!Yumi Mas Praod Blong Stap Olsem Wan Kristin!

‘Man we i wantem tok flas, hem i save tok flas from ol samting ya nomo we Jeova i mekem.’​—1 KORIN 1:​31.

1. ?Wanem tingting blong plante man long ol skul?

 I NO longtaem i pas, wan man we i stap raetem nius long saed blong ol jos, i tokbaot tingting we plante man oli gat long skul blong olgeta. Hem i se: “Bigfala samting long ol skul tede​—hem i wan tingting blong ol man se oli no kea.” Hem i go moa i se: “Oli no wari nating long skul blong olgeta.” Plante man “oli talem se oli bilif long God . . . ; be oli no rili intres long God.”

2. (a) ?From wanem yumi no sapraes we plante man oli no moa kea long skul blong olgeta? (b) ?Wanem trabol we ol trufala Kristin oli save kasem sipos oli no moa kea?

² Olgeta we oli stadi Baebol oli no sapraes long tingting blong ol man we oli no kea. (Luk 18:8) Mo yumi save se ol man oli mas kam olsem we oli no moa intres long skul, from we longtaem finis i kam, ol giaman skul oli lidim olgeta oli go krangke mo mekem olgeta oli harem nogud. (Revelesen 17:​15, 16) Be tingting ya we i hafhaf mo i no kea long saed blong skul, hem i wan denja long ol trufala Kristin. Yumi save kasem bigfala trabol sipos yumi no kea long bilif blong yumi, mo sipos yumi no moa holem strong tingting long saed blong wok blong God mo ol trutok blong Baebol. Long saed blong bilif we i hafhaf, Jisas i givim woning long ol Kristin blong Laodisia long faswan handred yia, i se: “I olsem we yufala i no hot, mo yufala i no kol tu. Sipos yufala i hot gud no yufala i kol gud, hemia i moa gud, bambae mi mi save glad long yufala. Be . . . yufala i hafhaf nomo.”​—Revelesen 3:​15-​18.

Klia Tingting Se Yumi Hu

3. ?Ol Kristin oli save praod se oli hu?

³ Blong faet agens long tingting ya blong no kea, ol Kristin oli mas gat klia tingting se oli hu, mo oli mas praod blong stap defren long ol narafala man. Baebol i soem se yumi hu, long ol tok blong hem long saed blong ol man blong Jeova mo ol disaepol blong Jisas. Yumi, yumi ol “witnes” blong Jeova, we yumi “stap joen wetem God” blong mekem wok ya blong talemaot “gud nius.” (Aesea 43:10; 1 Korin 3:9; Matiu 24:14) Yumi ol man we yumi ‘lavlavem yumi.’ (Jon 13:34) Ol trufala Kristin wanwan oli traehad longtaem finis, nao oli kam “naf blong jusumaot wanem fasin i gud mo wanem fasin i nogud.” (Hibrus 5:​14) Yumi “saenaot long medel blong [ol man], olsem ol sta long skae.” (Filipae 2:​15) Yumi traehad blong ‘mekem fasin blong yumi i stret gud long fes blong olgeta man.’​—1 Pita 2:​12; 2 Pita 3:​11, 14.

4. ?Ol man blong Jeova oli no olsem hu?

⁴ Ol trufala man blong Jeova oli save tu se oli mas stap defren long hu. “Oli no man blong wol ya,” olsem Lida blong olgeta Jisas Kraes, we hem tu i no man blong wol ya. (Jon 17:16) Oli stap defren long “ol hiten man,” hemia ol man we ‘tingting blong olgeta i stap long tudak nomo, mo oli stap longwe tumas long laef ya we God i stap givim.’ (Efesas 4:​17, 18) Taswe, ol man blong Jisas ‘oli livim olgeta fasin we oli no stret long fes blong God, mo oli no wantem ol samting blong wol ya . . . oli mekem ol fasin we i stret, we God i stap harem gud long hem.’​—Taetas 2:​12.

5. ?Wanem mining blong advaes ya se yumi mas ‘tok flas from ol samting we Jeova i mekem’?

