Laef Stori

Taem Laef i Jenis, Mifala i Go Prij Long Ol Kantri Farawe

RICARDO MALICSI I TALEM STORI YA

Mi lusum wok blong mi from we mi stanap strong long tingting blong Baebol long saed blong politik mo faet. Long taem ya, mi wetem famle blong mi, mifala i askem Jeova blong i halpem mifala blong mekem plan blong fiuja. Mifala i prea long Jeova se mifala i wantem mekem moa long wok blong prij. Smoltaem biaen, mifala i statem wan longfala wokbaot we i tekem mifala i go laef long eit defren kantri. Olsem nao, mifala i gat janis blong prij long ol kantri farawe.

MI MI bon long Filipin long 1933 long wan famle we i joen long Filipin Independen Jos. Ol 14 memba blong famle, mifala evriwan i joen long jos ya. Taem mi mi gat samwe 12 yia blong mi, mi prea long God blong hem i halpem mi blong faenem trufala skul. Wan tija blong mi i tekem mi mi go long wan klas we i tijim ol bilif blong jos, mo mi kam wan Katolik we i gat strong bilif. Mi neva mestem blong go long jos long Sarede blong talemaot ol sin blong mi, mo long Lames long Sande tu. Nating se i olsem, sloslo mi no moa bilif strong long jos, mo mi harem nogud long sam samting. Mi wantem save wanem i hapen long ol man taem oli ded, mo mi no klia long ol kwestin long saed blong helfaea mo Triniti. Mi kwestinim ol lida blong jos, be mi no laekem ol ansa blong olgeta we oli no givim klia save.

Mi Kasem Sam Gudfala Ansa

Taem mi stadi long haeskul, mi joen long wan grup we i pulum mi blong faet, plelaki, smok tabak, mo mekem sam narafala rabis samting. Wan naet, mi mitim mama blong wan fren we i  skul wetem mi. Hem i wan Witnes blong Jeova. Mi askem sam kwestin long hem, ol semfala kwestin we mi bin askem long ol tija long saed blong bilif blong ol jos. Woman ya i yusum Baebol blong ansa long olgeta kwestin blong mi, mo mi sua we hem i talem trutok.

Mi pem wan Baebol mo mi stat stadi long hem wetem ol Witnes. I no longtaem, mi mi stat blong go long ol miting blong ol Witnes blong Jeova. Mi folem waes advaes ya blong Baebol se “ol rabis fren oli save spolem ol gudfala fasin,” taswe mi no moa joen wetem ol rabis fren blong mi. (1 Korin 15:​33, NW ) Samting ya i halpem mi blong gohedgud long stadi blong Baebol, mo biaen mi givim laef blong mi i go long Jeova. Mi tekem baptaes long 1951, mo mi mekem wok blong paenia blong sam taem. Biaen, long Disemba 1953, mi maredem Aurea Mendoza Cruz, we i kam besfren blong mi blong ful laef blong mi, mo i joen oltaem wetem mi long wok blong prij.

Wan Ansa Long Ol Prea Blong Mitufala

Mitufala i wantem tumas blong wok olsem paenia. Be samtaem i pas bifo we mitufala i save mekem moa long wok blong Jeova. Nating se i olsem, mitufala i askem oltaem long Jeova blong i givim janis long mitufala blong mitufala i save mekem moa. Laef blong mitufala i no isi, be mitufala i no fogetem ol mak we mitufala i wantem kasem long saed blong spirit. Taem mi mi gat 25 yia blong mi, oli putumap mi olsem presiden elda long wan kongregesen blong ol Witnes blong Jeova.

Taem mi kasem moa save long saed blong Baebol mo long saed blong ol rul blong Jeova, mi luksave se wok blong mi i agensem tingting blong God long saed blong politik mo faet. (Aesea 2:​2-4) Taswe mi tekem desisen blong lego wok ya. Desisen ya i olsem wan traem long bilif blong mitufala. ?Olsem wanem bambae mi lukaot long famle blong mi? Bakegen, mitufala i prea long Jeova blong hem i halpem mitufala. (Ol Sam 65:2) Mitufala i talemaot ol fraet mo ol wari blong mitufala, be tu, mitufala i talem se mitufala i wantem prij long ol ples we oli nidim moa man blong talemaot Kingdom. (Filipae 4:6, 7) !Long taem ya mitufala i no save se bambae Jeova i openem plante defdefren rod blong mitufala i save mekem moa long wok blong hem!

