Waes Advaes We i Go Long Ol Mared Man Mo Woman
Waes Advaes We i Go Long Ol Mared Man Mo Woman
“Yufala ol woman we i mared. Yufala i mas ona long ol man blong yufala, olsem we yufala i stap ona long Masta blong yumi. Mo yufala ol man we i mared, yufala i mas lavem ol woman blong yufala.”—EFESAS 5:22, 25.
1. ?Wanem tingting we ol mared man mo woman oli mas gat?
JISAS i talem se man mo woman we i mared, God i joenem tufala blong tufala i kam olsem “wan bodi nomo.” (Matiu 19:5, 6) Tufala ya i gat defdefren fasin, be tufala i mas lanem blong laekem ol semfala samting mo wok tugeta blong kasem ol semfala mak. Tufala i mas holem promes ya blong mared long ful laef blong tufala. Hem i no wan kontrak blong smoltaem nomo we tufala i save brekem taem tufala i wantem, nogat. Long plante kantri, i isi nomo blong mekem divos. Be long tingting blong ol Kristin, mared i wan tabu samting. Man mo woman i save divos from wan bigfala risen nomo.—Matiu 19:9.
2. (a) ?Wanem i save givhan long ol mared man mo woman? (b) ?From wanem i impoten blong traehad blong mekem mared blong yumi i hapi?
2 Wan woman we i givim advaes long saed blong mared, i talem se: “Blong mekem wan gudfala mared, man mo woman i mas gohed nomo blong jenis folem ol niufala samting we i kamaot long laef blong tufala, folem ol trabol we tufala i mas stretem, mo folem ol samting we tufala i gat blong yusum long ol defdefren taem long laef blong tufala.” Sam samting we ol Kristin oli gat blong yusum, hemia ol waes advaes blong Baebol, help blong ol narafala Kristin, mo gudfala fasin fren wetem Jeova we i mekem se oli save prea long hem oltaem. Wan hapi mared i save winim plante trabol, mo taem ol yia oli pas, hasban mo waef tufala i kasem glad mo tufala i hapi. Samting we i moa impoten, se mared we i hapi i givim ona long Jeova God we hem i Stamba blong mared.—Jenesis 2:18, 21-24; 1 Korin 10:31; Efesas 3:15; 1 Tesalonaeka 5:17.
Folem Eksampol Blong Jisas Mo Kongregesen Blong Hem
3. (a) Talem ol bigfala poen long advaes blong Pol we i go long ol mared man mo woman. (b) ?Jisas i givim wanem gudfala eksampol?
3 Tu taosen yia bifo, aposol Pol i givim waes advaes long ol Kristin we oli mared. Hem i raetem se: “Ol woman oli mas ona long ol man blong olgeta, long evri samting, olsem we [kongregesen] i stap ona long Kraes. Mo yufala ol man we i mared, yufala i mas lavem ol woman blong yufala, olsem we Kraes i lavem [kongregesen] ya. Taswe hem i letem laef blong hem, blong sevem [kongregesen].” (Efesas 5:24, 25) !Hemia wan nambawan eksampol! Ol Kristin waef we oli holem tingting daon mo ona long man blong olgeta, oli folem fasin blong kongregesen we i luksave Jisas olsem hed blong hem mo i obei long hem. Ol Kristin hasban we oli lavem woman blong olgeta taem laef i isi mo taem i gat trabol tu, oli stap folem fasin blong Kraes we hem i lavem kongregesen mo i lukaotgud long hem.
4. ?Olsem wanem ol hasban oli save folem eksampol blong Jisas?
4 Ol Kristin hasban oli hed blong famle, be i gat wan man we i hed blong olgeta tu, hemia Jisas. (1 Korin 11:3) Taswe, ol hasban oli mas folem fasin we Jisas i mekem blong lukaotgud long kongregesen. Oli mas lavem woman blong olgeta mo lukaotgud long olgeta long saed blong spirit mo bodi, nating se oli mas lego sam samting we olgeta nomo oli wantem. Oli tingbaot woman blong olgeta fastaem, bifo long ol samting we olgeta nomo oli wantem mo laekem. Jisas i talem se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.” (Matiu 7:12) Yumi mas folem rul ya oltaem, be speseli insaed long mared. Pol i soem samting ya taem hem i talem se: “Man i mas lavem woman blong hem, i mas lukaot gud long hem, olsem we i stap lukaot gud long bodi blong hem nomo. . . . I no gat man we i wantem spolem bodi blong hem. Man i stap kakae gud blong mekem bodi blong hem i strong, mo i stap lukaot gud long bodi blong hem.” (Efesas 5:28, 29) Man i mas givim kakae long woman blong hem mo lukaotgud long hem, long sem fasin we hem i stap mekem long hem wan.