⁵ Klia tingting we yumi gat se yumi hu, mo fasin fren we yumi gat wetem Hae Rula blong heven mo wol, i pulum yumi blong ‘tok flas from ol samting we Jeova i mekem.’ (1 Korin 1:​31) ?Tok flas olsem wanem? Yumi ol trufala Kristin, yumi praod se Jeova i God blong yumi. Yumi folem advaes ya: ‘Man  we hem i wantem tok flas, i gud hem i tok flas from we hem i luksave tingting blong God, mo i savegud God, we fasin blong God blong lavem man i gudfala tumas, mo ol wok we God i stap mekem long wol ya, oli gud mo oli stret nomo.’ (Jeremaea 9:​24) Yumi “tok flas” from bigfala ona we yumi gat blong save God, mo from we hem i stap yusum yumi blong givhan long ol narafala man.

I No Isi Blong Holem Klia Tingting

6. ?From wanem sam Kristin oli faenem i had blong holem klia tingting se oli hu?

⁶ I tru, i no isi long ol Kristin blong oli holem klia tingting se oli hu. Wan yangfala man we hem i gruap long Kristin famle i tingtingbak long wan taem we bilif blong hem i kam slak. Hem i se: “Samtaem mi bin harem se mi no save from wanem mi mi wan Witnes blong Jeova. Stat long taem we mi mi smol nomo, trutok i stap raon long mi oltaem. Samtaem mi bin gat tingting se skul blong mi i olsem ol narafala skul nomo.” Sam narafala oli no gat klia tingting se oli hu, from we oli letem ol tingting blong wol i gat paoa long olgeta, olsem ol sinema, ol toktok long televisin mo niuspepa, mo tingting blong ol man tede we oli no bilif long God. (Efesas 2:​2, 3) Sam samtaem long laef blong ol Kristin, maet oli harem se oli no naf, no maet oli skelem bakegen ol samting we oli tinghae long olgeta, mo ol mak we oli stap traehad blong kasem.

7. (a) ?Ol man blong God oli mas jekem olgeta bakegen long wanem fasin? (b) ?Oli mas lukaot long wanem denja?

⁷ ?Olsem wanem? ?I rong blong lukluk gud long laef blong yumi mo skelem bakegen? Nogat. Aposol Pol i leftemap tingting blong ol Kristin blong oli jekem laef blong olgeta. Hem i se: “I gud yufala nomo i traem luklukgud long laef blong yufala, yufala nomo i jajem yufala. Yufala i mas traem faenemaot se yufala i stap holem yet fasin blong bilif, no yufala i no moa holem.” (2 Korin 13:5) Long ples ya, aposol Pol i pulum yumi blong traem faenem enikaen slak fasin we maet yumi gat long saed blong spirit, mo tekem aksin blong stretem trabol ya. Taem wan Kristin i stap jekem sipos hem i holem yet fasin blong bilif, hem i mas traem luksave sipos ol tok mo ol wok blong hem oli laenap wetem bilif we hem i stap talem se hem i holem. Be yumi mas lukaotgud se tingting we i pulum yumi blong jekem yumi bakegen i stret. Sipos no, maet yumi lukluk i go afsaed long Kristin kongregesen no long ol samting we oli no joen long fasin fren blong yumi wetem Jeova, blong traem faenemaot se yumi hu no blong traem faenem ansa long ol kwestin blong yumi. Hemia i westem taem, mo i save lidim yumi blong lusum rod fulwan long saed blong spirit. * !Yumi no wantem se ‘bilif blong yumi i foldaon’ olgeta!​—1 Timoti 1:​19.

Rong Tingting i Save Kasem Ol Kristin Tu

8, 9. (a) ?Moses i talem wanem blong soem filing blong hem se hem i no naf? (b) ?Jeova i mekem wanem blong givhan long Moses? (c) ?Ol promes blong Jeova oli mekem wanem long yu?

⁸ ?Sipos wan Kristin i harem se hem i no naf, hem i mas ting se i lusum rod finis? !Nogat! Hem i save haremgud bakegen sipos hem i tingbaot se ol filing olsem oli no jes kamaot long taem blong yumi. Long taem bifo tu, ol gudfala man blong God oli kasem ol filing ya. Tingbaot Moses, we hem i gat bigfala bilif, i onagud long God, mo i stap tru long God oltaem. God i givim wan wok long Moses, be Moses i harem se wok ya i bigwan tumas. Hem i talem long God se: “Mi mi olsem nating nomo.” (Eksodas 3:​11) Ating Moses i ting se, ‘!Mi mi no impoten!’ ‘!Mi mi no naf!’ Maet Moses i harem se hem i no naf from sam samting we oli kamaot long laef blong hem. Tingbaot we Moses i kamaot long wan laen we oli slef nomo. Antap long hemia, ol man Isrel oli no wantem hem. Mo tu, hem i no save givim gudfala toktok. (Eksodas 1:​13, 14; 2:​11-​14; 4:​10) Hem i wan man blong lukaot long sipsip nomo, hemia wan wok we ol man Ijip oli lukluk daon long hem. (Jenesis 46:34) !Maet ol samting ya nao oli mekem hem i ting se hem i no stret nating blong tekemaot ol man blong God long wok slef long Ijip!

