Tok Blong Jeova i Wan Samting We i Laef

Ol Bigfala Poen Long Buk Blong Fas Samuel

HEMIA yia 1117 B.K.T. * Klosap tri handred yia i pas nao we Josua i finisim faet blong tekem Promes Lan. Ol lida blong ol man Isrel oli kam luk profet blong Jeova blong askem wan bigfala samting long hem. Profet ya i prea long Jeova long saed blong bisnes ya mo Jeova i ansa long prea blong olgeta, i letem olgeta oli kasem samting we oli wantem. Samting ya i makem en blong taem blong ol jaj, mo stat blong taem blong ol king we oli rulum Isrel. Buk blong Fas Samuel i tokbaot ol samting we oli hapen raonabaot long taem ya we ol man Isrel oli stat blong gat ol king blong olgeta.

Olgeta we oli raetem buk ya i gat Samuel, Natan mo Gad. Fas Samuel i tokbaot ol samting we oli hapen long wan taem blong 102 yia we i stat long yia 1180 go kasem 1078 B.K.T. (1 Kronikel 29:29) Hemia stori blong fo lida blong Isrel. I gat tu we tufala i mekem wok olsem ol jaj mo nara tu we tufala i wok olsem ol king. I gat tu we tufala i obei long Jeova mo nara tu we tufala i no obei long Jeova. Mo bambae yumi luk eksampol blong tu woman mo wan soldia blong faet we i gat strong tingting. Ol eksampol olsem, oli tijim ol gudfala lesen long yumi long saed blong ol fasin mo ol wok we yumi mas mekem, mo we yumi no mas mekem. Ol samting we buk blong Fas Samuel i tokbaot i save gat paoa long ol tingting mo fasin blong yumi.​—Hibrus 4:​12.

SAMUEL I TEKEM PLES BLONG ILAE

(1 Samuel 1:1–​7:​17)

Hemia taem blong mekem Lafet blong Tekemaot Kakae long Garen, mo Hana we i blong taon ya Rama, i glad we i glad. * Jeova i ansarem ol prea blong hem mo hem i bonem wan pikinini boe. Blong holem promes ya blong hem we hem i mekem long Jeova, Hana i tekem pikinini ya blong hem, Samuel, i go blong mekem wok long ‘haos blong Jeova.’ Long ples ya Samuel ‘i stap wok blong Jeova, aninit long pris ya Ilae.’ (1 Samuel 1:​24; 2:​11) Taem Samuel i smol boe yet, Jeova i toktok long hem mo i talem long hem we bambae hem i panisim tufala pikinini blong pris ya Ilae. Taem Samuel i stap kam bigwan, olgeta laen blong Isrel oli luksave we hem i wan profet blong Jeova.

Long taem ya, ol man Filistia oli kam wanples blong mekem faet long ol laen blong Isrel. Oli kilim i ded tufala boe blong pris ya Ilae mo oli karem Bokis blong Kontrak. Taem pris Ilae, we i olfala tumas i harem nius ya, hem i ded. Hem i bin “lida blong ol man Isrel blong foti yia.” (1 Samuel 4:​18) Ol man Filistia oli kasem trabol from Bokis blong Kontrak ya, ale oli sanem Bokis ya i kambak long ol man Isrel. Nao, Samuel i kam lida, no jaj, blong ol laen blong Isrel mo kantri blong olgeta i stap long pis.

Ansa Blong Sam Kwestin Long Saed Blong Baebol:

2:​10​—?From wanem Hana i prea long Jeova blong i “givim paoa long king ya we hem i jusumaot” we long taem ya ol man Isrel oli no gat king blong olgeta? Loa blong Moses i talem finis se ol man Isrel bambae oli gat wan king blong olgeta. (Dutronome 17:​14-​18) Taem Jekob i talem las toktok blong hem bifo we hem i ded, hem i se: “Wokingstik [wan pija blong rul blong king] bambae i no save aot long Juda.” (Jenesis 49:​10, NW ) Mo tu, Jeova i talem long saed blong Sera, we hem i mama blong nesen blong Isrel, se: “Bambae mi mi mekem hem i kam stamba blong ol man blong plante ples. Mo long olgeta ya, bambae i gat ol king tu oli stap.” (Jenesis 17:16) Taswe, Hana i stap prea long saed blong wan fiuja king long taem blong hem.

3:​3 (NW )​—?Samuel i rili slip long rum ya we Bokis blong Kontrak i stap long hem? Nogat. Samuel i wan Livaet long laen blong Kohat we oli no laen blong pris. (1 Kronikel 6:​33-​38) From samting ya, hem i no gat raet blong ‘kam insaed blong luk ol tabu samting.’ (Namba 4:​17-​20) Wan ples nomo we Samuel i gat raet blong go insaed, hemia yad blong haos tapolen. Ples ya nao we ating hem i slip long hem. Mo i luk olsem se Ilae tu i slip samples insaed long yad blong haos tapolen ya. Tok ya se ples “we Bokis blong Kontrak i stap long hem,” hem i min se Samuel i slip long ples raon long haos tapolen.

