Ol Papa Mama, Protektem Sas Presen Blong Yufala

“Waes i blong lukaotgud long man . . . waes i save sevem laef blong man.”—PRIJA 7:​12, NW.

1. ?From wanem ol papa mama oli mas tingbaot ol pikinini blong olgeta olsem wan presen?

 OL MAN mo woman oli naf blong mekem wan niufala pikinini i kam long wol we i luk olsem tufala mo i gat ol fasin olsem tufala. Baebol i talem se ol pikinini ya oli “wan presen we Hae God i givim long yumi.” (Ol Sam 127:3) Jeova i Stamba blong laef, taswe taem man mo woman i gat pikinini, Jeova i stap putum wan samting we i rili blong hem i go long han blong tufala. (Ol Sam 36:9) ?Ol papa mama, wanem tingting blong yufala long sas presen ya we God i givim?

2. ?Taem Manoa i save se bambae hem i kam wan papa, hem i mekem wanem?

² Taem yumi kasem wan presen olsem, yumi mas tinghae long hem mo akseptem wetem tingting daon. Bitim 3,000 yia bifo, wan man Isrel we nem blong hem Manoa i soemaot fasin ya taem enjel i talem long woman blong hem se bambae tufala i gat pikinini. Afta we Manoa i save long gudfala nius ya, hem i prea long God se: “Hae God. Plis yu sanem man ya blong yu we yu sanem i kam fastaem, i kambak long mitufala bakegen. I gud hem i kam talemaot long mitufala ol samting ya we bambae mitufala i mas mekem long boe ya, taem hem i bon.” (Jajes 13:8) ?Ol papa mama, eksampol blong Manoa i save tijim yufala long wanem samting?

?From Wanem Yumi Nidim Help Blong God Tede?

3. ?From wanem ol papa mama oli nidim help blong God moa tede blong oli lukaotgud long ol pikinini blong olgeta?

³ Naoia, bitim olgeta yia bifo, ol papa mama oli nidim help blong Jeova blong oli lukaotgud long ol pikinini blong olgeta. ?From wanem? From we olgeta long heven oli sakemaot Setan wetem ol enjel blong hem finis, oli kamdaon long wol. Baebol i givim woning ya se: “Sore tumas long yu, graon, mo long yu, solwota, from we Setan i kamdaon finis long yufala. Mo hem i kros tumas, from we hem i save se i gat smol taem nomo blong hem i stap yet.” (Revelesen 12:​7-9, 12) Baebol i talem tu se Setan i olsem “wan laeon we i stap singaot bigwan,” mo se hem i “stap lukaot man blong i kakae.” (1 Pita 5:8) Oltaem ol laeon oli ronem ol anamol we oli no strong, maet oli yangfala nomo. Taswe ol Kristin papa mama oli waes sipos oli lukaot help blong Jeova blong lidim olgeta long wok ya blong protektem ol pikinini blong olgeta. ?Yufala i stap traehad blong mekemgud wok ya?

4. (a) ?Sipos wan laeon i stap wokbaot long ples blong yufala, bambae yufala i tingbaot wanem fastaem? (b) ?Ol pikinini oli nidim wanem samting we i save protektem olgeta?

 ⁴ Sipos yufala i save se wan laeon i stap wokbaot long ples blong yufala, ating faswan samting we bambae yufala i tingbaot i blong protektem ol pikinini blong yufala. Setan i olsem wan laeon we i wantem spolem ol narafala anamol mo kakae olgeta. Setan i stap traehad blong mekem ol man blong God oli kam nogud, nao God bambae i no moa glad long olgeta. (Job 2:1-7; 1 Jon 5:19) Ol pikinini oli no strong, i isi nomo blong Setan i winim olgeta. Taswe blong no foldaon long ol trap blong Setan, oli mas savegud Jeova mo obei long Hem. Oli nidim save blong Baebol. Jisas i talem se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Ol pikinini oli nidim waes tu, hemia se oli mas kasem save gud long samting we oli lanem, mo folem long laef blong olgeta. “Waes i save sevem laef blong man,” taswe yufala ol papa mama yufala i mas putum trutok i go long hat blong ol pikinini blong yufala. (Prija 7:​12, NW ) ?Olsem wanem yufala i save mekem olsem?

