Gudfala Fasin i “Leftemap Tok Blong God”

YANGFALA Maria i blong Kransnoyarsk long Rasia. Hem i singsing gud tumas mekem se tija blong hem i putum hem blong i joenem wan kores blong skul. Smoltaem afta, wetem respek, Maria i go luk wan long ol tija blong hem blong talem se hem i no save joen long sam singsing. ?From wanem? From we sam singsing oli tokbaot sam bilif we oli go agensem wanem we hem i lanem long Baebol. Tija blong hem i sapraes tumas mo i askem long hem se, ‘?Wanem i rong blong givim glori long God long wan singsing?’

Maria i ridim sam vas blong Baebol blong soem from wanem hem i no wantem sing long wan singsing we i tokbaot God olsem se hem i wan Triniti. Mo hem i eksplenem se God mo Jisas, tufala i no sem mak, mo se tabu spirit hemia paoa blong God. (Matiu 26:39; Jon 14:28; Ol Wok 4:​31) Maria i talem se: “Samting ya i no spolem fasin fren blong mi wetem tija blong mi. Long skul blong mifala, mifala i gat ol gudfala tija. Oli wantem blong mifala i fri blong talemaot tingting blong mifala.”

Long ful yia blong skul, ol tija mo ol fren blong hem oli soem respek long hem. Maria i talem se: “Ol rul blong Baebol oli halpem mi long laef blong mi. Long en blong yia, mi kasem wan praes from fasin blong tok tru mo blong gat gudfala fasin, mo long semtaem, papa mama blong mi tu oli kasem wan leta blong skul we i blong talem tangkiu long tufala se tufala i tijim gud gel blong tufala.”

Maria i baptaes long Ogis 18, 2001. Hem i talem se: “!Mi mi hapi se mi save mekem wok blong nambawan God ya Jeova!” Ol yangfala Witnes blong Jeova long ful wol oli folem ol tok blong Taetas 2:10 we i talem se: “Long olgeta samting we oli mekem, . . . oli stap leftemap tok blong God ya we i sevem yumi.”

[Tok blong pija long pej 32]

Maria mo papa mama blong hem afta we hem i baptaes

[Tok blong pija long pej 32]

Leta blong soem tangkiu long papa mama mo setifiket we Maria i kasem from gudfala fasin blong hem