5. ?Olsem wanem ol waef oli save folem eksampol blong Kristin kongregesen?
5 Ol waef we oli onagud long God, oli folem eksampol blong Kristin kongregesen. Taem Jisas i stap long wol, ol man blong hem oli glad blong livim ol wok we oli stap mekem blong oli folem hem. Afta we Jisas i ded, oli gohed blong obei long hem, mo long ol 2,000 yia biaen, trufala Kristin kongregesen i stap obei long Jisas long evri samting, mo i folem hem olsem hed blong olgeta. Long sem fasin, ol Kristin waef oli no daonem hasban blong olgeta, mo oli no mekem olsem we rul ya blong Baebol se hasban i hed blong famle i nating nomo. Long defren fasin, oli givhan long hasban blong olgeta, oli obei long hem, oli wokgud wetem hem, mo oli leftemap tingting blong hem. Taem hasban mo waef tugeta i soem lav olsem, bambae mared blong tufala i stanap strong, mo bambae tufala i hapi.
Stap Wetem Olgeta
6. ?Pita i givim wanem advaes long ol hasban? ?From wanem advaes ya i impoten tumas?
6 Aposol Pita tu i givim advaes long ol mared man mo woman. Hem i talem stret long ol hasban se: “Yufala i mas tingbaotgud [“stap wetem,” NW ] ol woman blong yufala long laef blong yufala long mared. Yufala i mas ona long ol woman blong yufala, from we oli no strong olsem yufala, mo from we promes blong God i stap wantaem long man mo woman we tufala i mared, se long gladhat blong hem, bambae hem i givim laef long tufala. Yufala i mas mekem olsem blong bambae i no gat samting we i save blokem ol prea blong yufala.” (1 Pita 3:7) Lashaf blong vas ya i soem from wanem advaes ya blong Pita i impoten tumas. Sipos hasban i no ona long waef blong hem, bambae hem i no moa save frengud wetem Jeova. Fasin blong hem bambae i blokem ol prea blong hem.
7. ?Olsem wanem hasban i save ona long woman blong hem?
7 ?Olsem wanem ol hasban oli save ona long waef blong olgeta? Blong ona long waef, hasban i mas soem lav, respek, mo i mas givhan long waef blong hem blong i tinghae long hem wan. Long taem bifo, kaen fasin olsem i wan narakaen samting long tingting blong plante man. Wan man Gris we i gat big save, i talem se: “Folem loa blong ol man Rom, woman i no gat raet blong mekem wan samting. Hem i stap olwe olsem wan pikinini nomo. . . . Hem i mas obei fulwan long man blong hem, mo man i save mekem olsem hem i wantem long woman blong hem.” !Hemia i defren olgeta long tijing we ol Kristin oli folem! Kristin hasban i mas ona long woman blong hem. Fasin blong hem i mas laenap wetem ol Kristin rul, i no wetem prapa tingting no filing blong hem. Mo tu, hem i mas “tingbaotgud” woman blong hem, i min se, hem i mas tingbaot we woman i no strong olsem man.
‘No Strong Olsem Man’—?Olsem Wanem?
8, 9. ?Long wanem fasin ol woman oli sem mak long ol man?
8 Taem Pita i talem se woman ‘i no strong olsem man,’ hem i no min se woman i no gat hed olsem man, no woman i no save strong long saed blong spirit olsem man. I tru, plante Kristin man oli gat spesel wok insaed long kongregesen we ol woman oli no gat raet blong mekem, mo tu, insaed long famle ol woman oli mas obei long man blong olgeta. (1 Korin 14:35; 1 Timoti 2:12) Nating se i olsem, yumi evriwan, ol man mo ol woman tu, yumi mas gat strong bilif, stanap strong longtaem, mo folem ol semfala gud fasin blong laef. Olsem Pita i talem, “promes blong God i stap wantaem long man mo woman we tufala i mared, se long gladhat blong hem, bambae hem i givim laef long tufala.” Taem bambae Jeova God i jajem ol man mo woman blong givim laef long olgeta, bambae hem i no luk man olsem we i defren long woman, be bambae hem i jajem tufala folem ol semfala rul nomo. (Galesia 3:28) Leta we Pita i raetem long faswan handred yia, i go long ol Kristin we tabu spirit i makemaot olgeta. Taswe, ol tok long leta ya i mekem ol Kristin hasban ya oli tingbaot se ‘oli save joen long Kraes blong kasem haf long ol gudgudfala samting we God i putum olgeta oli tabu, se bambae oli blong Kraes,’ mo i mekem olgeta oli tingbaot tu se ol woman blong olgeta oli gat sem janis olsem olgeta blong kasem laef long heven. (Rom 8:17) !Long fiuja, ol man mo ol woman ya tugeta bambae oli mekem wok blong pris mo king long Kingdom blong God long heven!—Revelesen 5:10.
