Yumi No Moa Laef Blong Mekem Ol Wok Blong Yumi Nomo
Yumi No Moa Laef Blong Mekem Ol Wok Blong Yumi Nomo
“[Kraes] i ded blong sevem olgeta man, blong bambae ol man we oli laef . . . oli no moa laef blong mekem ol wok blong olgeta nomo.”—2 KORIN 5:15.
1, 2. ?Wanem loa blong Baebol we i pulum ol man blong Jisas long faswan handred yia blong oli no tingbaot olgeta nomo?
LONG laswan naet we Jisas i stap long wol, sam aoa nomo bifo we hem i givim laef blong hem blong pemaot olgeta man we bambae oli bilif long hem, hem i talem plante impoten samting long ol aposol we oli stap tru long hem. Wan long ol samting ya, hemia wan loa we oli mas folem blong soemaot se oli man blong hem. Hem i se: “Mi mi givim wan niufala loa long yufala se, ‘Yufala i mas lavlavem yufala.’ Olsem we mi mi lavem yufala, ale long sem fasin, yufala i mas lavlavem yufala. Nao from we yufala i stap lavlavem yufala, bambae olgeta man oli luksave se yufala i man blong mi.”—Jon 13:34, 35.
2 Ol trufala Kristin oli mas rere blong lego samting we olgeta nomo oli wantem, blong soem lav long narafala. Oli mas tingbaot samting we ol Kristin brata sista blong olgeta oli nidim fastaem long ol samting we olgeta oli nidim. Oli mas rere tu blong ‘lusum laef blong olgeta blong oli sevem ol fren blong olgeta.’ (Jon 15:13) ?Taem ol faswan Kristin oli harem loa ya we Jisas i talem, oli mekem wanem? Long wan buk (Apology) we Tertullian i raetem afta long yia 100 K.T. mo we plante man oli save long hem, hem i tokbaot samting we samfala oli talem long saed blong ol Kristin. Oli se: ‘Yu luk olsem wanem oli lavlavem olgeta. Mo oli rere tu blong ded from ol Kristin brata mo sista blong olgeta.’
3, 4. (a) ?From wanem yumi mas traehad blong winim fasin ya blong tingbaot yumi nomo? (b) ?Long stadi ya, bambae yumi tokbaot wanem?
3 Tede tu, yumi mas ‘givgivhan long yumi long ol trabol blong yumi. Long fasin ya, bambae yumi save mekem ol samting we loa blong Kraes i talem.’ (Galesia 6:2) Wan bigfala samting we i blokem yumi blong yumi no obei long loa ya blong Kraes, hemia fasin blong tingbaot yumi wan nomo. Sipos yumi tingbaot yumi nomo, yumi no save ‘lavem Hae God ya we i God blong yumi long olgeta hat blong yumi, mo long olgeta laef blong yumi, mo long olgeta tingting blong yumi.’ Mo yumi no save ‘lavem ol man we oli stap raonabaot long yumi, yumi no mekem i gud long olgeta, olsem we yumi stap mekem i gud long yumi.’ (Matiu 22:37-39) From we yumi sinman, yumi bon wetem tingting ya blong lukaotgud long yumi wan fastaem. Samting we i pulum yumi moa blong tingbaot yumi wan, hemia ol wari blong laef, fasin blong traem winim narafala we yumi luk evri dei long ples blong wok mo long skul, mo hadwok we yumi mas mekem blong kasem ol samting we yumi nidim blong laef. Tede, fasin ya i stap kam antap moa. Aposol Pol i givim woning se: “Long taem ya we bambae i klosap long Lasdei, . . . ol man oli save tingbaot olgeta nomo.”—2 Timoti 3:1, 2.
4 Klosap long en blong laef blong Jisas long wol, hem i talem tri rod long ol disaepol blong hem, blong givhan long olgeta blong winim fasin ya blong tingbaot olgeta nomo. ?Wanem trifala rod ya? ?Mo olsem wanem advaes ya blong Jisas i save givhan long yumi?
!Gudfala Meresin Blong Sik Ya!
5. ?Taem Jisas i stap prij long not blong Galili, hem i talem wanem long ol disaepol blong hem? ?From wanem tok blong hem i mekem olgeta oli sek?