Mitufala i Stat Wokbaot i Go Long Defdefren Ples

Long Epril 1965, mi akseptem wan wok olsem bos blong wan tim we i kilim faea mo i sevem ol man taem i gat aksiden long plen long Intenasnal Epot blong Vientiane, long Laos, taswe mitufala i muf i go long kantri ya. Long taon blong Vientiane, i gat 24 Witnes, mo mitufala i glad blong prij wetem ol misinari mo ol manples. Biaen, oli sanem mi mi go long Epot blong Udon Thani, long Taelan. I no gat Witnes long taon ya Udon Thani. Evri wik, mitufala i mekem olgeta miting tugeta. Mitufala i go prij long ol haos wanwan, gobak blong luk ol man we oli intres, mo mitufala i statem sam Baebol stadi.

Oltaem, mitufala i rimemba advaes we Jisas i talem long ol disaepol blong hem se oli mas “karem plante frut.” (Jon 15:8) Mitufala i gat strong tingting blong folem eksampol blong olgeta, taswe mitufala i gohed blong talemaot gud nius. I no longtaem, mitufala i karem gudfala frut long wok ya. Wan yangfala gel Taelan i akseptem trutok, mo hem i tekem baptaes. Tu man blong Not Amerika tufala i akseptem trutok, mo biaen tufala i kam elda. Mitufala i gohed blong talemaot gud nius blong bitim ten yia long not blong Taelan. !Mifala i glad tumas blong save se naoia i gat wan kongregesen long Udon Thani! Sam sid we mitufala i planem oli stap gru yet.

Be, sore tumas, mitufala i mas muf bakegen. Mitufala i prea long “masta blong garen” blong hem i halpem mitufala blong gohed long wok blong prij. (Matiu 9:38) Oli sanem mi mi go long Tehran, kapital blong Iran. Hemia long taem we Shah i stap rul long Iran.

Mitufala i Prij Long Ol Kantri We Oli No Isi

Taem mitufala i kasem Tehran, wantaem nomo mitufala i faenem ol Witnes. Mitufala i joen wetem wan smol grup blong brata sista we oli kamaot long 13 defren kantri. Mitufala i mas jenisim sam fasin blong mitufala blong talemaot gud nius long Iran. Ol man oli no agensem ol Witnes stret, be mitufala i mas lukaot.

 Sam man we oli intres oli bisi tumas, taswe samtaem mitufala i mas stadi Baebol wetem olgeta long medel naet, no long eli moning. !Be mitufala i glad blong luk ol gudfala frut we oli kamaot from hadwok ya! Sam famle blong Filipin mo Koria oli akseptem ol Kristin trutok mo oli tekem baptaes.

Biaen, oli sanem mi mi go wok long Dhaka, long Banglades. Mitufala i kasem ples ya long Disemba 1977. Long kantri ya tu, wok blong prij i no isi. Be mitufala i tingbaot oltaem we mitufala i mas gohed nomo blong prij. Jeova i halpem mitufala wetem tabu spirit blong hem, nao mitufala i faenem plante famle we oli talem se oli Kristin. Sam long olgeta oli tosta long saed blong spirit, mo oli wantem tumas blong dring ol freswota blong trutok we oli kamaot long Baebol. (Aesea 55:1) Taswe mitufala i statem plante Baebol stadi.

Mitufala i rimemba se God i wantem we “olkaen man bambae oli sef.” (1 Timoti 2:​4, NW ) Wan gudfala samting se ol man oli no mekem trabol long mitufala. Taem mitufala i wantem toktok wetem olgeta, mitufala i soem kaen fasin long olgeta blong oli no kros long mitufala. Olsem aposol Pol, ‘long fes blong ol man we oli gat ol defdefren kaen fasin, be mitufala i traem mekem olsem we mitufala tu i gat sem fasin we olgeta oli gat, blong yusum olgeta rod blong sevem sam long olgeta.’ (1 Korin 9:22) Taem oli askem from wanem mitufala i kam luk olgeta, mitufala i ansa wetem kaen fasin, mo bighaf blong olgeta oli gat gudfala fasin wetem mitufala.

Long Dhaka mitufala i faenem wan Witnes mo mitufala i leftemap tingting blong hem blong hem i joen wetem mitufala long ol miting, mo long wok blong prij. Biaen, waef blong mi i stadi Baebol wetem wan famle, mo hem i singaot olgeta blong oli kam long ol miting blong mifala. Jeova i soem lav blong hem we i kaengud long famle ya, mo ful famle i tekem baptaes. Biaen, tufala dota blong famle ya tufala i givhan blong tanem ol buk we oli tokbaot Baebol i go long lanwis Bengali, mo plante famle blong olgeta oli lanem blong save Jeova tu. Plante narafala Baebol studen oli akseptem trutok. Naoia, bighaf blong olgeta oli wok olsem elda no paenia.