5. (a) ?Olsem wanem blong givim waes long pikinini? (b) ?Ol Proveb i talem wanem blong soem se waes i wan samting we i gud tumas?

⁵ Yufala i save ridim Tok blong God long ol pikinini blong yufala, hemia wan wok we yufala i mas mekem. Be hemia i no naf blong givhan long olgeta blong lavem Jeova mo blong obei long hem​—i nidim tu we oli kasem save long Tok ya. Traem tingbaot eksampol ya: Ol papa mo mama oli talem long ol pikinini blong olgeta se bifo we oli krosem rod, oli mas lukluk gud long lefsaed mo raetsaed blong meksua se i no gat trak i stap kam. Be sam pikinini oli no obei long tok ya. ?From wanem? Ating papa mama i no eksplenem long olgeta se hemia we i no obei long rul ya, i save kasem trabol. Ating ol pikinini oli no kasem save long denja ya se trak i save sperem olgeta, from we maet papa mama i no bin talem samting ya plante taem long olgeta blong makemgud long tingting blong olgeta. Sipos ol papa mama oli eksplenem gud ol samting ya oltaem, oli save blokem pikinini blong i no mekem wan “krangke samting” mo karekil. I tru se i tekem taem blong givim waes long pikinini mo i nidim longfala tingting tu. !Be waes i wan samting we i gud tumas! Baebol i talem se: “Hem i save mekem laef blong yu i ron gud, nao bambae yu stap gud oltaem long laef blong yu. Ol man we oli holem waestok oli glad oltaem nomo, mo hem bambae i mekem olgeta oli gat laef.”​—Ol Proveb 3:​13-18; 22:15.

Tijing We i Givim Waes

6. (a) ?From wanem plante pikinini oli mekem samting we i no waes? (b) ?Wanem faet i stap gohed?

⁶ Nating se ol yangfala oli kasem gudfala tijing be sam long olgeta oli girap oli mekem samting we i no stret. Hemia from we tijing i no kasem hat blong olgeta​—ol dip filing blong olgeta. Setan i stap faet agens long ol yangfala blong traem winim hat blong olgeta. Hem i yusum ol trik blong hem blong traem pulum olgeta oli kam aninit long rabis paoa blong wol ya. Mo tu, from we tingting blong ol sinman i stap finis long ol rabis fasin, hem i yusum tingting ya blong traem pulum ol yangfala blong mekem i no stret. (Jenesis 8:21; Ol Sam 51:5) Ol papa mama oli mas luksave se Setan i stap faet strong blong kam bos long hat blong ol pikinini blong olgeta.

7. ?From wanem i no naf blong talem long pikinini wanem samting i stret mo wanem samting i no stret?

⁷ Plante papa mama oli ting se sipos oli talem long pikinini wanem i stret mo wanem i no stret, ale oli tijim hem finis. Ating oli talem long pikinini se i nogud blong giaman, stil, mo slip wetem man no woman we yu no mared long hem. Be pikinini i no save obei nomo from we papa mama i talem long hem blong obei. Blong pulum pikinini blong obei, i mas gat wan samting we i gat moa paoa long tingting blong hem. Samting ya, hemia ol loa blong Jeova. Pikinini i mas kasem save se i waes we i waes blong obei long ol loa blong God.​—Ol Proveb 6:​16-19; Hibrus 13:4.

8. ?Wanem kaen tijing i save mekem pikinini i kam waes?

⁸ Sipos ol papa mama oli tokbaot ol nambawan wok we i stap gohed oltaem long yunivas, * olsem wanem ol laef samting oli defdefren, mo from wanem i gat hot taem mo kol taem evri yia​—ol samting ya i save givhan long ol smosmol pikinini blong kasem save se i gat wan God i stap we i wokem olgeta samting ya, mo se God ya i waes bitim mak. (Rom 1:20; Hibrus 3:4) Mo tu, ol papa mama oli mas tijim long ol pikinini blong olgeta se God i lavem olgeta mo se hem i letem Pikinini blong hem i ded blong mekem rod blong oli save kasem laef we i no save finis. Oli mas tijim long olgeta se oli save mekem God i glad sipos oli obei long hem. Long rod ya, ol pikinini oli save kam olsem we oli wantem mekem wok blong Jeova, nating se Setan i traehad blong blokem olgeta.​—Ol Proveb 22:6; 27:11; Jon 3:16.