9 Ol Kristin hasban we tabu spirit i makemaot olgeta, oli no impoten moa i bitim ol Kristin waef blong olgeta we tabu spirit i makemaot olgeta, nogat. Sem mak long ol man mo woman we bambae oli kasem laef long wol ya. Long “bigfala kampani,” ol man mo woman tugeta oli wasem klos blong olgeta long blad blong Smol Sipsip blong mekem ol klos ya oli waet. Long olgeta ples blong wol, ol man mo woman tugeta oli joen “long dei mo long naet” blong presem Jeova. (Revelesen 7:9, 10, 14, 15, NW ) Ol man mo woman tugeta oli wet blong kam ‘fri olgeta olsem ol pikinini blong God.’ Long taem ya, bambae olgeta evriwan oli haremgud long “laef ya we i prapa wan.” (Rom 8:21; 1 Timoti 6:19) Nating se ol Kristin oli stap long kampani we tabu spirit i makemaot olgeta no oli blong ol narafala sipsip, be olgeta evriwan oli mekem wok blong Jeova tugeta olsem “wan kampani nomo” we i gat “wan man nomo blong lukaot long olgeta.” (Jon 10:16) !Hemia wan bigfala risen blong ol Kristin hasban mo waef oli soem ona long olgeta!
10. ?Olsem wanem woman ‘i no strong olsem man’?
10 ?Olsem wanem ol woman ‘oli no strong olsem ol man’? Ating Pita i stap tingbaot se klosap oltaem woman i smol moa long man, mo woman i no strong long bodi olsem man. Mo tu, from we yumi no stretgud olgeta, nambawan blesing we ol woman oli gat blong karem pikinini, i save tekemaot plante paoa long bodi blong olgeta. Ol woman we oli naf blong bonem pikinini, oli stap harem nogud long bodi blong olgeta wan taem evri manis. Oli nidim spesel kea mo lav long taem ya, mo oli nidim samting ya bakegen, taem bodi blong olgeta i taed from we oli gat bel no oli jes bonem pikinini. Hasban bambae i givhan bigwan blong mekem mared blong hem i hapi sipos hem i ona long woman blong hem, mo sipos hem i luksave se woman blong hem i nidim help blong hem.
Taem Wan Long Tufala i No Folem Kristin Bilif
11. ?Olsem wanem mared i save hapi nating se tufala i gat defdefren bilif?
11 ?Olsem wanem sipos hasban mo waef tufala i gat defdefren skul from we wan long tufala i lanem Kristin trutok afta we tufala i mared be narawan i no wantem? ?Mared blong tufala i save hapi? Plante we oli stap long wan mared olsem oli talem se ‘yes.’ Nating se hasban mo waef tufala i gat defdefren bilif, be tufala i save mekem mared blong tufala i hapi, i min se mared i save stanap strong longtaem mo i save givim glad long tufala. Antap moa, long lukluk blong Jeova, nating se tufala i gat defdefren bilif be tufala i stil mared, mo tufala i stap yet olsem “wan bodi nomo.” Taswe, advaes i go long wan long tufala we i Kristin se hem i mas stap wetem narawan we i no bilif sipos narawan i agri. Sipos tufala i gat pikinini, fasin blong hemia we i folem Kristin bilif i save karem bigfala blesing long pikinini.—1 Korin 7:12-14.
12, 13. ?Advaes blong Pita i soem se ol Kristin waef oli save mekem wanem blong givhan long hasban blong olgeta we i no folem Kristin bilif?
12 Long kaen fasin, Pita i givim advaes long ol Kristin woman we hasban blong olgeta i no folem Kristin bilif. Tok blong Pita i save givhan tu long ol Kristin hasban we woman blong olgeta i no folem Kristin bilif. Pita i raetem se: “Yufala ol woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif. Taem ol man blong yufala oli luk we fasin blong yufala i klin gud, mo yufala i gat ona, hemia i naf blong pulum olgeta. Bambae i no nid blong yufala i talem wan samting long olgeta.”—1 Pita 3:1, 2.