 7:​7-9, 17​—Long taem bifo, Jeova nomo i jusum ples we ol man oli mas go long hem evri dei blong mekem sakrefaes. ?Ale, from wanem Samuel i mekem wan sakrefaes long Mispa mo i mekem wan olta long Rama? (Dutronome 12:​4-7, 13, 14; Josua 22:19) From we tabu Bokis blong Kontrak i no moa stap long haos tapolen long Silo, Jeova i no moa stap long ples ya tu. Taswe Samuel we hem i wan profet blong God, i givim wan sakrefaes i go long God long Mispa mo i mekem wan olta long Rama. I luk olsem se Jeova i glad nomo long wanem we Samuel i mekem.

Ol Lesen Blong Yumi:

1:​11, 12, 21-​23; 2:​19. Fasin blong Hana blong prea oltaem, gat tingting daon, gat tangkiu long kaen fasin blong Jeova, mo bigfala lav we hem i gat olsem wan mama, oli ol gudfala eksampol blong olgeta Kristin woman tede.

1:8. !Elkana i soem wan nambawan eksampol long fasin ya blong talem ol tok we i leftemap tingting blong narafala! (Job 16:5) Fastaem hem i no jajem Hana we i harem nogud be i askem wan kwestin long hem se: “?From wanem yu stap harem nogud?” Kwestin ya i pulum Hana blong talemaot ol filing blong hem. Biaen, Elkana i talem klia se hem i lavem Hana tumas nao hem i se: “?Yu no harem se hemia i gud moa i winim we yu gat ten pikinini boe blong yu?”

2:​26; 3:​5-8, 15, 19. Yumi save kam olsem wan man we “Hae God i glad moa long hem, mo ol man tu oli glad long hem” taem yumi gohed blong mekemgud wok we God i askem yumi blong mekem, taem yumi lukaot janis blong kasem ol trening long saed blong spirit, taem yumi gat ol naesfala fasin mo taem yumi soem respek long narafala.

4:​3, 4, 10. Nating sipos wan samting i tabu olsem bokis blong kontrak ya, hemia i no minim se samting ya i save protektem man long trabol. Yumi mas “lukaot gud blong no mekem wosip long ol aedol.”​—1 Jon 5:​21, NW.

FASWAN KING LONG ISREL—?HEM I MEKEM I GUD NO I NOGUD?

(1 Samuel 8:1–​15:35)

Samuel i stap tru long Jeova long olgeta laef blong hem be tufala pikinini blong hem oli no folem rod blong Jeova. Taem ol lida blong ol laen blong Isrel oli wantem gat wan king blong olgeta, Jeova i agri. Samuel i mekem olsem we Jeova i talem nao i putumap Sol, wan saesman blong laen blong Benjamin, i kam king blong olgeta. Sol i holem strong posisen blong hem olsem king taem hem i winim ol laen blong Amon.

Jonatan, boe blong King Sol i wan strong man blong faet, i winim komanda blong ol man Filistia. Nao ol man Filistia oli kam blong mekem faet long ol man Isrel wetem ol soldia blong olgeta we oli plante we oli plante. Sol i fraet we i fraet, ale, hem i girap i mekem wan sakrefaes we pris nomo i gat raet blong mekem. Jonatan i gat strong tingting, ale hem i tekem yangfala ya we i stap karem ol samting blong faet blong hem, tufala nomo i go nao Jonatan i kilim wan narafala kampani blong ol soldia blong Filistia we oli stap blokem rod. Be, strong tok we Sol i putum long ol man Isrel i mekem se oli slak we oli slak ale oli no finisimgud faet blong olgeta. Sol i stap faet long olgeta enemi blong hem “long ol ples raonabaot.” (1 Samuel 14:47) Bakegen, taem ol man Isrel oli stap faet agensem ol laen blong Amalek, Sol i no obei long Jeova. Hem i no kilim i ded olgeta samting we Jeova i talem se oli ‘mas kilim olgeta i ded.’ (Levitikas 27:​28, 29) From samting ya, Jeova i no moa wantem we Sol i king.

Ansa Blong Sam Kwestin Long Saed Blong Baebol:

9:9​—?Tok ya se: “Long taem ya, ol man oli stap singaot profet, se man blong luk vison”, i minim wanem? Maet ol tok ya oli soem se from we ol profet oli kam plante long taem blong Samuel mo long taem blong ol king blong Isrel, ale oli no moa singaot olgeta se “man blong luk vison”, be oli stat singaot olgeta se “profet.” Samuel nao i olsem faswan long ol laen blong ol profet.​—Ol Wok 3:​24.