5 Jisas i stap prij long not blong Galili, klosap long taon ya Sisaria Filipae. Hemia wan eria we i kwaet mo i naes, wan gudfala ples blong spel we i no pulum man nating blong tingbaot fasin blong lego samting we hem nomo i wantem. Be taem Jisas i stap long ples ya wetem ol disaepol blong hem, hem i talem long olgeta se “bambae hem i mas go long Jerusalem, mo ol elda blong ol laen blong Isrel, wetem ol jif pris mo ol tija blong Loa bambae oli mekem hem i harem nogud long plante samting. Bambae olgeta oli kilim hem i ded, mo long namba tri dei, bambae God i mekem hem i laef bakegen.” (Matiu 16:21) !Ating tok ya i mekem ol disaepol blong Jisas oli sek! !Kam kasem taem ya, oli bin ting se Jisas we i Lida blong olgeta bambae i setemap Kingdom blong hem long wol ya!—Luk 19:11; Ol Wok 1:6.
6. ?From wanem Jisas i tok strong long Pita?
6 Wantaem nomo, Pita i “tekem [Jisas] i go long saed blong rod, i stat tok strong blong blokem hem. Hem i talem se, ‘Masta, God i mas blokem samting ya [“yu no mas spolem yu wan,” NW ]. Samting ya i no save kamtru long yu olsem.’ ” ?Jisas i talem wanem? Hem i tanem baksaed long Pita, “i talem se, ‘Setan. Yu gowe long mi. Yu yu stap traem blong blokem mi nomo. Tingting blong yu i no tingting blong God, i tingting blong man nomo.’ ” !Tingting blong Jisas i defren olgeta long tingting blong Pita! Jisas i rere blong lego samting we hem i wantem mo folem rod we God i wantem—we bambae i lidim hem blong ded long pos sam manis biaen. Pita i ting se i moagud blong folem rod we i isi. Hem i se: “Yu no mas spolem yu wan.” I tru, Pita i wantem mekem i gud long Jisas, be Jisas i tok strong long hem, from we Pita i letem Setan i gat paoa long tingting blong hem. Pita i gat ‘tingting blong man, i no tingting blong God.’—Matiu 16:22, 23.
7. ?Long Matiu 16:24, Jisas i talem wanem rod we ol man blong hem oli mas folem?
7 Tede tu, yumi harem ol tok we i klosap sem mak long tok blong Pita. Plante taem, ol man blong wol oli talem se ‘yu no mas spolem yu wan’ no ‘yu mas folem rod we i isi.’ Be tingting we Jisas i talem, hem i defren olgeta. Hem i talem long ol disaepol blong hem se: “Man we i wantem kam biaen long mi, hem i mas blokem ol samting we hem nomo i wantem, nao i mas karem [“pos,” NW ] blong hem, i biaen long mi.” (Matiu 16:24) Wan buk (The New Interpreter’s Bible) i eksplenem se: “Jisas i no talem tok ya long ol man olbaot, blong singaot olgeta oli kam disaepol blong hem, nogat. Tok ya i go long olgeta we oli biaen long Jisas finis, blong oli tingbaot wok blong olgeta olsem ol disaepol blong hem.” Trifala rod we Jisas i talem long vas ya, hemia ol rod we olgeta man blong bilif oli mas folem. Naoia, bambae yumi tokbaot trifala rod ya wanwan.