13 Sipos woman i save eksplenem bilif blong hem long hasban blong hem long kaen fasin, hemia i gud tumas. ?Be olsem wanem sipos hasban i no wantem lesin? Hemia i jus blong hem nomo. Nating se i olsem, maet i gat rod yet blong pulum hem, from we ol gudfala Kristin fasin tu oli save givim bigfala witnes. Plante hasban, fastaem oli no intres no maet oli agensem woman blong olgeta stret. Be taem oli luk gudfala fasin blong woman blong olgeta, oli kam man we i stret blong kasem “laef ya we i no save finis.” (Ol Wok 13:48) Nating se hasban i no bilif long Kristin trutok, be maet hem i laekem tumas fasin blong woman blong hem. Ale samting ya i save mekem i gud long mared blong tufala. Wan man we woman blong hem i wan Witnes blong Jeova, i talem stret se hem i no naf blong folem ol gudfala fasin we ol Witnes oli folem. Be hem i talem se hem i “wan hapi hasban from we hem i gat wan gudfala waef.” Long wan leta we hem i raetem i go long niuspepa, hem i talem ol gudfala tok blong leftemap woman blong hem mo ol narafala Witnes.
14. ?Olsem wanem ol Kristin hasban oli save givhan long ol woman blong olgeta we oli no folem Kristin bilif?
14 Plante Kristin hasban we oli folem advaes blong Pita, fasin blong olgeta tu i bin pulum waef blong olgeta we i no folem Kristin bilif. Waef i luk we hasban blong hem i tinghevi long wok blong hem insaed long famle, i no moa westem mane long sigaret, long dring, mo long kasino, mo i no moa tok swea. Sam waef we oli no bilif, oli mitim sam memba blong Kristin kongregesen mo oli laekem tumas fasin blong ol Kristin ya blong lavlavem olgeta, nao gudfala fasin we oli luk insaed long kongregesen i pulum olgeta oli kam long Jeova.—Jon 13:34, 35.
“Ol Fasin We Oli Stap Haed Long Hat”
15, 16. ?Wanem fasin blong Kristin waef i save pulum man blong hem we i no bilif?
15 ?Wanem kaen fasin i save pulum hasban we i no bilif? Blong talem stret, hemia ol gudfala fasin we olgeta Kristin woman oli mas traehad blong wokem. Pita i talem se: “I moa gud yufala i mekem tingting blong yufala i stret long fes blong God, [“ol fasin we oli stap haed long hat blong yufala oli flasem yufala, olsem klos we oli no save kam nogud samtaem,” NW ] mo yufala i gat pis long laef blong yufala, mo yufala i kwaet woman, we fasin blong yufala i stret gud. Fasin olsem i gud tumas long fes blong God mo i no save lus. Ol woman ya bifo we oli tabu, mo oli klin gud long fes blong God, we tingting blong olgeta i stap strong long hem, olgeta ya, oltaem oli kaen long ol man blong olgeta, mo oli obei long olgeta. Long fasin ya nao oli mekem olgeta oli naes long fes blong ol man blong olgeta. Sera i mekem olsem. Hem i obei long Ebraham, mo i singaot hem, se ‘Masta blong mi.’ Mo sipos yufala i stap mekem ol gudfala fasin, mo yufala i no fraet long sam samting, bambae yufala i kam olsem we yufala i dota blong Sera.”—1 Pita 3:3-6.
16 Pita i givim advaes se, ol Kristin woman oli no mas ting se sipos oli flasemgud fes mo bodi blong olgeta, samting ya i save pulum man blong olgeta blong bilif. I moagud sipos man blong olgeta i save luk we ol tijing blong Baebol oli stap jenisim ol fasin we oli haed long hat blong olgeta. I moagud we man i luk se woman blong hem i stap mekem fasin blong hem i kam niuwan we i gud tumas. Ating bambae hem i skelem niufala fasin ya wetem fasin blong woman ya bifo, nao bambae hem i luk se hem i jenis bigwan. (Efesas 4:22-24) Bambae hem i haremgud tumas long ‘kwaet fasin mo pis’ we woman blong hem i gat, mo bambae hem i laekem woman blong hem moa. Ol fasin ya we ol hasban oli laekem tumas, oli “gud tumas long fes blong God” tu.—Kolosi 3:12.
17. ?Olsem wanem Sera i wan gudfala eksampol blong ol Kristin waef?