14:​24-​32, 44, 45​—Taem Jonatan i kakae hani, hem i brekem strong tok we Sol i bin putum long ol man Isrel. ?Olsem wanem? ?Samting ya i mekem se God i no moa glad long Jonatan? I luk olsem se Jeova i no kros long Jonatan from samting ya we hem i mekem. Nogat. Faswan samting hemia se Jonatan i no bin save we papa blong hem i putum strong tok ya long olgeta. Mo tu, maet Sol i wantem soem nomo se hem i gat strong tingting blong wok no maet hem i gat rong tingting long saed blong paoa blong hem olsem king, taswe hem i putum strong tok ya, we i givim hadtaem long ol man Isrel. Jeova i no save agri long wan strong tok olsem. Nating se Jonatan i rere nomo blong kasem panis from samting we hem i mekem blong brekem strong tok ya blong papa blong hem, be oli no kilim hem i ded.

15:6​—?From wanem Sol i soem kaen fasin long ol man long laen blong Ken? Ol laen blong Ken oli ol pikinini blong palika blong Moses. Oli bin folem ol laen blong Isrel taem oli aot long Hil ya Sinae. (Namba  10:​29-​32) Taem oli kasem graon blong ol man Kenan, ol laen blong Ken oli stap smol taem wetem ol laen blong Juda. (Jajes 1:16) Nating se smol taem biaen oli stap wetem ol laen blong Amalek mo fulap narafala man bakegen, ol laen blong Ken oli frengud nomo wetem ol laen blong Isrel. Ale, from samting ya, Sol i no spolem ol laen blong Ken.

Ol Lesen Blong Yumi:

9:​21; 10:​22, 10:​27. Tingting daon we Sol i gat fastaem, taem hem i jes kam wan king, i lukaotgud long hem blong no mekem wan samting we i no waes taem sam “man we oli stap mekem hed” oli no agri blong hem i king blong olgeta. !Yes, tingting daon i wan nambawan fasin we i save lukaotgud long yumi blong yumi blokem ol krangke fasin!

12:​20, 21. Neva letem ‘ol god ya we oli rabis nomo,’ olsem fasin ya blong putum tras long man, trastem ol wol paoa, mo fasin blong wosip long ol aedol, oli pulum yu blong no moa mekem wok blong Jeova.

12:24. Wan rod blong ona oltaem long Jeova mo mekem wok blong hem wetem ful hat blong yumi hemia blong “tingbaot ol bigbigfala wok ya we hem i mekem finis” long ol man blong hem long taem bifo mo long taem blong yumi tu.

13:​10-​14; 15:​22-​25, 30. Yumi mas lukaotgud long fasin flas​—maet hemia i kamaot taem yumi no wantem obei no taem yumi tinghae tumas long yumi wan.​—Ol Proveb 11:2.

OLI JUSUM WAN YANGFALA MAN BLONG LUKAOT LONG SIPSIP BLONG I KAM KING

(1 Samuel 16:1–​31:13)

Samuel i jusumaot Deved we i kamaot long laen blong Juda blong bambae i kam king blong ol man Isrel. Smoltaem afta, Deved i yusum sling mo ston nomo blong kilim bigfala man Filistia ya Golaeat i ded. Deved mo Jonatan tufala i kam gudfala fren. Sol i putumap Deved i kam wan kapten blong ol soldia blong hem. Deved i stap win long evri ples we king i sanem hem i go blong faet, nao from samting ya ol woman long evri taon long Isrel oli stap singsing se: “King Sol i kilim plante taosen man, be Deved i kilim plante plante taosen moa, winim hem.” (1 Samuel 18:7) Sol i jalus tumas long Deved nao i lukaot rod blong kilim Deved i ded. Tri taem, Sol i wantem sperem Deved i ded, mekem se Deved i ronwe mo i go haed long ol hol blong ston.

Hem i stap haed blong plante yia mo long ol yia ya, tu taem, hem i gat janis blong kilim Sol i ded be hem i no mekem olsem. Mo tu, hem i mitim naesfala woman ya Abigel mo biaen i mared long hem. Taem ol man Filistia oli kam wanples blong go mekem faet long ol laen blong Isrel, Sol i prea long Jeova, i askem long hem se bambae hem i mekem olsem wanem. Be Jeova i no moa wantem givhan long hem. Samuel i ded finis. Ale from we Sol i fraet we i fraet, hem i girap i go luk wan woman kleva mo kleva ya i talem long hem se bambae oli kilim hem i ded long faet ya we oli mekem agensem ol man Filistia. Long taem blong faet ya, Sol i karem bigfala kil mo trifala pikinini blong hem oli ded. Long en blong stori ya, Sol i ded olsem wan man olbaot nomo. Deved i stap haed yet.