⁹ Jeova i mekem tingting blong Moses i strong bakegen, taem hem i givim tu bigfala promes long hem, i se: “Mi bambae mi stap wetem yu. Mo taem yu tekem olgeta oli aot finis long Ijip oli kam, bambae yufala i mas kam mekem wosip long mi long  hil ya. Samting ya bambae i soemaot we mi mi sanem yu.” (Eksodas 3:​12) God i stap talem se bambae hem i stap wetem Moses oltaem, taswe Moses i no mas fraet. Mo tu, Jeova i stap soemaot se bambae hem i sua blong mekem ol man blong hem oli fri. Long ol handred yia we oli pas, God i mekem plante narafala promes olsem blong givhan long ol man blong hem. Olsem nao, taem ol man Isrel oli stap rere blong go insaed long Promes Lan, Jeova i pulum Moses blong talemaot long olgeta se: “Tingting blong yufala i mas strong, mo yufala i mas stanap strong oltaem. . . . [Jeova] i God blong yumi, mo hem i no save gowe long yufala samtaem. Bambae hem i no save lego yufala, oltaem bambae hem i stap wetem yufala.” (Dutronome 31:6) Jeova i mekem tingting blong Josua i strong tu, hem i talem long hem se: “Oltaem long laef blong yu, bambae i no gat man i save winim yu . . . bambae mi stap wetem yu oltaem, we neva bambae mi lego yu samtaem.” (Josua 1:5) Mo Jeova i promes long ol wanwan Kristin se: “Bambae mi mi no save livim yu yu stap yu wan. Bambae mi mi no save lego yu samtaem.” (Hibrus 13:5) !From we strong Man ya i stap givhan long yumi, yumi save praod blong stap olsem ol Kristin!

10, 11. ?Wanem samting i givhan long Livaet ya Asaf blong holem tingting se beswan rod i blong mekem wok blong Jeova?

¹⁰ Samwe long 500 yia afta long taem blong Moses, wan Livaet we i holemstrong long God, nem blong hem Asaf, i raetemdaon filing blong hem. Hem i no moa save sipos i gud blong folem stret fasin oltaem no nogat. Hem i stap traehad blong mekem wok blong God, nating se hem i kasem plante traem mo plante samting oli pulum hem. Be hem i luk se samfala we oli laf long God, oli stap kasem paoa mo oli gat plante samting. ?Nao Asaf i stat tingting olsem wanem? Hem i se: “Mi, klosap tingting blong mi i no moa stap long [God], bilif blong mi klosap i lus, from we taem mi luk ol man nogud ya we ol samting long laef blong olgeta oli stap ron gud nomo, mo oli stap praod from, mi mi jalus long olgeta.” Hem i no moa save nao se i gud blong mekem wosip long Jeova no nogat. Hem i tingting se: “Mi mi stap holem tingting blong mi i klin, mi no stap mekem sin, be hemia i blong nating nomo. Oltaem . . . mi mi harem nogud, i stat long moning, gogo i kasem long sapa.”​—Ol Sam 73:​2, 3, 13, 14.

¹¹ ?Asaf i mekem wanem blong winim tingting we i trabol? ?Hem i giaman se hem i no gat tingting olsem? Nogat. Hem i prea long God, i talemaot ol tingting blong hem, olsem yumi ridim long Ol Sam 73. Samting we i rili wekemap tingting blong Asaf, se hem i go long haos blong God, nao long ples ya hem i jes luksave se i no gat wan narafala rod moa, hem i mas gohed nomo blong holemstrong long God. Nao hem i kasem wan niufala tingting long saed blong wosip blong hem. Hem i luksave se Jeova i no laekem nating ol rabis fasin, mo se long stret taem blong hem, bambae i panisim ol man nogud. (Ol Sam 73:​17-​19) Taem Asaf i stretem tingting blong hem, hem i praod long blesing we hem i gat blong stap olsem wan man blong wok blong Jeova. Hem i talem long God se: “Oltaem mi mi stap klosap long yu, mo yu stap holem mi long han blong mi. Yu yu stap lidim mi long ol toktok blong yu, mo biaen, bambae yu ona long mi, yu tekem mi mi go stap wetem yu.” (Ol Sam 73:​23, 24) Yes, Asaf i praod bakegen long God blong hem.​—Ol Sam 34:2.

