‘Olsem Wan Gudfala Ston We Kala Blong Hem i Red’

APOSOL Jon i luk wan vison blong wan bigfala jea blong king long heven. Man we i sidaon long jea ya i “olsem ston ya jaspa.” Mo Hem i olsem ‘wan gudfala ston we kala blong hem i red.’ (Revelesen 4:​2, 3, NW ) ?Wanem tufala ston ya?

Tufala ston ya oli no olsem ol ston ya we laet i no save pastru long olgeta mo we oli stap saen antap nomo, nogat. Grik tok ya we long vas ya oli tanem i kam “jaspa,” i wan tok we ol man long taem bifo oli yusum blong tokbaot ol ston we oli gat defdefren kala, olsem ol gudfala ston ya we oli klia olsem glas. Archibald Thomas Robertson i talem tok ya long buk blong hem (Word Pictures in the New Testament) se “ston ya jaspa” we Revelesen 4:3 i tokbaot, “hem i no jaspa ya we tede yumi stap pem long wan jip praes nomo.” Nogat. Mo tu, long buk blong Revelesen, Jon i tokbaot bigfala taon ya Jerusalem we i stap long heven, i se: “Taon ya i stap saen olsem wan gudfala ston, olsem gudfala ston ya jaspa we i klia gud, i olsem glas.” (Revelesen 21:​10, 11) Ol ston we Jon i tokbaot oli klia gud olsem glas mo laet i save saen i pastru long olgeta.

Man ya we i stap sidaon long jea blong king we Jon i luk long vison blong hem, hemia Jeova God, Man ya we glori blong hem i saen moa i bitim ol narafala samting long heven mo wol. Hem wan nomo we fasin blong hem i klin we i klin mo i tabu we i tabu tumas. I no gat wan man we i olsem hem. Aposol Jon i talem wan samting we i laenap wetem samting ya, i se: “God hem i olsem delaet, i no gat tudak nating i stap long hem.” (1 Jon 1:5) Taswe, Jon i talem long ol Kristin brata sista blong hem se oli mas ‘mekem fasin blong olgeta i klin, olsem we Jeova i klin.’​—1 Jon 3:​3, NW.

?Yumi mas mekem wanem blong yumi stap klin long ae blong God? Yumi mas bilif long blad blong Kraes we i ron blong fogivim ol sin blong yumi. Yumi mas stadi oltaem long Baebol mo mekem laef blong yumi i laenap wetem ol tijing blong Baebol from we long rod ya nao bambae yumi stap “wokbaot long delaet” oltaem.​—1 Jon 1:7.