Gotru Long Ol Traem Wetem Strong Bilif

LONG stat blong Epril 1951, strongfala gavman blong Soviet Yunion i girap wantaem i agensem wan grup blong ol Kristin we oli no gat fol, hemia ol Witnes blong Jeova, we oli stap long Wes blong Soviet Yunion. Oli putum plante taosen famle​—wetem ol smosmol pikinini, ol woman we oli gat bel, mo ol olfala—​oli go long ol bigfala bokis we tren i pulum. Oli harem nogud blong 20 dei insaed long ol bokis ya gogo tren i kasem Saebiria. Kot i givim oda se oli mas stap blong olwe long Saebiria, wan ples we i had blong laef long hem.

Long Epril 2001, blong makem namba 50 aniveseri blong taem ya, wan niufala vidio kaset i kamaot long Moscow. Hem i tokbaot ol trabol we ol Witnes blong Jeova oli kasem long ol 50 yia we oli stap aninit long rul blong Soviet Yunion. Long vidio kaset ya, ol man blong raetem histri wetem ol man we oli bin laef long taem ya, oli tokbaot olsem wanem ol Witnes oli gotru long ol trabol ya mo olsem wanem oli kam moa plante nating se oli kasem hadtaem.

Tede plante milian man long Rasia mo long ol narafala ples long wol oli lukluk finis vidio kaset ya, Faithful Under Trials​—Jehovah’s Witnesses in the Soviet Union, mo olgeta wetem ol man blong raetem histri oli talem ol gudfala toktok long saed blong kaset ya. Ol toktok we oli kam biaen oli kamaot long tu tija blong Rasia we tufala i laef long ol eria we bighaf blong ol famle blong ol Witnes oli bin stap long hem afta we gavman i muvumaot olgeta:

“Mi mi laekem tumas vidio kaset ya. Fastaem finis, mi laekem ol man blong skul blong yufala, be afta we mi wajem vidio kaset ya, mi mi laekem yufala moa. !Yufala i wokem gud vidio kaset ya! Mi rili laekem fasin ya we yufala i soemaot ol wanwan man mo yufala i tokbaot samting we i hapen long olgeta. Nating se mi mi skul Otodoks mo mi no gat tingting blong jenisim skul blong mi, be mi laekem tumas ol Witnes blong Jeova. Mi wantem se mifala i gat vidio kaset ya long yunivesiti blong mifala. Mi mo ol narafala tija, mifala i tekem desisen blong soemaot kaset ya long ol studen mo blong putum vidio kaset ya insaed long program blong skul.”​—Profesa Sergei Nikolayevich Rubtsov, tija blong histri long Stet Pedagogical Yunivesiti, long Irkutsk, Rasia.

“Mi mi glad taem vidio kaset ya i kamaot. Taem oli mekem wan sinema blong tokbaot wan grup blong man we i kasem trabol from ol narafala, i no isi oltaem blong talemaot ol trufala samting we i hapen long fasin we i stret mo i gud. Be yufala i mekem olsem. Plis, yufala i no fraet blong karem ol niufala vidio kaset blong yufala i kam long mi.”​—Profesa Sergei Ilyich Kuznetsov, tija blong histri long Stet Yunivesiti blong Irkutsk, long Rasia.

Ol Witnes blong Jeova we oli stap long Saebiria tu oli rili laekem vidio kaset ya. Sam long olgeta oli talemaot filing blong olgeta, oli se:

“Taem ol trabol ya oli kamaot, plante man long Rasia oli gat rong tingting long saed blong wok blong ol Witnes blong Jeova. Be afta we oli wajem kaset ya, oli kasem save se skul blong yumi i no jes  wan krangke grup olbaot nomo, olsem we oli bin tingting fastaem. Samfala we oli jes kam Witnes, oli talem se: ‘!Mifala i no save nating se mifala i stap laef mo wok klosap long ol Kristin brata we oli bin fesem plante trabol olsem!’ Afta we wan Witnes i wajem kaset ya, hem i wantem kam wan paenia we i mekem wok blong prij fultaem.”​—Anna Vovchuk, we oli bin sanem hem i go long Saebiria.

