Nating Se Wol Ya i Raf, Yumi Save Gat Wan Hapi Mared
Nating Se Wol Ya i Raf, Yumi Save Gat Wan Hapi Mared
“Yufala i mas lavem ol man, from we fasin ya blong lavem man, hem i save joenemgud olgeta samting, blong oli kam wan.”—KOLOSI 3:14.
1, 2. (a) ?Wanem samting insaed long Kristin kongregesen we i leftemap tingting blong yumi? (b) ?Wan mared we i hapi, hem i olsem wanem?
?TAEM yu lukluk raon long Kristin kongregesen, yu yu haremgud blong luk fulap mared man mo woman we oli bin stap tru long olgeta blong 10, 20, no 30 yia, no longtaem moa? !Yes! Olgeta ya oli bin stap tru long olgeta long ol gudtaem mo ol hadtaem tu.—Jenesis 2:24.
2 Bighaf blong ol man mo woman ya, bambae oli talem se oli bin fesem sam hadtaem long mared blong olgeta. Wan woman i tokbaot mared i se: “Wan hapi mared i no min se tufala i no kasem trabol mo wari samtaem. I gat gudtaem mo i gat hadtaem long mared . . . Be olgeta we oli gat wan hapi mared oli faenem rod . . . blong mekem mared blong olgeta i stap gud, nating se laef long wol ya tede [i fulap long trabol].” Ol man mo woman we oli gat wan hapi mared oli lanem blong gotru long ol hadtaem mo wari we i kamaot from ol trabol blong laef tede, antap moa sipos oli gat pikinini. From ol samting we ol man mo woman olsem oli bin fesem, oli lanem se trufala lav “i no save finis samtaem.”—1 Korin 13:8.
3. ?Ol namba long saed blong mared mo divos oli soemaot wanem? ?Wanem tufala kwestin i stanap?
3 Be plante milian mared man mo woman oli divos. Wan ripot i talem se: “Stret haf blong olgeta man mo woman we oli mared long Yunaeted Stet tede bambae oli divos. Mo stret haf blong olgeta [divos ya] bambae oli hapen long ol faswan yia blong mared go kasem 7.8 yia afta long mared . . . Long olgeta ya we oli divos, bighaf (75 pesen) bambae oli mared long wan narafala bakegen, mo 60 pesen blong olgeta bambae oli divos bakegen.” Long sam kantri we fastaem i no gat plante divos, naoia samting ya i jenis. Olsem nao, long Japan, long ol yia we oli jes pas, namba blong ol divos i dabolem namba blong bifo. ?Wanem trabol we i mekem samting ya i kamaot, mo we yumi save luk insaed long Kristin kongregesen tu? ?I nidim wanem blong mekem wan hapi mared, mo blong winim ol traehad blong Setan blong spolem mared?
Lukaot Long Ol Trap
4. ?Wanem sam samting we oli save mekem trabol long mared?
4 Tok blong God i givhan long yumi blong kasem save long ol samting we i save mekem trabol long mared. Tingbaot tok blong aposol Pol long saed blong ol fasin we bambae oli kamaot long ol las dei. Hem i se: ‘Laef long wol ya bambae i kam strong tumas. Bambae ol man oli save tingbaot olgeta nomo, oli wantem mane tumas, oli tok flas, tingting blong olgeta i go antap tumas, mo oli save tok nogud long ol man. Bambae oli no save ona long papa mo mama blong olgeta, oli no talem tangkiu, oli no save tingbaot God [“oli no gat fasin blong stap tru,” NW ], oli no gat sore long man, oli mekem i strong tumas oltaem long ol narafala man, oli spolem nem blong narafala man, oli man blong lusum hed, oli wael olgeta, oli no wantem ol fasin we i gud, oli agens long hem. Bambae oli spolem ol fren blong olgeta, oli no kea, oli praod tumas, oli wantem tumas ol samting we oli stap harem gud long hem, i winim we oli stap lavem God. Long fes blong ol man, bambae oli stap folem fasin blong Kristin man, be oli no wantem paoa blong God nating long laef blong olgeta. Bambae yu no go klosap nating long ol man olsem.’—2 Timoti 3:1-5.
5. ?From wanem man no woman we ‘i tingbaot hem wan nomo’ i save spolem mared blong hem? ?Baebol i givim wanem advaes long saed ya?