17 Pita i tokbaot fasin blong Sera, we i wan gudfala eksampol blong olgeta Kristin waef, nating sipos hasban blong olgeta i folem Kristin bilif no nogat. Sera i respektem Ebraham olsem hed blong hem. Long hat blong hem, hem i singaot Ebraham se ‘masta blong hem.’ (Jenesis 18:12, NW ) Be samting ya i no mekem se Sera i ting nating long hem wan, nogat. I klia se Sera i strong long saed blong spirit mo hem wan i gat bigfala bilif long Jeova. Yes, hem i wan long ‘ol witnes we oli plante we plante,’ we eksampol blong olgeta long saed blong bilif i save pulum yumi blong “mekem tingting blong yumi i strong, blong yumi resis long rod ya we i stap long fes blong yumi.” (Hibrus 11:11; 12:1) Taem Kristin waef i gat fasin olsem Sera, samting ya i no daonem hem.
18. ?Wanem ol rul we hasban mo waef i mas folem taem tufala i gat defdefren bilif?
18 Long famle we hasban mo waef i gat defdefren bilif, hasban i hed blong famle yet. Sipos hasban nao i folem Kristin bilif, bambae hem i respektem bilif blong waef blong hem, be long semtaem bambae hem i no mekem samting blong agensem prapa bilif blong hem. (Ol Wok 5:29) Mo woman ya i no mas agensem hasban blong hem olsem hed blong famle. Hem i mas ona long man blong hem from wok ya we hem i mekem, mo hem i mas stap aninit long “loa blong hasban blong hem.”—Rom 7:2, NW.
Waes Advaes Blong Baebol
19. ?Wanem sam trabol we oli save traem mared blong yumi? ?Be olsem wanem yumi save winim ol traem ya?
19 Plante samting we oli kamaot long laef blong yumi tede, oli save traem mared blong yumi. Sam hasban oli no tinghevi long wok blong olgeta insaed long famle. Sam waef oli no wantem we hasban i hed blong olgeta. Long sam mared, wan i stap tok nogud long narawan mo i stap kilim hem. Long ol Kristin mared, trabol long saed blong mane, ol mastik blong yumi wanwan, spirit blong wol ya wetem ol rabis fasin blong hem long saed blong seks mo ol narakaen tingting blong hem long saed blong samting we i moa impoten long laef, oli save traem fasin blong ol man mo woman blong stap tru. Be sipos oli folem ol rul blong Baebol, nating se laef blong olgeta i olsem wanem, bambae oli kasem blesing blong Jeova. Maet wan nomo long tufala i folem ol rul blong Baebol, be long taem ya tu, famle bambae i moagud i bitim we tufala tugeta i no folem ol rul ya. Mo tu, Jeova i lavem ol man blong hem we oli holem promes blong mared nating se oli fesem trabol insaed long mared, mo hem bambae i givhan long olgeta. Hem i no save fogetem man we i gat fasin blong stap tru.—Ol Sam 18:25; Hibrus 6:10; 1 Pita 3:12.
20. ?Pita i givim wanem advaes long olgeta Kristin?
20 Aposol Pita i givim advaes long ol mared man mo woman, nao blong finisim ol tok blong hem, hem i leftemap tingting blong olgeta, i se: “Yufala evriwan i mas gat wan tingting nomo, mo yufala i mas gat sore long yufala. Yufala i mas lavlavem yufala olsem we yufala i wan brata nomo, mo yufala i mas mekem i gud long yufala, we tingting blong yufala i stap daon. Sipos man i mekem i nogud long yufala, bambae yufala i no givimbak long hem bakegen. Taem man i tok nogud long yufala, bambae yufala i no tok nogud long hem bakegen. Yufala i mas askem long God blong hem i mekem i gud long ol man olsem, from we taem God i singaot yufala, hem i promes se bambae hem i mekem i gud long yufala.” (1 Pita 3:8, 9) !Hemia i waes advaes we i go long yumi evriwan, antap moa, long ol mared man mo woman!
?Yu Yu Tingbaot?
• ?Olsem wanem ol Kristin hasban oli save folem fasin blong Jisas?
• ?Olsem wanem ol Kristin waef oli save folem fasin blong kongregesen?
• ?Olsem wanem ol hasban oli save ona long ol woman blong olgeta?
• ?Wanem beswan rod we Kristin woman i save folem taem man blong hem i no bilif?
[Kwestin]
[Tok blong pija long pej 16]
Kristin hasban i lavem woman blong hem mo i lukaotgud long hem
[Tok blong pija long pej 16]
Kristin waef i respektem man blong hem mo i obei long hem
[Tok blong pija long pej 17]
Loa blong ol man Rom i defren long ol Kristin tijing we oli pulum hasban blong ona long woman blong hem
[Tok blong pija long pej 18]
Long “bigfala kampani,” ol man mo woman tugeta oli save kasem laef blong olwe long Paradaes
[Tok blong pija long pej 20]
Sera i luk Ebraham olsem we i masta blong hem