Wan Kwestin

?Olsem wanem? ?Taem Deved mo ol man blong hem oli kakae ol bred ya we ol pris oli givim i go long God finis, hemia i soemaot we taem man i stap long trabol, hem i save brekem loa blong God we i no kasem panis from?​—1 Samuel 21:​1-6.

Folem ol tok blong Levitikas 24:​5-9, ol pris nomo oli gat raet blong kakae ol bred ya we ol pris oli givim i go long God finis mo we oli stap jenisim evri Sabat dei. Bigfala tingting we loa ya i stanap long hem hemia se ol bred ya oli tabu mo oli olsem kakae blong ol man we oli stap mekem wok blong God​—hemia ol pris. Taswe sipos oli givim bred ya long wan wokman olbaot nomo no oli kakae bred ya jes blong haremgud, hemia i no stret. Be, pris ya Ahimelek i no mekem wan sin nating taem hem i givim bred ya long Deved mo ol man blong hem blong oli kakae.

Ahimelek i ting se Deved i stap mekem wan spesel wok blong King Sol. Deved mo ol man blong hem oli hanggri. Ale, Ahimelek i tekem disisen se olgeta ya oli klin nomo folem loa. I tru se taem oli kakae ol bred ya we ol pris oli givim i go long God finis, oli stap mekem wan samting we i no folem loa blong God, be fasin ya i laenap tu wetem wanem we ol pris oli mas mekem wetem bred ya. Samting ya nao i mekem we Ahimelek i jenisim tingting blong hem long rul ya. Jisas Kraes tu i yusum stori ya blong soemaot rong tingting we ol Farisi oli gat long saed blong loa blong Sabat dei nao oli mekem i strong tumas long ol man.​—Matiu 12:​1-8.

Be samting we yumi jes tokbaot i no min se i oraet nomo sipos man i brekem loa blong God taem hem i kasem hadtaem long laef blong hem. Nogat. Taem ol strong man blong faet blong Isrel oli go mekem faet long ol man Filistia, oli fesem wan hadtaem tu. King Sol i bin talem long olgeta se: “I tabu blong man i kakae tede, gogo mi mi kilim ol enemi blong mi blong givimbak olgeta trabol we oli mekem long mi.” Baebol i talem se: “Long dei ya, olgeta oli winimgud ol enemi ya blong olgeta.” Ol soldia oli taed tumas from we oli faet be oli no kakae, ale, ‘oli resis i go long ol sipsip mo ol buluk, oli kilim long weples oli faenem, mo oli no wet blong letem blad blong mit ya i ronaot fastaem, oli gohed, oli rusum, oli kakae.’ (1 Samuel 14:​24, 31-33) Olgeta oli sin agens long Jeova taem oli brekem loa blong hem long saed blong blad. I gat wan rod nomo we God i talem se i stret blong yusum blad, hemia ‘blong tekemaot sin,’ be wanem we ol man ya oli mekem i no laenap wetem samting ya. (Levitikas 17:​10-​12; Jenesis 9:​3, 4) Be from we Jeova i gat fasin sore, ale, hem i akseptem spesel sakrefaes blong olgeta ya we oli mekem sin.​—1 Samuel 14:​34, 35.

Yes, Jeova i wantem we yumi obei long ol loa blong hem oltaem, nomata wanem samting i hapen long laef blong yumi. Aposol Jon i talem se: “Sipos yumi lavem God, hemia i min se yumi stap folem ol tok blong hem.”​—1 Jon 5:3.

[Tok blong pija long pej 30]

Oli putum niufala bred evri Sabat dei insaed long Haos Tapolen