Tok Blong Jeova i Wan Samting We i Laef

Ol Bigfala Poen Long Buk Blong Rut

HEMIA wan laef stori we i rili tajem hat blong yumi mo i tokbaot fasin blong tu woman we tufala i stap tru long tufala. Hem i wan stori blong soemaot fasin blong gat tangkiu long Jeova God mo blong trastem ol plan blong hem. Stori ya i makem klia, fasin blong Jeova blong soem bigfala intres long laen blong Mesaea. Hem i wan nambawan stori long saed blong glad mo sore blong wan famle. Buk blong Rut i tokbaot ol samting ya wetem plante narafala samting moa.

Buk ya blong Rut i tokbaot ol samting we oli hapen blong klosap 11 yia, “long taem ya we ol laen blong Isrel oli stap long han blong ol haeman [jaj] blong olgeta nomo.” (Rut 1:1) Ol samting we buk blong Rut i tokbaot, ating oli hapen long stat blong taem blong ol jaj, from we Boas ya, we long stori blong Rut hem i gat plante graon, hem i boe blong Rehab we i laef long taem blong Josua. (Josua 2:​1, 2; Rut 2:1; Matiu 1:5) Profet Samuel nao i raetem stori ya long ol yia 1090 B.K.T. * Buk blong Rut i wan buk ya nomo long Baebol we i karem nem blong wan woman we i no woman Isrel. Mesej we i stap insaed long buk ya blong Rut “i laef, mo i stap wok.”​— Hibrus 4:12.

“LONG PLES WE YU YU GO, BAMBAE MI MI GO”

(Rut 1:​1–​2:​23)

Taem Nomi mo Rut tufala i kamtru long Betlehem, ol man blong ples ya oli sek gud long tufala. Ol woman blong taon ya oli luk hemia we i olfala moa, mo oli stap asaskem se: “?E, hu ya? ?Nomi ya, no hu?” Nao Nomi i talem se: “Yufala i no moa singaot mi se ‘Nomi’ . . . yufala i singaot mi se ‘Mara’ we i min se ‘Harem nogud’. Hae God i gat olgeta paoa, mo hem i mekem mi mi harem nogud tumas. Taem mi mi aot long ples ya, mi gat plante samting. Be naoia, hem i tekem mi mi kambak we mi no gat wan samting nating.”​—Rut 1:​19-21.

Nomi mo famle blong hem oli mas aot long Betlehem blong go stap long kantri ya Moab from i gat hadtaem blong kasem kakae long Isrel. Long taem ya, i olsem we Nomi i “gat plante samting” from we hem i gat wan hasban mo tu boe. Smoltaem afta we oli stap gud finis long Moab, hasban blong Nomi, Elimelek i ded. Biaen, tufala boe blong Nomi, tufala i mared wetem tu gel Moab we nem blong tufala, Opa mo Rut. Klosap ten yia i pas, ale, tufala boe blong Nomi oli ded we oli no gat pikinini. Nomi, Opa mo Rut, trifala nomo i stap. Taem Nomi i mekemrere blong gobak long Juda, tufala wido blong tufala boe blong hem oli go wetem hem. Taem trifala i stap wokbaot i go, Nomi i talem long tufala blong gobak long Moab mo mared bakegen wetem ol man long ples blong tufala nomo. Opa i agri nomo blong gobak. Be, Rut i no lego Nomi nating, hem i talem se: “Ples we yu bambae yu go long hem, mi tu bambae mi go long hem. Ples we bambae yu yu stap long hem, mi tu bambae mi stap long hem. Ol man ples blong yu bambae oli man ples blong mi, mo God blong yu bambae i God blong mi.”​—Rut 1:16.

Tufala wido ya Nomi mo Rut, tufala i kamtru long Betlehem stret long taem we ol man oli stat blong tekemaot bale long ol garen blong olgeta. Rut i tekem janis folem Loa blong God, blong pikimap ol bale we ol man oli mestem long garen blong wan man we i famle blong Elimelek. Nem blong man ya Boas. Boas i mekem i gud long Rut, mo Rut i gohed blong pikimap ol bale long garen blong Boas “gogo oli katem olgeta bale mo wit” evriwan long garen blong hem.​—Rut 2:​23.