8. Eksplenem mining blong tok ya se yumi blokem ol samting we yumi nomo i wantem.
8 Fastaem, yumi mas blokem ol samting we yumi nomo i wantem. Long olfala Grik lanwis, mining blong tok ya hemia se yumi mas rere blong talem ‘no’ long ol samting we yumi nomo i wantem, mo long ol fasin we oli blong mekem i isi long yumi wan. Taem yumi blokem ol samting we yumi nomo i wantem, hemia i no min se wanwan taem nomo yumi lego samting we yumi save haremgud long hem, nogat. Mo tok ya i no minim tu se yumi mas mekem i strong bitim mak long yumi wan mo spolem yumi wan oltaem. Tok ya i minim se laef blong yumi i no moa ‘blong yumi,’ be yumi rere blong givim ful laef blong yumi mo evri samting we i joen wetem laef ya i go long Jeova. (1 Korin 6:19, 20) Yumi no laef blong mekem samting we yumi wan i wantem, be yumi laef blong mekem samting we God i wantem. Taem yumi blokem ol samting we yumi nomo i wantem, yumi gat strong tingting blong mekem samting we God i wantem, nating se samting ya i defren long samting we yumi wantem. Taem yumi givim laef blong yumi i go long hem mo tekem baptaes, yumi soem se yumi wantem yusum laef blong yumi blong ona long hem nomo. Biaen, yumi wok had blong holem promes ya gogo kasem we yumi ded.
9. (a) ?Taem Jisas i stap long wol, pos i saen blong wanem samting? (b) ?Long wanem fasin yumi karem pos blong yumi?
9 Seken samting se, yumi mas karem pos blong yumi. Long faswan handred yia, pos i wan saen se man bambae i safa, i sem, mo i ded. Klosap oltaem nomo oli yusum pos blong hangem ol rabis man long hem, hemia ol man we oli panisim olgeta from ol nogud samting we oli mekem. Jisas i yusum tok ya blong soem se ol Kristin oli mas rere blong kasem trabol from ol man we oli agensem olgeta, oli ting rabis long olgeta, mo maet oli kilim olgeta i ded tu, from we ol Kristin ya oli no folem fasin blong wol ya. (Jon 15:18-20) Ol Kristin rul we yumi folem, oli mekem se yumi defren long ol man blong wol, taswe oli ‘tok nogud long yumi.’ (1 Pita 4:4) Samting ya i save hapen long skul, long ples blong wok, mo insaed long famle tu. (Luk 9:23) Nating se i kamaot weples, be yumi rere blong stanap strong taem ol man blong wol oli ting rabis long yumi. Yumi mekem olsem from we yumi no moa laef blong mekem ol wok blong yumi nomo. Jisas i talem se: “Yufala we ol man oli stap spolem nem blong yufala, mo oli stap mekem i nogud long yufala, mo oli stap giaman, oli stap talem ol rabis tok agens long yufala from we yufala i man blong mi, yufala i save harem gud. Yufala i mas harem gud yufala i glad, from we i gat bigfala pei blong yufala i stap long heven.” (Matiu 5:11, 12) Tru ya, i moa impoten we yumi mekem God i glad.
10. ?Olsem wanem yumi biaen long Jisas?
10 Namba tri samting we Jisas Kraes i talem, hemia se yumi mas biaen long hem. Buk blong W. E. Vine (An Expository Dictionary of New Testament Words) i talem mining blong tok ya ‘biaen’ long olfala lanwis, hemia se yumi kampani wetem narawan—“yumi wokbaot long semfala rod.” Fas Jon 2:6 i talem se: “Sipos wan man i stap talem se laef blong hem i stap joen gud long laef blong [God], fasin blong hem i mas stret gud wetem fasin blong [Kraes].” ?Jisas i gat wanem fasin? Jisas i lavem tumas Papa blong hem long heven mo ol disaepol blong hem, mekem se hem i no gat taem blong tingbaot hem wan nomo. Pol i raetem se: “Kraes i no folem ol fasin we hem nomo i wantem.” (Rom 15:3) Nating se Jisas i taed no i hanggri, be hem i tingbaot yet, samting we ol narafala oli nidim, i no samting we hem i nidim. (Mak 6:31-34) Mo tu, Jisas i wok strong long wok blong talemaot Kingdom mo tijim ol man. Taswe, i stret nomo we yumi folem eksampol blong hem mo wok strong blong ‘pulum ol man oli kam man blong hem mo tijim olgeta blong oli folem olgeta tok ya we hem i givim finis long yumi.’ (Matiu 28:19, 20) Long olgeta samting ya, Kraes i soemaot rod long yumi, mo yumi mas “biaen long hem.”—1 Pita 2:21.
11. ?From wanem i impoten we yumi blokem ol samting we yumi nomo i wantem, karem pos blong yumi, mo biaen long Jisas Kraes?