5 Taem yumi skelemgud ol tok ya blong Pol, yumi luksave se plante long ol fasin we hem i tokbaot oli save spolem mared. Olsem nao, olgeta we ‘oli tingbaot olgeta nomo,’ hemia i minim olgeta we oli no save tingbaot narafala be oli tingbaot samting we olgeta nomo oli wantem. Hasban no waef we i tingbaot hem wan nomo, hem i wantem se narawan i folem tingting blong hem oltaem. Hem i no save jenisim tingting blong hem no lego prapa tingting blong hem. ?Olsem wanem? ?Fasin olsem bambae i mekem mared i hapi? !Nogat! Aposol Pol i givim waes advaes long ol Kristin, wetem ol mared man mo woman tu, hem i se: “I nogud wan long yufala i tok flas, no i mekem wan samting blong leftemap hem nomo. Yufala i mas mekem tingting blong yufala i stap daon, mo yufala i mas luk ol narafala man olsem we oli gud moa long yufala. Mo yufala evriwan i mas givgivhan long yufala long laef blong yufala. I nogud wan man i stap lukaot long laef blong hem nomo.”—Filipae 2:3, 4.
6. ?Olsem wanem fasin blong laekem mane tumas i save spolem mared?
6 Fasin blong laekem mane tumas, i save mekem se hasban mo waef i no moa joengud. Pol i givim woning se: “Ol man ya we oli wantem kam rijman, be oltaem, ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta. Nao fasin ya blong wantem evri samting, hem i save mekem olgeta oli foldaon we laef blong olgeta i kam nogud olgeta. Fasin blong laekem mane tumas, hem i stamba blong olgeta fasin nogud. Mo i gat sam man we oli strong blong folem fasin ya, nao oli gowe finis long fasin blong bilif. Mo oli stap mekem ol samting we olgeta tu oli harem nogud tumas from.” (1 Timoti 6:9, 10) Sore tumas, be tok ya blong Pol i kamtru finis long plante mared tede. Plante man mo woman we oli wantem tumas blong kam rijman, oli no moa spenem taem blong lukaotgud long hasban no waef blong olgeta mo mekem hem i haremgud long filing blong hem olsem yumi evriwan i nidim, mo oli no moa tektaem blong storian tugeta wetem lav.
7. ?Wanem fasin i lidim samfala blong oli no moa stap tru long hasban no waef blong olgeta?
7 Pol i talem tu se, long ol las dei ya, samfala bambae oli ‘no gat fasin blong stap tru, oli no gat sore, mo oli mekem i strong tumas oltaem long ol narafala.’ Promes blong mared i wan promes we man mo woman i mas tinghevi long hem mo i mas pulum tufala blong stap tugeta olwe, i no blong seraot. (Malakae 2:14-16) Be samfala oli stat laekem wan narafala man no woman. Wan woman we hem i gat bitim 30 yia, hasban blong hem i lego hem. Woman ya i talem se longtaem finis, man blong hem i gat fasin blong fren tumas wetem ol narafala woman mo soemaot filing long olgeta. Man ya i no luksave se fasin ya i no stret long wan mared man. Taem woman blong hem i luk samting ya, hem i harem nogud tumas, nao long kaen fasin, hem i traem givim woning long man blong hem se hem i save kasem trabol. Be man ya i gohed nomo, nao hem i foldaon long rabis fasin ya blong slip wetem narafala woman. Hem i kasem woning, be hem i no wantem harem. Ale, wantaem nomo, hem i foldaon long trap.—Ol Proveb 6:27-29.
8. ?Wanem i save lidim man blong slip wetem narafala woman?
8 !Baebol i givim klia woning se man i no mas slip wetem narafala woman! “Man we i go slip wetem woman blong narafala man, hem i no gat hed nating. Fasin ya i blong spolem hem nomo.” (Ol Proveb 6:32) Klosap oltaem, man we i mekem rabis fasin, i no girap wantaem nomo mo mekem fasin ya. Nogat. Jemes we i raetem wan haf blong Baebol, i talem se klosap oltaem, man we i mekem wan sin olsem slip wetem narafala woman, hem i tingting long samting ya fastaem, gogo hem i wantem tumas. (Jemes 1:14, 15) Man we i mekem nogud, sloslo hem i no moa stap tru long woman blong hem olsem hem i promes blong mekem long ful laef blong hem. Jisas i talem se: “Yufala i harem finis we ol tija oli talem bifo se, ‘Yufala we i mared, bambae yufala i no mas go slip wetem narafala woman.’ Be mi mi talem long yufala, se man we i luk wan woman, nao i wantem hem tumas, i olsem we hem i slip wetem woman ya finis.”—Matiu 5:27, 28.
9. ?Wanem waes advaes i stap long Ol Proveb 5:18-20?