9. (a) ?I nidim wanem blong givim tijing we i sevem laef blong pikinini? (b) ?Wanem advaes i go long ol papa? ?Olsem wanem oli save mekem samting ya?

 ⁹ Blong givim tijing we i protektem pikinini mo i mekem se hem i wantem folem gudfala fasin, ol papa mama oli mas tekem taem, lesingud, mo plan gud. Mo tu, oli mas letem God i lidim olgeta long wok ya. Baebol i talem se: “Ol papa . . . yufala i mas gohed blong stretem olgeta [pikinini blong yufala], mo blong trenem tingting blong olgeta olsem we Jeova i wantem.” (Efesas 6:​4, NW ) ?Wanem mining blong vas ya? Long olfala Grik lanwis, tok ya “trenem tingting” i minim “putum tingting i go insaed.” Taswe vas ya i stap talem long ol papa se oli mas putum tingting blong Jeova i go insaed long ol pikinini blong olgeta. !Hemia bambae i protekem ol pikinini ya long nambawan fasin! Sipos oli gat ol tingting blong God, no sipos oli tingting olsem God, samting ya bambae i blokem olgeta blong oli no mekem nogud fasin.

Lav i Mas Pusum Ol Papa Mama

10. ?Blong tijimgud ol pikinini blong yufala, yufala i mas kasem save long wanem?

¹⁰ Ating yufala i wantem tumas blong tijimgud ol pikinini blong yufala. Blong mekemgud wok ya, lav i mas pusum yufala. Wan impoten samting long saed ya, hemia se yufala i mas storian gud oltaem wetem ol pikinini blong yufala. Faenemaot wanem i stap hapen long laef blong olgeta, mo wanem i stap long tingting blong olgeta. Long wan taem mo ples we i isi long yufala blong storian, yusum kaen fasin blong pulum ol pikinini blong oli toktok. Ating sam tok blong olgeta bambae i mekem yufala i sek. Be yufala i mas lukaotgud blong no kam kros mo faerap long olgeta. I moagud we yufala i lesingud mo soem se yufala i intres mo kea long olgeta.

11. ?Olsem wanem ol papa mama oli save putum tingting blong God i go insaed long ol pikinini blong olgeta?

¹¹ I tru, ating yufala i ridim finis long ol pikinini blong yufala ol loa blong God long Baebol we oli putum tabu long rabis fasin long saed blong seks. Maet yufala i mekem olsem bakegen mo bakegen. (1 Korin 6:18; Efesas 5:5) Ating samting ya i makem long tingting blong olgeta ol fasin we Jeova i laekem mo ol fasin we hem i no laekem. Be blong putum tingting blong Jeova i go insaed long pikinini blong yufala, yufala i mas mekem moa. Yufala i mas givhan long olgeta blong tingting gud long ol loa blong Jeova mo luksave from wanem ol loa ya oli gud tumas. Yufala i mas mekem oli luksave se ol loa ya oli stret mo oli waes, mo se sipos oli obei long olgeta hemia stret samting blong mekem mo hemia samting we i soemaot lav. Wan rod nomo blong ‘putum tingting blong God’ i go insaed long ol pikinini blong yufala, i blong yusum Baebol mo mekem olgeta oli tingting gud long ol tok blong hem. Long rod ya, bambae oli save akseptem mo agri long ol tingting blong God.

12. ?Olsem wanem ol papa mama oli save givhan long pikinini blong i gat stret tingting long saed blong seks?