 Oli Savegud Se Oli Hu

12, 13. Tokbaot samfala long Baebol we oli praod blong stap olsem fren blong God.

¹² Wan rod blong ol Kristin oli savegud se oli hu, hemia blong luklukgud long bilif blong ol man we oli holemstrong long God, mo traem folem. Nating se ol man blong God oli kasem trabol long laef blong olgeta, be oli praod long fasin fren we oli gat wetem God. Tingbaot Josef, pikinini blong Jekob. Taem hem i yangfala nomo, ol brata blong hem oli mekem i nogud long hem. Oli salem hem i go long ol man blong narafala laen, nao olgeta oli tekem hem i go long Ijip blong wok slef. Long ples ya, hem i stap plante handred kilometa longwe long papa blong hem we i onagud long God, mo farawe long lav mo fasin givhan we i stap long hom blong hem. Long Ijip, i no gat wan man nating we i save givim advaes blong God long Josef. Hem i fesem sam trabol we oli traem bigwan ol gudfala fasin blong hem mo tras we hem i gat long God. Be Josef i no fogetem se hem i hu. Hem i tingbaot oltaem se hem i wan man blong God, mo hem i holemstrong long ol fasin we hem i save se oli stret. Nating se ol man raonabaot long hem oli no wosipim Jeova, be hem i praod se hem i wan man blong Jeova, mo hem i no fraet blong talemaot tingting blong hem.​—Jenesis 39:​7-​10.

¹³ Samwe long 800 yia afta long taem ya, ol soldia blong Siria oli holem wan smol gel Isrel, oli tekem hem i go blong wok olsem slef blong komanda blong ami blong Siria, we nem blong hem Neman. Smol gel ya tu i no fogetem se hem i hu, mo se hem i stap wosipim Jeova. Taem hem i gat janis, hem i givim wan gudfala witnes long saed blong Jeova. Hem i no fraet blong talemaot se Elisa i wan profet blong trufala God. (2 King 5:​1-​19) Plante yia afta long taem ya, i gat yangfala King Josaea. Nating se ol man raonabaot long hem oli mekem ol nogud fasin, be hem i putumap sam  plan blong stanemap trufala wosip bakegen, fiksimap haos blong God, mo lidim nesen blong Juda i gobak long Jeova. Yes, Josaea i praod long bilif mo wosip blong hem. (2 Kronikel, japta 34, 35) I gat Daniel mo trifala Hibru fren blong hem tu. Taem oli stap long Babilon, oli no fogetem se oli hu. Oltaem oli tingbaot se oli man blong Jeova, mo oli holemstrong long hem nating se samfala oli agensem olgeta, oli traem pulum olgeta blong mekem i no stret. I klia se olgeta ya oli praod blong stap olsem ol man blong Jeova.​—Daniel 1:​8-​20.

Yumi Mas Praod Blong Stap Olsem Kristin

14, 15. ?Olsem wanem yumi save soemaot se yumi praod blong stap olsem wan Kristin?

¹⁴ Ol man ya blong God oli stanap strong from we oli wokem fasin ya blong praod blong stap olsem fren blong God. ?Olsem wanem long yumi tede? ?Olsem wanem yumi save praod blong stap olsem wan Kristin?

¹⁵ Fastaem, yumi mas gat bigfala tangkiu from blesing ya blong stap olsem wan man blong Jeova mo karem nem blong hem, mo from we hem i glad long yumi mo i blesem yumi. Tingting blong God i no hafhaf long saed blong hu man we oli blong hem. Long taem blong aposol Pol, ol man oli gat ol defdefren tingting long saed blong wosip. Be Pol i raetem se: “Hae God, hem i save finis ol man blong hem.” (2 Timoti 2:​19; Namba 16:5) Jeova i praod long olgeta we oli “man blong hem.” Hem i talem se: “Taem wan man i kilim yufala, i olsem we man ya i kilim ae blong mi stret.” (Sekaraea 2:8) I klia se Jeova i lavem yumi. Taswe, yumi tu, yumi mas lavem hem tumas, mo lav ya i mas pulum yumi blong wantem fren wetem hem. Pol i talem se: “Man we i lavem God, God i savegud hem.”​—1 Korin 8:3.