 Ansa Blong Sam Kwestin Long Saed Blong Baebol:

1:8​—?From wanem Nomi i talem long ol woman blong tufala boe blong hem se “yutufala i go stap wetem tufala mama blong yutufala” be i no talem papa blong tufala? Baebol i no talem sipos papa blong Opa i laef long taem ya. Be yumi save se papa blong Rut i bin laef i stap. (Rut 2:​11) Nating se i olsem, taem Nomi i tokbaot mama, hem i wantem mekem tufala i tingbaot lav blong mama blong tufala. Fasin blong mama blong tufala bambae i leftemap tingting blong tufala gel ya blong tufala i no sore long Nomi, gudfala mama ya blong tufala, taem hem i lego tufala. Mo tu, maet ol tok ya oli soemaot se mama blong Rut mo mama blong Opa oli gat gudfala haos mo plante samting moa i bitim Nomi.

1:​13, 21​—?Olsem wanem? ?Jeova nao i mekem laef blong Nomi i nogud mo i trabol? Nogat mo Nomi i no blemem God from wan nogud samting we i hapen long hem. Be, from evri samting we i hapen long laef blong hem, ating hem i ting se Jeova i no laekem hem. Hem i harem nogud tumas. Antap long samting ya, long taem blong hem, woman we i karem pikinini, hem i wan blesing we i kam long God be sipos woman i no gat pikinini, i olsem we God i panisim hem. Nomi i no gat ol smol bubu blong hem from we tufala boe blong hem oli ded. Taswe, maet Nomi i ting se Jeova i mekem i strong tumas long hem.

2:​12​—?Wanem “stret pei” we Jeova i givim long Rut? Rut i gat wan pikinini boe mo hem i kasem ona ya blong kam bubu blong wan impoten man long histri​—hemia Jisas Kraes.​—Rut 4:​13-​17; Matiu 1:​5, 16.

Ol Lesen Blong Yumi:

1:8; 2:​20. Nating se Nomi i kasem fulap trabol olsem, be hem i holem tras blong hem long Jeova se hem i gat lav mo i kaengud. Yumi mas mekem i sem mak, speseli taem yumi kasem ol strong traem.

1:9. Haos i no wan ples we ol memba blong famle oli kakae mo slip nomo long hem. Hem i mas wan ples blong pis we man i save spel mo haremgud long hem.

1:​14-​16. Opa i “gobak long ol manples blong hem mo ol god blong hem.” Be Rut i no mekem olsem. Hem i stap tru long Jeova taem hem i livim ol famle blong hem mo ples blong hem we hem i laekem mo we i bin stapgud long hem. Taem yumi stap wokem lav we i tru long God mo yumi rere blong lego samting we yumi nomo i wantem, samting ya bambae i blokem yumi blong yumi no tingbaot yumi nomo mo yumi no ‘tanemraon blong gobak, nao yumi lus.’​—Hibrus 10:39.

2:2. Rut i tekem janis blong pikimap ol hafhaf bale we ol man oli mestem long garen blong givhan long ol man blong nara kantri mo ol puaman. Hem i gat tingting daon. Wan trufala Kristin i no mas wan man we i tinghae tumas long hem wan nao i no wantem we wan brata no sista i givhan long hem wetem lav, no i no wantem eni help we gavman i save givim long hem.

2:7. Rut i askem fastaem blong hem i save go pikimap bale long garen nating se hem i gat raet blong mekem olsem. (Levitikas 19:​9, 10) Hemia i soemaot tingting daon blong hem. Yumi waes sipos yumi “lukaot tingting daon,” from we “ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud from we oli stap gud mo oli gat plante samting.”​—Sefanaea 2:​3, NW; Ol Sam 37:11.

2:​11. Rut i no jes wan famle blong Nomi nomo. Hem i wan trufala fren tu. (Ol Proveb 17:17) Fasin fren blong tufala i strong gud from we stamba blong fasin fren ya i stanap long lav, fasin blong  stap tru, fasin blong kasem save long filing blong narafala, kaen fasin mo fasin we wan i rere blong lego samting we hem nomo i wantem. Be, samting we i moa impoten hemia ol samting long saed blong spirit​—tufala i wantem mekem wok blong Jeova mo stap long medel blong ol man we oli wosipim hem. Yumi tu yumi gat gudfala janis blong wokem trufala fasin fren wetem ol trufala man blong God.

2:​15-​17. Nating se Boas i traem mekem se wok blong Rut i no hevi tumas, be Rut i gohed “i stap pikimap bale gogo san i godaon.” Rut i wan woman we i wok strong. Wan Kristin i mas wan man we ol narafala oli luk se hem i wok strong i no man blong les.