9 Taswe, rod we i waes mo we i save lidim man blong stap tru long woman blong hem, hemia rod we buk blong Ol Proveb i talem, se: “Oltaem yu mas lavem woman blong yu, mo oltaem yu mas harem gud blong stap wetem hem. Hem i naes we i naes, mo fasin blong hem we i muf blong wokem ol samting, i gud we i gud. Yu mas letem hem nomo i mekem yu yu harem gud oltaem. Hem i lavem yu tumas, mo yu mas letem fasin ya blong hem i fasem yu long hem. Pikinini blong mi. I krangke blong yu go lukaot narafala woman. Mo i krangke blong yu ting se woman blong narafala man i gud moa, i winim woman blong yu.”—Ol Proveb 5:18-20.
No Hareap Blong Mared
10. ?From wanem i waes blong tektaem blong savegud man no woman we yu yu wantem mared wetem hem?
10 Trabol i save kamaot taem man mo woman tufala i hareap tumas blong mared. Maet tufala i yang tumas, mo tufala i no gat plante save long laef. Maet tufala i no tektaem blong savegud tufala—ol samting we tufala i laekem mo ol samting we tufala i no laekem, ol mak we tufala i wantem kasem long laef, mo wanem kaen famle we tufala i gruap long hem. I waes blong gat longfala tingting mo tektaem blong save man no woman we yu yu wantem mared wetem hem. Tingbaot Jekob, pikinini blong Aesak. Hem i mas wok seven yia long palika blong hem, nao man ya i jes letem hem i tekem gel blong hem Rejel. Jekob i naf blong wet seven yia from we ol filing blong hem oli stanap long trufala lav, i no long ol samting we bodi blong hem nomo i wantem.—Jenesis 29:20-30.
11. (a) ?Mared i joenem wan man mo woman we tufala i olsem wanem? (b) ?From wanem i waes blong tufala we i mared i lukaotgud long ol toktok blong tufala?
11 Mared i no wan fasin fren we i stanap long filing blong lav nomo. Mared i joenem wan man mo woman we tufala i kamaot long tu defren kaen famle, tufala i gat defdefren fasin, ol filing blong tufala oli no sem mak, mo plante taem tufala i no gat sem edukesen. Samtaem tufala i kamaot long defdefren kalja, mo tufala i toktok defdefren lanwis. Sipos tufala i no gat ol problem ya, be tufala i mas gat defdefren tingting long sam samting. Wan haf blong mared, hemia taem tufala i talemaot ol defdefren tingting ya. Tufala i save tok daonem narawan mo komplen oltaem, no tufala i save talem ol gudfala tok we i leftemap tingting mo givhan long narawan. Yes, ol tok blong yumi i save spolem hasban no waef blong yumi no i save mekem hem i haremgud. Man no woman we i no lukaotgud long tok blong hem, i save mekem bigfala trabol long mared blong hem.—Ol Proveb 12:18; 15:1, 2; 16:24; 21:9; 31:26.
12, 13. ?Wanem stret tingting we yumi mas gat long saed blong mared?
12 From samting ya, i waes blong tektaem blong savegud man no woman we yu yu wantem mared wetem hem. Wan Kristin woman we hem i mared longtaem, i talem se: “Taem yu stap skelem wan man no woman we yu wantem mared wetem hem, tingbaot ten impoten samting we yu wantem luk long hem. Sipos yu faenem seven nomo, i gud blong askem se, ‘?Mi mi rere blong fogivim hem from tri narafala fasin ya we hem i no gat? ?Mi mi save laef evri dei wetem wan man we i no gat trifala fasin ya?’ Sipos yu yu no sua, i moagud we yu stop smoltaem mo tingting bakegen.” Be yu no mas bitim mak tu. Sipos yu wantem mared, yu mas save se bambae yu no save faenem wan waef no hasban we i stretgud olgeta. !Man no woman we bambae i mared long yu, hem tu i no faenem wan we i stretgud olgeta!—Luk 6:41.
13 Long mared, yu yu mas rere blong lego sam samting we yu wan yu wantem. Pol i talem olsemia, i se: “Mi mi wantem tumas we bambae i no gat wan samting i mekem yufala i harem nogud, yufala i stap wari. Man we i no mared, hem i stap tingbaot moa long ol wok blong Masta blong yumi. Hem i stap lukaot rod blong mekem Masta ya blong yumi i glad. Be man we i mared finis, hem i stap tingbaot moa long ol bisnes blong wol. Hem i stap lukaot rod blong mekem woman blong hem i glad, nao tingting blong hem i seraot long tu rod. Mo long sem fasin, woman we i no mared, no yang gel, hem i stap tingbaot moa long ol wok blong Masta blong yumi. Hem i wantem we bodi blong hem mo tingting blong hem i klin gud, i blong God. Be woman we i mared finis, hem i stap tingbaot moa long ol bisnes blong wol. Hem i stap lukaot rod blong mekem man blong hem i glad.”—1 Korin 7:32-34.