I gat plante we plante man long Dhaka, taswe mitufala i singaotem sam memba blong famle blong mitufala blong oli kam joen wetem mitufala long wok blong prij. Sam long olgeta oli agri mo oli kam joen wetem mitufala long Banglades. !Mitufala i glad mo talem tangkiu tumas long Jeova from nambawan janis we mitufala i bin gat blong talemaot gud nius long kantri ya! Long stat, i gat wan man nomo we i stap long trutok long Banglades, be naoia, i gat tu kongregesen.

Long Julae 1982, mitufala i mas aot long Banglades. Mitufala i krae taem mitufala i talem tata long ol brata. Smol taem biaen, mi kasem wan wok long Intenasnal Epot blong Entebbe, long Uganda. Mitufala i stap fo yia mo seven manis long ples ya. ?Olsem wanem mitufala i save presem nem blong Jeova long kantri ya?

Mitufala i Wok Blong Jeova Long Is Afrika

Taem mi wetem waef blong mi i kasem Entebbe Intenasnal Epot, wan taksi i karem mitufala i go long haos blong mitufala. Taem mitufala i aot long epot, mi stat tokbaot Kingdom blong God long draeva. Hem i askem se: “?Yu yu wan Witnes blong Jeova?” Taem mi talem yes, hem i talem se: “Wan brata blong yufala i wok long taoa ya blong kontrolem ol plen.” Wantaem nomo, mi askem hem blong i tekem mitufala i go long brata ya. Mitufala i mitim brata ya, we i glad tumas blong luk mitufala, mo mifala i mekem plan blong ol miting mo blong prij.

 Long taem ya, i gat 228 man blong talemaot Kingdom nomo long Uganda. Long faswan yia we mitufala i stap long Entebbe, mitufala wetem tu narafala brata, mifala i planem ol sid blong trutok. Long ples ya ol man oli laekem tumas blong ridim ol buk, taswe mifala i givimaot plante buk, wetem plante handred magasin tu. Mifala i singaotem ol brata blong Kampala, kapital blong Uganda, blong oli kam halpem mifala blong prij long ol teritori blong Entebbe long wiken. Long faswan pablik tok we mi givim, i gat faef man evriwan oli stap, hemia wetem mi tu.

Long ol trifala yia we oli kam biaen, mitufala i harem gud tumas taem mitufala i luk sam studen blong mitufala oli gohedgud long saed blong spirit. (3 Jon 4) Long wan seket asembli, sikis man we oli stadi long Baebol wetem mitufala oli tekem baptaes. Mitufala i wok fultaem mo mekem wok blong paenia tu. Plante we oli tekem baptaes oli talem se eksampol ya i pulum olgeta tu blong kam paenia.

Mitufala i luk se mitufala i save prij long ples blong wok tu. Wan taem, mi toktok wetem wan faea ofisa we i wok long epot, mo mi eksplenem long hem wanem samting we Baebol i talem long saed blong laef long paradaes long wol. Mi soem long hem long prapa Baebol blong hem se ol man we oli obei long God bambae oli laef long pis, oli joengud tugeta, oli no moa safa from fasin pua, oli gat prapa haos blong olgeta, mo bambae i no moa gat ol faet, sik, mo ded. (Ol Sam 46:9; Aesea 33:24; 65:​21, 22; Revelesen 21:​3, 4) Hem i sapraes blong ridim samting ya long prapa Baebol blong hem. Wantaem nomo, mi stat stadi Baebol wetem hem. Hem i kam long olgeta miting. Kwiktaem hem i givim laef blong hem i go long Jeova mo i tekem baptaes. Biaen hem i joen wetem mitufala long wok blong paenia.

Taem mitufala i stap long Uganda, trabol long saed blong politik i kamaot tu taem. Be samting ya i no stopem wok blong mifala long saed blong spirit. Oli sanem ol famle blong ol man we oli wok long ol intenasnal kampani oli go stap long Nairobi, long Kenya, blong 6 manis. Mifala ol brata sista we oli stap long Uganda, mifala i stap holem ol Kristin miting mo mifala i stap prij yet, be mifala i mas waes mo lukaotgud.

Long Epril 1988, wok blong mi i finis long Uganda mo mitufala i mas muf bakegen. Mitufala i glad blong luk ol gudfala frut we oli bin kamaot long saed blong spirit, taem mitufala i stap long kongregesen blong Entebbe. Long Julae 1997, mitufala i gat janis blong gobak long Entebbe. Long taem ya, sam blong ol man we oli stadi Baebol wetem mitufala bifo, oli stap wok olsem elda. !Mitufala i glad blong luk 106 man long Pablik Miting!