2:​19-​22. Nomi mo Rut tufala i glad blong storian tugeta long sapa. Nomi we i olfala moa i soem intres long ol wok we Rut, we i yangfala, i mekem mo Rut i glad blong talemaot wanem we hem i bin mekem mo wanem filing blong hem tu. Wan Kristin famle i save folem eksampol blong Nomi mo Rut.

2:​22, 23. Rut i no olsem Daena, gel blong Jekob. Rut i wantem gat ol fren we oli man blong wosip long Jeova. !Hemia wan gudfala eksampol blong yumi!​—Jenesis 34:​1, 2; 1 Korin 15:33.

NOMI I KASEM “PLANTE SAMTING”

(Rut 3:1– 4:​22)

Nomi i olfala tumas blong karem pikinini. Ale Nomi i talem long Rut blong gat ol pikinini long ples blong hem. Be blong mekem olsem, Rut i mas tekem wan man we i famle blong Nomi. Rut i mekem wanem we Nomi i talem long hem, ale, Rut i askem Boas blong i pembak graon blong man blong Nomi mo blong i tekem hem olsem woman blong hem. Boas i rere blong mekem olsem. Be, i gat wan man i stap we i klosap moa long man blong Rut, ale Boas i mas toktok wetem hem fastaem.

Boas i no wet blong stretem bisnes ya. Long nekis moning, hem i singaot ten lida blong taon ya Betlehem oli kam sidaon wetem hem mo man ya we i klosap moa long man blong Rut, hem tu i kam. Nao Boas i askem long man ya sipos hem i wantem pembak graon blong Nomi mo tekem Rut i kam woman blong hem. Man ya i no wantem. Ale, Boas i pemaot graon ya mo i maredem Rut. Tufala i gat wan pikinini boe, we nem blong hem Obed, we hem i bubu blong King Deved. Nao, ol woman long Betlehem oli talem long Nomi se: “!Nomi! !Yumi presem Hae God! . . . Hem bambae i mekem laef blong yu i kam niuwan bakegen, mo taem yu kam olfala, hem bambae i lukaot long yu. Woman ya we i bonem hem, hem i lavem yu tumas. Sipos yu gat seven pikinini boe blong yu blong givhan long yu, be bambae oli no save givhan gud long yu, olsem we woman ya i mekem.” (Rut 4:​14, 15) !Woman ya we i bin kambak long Betlehem ‘we i no gat wan samting nating’ naoia i gat “plante samting” bakegen!​—Rut 1:​21.

Ansa Blong Sam Kwestin Long Saed Blong Baebol:

3:​11​—?Wanem i mekem se ol man oli save we Rut i wan “gudfala woman”? I no from we ‘hem i stap fasem hea blong hem’ no ‘hem i stap putum gol jen mo ol flas klos blong hem, blong flasem hem.’ I no samting ya we i mekem narafala i laekem hem. Be, hemia se ‘tingting blong hem i stret long fes blong God’​—fasin blong hem blong stap tru mo gat lav, gat tingting daon, tingbaot filing blong narafala mo glad blong mekem wok blong narafala. Ol woman we oli fraetgud long God mo oli wantem we ol man oli luk olgeta olsem long taem blong Rut bifo oli mas traehad blong gat ol fasin olsem Rut.​—1 Pita 3:​3, 4; Ol Proveb 31:​28-31.

 3:​14​—?From wanem Rut mo Boas oli wekap we i haftudak yet? I no from wan nogud samting we i hapen long naet we tufala i wantem haedem, nogat. Fasin we Rut i mekem long naet ya i laenap wetem kastom we wan woman i mekem blong save mared wetem wan brata blong man blong hem. Rut i mekem samting folem wanem we Nomi i talem long hem. Antap moa, Boas i talem klia se hem i no luk wan samting we Rut i mekem we i rong. (Rut 3:​2-​13) Defren olgeta, Rut mo Boas, tufala i no wantem we ol man oli gat rabis tingting long tufala nao maet oli stat talem ol giaman stori olbaot.

3:​15 (NW )​—?From wanem Boas i givim ‘sikis haf’ blong bale long Rut? Samting ya i minim se dei blong spel blong Rut i klosap nao from olsem we i gat sikis dei blong wok be biaen i gat wan dei blong spel. Boas bambae i mas meksua se Rut i gat ‘ples blong hem we hem i save stap gud long hem’ long haos blong hasban blong hem. (Rut 1:9; 3:1) Be tu, Rut i naf blong karem ol sikis haf ya blong bale long hed blong hem.