“Taem oli soem ol sekret polis ya we oli go noknok long haos blong ol Witnes, mi mi seksek. I sem mak taem oli kam noknok long doa blong mifala, mo mi mi tingbaot mama blong mi we i talem se: ‘Ating i gat wan faea samples.’ Be vidio kaset ya i mekem mi mi tingbaot tu se i gat plante Witnes we oli bin safa moa i bitim mi. Olgeta save ya oli givim bigfala paoa long yumi mo oli mekem yumi glad blong gohed long wok blong Jeova.”​—Stepan Vovchuk, we oli bin sanem hem i go long Saebiria.

“Mi mi pikinini boe blong wan Witnes we oli bin sanem hem i go long Saebiria. Taswe, mi bin ting se mi mi save plante samting finis we oli kamaot long taem ya. Be afta we mi wajem kaset vidio ya, mi luksave se mi no save wan samting nating. Taem mi lesin long olgeta we oli ansa long ol kwestin long vidio kaset ya, wota i fulap long ae blong mi. Naoia long tingting blong mi, ol ekspiriens ya oli no jes ol stori nomo, be oli ol trufala samting we i hapen long laef blong olgeta. Vidio kaset ya i mekem fasin fren blong mi wetem God i kam strong moa mo i givhan long mi blong mi rere blong stanap strong long ol hadtaem we bambae oli kamaot long fiuja.”​—Vladimir Kovash, Irkutsk.

“Vidio kaset ya i gat moa paoa long mi, i bitim eni stori we oli raetem long buk. Taem mi wajem mo mi harem ol brata we oli ansa long ol kwestin, mi harem olsem se mi tu mi kasem ol traem ya wantaem wetem olgeta. Stori blong brata ya we i stap long presin mo i stap droem pija long ol kad blong sanem i go long tufala smol gel blong hem, i pusum mi blong mi traem mekem trutok blong Baebol i kasem hat blong ol pikinini blong mi. !Tangkiu! Vidio kaset ya i mekem ol Witnes blong Jeova long Rasia oli haremsave moa se oli haf blong kampani blong ol man blong Jeova we i stap long olgeta ples blong wol.”​—Tatyana Kalina, Irkutsk.

“Wan waes tok i talem se, ‘Sipos yu lukluk samting wan taem nomo, be hemia i moa gud i bitim we yu harem samting wan handred taem.’ Tok ya i stretgud long vidio kaset ya. !Hem i klia, i soemaot ol samting we oli rili hapen, mo hem i joen wetem laef blong yumi! Afta we mi wajem kaset ya, mi tekem taem blong tingting long hem. Kaset ya i givhan long mi blong mi tingting dip long laef blong ol Witnes ya long Saebiria. Naoia, taem mi skelem laef blong mi wetem laef blong olgeta, mi mi jenisim tingting blong mi long saed blong ol trabol long laef blong mi.”​—Lidia Beda, Irkutsk.

Vidio kaset ya Faithful Under Trials i bin kamaot finis long 25 lanwis, mo olbaot long wol ol man oli glad long hem. * Oli bin soemaot vidio kaset ya long televisin long St. Petersburg, Omsk, mo long sam narafala taon long Rasia, wetem sam taon blong Yukren olsem Vynnytsya, Kerch, Melitopol mo long eria long Lviv. Mo tu, ol man blong jekem ol vidio kaset long ol defren kantri, oli givim sam praes from video kaset ya.

Samting we i mekem se vidio kaset ya i gat bigfala paoa long ol man we oli lukluk, hemia eksampol blong ol taosen man ya we oli olsem ol narafala man nomo, be oli soemaot se oli no fraet nating mo se oli strong gud long saed blong spirit, tru long ol yia we ol narafala oli agensem olgeta. Tru ya, ol Witnes blong Jeova long Soviet Yunion oli pruvum gud se oli save gotru long ol traem wetem strong bilif. Sipos yu wantem lukluk vidio kaset ya, ol Witnes blong Jeova oli glad blong soem long yu. Plis yu toktok wetem wan long olgeta long ples blong yu.

[Futnot]

[Foto Credit Line blong pija long pej 8]

Stalin: U.S. Army photo

[Foto Credit Line blong pija long pej 9]

Stalin: U.S. Army photo