11 I impoten tumas we yumi blokem ol samting we yumi nomo i wantem, yumi karem pos blong yumi, mo yumi biaen long Jisas we i soemaot rod long yumi. Sipos yumi mekem olsem, yumi save winim fasin ya blong tingbaot yumi wan nomo—wan fasin we i mekem se yumi no gat lav ya we i pulum yumi blong livim samting we yumi nomo i wantem. Antap moa, Jisas i talem se: “Man we i wantem sevem laef blong hem, hem bambae i lusum laef blong hem, be man we i lusum laef blong hem from mi, hem bambae i kasem laef blong hem. ?Sipos wan man i kasem olgeta samting blong wol, be i lusum laef blong hem, hem bambae i save winim wanem? Sipos laef blong man i lus, bambae hem i no save givim wan samting nating long God blong pembak laef blong hem bakegen.”—Matiu 16:25, 26.
Yumi No Save Wok Blong Tu Masta Wantaem
12, 13. (a) ?Yangfala haeman ya we i askem advaes blong Jisas i wantem save wanem? (b) ?Jisas i givim wanem advaes long yangfala man ya, mo from wanem?
12 Sam manis afta we Jisas i makemgud long tingting blong ol disaepol blong hem se oli mas blokem ol samting we olgeta nomo oli wantem, wan yangfala haeman we i rij, i kam luk Jisas, i askem long hem se: “?Tija, mi mi mas mekem wanem gudfala wok blong bambae mi save kasem laef ya we i no save finis?” Jisas i talem long hem se hem i mas ‘obei long ol loa blong God,’ nao hem i talem sam long ol loa ya. Yangfala man ya i se: “Olgeta loa ya, mi mi stap obei long olgeta evriwan.” I luk olsem we man ya i talem tru, ating hem i mekem bes blong hem blong obei long ol komanmen long Loa. Ale hem i askem bakegen i se: “?Wanem samting moa i stap, we mi mi no mekem yet?” Nao Jisas i givim spesel janis long yangfala man ya i se: “Sipos yu wantem kam stret gud olgeta, [“olgeta fasin blong yu oli stret,” New American Standard Bible] yu go, yu salemaot olgeta samting blong yu, yu tekem mane blong hem, yu go givim long ol puaman, nao bambae yu yu gat plante samting blong yu long heven. Mo yu kam, yu biaen long mi, yu man blong mi.”—Matiu 19:16-21.
13 Jisas i luksave se sipos yangfala man ya i wantem mekem wok blong Jeova long olgeta laef blong hem, hem i mas sakemaot samting we i stap pulum hem tumas—hemia ol sas samting blong hem. Ol trufala disaepol blong Kraes oli no save wok blong tu masta wantaem. Oli ‘no save mekem we God i bos blong olgeta, be long semtaem nomo, mane tu i bos blong olgeta.’ (Matiu 6:24) ‘Ae blong olgeta i mas klia gud,’ i mas lukluk i go nomo long ol samting long saed blong spirit. (Matiu 6:22, Nyutesteman wetem Ol Sam long Bislama) Taem man i givim olgeta samting blong hem i go long ol puaman, hem i lego samting we hem i laekem mo samting we hem i wantem. Jisas i talem long yangfala haeman ya we i rij se sipos hem i lego ol sas samting blong hem, hem i save hivimap ol gudfala samting long heven—we i save givim laef blong olwe long hem mo janis blong rul wetem Kraes long heven long fiuja. Be yangfala man ya i no rere blong blokem ol samting we hem nomo i wantem. “Hem i gowe long Jisas we i harem nogud tumas, from we hem i gat plante samting.” (Matiu 19:22) Be sam narafala man we oli biaen long Jisas, oli gat defren fasin.
14. ?Fo man blong pulum fis oli mekem wanem taem Jisas i singaot fofala blong biaen long hem?
14 Samwe long tu yia bifo long taem ya, Jisas i bin givim semfala janis long fo man blong pulum fis, Pita, Andru, Jemes, mo Jon. Long taem ya, tu long olgeta i stap pulum fis, mo tu narawan i stap somap net blong olgeta. Jisas i talem long fofala ya se: ‘Yufala i biaen long mi, yufala i kam man blong mi. Bambae mi mi mekem yufala i man blong pulum man.’ Biaen, fofala i livim wok ya blong pulum fis, fofala i biaen long Jisas gogo kasem laef blong olgeta i finis.—Matiu 4:18-22.