¹² Taem yufala i stap toktok wetem pikinini long saed blong seks, maet yufala i askem se: “?Yu ting se sipos yumi obei long loa blong Jeova blong no slip olbaot bifo mared, bambae yumi hapi?” Nao pulum pikinini blong eksplenem gud filing blong hem. Taem yufala i stap tokbaot nambawan fasin we God i putum long ol man mo woman we i mekem se oli save wokem pikinini, yufala i save askem se: “?Yu ting se God blong yumi we i lavem yumi tumas i save putum wan loa we i mekem yumi harem nogud? ?Yu ting se ol loa blong hem oli stap blong mekem yumi  haremgud mo blong protektem yumi, no nogat?” (Ol Sam 119:​1, 2; Aesea 48:17) Faenemaot tingting blong pikinini blong yu. Nao biaen yu save tokbaot samfala we oli bin mekem rabis fasin long saed blong seks, mo olsem wanem oli harem nogud mo kasem trabol from. (2 Samuel 13:​1-33) Sipos yufala i mekem ol pikinini blong yufala oli tingting gud olsemia, bambae oli kasem save long tingting blong God mo bambae oli agri long hem. Olsem nao, yufala i mekem wan bigfala wok finis blong putum tingting blong God i go insaed long olgeta. Be i gat wan samting bakegen we yufala i mas mekem.

13. ?Wanem samting we pikinini i mas kasem save long hem blong pulum hem blong obei long Jeova?

¹³ Yufala i mas tijim ol pikinini blong yufala long ol nogud frut we i save kamaot sipos oli no obei long Jeova. Be i waes tu blong eksplenem olsem wanem ol samting we oli mekem long laef blong olgeta i save afektem Jeova. Soem sam vas blong Baebol we oli tokbaot olsem wanem Jeova i harem nogud taem yumi no mekem samting we hem i wantem. (Ol Sam 78:41) Yufala i save askem long pikinini se: “?From wanem yu yu no wantem mekem Jeova i harem nogud?” Nao eksplenem se: “Setan we hem i enemi blong God i stap talem se yumi obei long Jeova blong kasem samting we yumi nomo i wantem, be i no from we yumi lavem hem.” Nao yufala i save tokbaot Job we hem i mekem God i glad from we hem i holemstrong long hem, mo long rod ya hem i ansa long ol giaman tok blong Setan. (Job 1:​9-11; 27:5) Ol pikinini blong yufala oli mas kasem save se fasin blong olgeta i save mekem Jeova i haremgud no i harem nogud. (Ol Proveb 27:11) Impoten tijing ya wetem plante narafala tijing olsem, yufala i save givim long ol pikinini blong yufala taem yufala i yusum buk ya Learn From the Great Teacher. *

Gudfala Frut

14, 15. (a) ?Wanem sam japta blong Teacher buk we oli bin pulum sam pikinini blong mekem samting we i stret? (b) ?Buk ya i mekem wanem gudfala frut i kamaot long famle blong yufala? (Lukluk bokis long pej 18-19 tu.)

¹⁴ Long kantri blong Kroesia, oltaem wan bubu man i ridim Teacher buk long smol bubu blong hem we i gat 7 yia. Long leta we man ya i raetem, hem i tokbaot samting we smol boe ya i bin talemaot long hem: “Mama i bin talem long mi blong mekem wan samting, be mi mi no wantem mekem. Wantaem nomo mi tingbaot japta ya ‘Fasin Obei i Save Lukaotgud Long Yu,’ ale mi tanraon mo mi go talem long mama se bambae mi obei long hem.” Wan man mo woman blong hem long Florida, Yunaeted Stet, tufala i tokbaot japta ya “?From Wanem i Nogud Blong Giaman?” Tufala i talem se: “I gat plante kwestin long japta ya we oli pulum ol pikinini blong talemaot ol filing blong olgeta, mo blong talemaot ol mastik blong olgeta we plante taem oli stap haedem.”