Mitufala i Prij Long Ol Ples We Gud Nius i No Go Long Hem Yet

?Bambae mitufala i save karem trutok i go long sam niufala ples? Yes. Oli sanem mi mi go long Mogadishu Intenasnal Epot, long Somalia. Mitufala i gat strong tingting blong tekem janis ya blong prij long ol teritori we gud nius i no go long hem yet.

Mitufala i prij long ol man we oli wok long embasi, long ol man blong wok we oli kamaot long Filipin, mo long ol narafala strenja. Plante taem, mitufala i mitim olgeta long ples blong maket. Mo tu, mitufala i go long haos blong olgeta blong talem halo long olgeta. Mitufala i mas waes blong faenem rod blong prij, yusumgud olgeta janis, lukaotgud, mo trastem Jeova fulwan. Olsemia, mitufala i save talemaot ol trutok blong Baebol long ol man, mo samting ya i karem frut wetem sam man blong defdefren kantri. Afta tu  yia, mitufala i aot long Mogadishu, jes bifo we wo i stat long ples ya.

Biaen, International Civil Aviation Organization i sanem mi mi go long Yangon, Mianma. Bakegen, mitufala i gat janis blong halpem ol man we oli gat gudfala hat mo oli wantem save ol plan blong God. Afta Mianma, oli sanem mi mi go long Dar es Salaam, long Tansania. Fasin blong talemaot gud nius long ol haos wanwan i isi moa long Dar es Salaam, from we i gat plante man we oli toktok Inglis.

Long olgeta kantri we mitufala i wok long hem, mitufala i gat smol problem nomo taem mitufala i prij, nating se long plante ples, gavman i putum tabu long wok blong ol Witnes blong Jeova. Be, from we wok blong mi i joen wetem gavman blong kantri no wetem sam intenasnal kampani, ol man oli trastem mitufala.

Wok blong mi i mekem se mi wetem waef blong mi, mitufala i wokbaot i go long ol defdefren kantri blong 30 yia. Be wok ya i no stap long faswan ples long laef blong mitufala. Mitufala i luk wok ya olsem wan rod blong givhan long mitufala blong putum Kingdom blong God i stap long faswan ples oltaem. Mitufala i tangkiu long Jeova we i halpem mitufala blong wok blong hem taem laef blong mitufala i jenis, mo blong haremgud long nambawan wok ya blong talemaot gud nius long ol kantri farawe.

Gobak Long Filipin

Taem mi mi gat 58 yia, mi tekem desisen blong ritae mo gobak long Filipin. Taem mitufala i gobak, mitufala i prea long Jeova blong hem i lidim mitufala. Mitufala i stat wok long wan kongregesen long Trece Martires City, long provins blong Cavite. Taem mitufala i kasem ples ya, i gat 19 pablisa nomo. Mifala i ogenaesem wok blong prij evri dei, mo mifala i statem plante Baebol stadi. Kongregesen i stat kam bigwan. Wan taem, waef blong mi i gat 19 Baebol stadi, mo mi mi gat 14 Baebol stadi.

Kwiktaem, Haos Kingdom i kam smol tumas. Mifala i prea long Jeova long saed ya. Wan brata wetem waef blong hem, tufala i tekem desisen blong givim wan pis graon, mo branj ofis i agri blong givim wan lon blong bildim wan niufala Haos Kingdom. Niufala bilding ya i mekem se plante man we mifala i prij long olgeta oli intres, mo evri wik, i gat plante moa man i kam long ol miting. Naoia, mitufala i tekem wan aoa blong go mo wan aoa blong kambak long ol miting, blong mitufala i save givhan long ol 17 pablisa blong kongregesen ya.

Mi wetem waef blong mi, mitufala i glad tumas we mitufala i bin gat janis ya blong prij long plante defdefren kantri. Taem mitufala i luklukbak long laef blong mitufala we mitufala i bin wokbaot i go long defdefren ples, mitufala i harem gud tumas from we mitufala i yusum janis ya long beswan rod: !Mitufala i halpem ol narafala blong kasem save long Jeova!

[Map blong pija long pej 24, 25]

(Lukluk niuspepa)

IRAN

UGANDA

SOMALIA

TANSANIA

BANGLADES

MIANMA

LAOS

TAELAN

FILIPIN

[Tok blong pija long pej 23]

Mi wetem waef blong mi, Aurea