15. ?Wan Witnes blong Jeova long taem blong yumi, i lego wanem samting blong folem Jisas?
15 Plante Kristin tede oli folem eksampol blong fofala man ya blong pulum fis, oli no folem fasin blong yangfala haeman ya we i rij. Ol Kristin ya oli lego janis blong kasem mane mo haenem long wol ya, blong oli save mekem wok blong Jeova. Wan long olgeta ya, Deborah, i talem se: “Taem mi mi gat 22 yia blong mi, mi mas tekem wan bigfala desisen. Long taem ya, mi bin stadi Baebol sikis manis finis, mo mi kasem mak we mi wantem givim laef blong mi i go long Jeova. Be famle blong mi i agensem mi fulwan. Olgeta ya oli rij we i rij, mo oli harem se sipos mi mi kam wan Witnes, bambae mi mekem bigfala sem long famle. Oli talem se mi mi gat 24 aoa blong jusum sipos mi wantem wan gudfala laef wetem plante mane no mi wantem trutok. Sipos mi no finis wetem ol Witnes, bambae oli mekem se mi no kasem wan samting nating, taem papa mama blong mi i ded. Jeova i givhan long mi blong tekem stret desisen, mo i givim paoa long mi blong folem desisen ya. Naoia, mi mi mekem wok blong prij fultaem blong 42 yia finis, mo mi mi no harem nogud nating long desisen ya we mi bin tekem. Mi mi tanem baksaed long fasin blong laef we mi tingbaot mi wan nomo, mo fasin blong ronem ol pleplei blong haremgud, ale laef blong mi i defren long ol famle blong mi. Olgeta oli harem nogud nomo, olsem we laef blong olgeta i blong nating nomo. Mi wetem man blong mi mitufala i bin givhan long bitim handred man blong oli kasem save long trutok. Long tingting blong mi, ol pikinini ya blong mitufala long saed blong spirit, oli gud moa i bitim bigfala mane mo plante sas samting.” Plante milian narafala Witnes blong Jeova tu oli gat semfala filing ya. ?Olsem wanem long yu?
16. ?Olsem wanem yumi save soemaot se yumi no moa laef blong mekem ol wok blong yumi nomo?
16 Tingting ya blong no moa laef blong mekem ol wok blong yumi nomo, i pulum plante taosen Witnes blong Jeova blong oli mekem wok blong paenia, no talemaot Kingdom fultaem. Sam narafala Witnes oli no save mekem wok blong paenia from sam samting long laef blong olgeta we i blokem olgeta, be oli wokem wan tingting we i olsem ol paenia nomo mo oli mekem bes blong olgeta long wok blong talemaot Kingdom. Ol papa mama we oli lego sam samting we olgeta nomo oli wantem blong tijim ol pikinini blong olgeta long saed blong spirit, olgeta tu oli soemaot gudfala tingting ya. Yumi evriwan i save soemaot long wan rod olsem, se yumi putum ol wok blong Kingdom i stap long fasples long laef blong yumi.—Matiu 6:33.
?Lav Blong Hu i Holemtaet Yumi?
17. ?Wanem i save pulum yumi blong lego samting we yumi nomo i wantem?
17 I no isi blong gat lav ya we i pulum yumi blong lego samting we yumi nomo i wantem. Be tingbaot wanem samting i save pusum yumi blong folem rod ya. Pol i raetem se: “Mifala i mekem olsem, from we Kraes i lavem mifala tumas, nao fasin ya blong hem i stap holemtaet mifala. Mifala i luksave se hem wan nomo we hem i ded blong sevem olgeta man. . . . Hem i ded blong sevem olgeta man, blong bambae ol man we oli laef wetem hem, oli no moa laef blong mekem ol wok blong olgeta nomo. Olgeta oli laef blong mekem ol wok blong hem, we hem i ded, mo i laef bakegen, blong i sevem olgeta.” (2 Korin 5:14, 15) Fasin ya we Kraes i lavem yumi i mas holemtaet yumi, i mas pulum yumi blong yumi no moa wantem laef blong mekem ol wok blong yumi nomo. !Lav ya i gat bigfala paoa! From we Kraes i ded blong sevem yumi, yumi mas harem se i stret nomo we yumi laef blong mekem wok blong hem. Tingbaot: Tangkiu we yumi gat from bigfala lav we God mo Kraes i soemaot long yumi, i pusum yumi finis blong givim laef blong yumi i go long God mo blong kam ol disaepol blong Kraes.—Jon 3:16; 1 Jon 4:10, 11.