¹⁵ I gat moa long 230 pija long Teacher buk, mo klosap long ol pija ya, i gat sam tok blong eksplenem no blong pulum tingting blong pikinini. Wan mama we i laekem buk ya tumas i talem se: “Plante taem smol boe blong mi i lukluk strong long wan pija mo i no wantem se mi tanem pej. Ol pija oli naes tumas,  be i no hemia nomo. Oli tijim pikinini long wan samting, mo oli pulum pikinini blong askem kwestin. Smol boe blong mi i lukluk pija blong wan pikinini we i stap wajem televisin long rum we i tudak, nao i askem se: ‘?Mama, boe ya i stap mekem wanem?’ Be hem i askem wetem wan voes we i defren, olsem we hem i save finis se boe ya i stap mekem wan samting we i no stret.” Klosap long pija ya oli raetem se: “?Hu i stap lukluk evri samting we yumi mekem?”

Tijing We Ol Pikinini Oli Nidim Tede

16. ?Ol pikinini oli nidim wanem save tede? ?From wanem?

¹⁶ Ol pikinini oli nidim save long saed blong ol tabu haf blong bodi blong olgeta, olsem wanem blong yusum ol haf ya long fasin we i stret, mo wanem ol fasin we i no stret blong mekem. Be i no isi blong tokbaot samting ya wetem pikinini. Wan woman blong raetem niuspepa i talem se hem i gruap long ol yia we i tabu blong tokbaot ol haf blong bodi long saed blong seks. Taem hem i smol gel, sipos man i yusum wan tok long saed blong ol tabu haf ya blong bodi, ol narafala oli ting se man ya i stap tok swea. Woman ya i gohed blong tokbaot tijing we hem i mas givim long ol pikinini blong hem, i se: “Mi mi mas lanem blong winim fasin ya we mi sem blong tokbaot seks.” Tru ya, ol papa mama we oli sem blong tokbaot seks wetem ol pikinini blong olgeta, oli no stap protektem pikinini blong olgeta. Ol rabis man we oli wantem mekem nogud wetem ol pikinini, oli luk se i isi nomo blong winim ol pikinini we oli no gat save. Buk ya Learn From the Great Teacher i tokbaot seks long fasin we i klin mo i soem respek. Sipos yumi givim save long ol pikinini long saed blong seks, hemia bambae i no spolem gudfala fasin we oli gat blong no tingbaot rabis fasin. Be sipos yumi no givim save long olgeta long saed blong seks, narafala i save spolem gudfala fasin blong olgeta taem i pulum olgeta blong mekem rabis fasin.

17. ?Olsem wanem Teacher buk i save givhan long ol papa mama blong tijim ol pikinini blong olgeta long saed blong seks?

¹⁷ Japta 10 i tokbaot ol rabis enjel we oli bin kamdaon mo givim pikinini long ol gel long wol. Wan kwestin we i stap long japta ya se: “?Yu yu save wanem long saed blong seks?” Nao buk ya i yusum ol tok we i soem respek blong givim wan isi ansa. Japta 32 i tokbaot olsem wanem pikinini i save blokem ol rabis man we oli wantem mekem nogud wetem olgeta. Ol papa mama oli raetem plante leta i kam blong soemaot se ol pikinini oli nidim tijing ya. Wan long ol leta ya i talem se: “Las wik mi mi tekem smol boe blong mi Javan blong luk wan dokta blong ol pikinini. Dokta i askem long mi sipos mi mi toktok finis wetem hem long saed blong ol tabu haf blong bodi  mo stret rod blong yusum olgeta. Hem i sapraes bigwan taem mi talem se mi mi yusum niufala buk ya blong eksplenem samting ya.”

18. ?Olsem wanem Teacher buk i tokbaot ona we samfala oli givim long flaeg blong kantri?