16, 17. ?From wanem ol yangfala mo ol olfala Kristin oli save praod long ol samting long saed blong spirit we oli gat?

¹⁶ I gud se ol yangfala we oli gruap long ol Witnes famle, oli skelemgud sipos fasin fren blong olgeta wetem God i stap kam moa dip. Olsem nao, bambae oli luk se oli save kam praod moa blong stap olsem ol Kristin. Olgeta oli no save dipen nomo long bilif blong papa mama blong olgeta. Pol i tokbaot ol man blong God wanwan, i se: “Masta blong hem nomo i save talem se hem i mekem gudfala wok no nogat.” Nao Pol i gohed se: “Bambae yumi evriwan i mas talemaot olgeta fasin blong yumi long fes blong God.” (Rom 14:​4, 12) I klia se, sipos bilif blong wan yangfala i hafhaf from we hem i folem tingting blong famle blong hem nomo, hem i no save wokem wan gudfala fasin fren wetem Jeova we bambae i stap olwe.

¹⁷ Long ol yia we oli pas, i gat wan longfala laen blong ol witnes blong Jeova, stat long taem blong gudfala man blong bilif Ebel​—we i laef 6,000 yia bifo—​kam kasem “bigfala kampani” blong ol Witnes tede, mo go kasem bigfala hip blong ol man blong Jeova we bambae oli laef olwe. (Revelesen 7:​9, NW; Hibrus 11:4) Yumi ya, yumi ol laswan man blong joen long laen ya. !Ol samting long saed blong spirit we oli pasem i kam long yumi oli nambawan!

18. ?Olsem wanem ol rul we yumi folem mo ol samting we yumi tinghae long olgeta oli mekem se yumi defren long ol man blong wol?

¹⁸ Samting we i pruvum se yumi Kristin, hemia ol gudfala fasin blong yumi, ol samting we yumi tinghae long hem, mo ol rul we yumi folem. Hemia nao “Rod blong Masta,” rod ya nomo blong kasem wan gudfala laef mo mekem God i glad. (Ol Wok 9:2; Efesas 4:​22-​24) !Ol Kristin oli “traem olgeta samting fastaem” mo oli “holemstrong ol samting we oli gud”! (1 Tesalonaeka 5:​21) Yumi luksave klia se ol Kristin oli defren olgeta long ol man blong wol we oli stap longwe long God. Jeova i soemaot klia olsem wanem trufala wosip i defren long giaman wosip. Hem i pulum profet Malakae blong talemaot se: “Bambae yufala i save luk bakegen  wanem nao i stap mekem stret man i defren long rabis man, mo wanem nao i stap mekem man blong wok blong God i defren long man we i no wok blong God.”​—Malakae 3:​18, NW.

19. ?Ol trufala Kristin oli no save kam olsem wanem?

¹⁹ Yes, wol ya we yumi stap long hem i save mekem yumi konfius. Taswe i impoten we yumi tok flas from ol samting we Jeova i mekem. ?Wanem i save givhan long yumi blong praod long God blong yumi, mo blong holemtaet ol fasin we oli pruvum se yumi Kristin? Nekis stadi i givim gudfala advaes. Taem yu tingting gud long ol advaes ya, yu save sua long wan samting, hemia se: Ol trufala Kristin oli no save kam olsem we oli no moa kea long wosip blong olgeta.

[Futnot]

?Yu Yu Tingbaot?

• ?Olsem wanem ol Kristin oli save ‘tok flas from ol samting we Jeova i mekem’?

• ?Eksampol blong Moses mo Asaf i tijim yu long wanem samting?

• ?Hu ya samfala long Baebol we oli praod blong mekem wok blong God?

• ?Olsem wanem yumi soemaot se yumi praod blong stap olsem wan Kristin?

[Kwestin]

[Tok blong pija long pej 14]

Blong smoltaem, Moses i harem se hem i no naf

[Tok blong pija long pej 15]

Plante man blong Jeova bifo oli praod blong stap defren long ol narafala man