18. ?From wanem i no blong nating nomo we yumi lego samting we yumi nomo i wantem?
18 ?Olsem wanem? ?I blong nating nomo we yumi no moa laef blong mekem ol wok blong yumi? Nogat. Afta we yangfala haeman ya we i rij i gowe long Jisas, Pita i talem long Jisas se: “?Be olsem wanem long mifala? Mifala i bin lego evri samting blong mifala, blong kam biaen long yu. ?Bambae mifala i kasem wanem?” (Matiu 19:27) Tru ya, Pita mo ol narafala aposol oli lego evri samting blong folem Jisas. ?Bambae oli kasem wanem blesing? Faswan blesing we Jisas i talem long olgeta, hemia se oli save rul wetem hem long heven. (Matiu 19:28) Long semfala storian, Jisas i tokbaot ol blesing we olgeta man we oli biaen long hem oli save kasem. Hem i se: “Man we i tinghevi long mi, mo long gud nius blong mi, . . . wanem samting we hem i lego, olsem haos blong hem, no brata no sista blong hem, no mama blong hem, no pikinini blong hem, no graon blong hem, bambae hem i save kasem wan handred taem antap bakegen [long wol ya] . . . [mo] long niufala wol ya we bambae i kam, hem bambae i gat laef we i no save finis.” (Mak 10:29, 30) Yumi kasem plante moa samting i bitim samting we yumi lego. Ol papa, ol mama, ol brata, ol sista, mo ol pikinini blong yumi long saed blong spirit, oli moa gud i bitim eni samting we yumi lego from Kingdom. ?Yu ting se hu nao i gat beswan laef—Pita no yangfala haeman ya we i rij? Yes, yumi save se Pita i haremgud moa.
19. (a) ?Man we i rili haremgud, hem i gat wanem fasin? (b) ?Long nekis stadi, bambae yumi tokbaot wanem?
19 Long ol tok mo wok blong Jisas, hem i soemaot se man we i haremgud hemia man we i givim samting long narafala mo i mekem wok blong narafala, i no man we i tingbaot hem wan nomo. (Matiu 20:28; Ol Wok 20:35) Taem yumi no moa laef blong mekem ol wok blong yumi nomo be yumi biaen long Kraes, yumi haremgud tumas long laef naoia, mo yumi gat janis blong kasem laef we i no save finis long fiuja. I tru, taem yumi blokem ol samting we yumi nomo i wantem, yumi putum yumi long han blong Jeova, yumi blong hem nomo. Yumi kam slef blong God. ?Olsem wanem wok olsem slef blong God i save mekem yumi haremgud? ?Olsem wanem wok ya i save gat paoa long ol desisen we yumi mekem long laef blong yumi? Nekis stadi bambae i ansa long tufala kwestin ya.
?Yu Yu Tingbaot?
• ?From wanem yumi mas winim fasin ya blong tingbaot yumi wan nomo?
• ?I minim wanem blong blokem ol samting we yumi nomo i wantem, karem pos blong yumi, mo biaen long Jisas?
• ?Wanem i save pusum yumi blong no moa laef blong mekem ol wok blong yumi nomo?
• ?From wanem i no blong nating nomo we yumi lego samting we yumi nomo i wantem?
[Kwestin]
[Tok blong pija long pej 11]
‘Masta, yu no mas spolem yu wan olsem’
[Tok blong pija long pej 13]
?Wanem i mekem se yangfala haeman ya i no wantem biaen long Jisas?
[Tok blong pija long pej 15]
Lav i pusum ol Witnes blong Jeova blong oli wok strong blong talemaot Kingdom