¹⁸ Wan narafala japta i tokbaot stori blong Baebol long saed blong trifala Hibru boe ya, Sadrak, Mesak, mo Abednego. Trifala i no wantem bodaon long aedol blong givim ona long gavman blong Babilon. (Daniel 3:​1-30) Maet samfala oli no ting se fasin ya blong bodaon long aedol i joen wetem fasin blong salut long flaeg. Be Teacher buk i joenem tufala fasin ya. Makemgud tok blong wan man blong raetem buk, Edward Gaffney, taem man blong niuspepa (U.S. Catholic) i askem kwestin long hem. Hem i talem se long faswan dei we smol gel blong hem i go long skul, hem i kamhom nao i talem se hem i bin lanem “wan niufala prea.” Papa blong hem i askem long hem blong talem prea ya. Masta Gaffney i talem se: “Smol gel blong mi i putum han blong hem long jes blong hem, nao i toktok long fasin we i praod tumas, i se, ‘Mi mi promes blong ona olwe long flaeg . . . ’ ” Man ya i gohed se: “Wantaem nomo, mi luksave. Tok blong ol Witnes blong Jeova i stret nomo. I gat wan kaen wosip blong kantri we ol skul oli stap tijim ol smosmol pikinini blong yumi long hem​—olsem se i moa impoten blong ona long kantri i bitim olgeta narafala samting.”

Hadwok i No Blong Nating Nomo

19. ?Wanem blesing i save kamaot taem ol papa mama oli tijimgud pikinini blong olgeta?

¹⁹ Tru ya, bambae i no blong nating nomo we yufala i tijimgud ol pikinini blong yufala. Wan mama long Kansas, Yunaeted Stet i ridim leta we boe blong hem i sanem long hem, nao wota blong ae blong  hem i ron. Boe ya i raetem se: “Mi harem se mi laki blong kasem tijing we i givhan long mi blong gruap wetem stret tingting mo gudfala filing we i no olbaot. Mi mi wantem talem tangkiu tumas long yu mo Papa from gudfala wok ya we yutufala i mekem.” (Ol Proveb 31:28) Buk ya Learn From the Great Teacher i save givhan long plante moa papa mama blong oli givim gudfala tijing we i save protekem ol sas presen ya we God i givim long olgeta.

20. ?Oltaem ol papa mama oli mas rimemba wanem? ?Save ya i mas mekem wanem long ol papa mama?

²⁰ I stret nomo we yumi spenem plante taem wetem ol pikinini blong yumi, lesingud long olgeta, mo wokhad blong tijim olgeta. Oli yang blong smoltaem nomo. Yufala i mas tekem evri janis blong spenem taem wetem olgeta mo blong givhan long olgeta. Bambae yufala i no save harem nogud from. Bambae oli lavem yufala tumas. Oltaem yufala i mas rimemba se, ol pikinini blong yufala hemia wan presen we God i givim long yufala. !Presen ya i sas we i sas! (Ol Sam 127:​3-5) Taswe yufala i mas lukaot long olgeta olsem we yufala i lukaot long wan sas samting. Yufala i mas mekem wok ya olsem we yufala i stap stanap stret long fes blong God. !Mo i tru, yufala i stap mekem wok ya stret long fes blong God!

[Ol Futnot]

?Bambae Yu Yu Ansa Olsem Wanem?

• ?From wanem ol papa mama tede oli nidim moa blong protekem ol pikinini blong olgeta?

• ?Wanem kaen tijing i save givim waes?

• ?Wanem impoten save we yufala i nidim blong tokbaot wetem ol pikinini blong yufala tede?

• ?Olsem wanem Teacher buk i halpem plante papa mama blong oli tijimgud ol pikinini blong olgeta?

[Kwestin]

[Bokis/Foto blong pija long pej 18]

Wan Buk Blong Evri Man

Oli wokem buk ya Learn From the Great Teacher blong givhan long ol papa mama no ol narafala man blong oli ridim mo tokbaot ol tijing blong Jisas Kraes wetem ol pikinini. Nating se i olsem, ol bigman we oli ridim buk ya olgeta nomo, oli talemaot glad blong olgeta long ol samting we oli lanem long buk ya.

Wan man long Texas, Amerika, i talem se: “Buk ya, Learn From the Great Teacher, i talemaot ol toktok we oli klia nomo mo i givhan long eniman​—nating se man i gat 76 yia olsem mi. Mi mekem wok blong Jeova stat taem mi yangfala yet mo mi tangkiu tumas long yufala.”