?From Wanem Sam Mared Oli Finis?
14, 15. ?Wanem i save mekem se mared i no moa stanap strong?
14 I no longtaem i pas, wan Kristin woman i harem nogud tumas taem man blong hem i divosem hem afta we tufala i bin mared blong 12 yia, nao man ya i go stap wetem narafala woman. ?Kristin woman ya i bin luk sam saen blong trabol ya bifo we tufala i seraot? Hem i talem se: “Hem i no moa prea. Hem i mekem eskius oltaem blong no kam long miting mo blong no prij. Hem i talem se hem i taed mo i bisi tumas, ale hem i no save spenem taem wetem mi. Hem i no moa storian wetem mi. Hem i no moa tokbaot ol samting long saed blong spirit wetem mi. Sore tumas, hem i kam olsem wan narafala man, hem i no semfala man we mi mi mared long hem fastaem.”
15 Plante narafala oli talem se oli luk ol semfala saen blong trabol ya. Man blong olgeta i no moa stadi Baebol hem wan, i no moa prea, mo i no moa go long ol Kristin miting. Hemia i min se, plante man we oli lego woman blong olgeta oli letem fasin fren blong olgeta wetem Jeova i kam slak. From samting ya, oli no moa lukluk klia ol samting long saed blong spirit. Oli no moa tingbaot Jeova olsem wan God we i laef. Oli no moa ting se niufala wol blong stret fasin i wan trufala samting. Sam long olgeta oli kam slak long saed blong spirit bifo we oli stat laekem wan narafala woman.—Hibrus 10:38, 39; 11:6; 2 Pita 3:13, 14.
16. ?Wanem i save mekem se mared i stanap strong?
16 Wan man mo woman we mared blong tufala i hapi, tufala i talem ol tok we i defren olgeta. Tufala i talem se mared blong tufala i hapi from we tufala i joen tugeta blong mekem evri samting long saed blong spirit. Tufala i prea tugeta mo stadi tugeta. Hasban i talem se: “Mitufala i ridim Baebol tugeta. Mitufala i prij tugeta. Mitufala i laekem tumas blong mekem ol samting tugeta.” Eksampol blong tufala i soemaot wan impoten samting: Sipos yumi holemtaet wan gudfala fasin fren wetem Jeova, samting ya bambae i givhan bigwan blong mekem mared blong yumi i stanap strong.
Stret Tingting Mo Storian Tugeta Oltaem
17. (a) ?Wanem tu samting we i save givhan blong mekem mared i hapi? (b) ?Pol i talem se Kristin lav i olsem wanem?
17 Tu narafala samting we i save mekem se mared i hapi: Kristin lav mo storian tugeta oltaem. Taem filing blong lav i strong, i isi blong tufala i no moa luk ol slak fasin blong tufala. Taem tufala i jes mared, maet tufala i ting se evri samting bambae i nambawan oltaem, olsem oli bin ridim long ol stori buk blong lav, no oli bin luk long ol sinema. Be sloslo, tufala i luksave se mared i no olsem. Nao ol smosmol mastik mo slak fasin blong tufala oli save kam ol bigfala problem. Sipos samting ya i hapen long tu Kristin, tufala i mas soemaot ol frut blong tabu spirit, we wan long olgeta hemia lav. (Galesia 5:22, 23) Tru ya, lav i gat bigfala paoa—hemia i no ol filing blong lav nomo, be trufala Kristin lav. Pol i eksplenem se man we i gat Kristin lav ya, “tingting blong hem i longfala, mo hem i gat sore long man. . . . [Hem] i no save tingbaot hem nomo. Hem i no save kros kwik, mo i no save stap kros longtaem. . . . Hem i no save letem wan samting i daonem tingting blong hem, oltaem hem i stap bilif strong long God, mo i stap putum tingting blong hem i strong long hem. Maet bigfala trabol i save kasem hem, be tingting blong hem i no save foldaon.” (1 Korin 13:4-7) I klia se, man we i gat trufala lav i save fogivim narafala from ol smosmol mastik blong hem. Hem i no ting se narawan i mas stret gud olgeta.—Ol Proveb 10:12.
