blong givhan long yumi blong ‘yumi no gat tingting we i go antap.’​—Rom 12:3.

Stadi Baebol mo tingting dip long hem, hemia tu i save givhan. Tingbaot Paradaes long fiuja we God i promes long hem. Olgeta man bambae oli laef long pis, oli gat gudfala bodi, plante kakae, naesfala haos, mo wok we i mekem olgeta i haremgud. (Ol Sam 46:​8, 9; 72:​7, 8, 16; Aesea 65:​21-​23) ?Bambae i gat man i harem se i wantem blong winim narafala? Nogat. Bambae i no gat risen blong mekem olsem. Tru ya, Jeova i no talem evri samting long yumi se laef bambae i olsem wanem long taem ya, be yumi save se olgeta man bambae oli naf blong kasem wanem we oli wantem, mo oli gat save blong mekem wanem wok we oli laekem. Maet wan man i lanem blong lukluk ol sta, narafala maet i lanem blong mekem pija long ol naesfala kaliko. Bambae i no gat risen blong jalus long narafala. Wok blong ol man raonabaot long yumi bambae i pusum yumi blong wantem mekem moa samting, be i no blong mekem yumi harem nogud. Bambae ol filing ya blong wantem winim narafala oli ol samting blong bifo.

Sipos hemia nao laef we yumi wantem, i gud yumi traehad blong wokem gudfala fasin naoia. Yumi haremgud finis long wan paradaes long saed blong spirit, we yumi fri long plante trabol long wol raonabaot long yumi. Long niufala wol blong God, bambae i no gat fasin ya blong winim narafala, taswe i impoten we yumi traem blokem fasin ya naoia.

?Olsem wanem? ?I rong olgeta blong skelem yumi wetem narafala? ?No maet i gat sam samtaem we i stret blong mekem olsem?

Stret Taem We Yumi Save Skelem Yumi Wetem Narafala

Plante taem, fasin blong skelem yumi wan wetem narafala, i save lidim yumi blong harem nogud mo tingting i foldaon, be i no nid blong harem olsem ya. Tingbaot advaes we aposol Pol i talem long saed ya: “Mifala i wantem we yufala bambae i folem fasin blong olgeta ya we oli bilif strong, mo we tingting blong olgeta i longfala, nao oli save kasem ol samting we God i promes blong givim long olgeta.” (Hibru 6:​12) Taem yumi traehad blong wokem ol fasin olsem ol man blong Jeova bifo, yumi save kasem gudfala frut from. I tru, hemia i min se maet yumi skelem yumi wetem olgeta. Be, samting ya i save givhan long yumi blong luk sam eksampol we yumi save folem, mo olsem wanem yumi save kam gud moa long sam haf long laef blong yumi.

 Tingbaot Jonatan. I gat sam samting we oli save mekem we hem i kam jalus. Hem i fasbon boe blong King Sol blong Isrel, mo hem i gat janis blong kam king, be Jeova i jusum wan man we i 30 yia moa yang long hem, hemia Deved. Be Jonatan i no kros, hem i soemaot fasin we i defren olgeta. Hem i no tingbaot hem wan nomo, mo i sapotem man we Jeova i jusum blong kam king, taem hem i frengud wetem Deved. Yes, Jonatan i laekem tumas ol samting long saed blong spirit. (1 Samuel 19:​1-4) Hem i defren olgeta long papa blong hem. Papa blong Jonatan i tingbaot Deved olsem wan enemi. Be, Jonatan i luksave se Jeova i stap insaed long bisnes ya, mo hem i respektem wanem we Jeova i wantem. Jonatan i no skelem hem wan wetem Deved, mo i no gat tingting ya se, “?From wanem Deved i kam king be i no mi?”

Bitwin ol brata mo sista, yumi no mas wari se ol narafala bambae oli traem blong winim yumi no tekem ples blong yumi. I no stret blong wantem winim narafala. Ol man oli luksave ol Kristin we oli bigman long saed blong spirit from we oli gat fasin joengud, oli gat wan tingting nomo, mo oli laeklaekem olgeta. I no from fasin ya blong wantem winim narafala. Francesco, wan man blong stadi long laef blong ol man, i talem se: “Lav i enemi blong fasin jalus, sipos yumi lavem wan man yumi wantem se hem i haremgud, mo yumi glad taem yumi luk we hem i win long laef mo hem i glad.” Taswe sipos wan insaed long Kristin kongregesen i kasem wan wok, yumi soemaot lav taem yumi glad long hem. Hemia nao wanem we Jonatan i mekem. Olsem Jonatan, bambae yumi kasem blesing sipos yumi sapotem ol man we oli kasem wok insaed long ogenaesesen blong Jeova.

I no rong blong tinghae long wan Kristin from we i soem gudfala eksampol. Taem yumi skelem yumi wan wetem olgeta, long fasin we i stret, samting ya i save leftemap tingting blong yumi, blong folem fasin blong bilif blong olgeta. (Hibrus 13:7) Be sipos yumi no lukaotgud, fasin ya blong wantem mekem olsem narafala i save kam olsem fasin blong wantem winim narafala. Sipos yumi harem se yumi wantem bitim narafala we fastaem yumi laekem, mo yumi talem sam nogud toktok long saed blong hem blong traem daonem hem, samting ya i soem se yumi no moa wantem mekem olsem hem be naoia yumi kam jalus long hem.

I no gat man long wol ya we i save soemaot eksampol we i stretgud olgeta. Taswe Baebol i talem se: “Yufala i pikinini blong God, mo hem i lavem yufala tumas, nao from samting ya, yufala i mas traehad blong folem fasin blong hem.” Mo tu, “Kraes hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” (Efesas 5:​1, 2; 1 Pita 2:​21) Ol fasin blong Jeova mo Jisas​—olsem lav, kaengud fasin, fasin blong kasem save long filing blong man, mo tingting daon—​hemia nao ol fasin we yumi mas folem. Yumi mas tekem taem blong skelem yumi wan wetem ol fasin blong tufala, mo ol plan blong tufala, mo olsem wanem tufala i stap mekem samting. Taem yumi mekem olsem, laef blong yumi i save kamgud moa. Samting ya i save lidim yumi long stret rod, mekem we yumi stanap strong mo yumi harem sef, mo i givhan long yumi blong kam ol man mo woman we oli gru long saed blong spirit. (Efesas 4:​13) Sipos yumi traem bes blong yumi blong folem nambawan eksampol blong Jeova mo Jisas, samting ya bambae i blokem yumi blong no skelem yumi wan wetem ol narafala.

[Tok blong pija long pej 29]

King Sol i kam jalus long Deved

[Tok blong pija long pej 31]

Jonatan i neva tingbaot Deved we i yang moa long hem olsem wan enemi