Long Inglan, wan woman we i ridim buk ya i talem se: “Ol naesfala pijatok oli stret blong pulum tingting blong ol papa mama mo ol pikinini tu. Ol kwestin mo ol pija oli nambawan, mo i gud tumas blong luk olsem wanem buk ya i tokbaot sam samting tu we oli no isi tumas blong tokbaot wetem pikinini olsem long japta 32 se, ‘?Olsem Wanem God i Protektemgud Jisas?’ ” Hem i gohed i se: “Nating se buk ya oli wokem speseli blong ol pikinini blong ol Witnes blong Jeova be mi stap tingbaot se ol tija long skul mo sam narafala man tu bambae oli glad tumas blong gat wan kopi blong buk ya. Mi mi rere blong yusum buk ya long ol manis mo ol yia we oli kam.”

Wan woman long Massachusetts, Amerika, i tokbaot ol “pija we oli stap insaed long buk ya [se] oli rili tijim man.” Hem i raetem se: “Nating se oli mekem buk ya speseli blong ol pikinini, be ol stadi we oli stap insaed oli save halpem ol bigman tu blong tingbaot fasin fren blong olgeta wan wetem Jeova.”

Wan woman blong Maine, Amerika i talem se: “!Man! !Buk ya i nambawan tumas! Hem i no wan buk blong ol pikinini nomo be i wan buk blong yumi evriwan we yumi olsem ol pikinini blong God. Buk ya i rili kasem ol filing insaed long mi we mi neva save olgeta mo i kwaetem tingting blong mi, nao mi gat pis. Mi harem se mi kam moa klosap long Jeova olsem Papa blong mi. Jeova i karemaot ol samting ya we oli hapen long mi bifo we oli bin mekem mi mi harem nogud, mo hem i mekem ol stamba tingting blong hem oli klia gud long mi.” Woman ya i finisim tok blong hem se: “Mi mi talem long evriwan se, ‘Plis yufala i ridim buk ya.’ ”

Wan woman long Kyoto, Japan, i talem se taem hem i ridim buk ya long ol smol bubu blong hem, ol pikinini ya oli askem ol kwestin olsem: “ ‘?Boe ya i stap mekem wanem? ?From wanem smol gel ya i kasem fasin stretem? ?Olsem wanem long mama ya? ?Olsem wanem long laeon ya?’ Buk ya i tijim ol samting we yumi intres long hem, taswe mi laekem buk ya tumas i bitim ol narafala buk we mi save faenem long wan laebri.”

Wan papa long Calgary, Kanada, i talem se taem hem i jes kasem buk ya, hem i stat ridim long gel blong hem we i gat sikis yia mo boe blong hem we i gat naen yia. Hem i talem se: “Wantaem nomo, gudfala frut i kamaot. Tufala pikinini blong mi oli lesin gud long stadi mo oli askem ol kwestin we i rili kamaot long hat blong tufala. Oli harem se oli gat wan haf tu long stadi ya mo samting ya i givim janis long tufala blong talemaot tingting blong tufala. Oli harem oli glad tumas mo gel blong mi i talem se hem i wantem stadi long buk ya evri naet.”

Afta long wan stadi, wan papa i talem se: “Mi mo boe blong mi i spenem plante aoa blong tokbaot Jeova mo ol stamba tingting blong hem. Boe blong mi i askem plante kwestin we i stanap long stadi we mitufala i mekem. Wota i ron long ae blong mi taem hem i talem gudnaet long mi mo i askem se, ‘?Papa, bambae yumitu save mekem stadi bakegen? Mi mi gat fulap kwestin, mo mi mi wantem save evri samting long saed blong Jeova.’ ”

[Tok blong pija long pej 15]

?Ol papa mama, stori blong Manoa i tijim yufala long wanem samting?

[Tok blong pija long pej 16]

?Ol pikinini, stori blong trifala Hibru boe i tijim yufala long wanem samting?

[Tok blong pija long pej 17]

Ol pija long “Teacher” buk mo ol tok we i stap klosap long olgeta, oli save makemgud ol tijing long tingting blong pikinini

?Wanem giaman toktok we Ananaeas i talem long Pita?

?Hu i stap lukluk evri samting we yumi mekem?