18. ?Olsem wanem fasin blong storian tugeta oltaem i save mekem mared i stanap strong?
18 I impoten tu blong storian tugeta oltaem. Nating se tufala i mared hamas yia, be tufala i mas storian tugeta oltaem mo tufala i mas lesingud long tufala. Wan hasban i talem se: “Mitufala i no haedem ol filing blong mitufala, mitufala i tokbaot olgeta long kaen fasin.” Taem ol yia oli stap pas, hasban mo waef tufala i lanem blong lesingud, be i no long ol toktok nomo we narawan i talem. Tufala i traem luksave ol tingting blong narawan tu. Hemia i min se, taem ol yia oli stap pas, man mo woman we mared blong tufala i hapi, tufala i luksave ol tingting mo filing we narawan i no save talemaot. Sam woman oli komplen se hasban blong olgeta i no stap lesin long olgeta. Sam man oli komplen se woman blong olgeta i wantem storian long taem we oli bisi no we i no stret long olgeta. Blong holem fasin ya blong storiangud tugeta oltaem, tufala i mas gat sore mo kasem save long filing blong narawan. Gudfala fasin ya blong storian oltaem i givhan long tufala evriwan.—Jemes 1:19.
19. (a) ?From wanem i no isi blong talem sore from wan mastik? (b) ?Wanem bambae i pulum yumi blong talem sore?
19 Blong holem gudfala fasin ya blong storian tugeta, tufala i mas rere blong talem sore from ol mastik we tufala i mekem. Samting ya i no isi. Blong mekem olsem, tufala i mas gat tingtingdaon. !Sipos tufala i talem sore, fasin ya i save givhan bigwan blong mekem mared i hapi! Taem tok ya i kamaot long hat, hem i save finisim wan trabol, mo i save blokem wan bigfala rao we maet i kamaot long fiuja from trabol ya. Mo tu, tok ya blong talem sore i save mekem rod blong tufala i fofogivim tufala tru, mo blong tufala i stretem problem. Pol i talem se: “Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yumi. Mo wetem ol fasin ya, yufala i mas lavem ol man, from we fasin ya blong lavem man, hem i save joenemgud olgeta samting, blong oli kam wan.”—Kolosi 3:13, 14.
20. ?Wan Kristin i mas mekem olsem wanem long hasban no waef blong hem taem tufala i stap tufala nomo mo taem tufala i stap wetem ol narafala?
20 Wan narafala impoten samting insaed long mared, hemia se tufala i mas givgivhan long tufala. Kristin hasban mo waef tufala i mas trastem tufala, tufala i mas dipen long tufala. Wan i no mas spolem narawan no mekem sam narafala fasin we oli daonem strong tingting blong narawan mo mekem hem i ting nating long hem wan. Yumi mas talem ol gudfala toktok blong presem hasban no waef blong yumi, yumi no mas talem ol strong tok blong agensem hem. (Ol Proveb 31:28b) Yumi neva mas mekem hasban no waef blong yumi i sem, maet taem yumi no tingting gud nao yumi talem sam tok plei we oli stikim no spolem hem. (Kolosi 4:6) Fasin blong tufala blong givgivhan long tufala i save kam strong moa taem tufala i talem ol tok oltaem blong soem se tufala i lavlavem tufala. Maet wan i tajem narawan nomo long kaen fasin no i talem wan gudfala tok long kwaet fasin, be hemia i olsem we i stap talem long narawan ya se: “Mi mi lavem yu yet. Mi mi glad we yu yu stap wetem mi.” Nating se wol ya i raf, ol samting ya oli save mekem tufala i frengud mo mekem mared blong tufala i hapi. I gat plante narafala samting tu, mo nekis stadi bambae i givim moa advaes blong Baebol we i save mekem mared i hapi. *
[Futnot]
^ Blong kasem moa save, lukluk buk ya Spesel Rod Blong Mekem Famle i Hapi, we ol Witnes blong Jeova i wokem.
?Yu Yu Save Eksplenem?
• ?Wanem sam samting we oli save mekem trabol long mared?
• ?From wanem i no waes blong hareap tumas blong mared?
• ?Ol gudfala fasin long saed blong spirit oli save mekem wanem long wan mared?
• ?Wanem sam samting we oli givhan blong mekem mared i stapgud?
[Kwestin]
[Tok blong pija long pej 12]
Mared i no wan fasin fren we i stanap long filing blong lav nomo
[Tok blong pija long pej 14]
Gudfala fasin fren wetem Jeova i save givhan long ol man mo woman blong mekem mared blong olgeta i hapi