‘Jeova i Stap Givhan Long Mi’

Ol Yangfala We Oli Presem Jeova Oli Harem Gud

“!MI MI wantem kasem ol beswan samting long laef!” Hemia nao samting we wan yangfala boe we i gat samwe 15 yia i wantem. ?Be wanem samting i save mekem ol yangfala i rili haremgud long laef? Baebol i givim ansa ya se: “!Taem yufala i yang yet, yufala i mas tingbaot God we i Wokem yumi!”​—Prija 12:​1, Contemporary English Version.

I no ol bigman nomo we oli save wok blong Jeova mo presem Hem. Samuel, boe blong Elkana mo Hana, hem i smol nomo taem hem i stat mekem wok blong Jeova long haos tapolen. (1 Samuel 1:​19, 20, 24; 2:11) Wan yangfala gel Hibru i soem strong bilif we hem i gat long Jeova, taem hem i talem long Neman, wan komanda blong ami blong ol man Siria, se hem i mas go luk profet Elisa blong i tekemaot sik ya leprosi long hem. (2 King 5:​2, 3) Ol Sam 148:7, 12, i pulum ol boe mo ol gel tu blong presem Jeova. * Taem Jisas i gat 12 yia, hem i intres tumas long wok blong Papa blong hem. (Luk 2:​41-49) Sam boe we oli kasem gudfala tijing long Baebol, oli singaotem Jisas taem oli luk hem long tempol, oli se: “Hosana long Laen ya blong King Deved.”​—Matiu 21:​15, 16.

Presem Jeova Tede

Long taem blong yumi, plante yangfala Witnes blong Jeova oli praod long bilif blong olgeta, mo oli no fraet blong talemaot bilif ya taem oli skul mo long sam narafala taem tu. Tingbaot tufala eksampol ya.

Long Inglan, wan tija wetem ol studen blong hem oli stap tokbaot fasin ya blong kilim bebi long bel mo sam narafala fasin we plante man oli raorao from. Stephanie we i gat 18 yia, hem i wan long ol studen ya. Tija i talem se tede, klosap olgeta man oli agri wetem fasin ya blong kilim bebi long bel. Mo hem i talem se i no gat wan risen we i save pulum wan yangfala gel blong agensem fasin ya. Taem ol studen oli agri wetem tingting ya, Stephanie i harem se hem i mas talemaot bilif blong hem we i stanap long Baebol. Hem i gat janis blong mekem samting ya taem tija i askem long hem blong talem tingting blong hem long saed blong fasin ya. Fastaem, Stephanie i seksek lelebet, be nating se i olsem, hem i tekem janis ya blong talem tingting blong Baebol. Hem i talem vas ya blong Eksodas 21:​22-24, mo hem i eksplenem se sipos i rong blong givim kil long wan pikinini we i no bon yet, i klia we God i no save agri wetem fasin ya blong kilim pikinini i ded long bel.

Tija ya, we hem i wan lida blong jos tu, i neva ridim vas ya bifo. Strong tingting we Stephanie i soemaot long ol toktok blong hem i mekem se biaen hem i gat plante gudfala storian wetem ol studen long klas blong hem. Naoia, wan gel i stap ridim ol Wajtaoa mo Wekap!, mo tu narafala gel tufala i go long distrik asembli blong ol Witnes blong Jeova, blong luk Stephanie taem hem i tekem baptaes blong givim laef blong hem i go long God.

Vareta i wan yangfala gel we i gat 6 yia mo i laef long Surinam, Saot Amerika. Hem i tekem janis blong presem God taem tija blong hem i nidim ol gudfala toktok blong Baebol blong leftemap tingting blong hem. Tija i no kam long skul blong tri dei. Mo taem hem i kambak, hem i askem long ol pikinini sipos oli save from wanem hem i no stap. Ol pikinini oli ansa se: “?Ating yu yu sik?” Be tija i talem se: “Nogat. Sista blong mi i ded, mo mi  mi harem nogud tumas. Taswe yufala i mas stap kwaet nomo.”

Long aftenun, taem mama blong Vareta i slip, Vareta i stap lukluk ol olfala magasin, mo hem i ridim ol taetel. Hem i faenem Wajtaoa blong Julae 15, 2001, we taetel blong hem se “?I Gat Laef Afta Long Ded?” Vareta i glad tumas, hem i wekemap mama blong hem, i singaot se: “!Mama, mama, yu luk! Mi faenem wan magasin blong tija blong mi, wan magasin we i tokbaot ded!” Oli sanem magasin ya long tija, wetem wan leta blong Vareta. Hem i raetem se: “Hemia i speseli blong yu. Long Paradaes bambae yu yu luk sista blong yu bakegen, from we Jeova i no save giaman. Hem i promes se bambae hem i putum paradaes, i no long heven, be long wol.” Tija i talem tangkiu tumas from ol gudfala tok ya blong Baebol we oli mekem hem i haremgud.

Wok Naoia Blong Gat Wan Gudfala Fiuja

Jeova i “stap harem gud oltaem,” mo hem i wantem se ol yangfala oli harem gud tu. (1 Timoti 1:11) Baebol i talem se: “Ol yangfala, yufala i mas glad long yang taem blong yufala. Yufala i mas harem gud taem yufala i yang yet.” (Prija 11:​9, Today’s English Version) Jeova i luk ol gudfala samting mo ol nogud samting we yumi mekem tede, be hem i luksave tu ol frut we oli save kamaot long fiuja. Taswe Baebol i givim advaes ya long ol yangfala se: “God i mekem yumi, mo naoia we yufala i yangfala yet, oltaem yufala i mas tingbaot hem. I nogud yufala, i stap wet go kasem taem ya we evri dei, ol trabol bambae oli stap kam kasem yufala, mo evri yia, bambae yufala i stap talem se, ‘Mi mi no glad nating long laef ya.’ ”​—Prija 12:1.

Yes, Jeova i wantem we ol yangfala oli harem gud we oli harem gud long laef we hem i givim long olgeta olsem wan sas presen. Sipos ol yangfala oli tingbaot God mo oli presem hem, oli save haremgud mo karem gudfala frut long laef blong olgeta. Nating se oli fesem sam hadtaem, be oltaem oli save talem wetem strong tingting se: ‘Jeova i stap givhan long mi.’​—Ol Sam 121:2.

[Futnot]

[Tok blong makem poen pija long pej 9]

“Yufala i mas presem Hae God, . . . yufala ol gel wetem ol boe.”​—OL SAM 148:​7, 12

[Bokis blong pija long pej 8

JEOVA I GIVHAN LONG OL YANGFALA

‘Mi mi putum tingting blong mi, i stap long Jeova nomo. I stat bifo, taem mi mi yangfala yet, mi stap trastem hem.’—Ol Sam 71:5.

“Oltaem [God] i stap mekem mi mi harem gud long ol gudgudfala samting ya we hem i stap givim long mi, mo i mekem mi mi stap yang, mi stap strong oltaem, olsem bigfala pijin ya igel.”​—Ol Sam 103:5.