Ansa Blong Sam Kwestin Long Saed Blong Baebol:

16:​14 (NW )​—?Wanem nogud spirit i kam blong mekem King Sol i stap harem nogud? Nogud spirit ya we i blokem Sol blong gat pis long tingting blong hem hemia nogud fasin we i stap long hat mo tingting blong hem we i stap pulum hem blong wantem mekem samting nogud. Taem Jeova i karemaot tabu spirit blong hem mo i no moa givhan long Sol, Sol i stap folem nogud tingting blong hem nomo. Taswe Baebol i yusum tok ya ‘nogud spirit we Jeova i sanem’ from we Jeova i letem ol nogud tingting ya i tekem ples blong tabu spirit blong Hem.

17:55-58​—?Folem tok blong 1 Samuel 16:​17-​23, from wanem Sol i askem long komanda blong ol  soldia se Deved i pikinini blong hu? Kwestin we Sol i askem i no blong faenemaot nem blong papa blong Deved nomo. Be, hem i wantem savegud se wanem kaen man nao i papa blong boe ya we i jes mekem bigfala samting blong sapraes ya, taem i kilim bigfala man ya, Golaeat, i ded.

Ol Lesen Blong Yumi:

16:​6, 7. Bitim we yumi tinghae long wan man from we hem i naes long bodi, mo bitim we yumi jajem hem kwiktaem wetem rong tingting, yumi mas traehad blong lukluk hem olsem we Jeova i lukluk hem.

17:​47-​50 (NW). Yumi save gat strong tingting taem yumi fesem ol enemi blong yumi we oli gat fasin olsem Golaeat, oli stap mekem trabol long yumi mo oli stap agensem yumi, from we “faet hem i blong Jeova.”

18:​1, 3; 20:​41, 42. Yumi save faenem ol trufala fren long olgeta we oli laekem Jeova.

21:​12, 13. Jeova i wantem we yumi yusum tingting mo save blong yumi blong dil wetem ol hadtaem long laef blong yumi. Hem i givim Baebol long yumi blong tijim yumi blong gat waes, save, mo blong gat gudfala tingting. (Ol Proveb 1:4) Ol Kristin elda tu oli save givhan long yumi.

24:6; 26:11. !Deved i soem wan nambawan eksampol blong gat bigfala respek long olgeta we Jeova i jusumaot olgeta!

25:​23-​33. Gudfala tingting ya we Abigel i gat i wan eksampol blong yumi folem.

28:​8-​19. Ol rabis spirit oli save tekem fasin blong sam man we oli ded finis blong giaman no blong spolem man. Yumi mas lukaotgud long enikaen wok blong ol rabis spirit.​—Dutronome 18:​10-​12.

30:​23, 24. Disisen ya we i stanap long Namba 31:27 i soemaot se, long lukluk blong Jeova, olgeta we oli mekem ol wok blong givhan long narafala insaed long kongregesen, oli sas tumas. Long wanem wok we yumi mekem, be i gud yumi ‘mekem long gladhat blong yumi, olsem we yumi stap wok blong Masta blong yumi, yumi no stap wok blong ol man nomo.’​—Kolosi 3:23.

?Wanem i ‘Gud Moa i Bitim Wan Sakrefaes’?

?Wanem stamba trutok we yumi lanem long stori blong Ilae, Samuel, Sol mo Deved? Trutok ya hemia: “I tru we [God] i wantem blong yumi kilim ol nambawan sipsip blong mekem sakrefaes long hem, be hem i wantem moa blong yumi obei long tok blong hem. Fasin ya we man i stap mekem stronghed, hem i sin, i olsem we hem i stap mekem ol bisnes blong posen mo kleva. Mo fasin ya we man i stap flas, i stap leftemap hem, hem i nogud tumas, i olsem we hem i stap mekem wosip long ol narafala god.”​—1 Samuel 15:​22, 23.

!Hemia wan nambawan blesing ya we yumi gat blong joen long wok blong talemaot gud nius blong Kingdom mo pulum man i kam disaepol! Taem yumi givim long Jeova “ol yangfala buluk long maot” blong yumi, yumi mas traem bes blong yumi blong obei long ol tok blong lidim yumi we Jeova i givim tru long Tok blong hem, Baebol, mo tru long ogenaesesen blong hem we i stap long wol.​—Hosea 14:2 NW; Hibrus 13:15.

[Ol Futnot]

[Tok blong pija long pej 23]

Faswan king blong Isrel i lego tingting daon we hem i gat fastaem nao hem i kam wan man we i flas mo i tinghae long hem wan

[Tok blong pija long pej 24]

?Yumi mas trastem wanem samting taem yumi stap fesem fasin agens blong ol enemi blong yumi we oli olsem Golaeat?