3:​16 (NW )​—?From wanem Nomi i askem Rut se: “Dota blong mi. ?Yu yu hu?” ?Olsem wanem? ?Nomi i no luksave waef blong boe blong hem? Maet i olsem from we taem Rut i gobak long haos, ples i tudak yet. Be, maet kwestin ya i minim tu se Nomi i wantem save moa long saed blong samting we hem i sanem Rut blong mekem.

4:6​—?Long wanem rod wan man “i spolem” ol bisnes blong graon blong hem taem hem i pembak graon blong famle we i klosap moa long hem? Sipos wan man i kam pua nao i salemaot graon blong hem, wan famle blong hem we i klosap moa long hem i mas pembak graon ya. Hem i mas pem graon ya long wan praes we i stret long namba blong ol yia we i stap blong go kasem Jubili, hemia yia we graon i mas kambak fri nomo long han blong puaman ya. (Levitikas 25:​25-27) Taem man ya i mekem olsem, hem i lusum mane. Antap long hemia, sipos Rut i karem wan pikinini boe, graon ya bambae i go long pikinini ya be i no long pikinini blong man we i pembak graon ya.

Ol Lesen Blong Yumi:

3:​12; 4:​1-6. Boas i folemgud ol plan we Jeova i stanemap. ?Yumi stap traehad blong folem ol tiokratik rul?​—1 Korin 14:40.

3:​18. Nomi i trastem Boas. Yumi tu, yumi mas trastem ol brata mo sista insaed long kongregesen. Rut i glad nomo blong mared wetem wan brata blong man blong hem we hem i no save man ya nating mo nem blong man ya tu i no stap insaed long Baebol. (Rut 4:1) Rut i mekem olsem from we hem i trastem rod we Jeova i stanemap. Yumi mas gat semfala fasin tras olsem Rut. Taem yumi stap lukaot wan man no woman blong mared wetem, yumi mas meksua se yumi folem oda ya blong mared ‘nomo long man we i man blong Masta.’​—1 Korin 7:​39.

4:​13-​16. !Yes, nating se Rut i wan woman Moab we i bin stap mekem wosip long god ya Kemos, hem i kasem wan nambawan blesing! Hemia i soemaotgud rul ya se “i no folem ol samting we man i wantem, no we man i mekem long hadwok blong hem, be i folem gudfala fasin blong God we oltaem hem i gat sore long man.”​—Rom 9:​16.

God ‘Bambae i Leftemap Yufala, Long Taem We Hem i Luk Se i Stret’

Buk ya blong Rut i tokbaot Jeova olsem wan God blong lav we i kaengud mo we i stap givhan long ol man blong hem we oli stap tru long hem. (2 Kronikel 16:9) Taem yumi tingbaot olsem wanem Rut i kasem blesing, yumi luksave we i impoten blong putum tras blong yumi long God wetem bilif we i no hafhaf. Yumi mas bilif fulwan “we God i stap, mo we i stap mekem i gud long olgeta we oli stap traem faenem hem.”​—Hibrus 11:6.

From we Rut mo Nomi mo Boas oli putum ful tras blong olgeta long plan blong Jeova, oli kasem gudfala frut long laef blong olgeta. Sem mak tede, “God i stap wok long olgeta samting we oli stap kamtru long laef blong yumi, blong mekem i gud long yumi ya we yumi lavem hem. Yumi ya, hem i singaot yumi finis stret long rod we hem i makemaot.” (Rom 8:28) I gud yumi mekem ol advaes blong aposol Pita i wok long laef blong yumi se: “Yufala i mas putum yufala i stap daon, aninit long han blong hem. Nao long taem we hem i luk se i stret, hem bambae i leftemap yufala. Yufala we i stap wari tumas, yufala i mas putum ol trabol blong yufala long han blong hem, from we oltaem hem i stap tingbaot yufala.”​—1 Pita 5:​6, 7.

[Futnot]

[Tok blong pija long pej 26]

?Yu yu save from wanem Rut i no lego Nomi?

[Tok blong pija long pej 27]

?Wanem i mekem se ol man oli save we Rut i “wan gudfala woman”?

[Tok blong pija long pej 28]

?Wanem nao “stret pei” we Jeova i givim long Rut?